Nigeriapa sur lädunchö këkaq markachömi 1948 wata yurikurqä. Tsë witsankunam papänïpa menor kaq wawqin tiyü Moustapha, y mayor wawqï Wahabi Testïgu tikrayarqan. Papänïqa nuëvi watayoq këkaptïmi wanukurqan, y wanuriptinqa alläpam llakikurqä. Tsëmi wawqï Wahabi nimarqan, papänï kawarimunampaq kaqta y yapë tinkuyänäpaq kaqta. Kawarimunampaq kaqman pensarmi Bibliata estudiar qallëkurqä. 1963 watachömi bautizakurqä, tsëpitanam kiman wawqïkunapis Testïgu tikrayarqan.

Tsëpitanam 1965 watachö Lägus markata ëwakurqä, tsëchöqa mayor kaq wawqï Wilsunmi täkurqan. Tsëchö këkarmi Igbobi congregacionchö precursorkunawan juntu karqä. Pëkunaqa alläpa kushishqam kayaq, tsëmi noqapis 1968 wata enëru killachö precursor tikrarirqä.

Juk kutim Betelchö trabajaq Albert Olugbebi jutiyoq wawqi llapan jövinkunawan reunionta rurarqan, Nigeriapa norti kaq lädunchö precursor especialkunata wanayaptin. Tsë wawqiqa alläpa kushishqam kënö nirqan: “Qamkunaqa jövinmi kayanki y tiempuykikunata y kallpëkikunatam Jehoväta sirwiyänëkipaq utilicëta puëdiyanki. Tsë markachöqa alläpam yanapakoqkunata wanayan”. Noqaqa Jehovä Diospa willakoqnin Isaïasnömi Jehovä mandamanqanman mëmampis ëwëta munarqä, tsëmi solicitüta llenarqä (Is. 6:8).

 1968 wata mäyu killachömi, Nigeriapa norti kaq lädunchö Känu markaman mandayämarqan precursor especial kanäpaq. Tsë witsankunaqa 1967 watapita 1970 watayaqmi Biafra markachö guërra karqan. Guërraqa tsë markakunata chipyëpam ushakätsishqana karqan, tsëpitanam Nigeriapa inti o rupay yarqamunan lädunmampana pelyar qallëkuyarqan. Tsëmi juk wawqiqa, imapis pasamänampaq kaqta yarpachakurnin nimarqan Känu markata mana ëwanäpaq. Peru noqaqa kënömi nirqä: “Gracias wawqi noqapaq yarpachakunqëkita. Peru kikin Jehovämi tsë markaman ëwanäta munan, tsëmi següru kä cuidamänampaq kaqta”.

Känu markaqa alläpa mantsëpaqmi karqan. Guërra kashqa kaptinmi tsë markakunachö yachatsikoq ëwarqa, guërrachö wanutsiyanqan nunakunata jitarëkaqta rikäyaq kayä. Känu markachöqa atska congregacionmi kashqa kanaq, peru guërra kaptinmi wawqi panikunaqa qeshpir ëwakuyänaq. Y 15 publicadorkunapitapis mënusmi quedayänaq, y alläpa mantsakashqa y qelanashqam këkäyänaq. Precursor especialkuna joqtaq chäriyaptïqa, ¡alläpam kushikuyarqan! Animar yanapayaptïmi reunionkunata rurar y yachatsikur qallëkuyarqan. Y yachatsikuyanqan informinkunatapis sucursalmanmi mandar qallëkuyarqan y publicacionkunatapis mañakurmi qallëkuyarqan.

Tsëchö precursor especialkunam hausa idiömata yachakur qallëkuyarqä. Y idiömankunachö Diospita yachatsiyaptïmi nunakunaqa shumaq wiyayämaq. Peru tsë markachö wakin religionkunachö mandakoqkunaqa manam munayarqantsu yachatsikuyänäta, tsëmi alli cuidakuyänä karqan. Juk kutim yanaqïtawan noqata juk nuna cuchilluwan qatikachäyämarqan. Peru pëpita mas ras o sas cörrita puëdirmi qeshpir ëwakuyarqä. Tsënö peligru këkaptimpis, Salmus 4:8 ninqannömi Jehoväqa següru kawayänäta permitiyämarqan y ichikllapa ichikllapam publicadorkunapis mas mirar qallëkuyarqan. Kananqa Känu markachöqa, 11 congregacionkunam kan y 500 masnam publicadorkunapis kayan.

Känu markaman chäyanqäpita juk ishkë killakunallatanam 1968 wata agostu killachö, llapä  precursorkunata Niamey markata mandayämarqan. Tsë markaqa Africachö Niger nacionpa principal markanmi. Tsë markaman chärirqa, cuentatam qokuriyarqä alläpa achachanqanta y frances idiömata parlayaptinmi tsë idiömata yachakur qallëkuyarqä. Tsëkunata ruranan mana fäcil kaptimpis, Jehoväman confiakurmi tsë markachö wallkaqlla publicadorkunawan Diosnintsikpita yachatsikur qallëkuyarqä. Y ichik tiempullachönam Niamey markachö leyita yachaq nunakunaqa cäsi llapan Bibliapita yachatsikuyänäpaq La verdad que lleva a vida eterna neq libruta katsiyarqan. Y wakin nunakunaqa tsë libruta munarmi ashiyämaq.

Tsëpitanam cuentata qokuriyarqä autoridäkunaqa Testïgukunata chikiyämanqanta. 1969 wata juliu killachömi juk asamblëata rurayarqä, y tsë nacionchöqa punta kaq asamblëam karqan y veintinöllam juntakäyarqä. Ishkaq publicadorkuna bautizakunampaq kaqta musyarmi kushishqa këkäyarqä. Peru asamblëapa punta kaq junaqninllachönam policïakunaqa chärayämurqan y congregacionkunata watukaqta y precursor especialkunatam comisarïaman apayämarqan. Tsëchömi tapupäyämarqan y tsëpitanam waränin kutiyänäpaq niyämarqan. Asamblëata rurayänäta mana dejayämänampaq kaqta musyarmi bautizakoqkunapaq discursutaqa juk wayillachöna rurayarqä, y tsëpitanam juk mayuchö pakëllapa bautizakuyarqan.

Tsëpita juk ishkë semänakuna pasariptinmi noqata y pitsqan precursor especialkunata Ministerio del Interiorchö trabajaqkuna niyämarqan tsë nacionpita ëwakuyänäpaq. 48 hörakunallachömi ëwakuyänä karqan, tsëmi niyämanqanta cäsukurnin Niger nacionpita ëwakuyarqä y Nigeria sucursalmanmi chäriyarqä. Tsëpitanam juk markakunaman ëwayänäpaq niyämarqan.

Noqataqa Nigeria nacionchö Orisunbare markamanmi mandayämarqan. Tsë markachö wallkaq publicadorkunallawanmi Diospita yachatsikurqä y nunakunatam Bibliapita estudiatsirqä. Peru tsëpita joqta killakuna pasariptinmi sucursalpita nirayämarqan Nigerman yapë kutinäpaq, kë kutichöqa japallänam ëwanä karqan. Tsënö niyämaptinqa mantsakarmi yarpachakurqä. Tsënö kaptimpis, Niger nacionchö wawqi panikunawanmi tinkuyta munarqä.

Niamey markamanmi kutirqä. Y chanqäpita waräninllanam Nigeria nacionchö juk negocianti nuna cuentata qokurirqan Testïgu kanqäta y Bibliapita musyëta munarmi tapupämar qallëkurqan. Tsë nunatam Bibliapita yachatsirqä, y mana fäcil kaptimpis cigärru shoquyta y upyëta dejarirmi bautizakurqan. Tsëpitanam tsë nacionpa wakin markankunachö yachatsikurqä y nunakunaqa allim wiyakuyarqan. Niger nacionman chanqä wataqa treinta y ünullam Testïgukuna kayarqan, peru ëwakunä watapaqqa sesenta y nuëvinam kayarqan.

1977 wata diciembri killachömi niyämarqan Nigeria nacionchö rurayanqan kima semänapa escuëlaman  ëwanäpaq. Tsë escuëla ushariptinqa, Sucursalta Rikaqkuna rurayänanta rikaq Malcolm Vigo jutiyoq wawqim juk cartata entregamarqan, tsë cartataqa Siërra Leöna sucursalpitam chaskishqa kanaq. Wawqikunaqa ashikäyänaq juk precursor soltëru, alli saloryoq, ingles y frances idiömata parlaq wawqitam, Guinëa-Conakrichö congregacionkunata watukanampaq. Wawqi Vigoqa willamarqan tsëman yanapakoq ëwanäta munarnin tsë escuëlaman invitayämashqa kayanqantam. Y clärum nimarqan tsëchö yanapakunäqa mana fäcil kanampaq kaqta, y kënömi nimarqan: “Manaraq änikur alli pensë”. Peru noqaqa mana pensashpam kënö nirqä: “Ëwanäta Jehovä munëkaptinqa ëwashaqmi”.

Siërra Leöna naciontaqa avionwanmi viajarqä y chärirmi Sucursalta Rikaqkunawan juntakarqä. Sucursalta Rikaqkunapita juk wawqim kënö nimarqan: “Guinëachö Diospita yachatsikuyanqan imanö këkanqantaqa manam musyayätsu”. Tsë sucursalmi Guinëachö Diospita yachatsikuyanqantaqa rikaq, peru polïtica asuntu alläpa chikinakuyaptinmi publicadorkuna imanö këkäyanqantaqa musyëta puëdiyänaqtsu. Atska kutim juk wawqita mandëta munayänaq, peru manam lograyänaqtsu. Tsëmi noqataqa niyämarqan Guinëapa principal markan Conakrita ëwanäpaq, y wayita tsëchö arrendanäpaq.

Conakri markaman chärirqa, Nigeriapa embajadorninwan parlanäpaqmi embajädata ëwarqä. Y embajadortam nirqä Guinëachö Diospita yachatsikuyta munanqäta, peru pëqa mana yachatsikunäpaqmi consejamarqan. Y tsëta ruraptïqa carcelayämänampaq kaqta o ima mana allipis pasëkamänampaq kaqtam nimarqan. Kënömi nimarqan: “Nigeriata kutir tsëchö yachatsikuy”. Peru noqam kënö nirqä: “Noqaqa quedakunäpaqmi shamurqö”. Tsënö niptïmi embajadorqa, Guinëapa Ministerio del Interiorchö trabajaqman juk cartata qellqarqan yanapamänampaq, y ninqannömi yanapamarqan.

Tsëpitanam Siërra Leöna sucursalta kutirnin wawqikunata willarqä ministru decidinqanta. Y pëkunaqa alläpam kushikuyarqan Jehovä Dios yanapayämaptin Guinëachö quedakunäpaq permïsuyoqna kanqäpita.

1978 y 1989 watakunachömi Guinëachö y Siërra Leönachö congregacionkunata watukar yanapakurqä, y Liberiachönam congregacionkunata watukaq wawqita yanaparqä. Qallananllachöqa, alläpam qeshyarqä. Y masqa karu markakunachö congregacionkunata watukarmi qeshyapäkoq kä, tsënö kaptimpis wawqi panikunaqa imëkanöpam hospitalman apayämaq.

Juk kutim malaria qeshyawan y pachächö kuru kaptin alläpa grävi qeshyakurkurqä. Y qeshyanqäpita alliyärirmi, musyarirqä wawqi panikunaqa mëman pampayämänampaq kaqta parlashqa kayanqanta. Tsënö peligrukunapa pasëkarpis, manam yanapakuyta dejëtaqa pensarqätsu. Y segürum këkä Jehovä yanapamashqalla kawëta puëdinqantsikta, y wanukushqapis kawaritsimänapaq kaqta.

1988 watachömi, Dorcas jutiyoq precursörata reqirqä, pëqa humildim kaq y Diosnintsiktam alläpa kuyaq. Pëwanmi casakurqä y juntum congregacionkunata watukar yanapakuyarqä. Dorcasqa alläpam yanapamashqa, y Jehoväta kuyarmi mana fäcil kaptimpis imëkata rurashqa. Juk congregacionpita juk  congregacionman chäyänäpaqqa, 25 kilömetrustam cösasnïkunawan chakipa viajayaq kayä. Y mas karu kaq congregacionkunamampis imëkanöpam ëwayaq kayä. Alläpa mitu nänita y zanjakunata pasarmi viajayaq kayä.

Dorcasqa valientim kaq. Höraqa cocodrïlukuna kanqan mayukunapam pasayaq kayä. Juk kutim pitsqa junaqpa viajayarqä, y qerupita rurashqa tsakakuna mana alli kaptinmi mayuta bötiwan tsimpayarqä. Peru Dorcasmi bötipita yarqunampaq sharkunqanchö yakuman jeqarkurqan y hundikärirqan. Manam mëqäpis nadëta yachayarqätsu, y mayuchöqa cocodrïlukunam karqan. Peru jövinkunam jinan höra yakuman saltarkur Dorcasta sutarayämurqan. Tsë pasayämanqampitaqa atska tiempupam punuyta puëdiyaqtsu kayä, tsënö kaptimpis yanapakurmi sïguiyarqä.

1992 watachömi cuentata qokuriyarqä Dorcas qeshyaq këkanqanta. ¿Llapan tiempükunawan yanapakuyanqätatsuraq dejariyäman karqan? Peru kënömi pensayarqä: “Rasumpa kaqchöqa, kë llullutaqa Jehovämi qarëkämantsik”. Tsënö nirmi Jahgift nir jutin churayarqä, tsëqa ingles idiömachö “Jehovämi qaramarquntsik” ninanmi. Tsëpita chusku wata pasariptinnam Eric wamräkuna yurikurqan. Tsë ishkan wamräkunataqa Jehovämi qarayämarqan. Tsëpitaqa warmi wamräkuna Jahgiftqa publicacionkunata juk idiömaman traduciyanqan Conakri markachömi yanapakurqan, y Ericnam siervu ministerial.

Tiempuwanqa Dorcasqa precursöra especial këta dejarirmi precursöra regular karqan, tsënömi yanapakurqan wamräkuna winayanqanyaq. Y noqaqa Jehovä yanapayämaptinmi llapan tiempüwan yanapakur sïguirqä. Wamräkuna jatunyarkuyaptinnam Dorcasqa yapë precursöra especial karqan, y kananqa Conakri markachömi misionëru kayä.

Jehovä mandamanqanmanmi mëmampis ëwarqö. Y mëtsika kutim warmïwan rikäyarqö Jehovä imanö cuidayämanqanta y bendiciyämanqanta. Imëkayoq këman confiakuyänäpa rantin, Jehoväman confiakurmi imëka problëmakunaman ni yarpachakuyman chäyarqötsu. Dorcaswanqa clärum rikäyarqö Teyta Diosqa “salvakoq” kanqanta (1 Crön. 16:35). Y segürum këkä pëman confiakoqkunataqa Jehovä imëpis salvanqanta (1 Sam. 25:29).