1983 watachömi yurikurqä. 10 watayoq kanqäyaqqa wakin wamrakunanöllam sänu kawakurqä, peru tsëpitaqa nanapäkurmi qallëkurqä. Tsëpita ishkë watallatam, juk junaq pununqäpita sharkuyta puëdirqänatsu. Tsë junaqpita chankä mana kuyuptinmi purita puëdirqänatsu. Tsë qeshyarëkurmi winarqönatsu, y mana winëta puëdirmi wamra tamäñulla quedakurqö.

Atska killapana mana mëtapis yarqur wayïllachö kakuykaptïmi, ishkaq Jehoväpa testïgun warmikuna wayïman yachatsikur chäyämurqan. Wayïman pillapis chämuptinqa manam yarqoqtsu kä, peru tsë junaqqa Testïgu warmikuna parlapäyämänantam permitirqä. Mushoq Patsapita parlapayämaptinmi yarparqä, pitsqa watayoq këkaptï Surinam nacionpita Jethro jutiyoq misionëru, cada killa shamurnin papänïta Bibliapita yachatsinqanta. Jethro shumaq tratamaptinmi yachanëpaq nunatanö rikaq kä. Awilukunaqa Jehoväpa testïgunkunapa reunionninkunamanmi markächö ëwayaq y hörataqa noqatapis apayämaqmi. Tsënam Florence jutiyoq Testïgu Bibliapita yachakunäpaq nimaptin änirirqä.

Florenceqa qowan Justuswanmi watukamaq kutiyämurqan y Bibliapita yachatsiyämarnïmi qallëkuyarqan. Leyita mana yachanqäta rikarmi, pëkunaqa yachatsiyämarqan y tiempuwanqa kikïllanam leyeq kä. Tsëpitanam, Surinam nacionman Diospita yachatsikoq ëwayänampaq mandëkäyanqanta niyämarqan. Pëkuna ëwakuyaptinmi, Orealla markächöqa pillapis Bibliapita yachatsimänampaq karqannatsu. Tsënö kaptimpis, Jehovä mana qonqamanqampitam kushishqa sientikurqä.

Wallka tiempu pasarinqanllachömi llapan tiempunwan yachatsikoq Floyd jutiyoq wawqi Orealla markäman chämurqan. Juk junaq Diospita yachatsikuykarmi wayïman chämurqan. Bibliapita yachatsimänampaq nimaptinmi asinarqä. Tsëmi “¿imanirtan asinanki?” nir tapumaptin, ¿Imataraq Dios shuyaran noqantsikpita? neq follëtuwan yachakushqana kanqäta y El conocimiento que lleva a vida eterna * libruwan yachakur qallashqana kanqäta willarqä. Y imanir manana yachakunqätam nirqä. Floydwanqa libru Conocimientupita yachakurmi usharqä. Peru pëtapis juk läduman yachatsikoq ëwanampaqmi mandayarqan. Yapëmi Bibliapita yachatsimänampaq pillapis karqantsu.

2004 watachömi, Orealla markaman llapan tiempunkunawan Diospita yachatsikoq wawqi Granvillewan Joshuaqa chäyämurqan. Pëkunapis Diospitam yachatsikuyaq, tsënöpam noqatapis tariyämarqan. Bibliapita yachakunäpaq niyämaptinmi asinarqä. Y libru Conocimientuwan qallanampita yachatsiyämänampaqmi  nirqä. Tsëtaqa mañakurqä punta kaq yachatsimaqnïkunanölla pëkunapis yachatsikuyanqanta musyëta munarmi. Wawqi Granvilleqa täranqä markachö reunionkuna kanqantam willamarqan. Chunka watapanam wayïpita mëtapis yarqushqatsu karqä. Peru reunionkunaman ëwëta munaptïmi, wawqi Granvilleqa wayïpita apamänampaq shamurqan y sïlla de ruëdaswanmi reunionman apamarqan.

Tiempuwanqa wawqi Granvillem Yachatsikunapaq Diospa Escuëlanman apuntakunäpaq nimarqan. Kënömi nimarqan: “Purita mana puëdirpis, parlëtaqa puëdinkim. Imëllapis semäna ushë reunionchömi atskaqpa puntanchö qamqa yachatsikunki. Awmi, tsënömi kanqa”. Tsënö nimaptinmi alläpa kushikurqä.

Wawqi Granvillewanmi Diospita yachatsikur qallëkurqä. Peru nänikuna mana alli kaptinmi, sïlla de ruëdaswan ëwananqa fäciltsu kaq. Tsëmi Diospita yachatsikurnin carretïllawan apamänampaq nirqä, tsëqa alläpam yanapayämarqan. 2005 wata abril killachömi bautizakurqä. Tsëpitanam wawqikuna yachatsiyämarqan wawqi panikunata wanayanqan librukunata y follëtukunata qonäpaq. Y reunionchö wiyanapaq y rikänapaq kaqta churar yanapakunäpaq.

2007 watachömi papänïqa bötiwan accidentäkur wanukurqan. Tsëmi alläpa sufriyarqä. Wawqi Granvilleqa alläpam yanapayämarqan, noqakunawanmi Jehoväman mañakoq y Bibliachö ninqanwanmi yanapayämaq. Papäni wanunqampita ishkë wata pasarinqanchömi, wawqi Granvillepis bötichö accidentäkur wanurirqan.

Llapan wawqi panikunawanmi llakikuyarqä, wawqi Granvillellam creikoqkunata rikaq karqan y juk yanapaqnin wawqillawannam quedakuyarqä. Wawqi Granvilleqa kuyë amïgümi karqan, manam imëpis dejamarqantsu. Diospa kaqchö alli tsarakunäpaqmi, wananqäkunawan alläpa yanapamaq. Y manana purirnin imatapis rurëta mana puëdiptïmi, pëqa yanapamarqan. Tsëmi pë wanukuptinqa alläpa llakikurqä. Wanunqampita juk ishkë junaq pasarinqanllachömi reunionnïkuna karqan, noqataqa Täpakoq revista leyim tocamarqan. Ishkë pärrafukunata leyirirllam waqar qallëkurqä. Manam leyitapis puëdirqänatsu, waqakurllanam kakurqä. Tsëmi raslla yarqukurirqä.

Orealla markaman juk congregacionpita wawqi panikuna yanapakoq chäyämunqanmi kushitsimarqan. Tsëpitanam, llapan tiempunwan Diospita yachatsikoq Kojo jutiyoq wawqita, Betelpita mandayämurqan. Mamänïwan menor kaq wawqï Bibliapita yachakur qallëkuyaptin y bautizakuyaptinmi alläpa kushikurqä. Y 2015 wata marzu killachömi creikoqkunata rikaqkunapa yanapaqnin kanäpaq churayämarqan. Tsëpita wallka tiempullatanam, semäna ushë reunionchö atskaqpa puntanchö yachatsikurqä. Tsë junaqmi, kushikuypita waqarnin agradecïdu yarparqä wawqi Granville unë nimanqanta: “Imëllapis semäna ushë reunionchömi atskaqpa puntanchö qamqa yachatsikunki. Awmi, tsënömi kanqa”.

JW Broadcasting^® progrämachömi rikarqö, juk wawqi panikunapis noqanölla qeshyapäkur imëkapa pasëkäyanqanta. Pëkunapis puëdiyanqanmannömi kushishqa Jehoväta sirwikäyan. Noqaqa imallatapis rurëta puëdiraqmi. Tsëmi Teytantsik Jehoväta llapan puëdinqämannö sirwita munarnin, llapan tiempüwan Diospita yachatsikur qallëkurqä. Y mana creipaqnömi karqan 2019 wata septiembri killachö, creikoqkunata rikaqnö yanapakunäpaq churarayämaptin. Këchöqa, 40 Diospita yachatsikoqkunanömi kayä.

Jehovä Diospita yachatsimaqnï y pëta sirwinäpaq yanapamaqnï wawqi panikunatam alläpa agradecikü. Peru masqa, Teyta Jehovä mana qonqamanqampitam pëwan imëyaqpis agradecïdu këkäshaq.