1. Diosta sirweqkunaqa, ¿imatataq musyantsik, y imapitataq següru këkantsik?

 TEYTA DIOSPITA yachatsikunantsikta nunakuna prohibimashqaqa manam mantsakantsiktsu. Shamoq tiempuchöqa, capaz masraq yachatsikunqantsikpa contran churakäyanqa (Dan. 11:44; 2 Tim. 3:12; Apoc. 16:21). Tsënö kaptimpis, Jehovä yanapamänapaq kaqtaqa segürum këkantsik. ¿Imanötan musyantsik? Unë sirweqninkunata yanapashqa kaptinmi. Mandanqanta rurayänan sasa o aja kaptimpis, cumpliyänampaqmi sirweqninkunata imëpis yanaparqan. Tsëta musyanapaq, Babiloniachö prësunö këkaq judïukunata Diospita parlapanqanchö, Ezequiel imakunapa pasanqanta rikärishun.

2. (1) Ezequiel parlapänampaq kaq judïu nunakunapaqqa, ¿imanö kayanqantataq Jehovä nirqan? (Ezequiel 2:3-6). (2) ¿Imatataq yachakushun?

² Ezequiel parlapänampaq kaq nunakunaqa, ¿imanötan kayarqan? Jehovämi nirqan tsë judïu nunakunaqa, “munëninkunata rurakoq”, “mana penqakoq” y “rumi shonqu” kayanqanta. Imëka kashanö y atoq kurunö mantsëpaqmi kayarqan. Tsëchi Jehoväqa, Ezequielta kutin kutin nirqan: “Ama pëkunata mantsankitsu” (leyi Ezequiel 2:3-6). ¿Imatan Ezequielta yanaparqan Diosnintsik mandanqanta cumplinampaq? 1) Jehovä mandashqa kanqanta musyanqan, 2) poderninwan Jehovä yanapanqan y 3) Diospa Palabrampita yachakuyta mana dejanqanmi. ¿Imanötan tsë kiman yanaparqan, y imanötan noqantsiktapis yanapamashwan? Yachakurishun.

3. ¿Jehovä ima ninqantan Ezequielta yanaparqan, y imanötan yanapanampaq kaqta Jehovä kutin kutin änirqan?

³ Jehovämi Ezequielta nirqan: “Qamtam mandëkaq” (Ezeq. 2:3, 4). Jehovä mandëkanqanta musyarqa kushikurqanchi. Capaz yarparqan Moisestapis y Isaïastapis willakoqninkuna kayänampaq akrar tsënö nishqa kanqanta (Ex. 3:10; Is. 6:8). Ezequielqa musyarqanmi, rurayänampaq kaq sasa o aja ruranan kaptimpis, Moisestawan Isaïasta Jehovä yanapashqa kanqanta. Tsëmi Ezequielqa, “qamtam mandëkaq” niptinqa, Dios yanapanampaq kaqman confiakurqan. Ezequiel libruchöqa atska kutim tarintsik, “Teyta Jehoväqa parlapämarqan” neqta (Ezeq. 14:2). Y kutin kutinmi tarintsik, “Teyta Jehoväqa yapëmi parlapämarqan” neqtapis (Ezeq. 6:1). Tsëmi Ezequielqa següru këkarqan, Jehovä mandashqa kanqanta. Papänimpis sacerdöti karchi Ezequielta willashqa karqan, willakoqninkunata Jehovä imëpis yanapanqanta. Jehoväqa Isaacta, Jacobta y Jeremïastapis kënömi nishqa karqan: “Noqam qamwan këkä” (Gen. 26:24; 28:15; Jer. 1:8).

4. ¿Jehovä ima ninqantan Ezequielta yanaparqan?

⁴ Israelïtakunaqa, ¿cäsukuyarqanku Ezequiel parlapanqanta? Jehovämi Ezequielta nirqan: “Israel nunakunaqa, manam parlapanqäta cäsuyämantsu. Tsëmi qam parlapaptikipis cäsuyäshunkitsu” (Ezeq. 3:7). Ezequielta mana cäsurqa, Jehovätam cäsuykäyarqantsu. Tsëta Ezequiel musyanqanqa yanaparqan, Dios mandanqankunata rurëchö mana allita rurëkanqanta o mana yachanqanta mana pensanampaqmi. Tsënöllam Jehoväqa, willakunqan cumplikaptin ‘markankunachö juk willakoqnin’ kashqa kanqanta judïukuna yarpäyänampaq kaqta  nirqan (Ezeq. 2:5; 33:33). Jehovä tsënö parlapanqanqa, Ezequielta yanaparqanchi Jehovä mandanqanta alli cumplinampaq.

5. ¿Imanirtan Isaïas 44:8 textuchö ninqan yanapamantsik?

⁵ Jehovä mandamanqantsikta musyanqantsikqa, noqantsiktapis yanapamantsikmi. Pëpita willakoq Testïgunkuna kanatam permitimantsik (Is. 43:10). Jehovämi Ezequielta, “ama pëkunata mantsankitsu” nirqan. Tsënöllam noqantsiktapis, “ama mantsakäyëtsu” nimantsik. ¿Imanirtan contrantsikchö këkaqkunata mantsashwantsu? Ezequieltanölla Jehovä mandamashqantsik kaptin y pë yanapamashqam (leyi Isaïas 44:8).

6. (1) ¿Imanötan Jehovä yanapamantsik? (2) ¿Imata musyanqantsiktan alläpa yanapamantsik?

⁶ Jehoväqa yanapamänapaq kaqtam nimantsik. Kënö ninqanman pensarishun: “Qamkunam noqapa testïgükuna kayanki”. Peru tsënö manaraq nirmi kënö nirqan: “Mëtsika yakuta tsimpayaptikipis qamkunawanmi këkäshaq y mayukunata tsimpayaptikipis manam tsaparkuyäshunkitsu. Ninapa pasarpis manam rupakuyankitsu, y rawrëkaq o lunyëkaq ninapis manam imanäyäshunkitsu” (Is. 43:2). Diospita yachatsikurqa, höraqa mayunö y ninanö problëmakunapam pasantsik. Peru Jehovä yanapamashqam pëpita yachatsikurnin sïguintsik (Is. 41:13). Ezequieltanöllam, noqantsiktapis cäsi llapan nunakuna wiyamantsiktsu. Peru nunakuna mana wiyamashqapis, manam mana alli Testïgukuna kanqantsiktatsu pensantsik. Mana qelanëpa yachatsikunqantsikpita Jehovä kushishqa këkanqanta musyarmi kushishqa kantsik. Apostol Pablum kënö nirqan: “Cada nunam ruranqanmannö premiuta chaskinqa” (1 Cor. 3:8; 4:1, 2). Mëtsika watapana yanapakoq juk precursöram kënö nin: “Kallpachakunqantsikpita Jehovä bendicimanqantsikta musyarmi kushikü”.

7. Dios revelanqanta cada yarpar, ¿imapitataq Ezequiel següru karqan? (Jana qaranchö këkaq dibüjuta rikäri).

⁷ Ezequielqa Diospa santu espïritun poderösu kanqantam rikarqan. Dios revelaptinmi rikarqan, tsë poderqa puëdeq angelkunata y ciëluchö Diospa cärrumpa ruëdankunata mëpapis munanqampa apanqanta (Ezeq. 1:20, 21). Kikin Ezequielmi willakun, tsëta rikëkur alläpa espantakur ‘patsamampis urkun chanqanyaq’ ishkirinqanta (Ezeq. 1:28). Tsë rikanqanman cada yarparchi, Dios mandanqanta cumplita puëdinampaq kaqman masraq confiakurqan.

8, 9. (1) ¿Imata ruranampaqtan Ezequielta Jehovä mandarqan? (2) ¿Ima mastataq Jehovä rurarqan Ezequielta yanapar?

⁸ Jehovämi Ezequielta këta mandarqan: “Nunapa tsurin, sharkuy. Qamwanmi parlëta munä”. Tsënö mandaptinmi, sharkunampaq kallpayoq tikrarqan. Tsëmi kënö nirqan: “Tsënö parlapämaptinmi sharkunäpaq Teyta Diospa podernin yanapamarqan” (Ezeq. 2:1, 2). Y tiempuwanqa, yachatsikunampaqmi ‘poderninwan’ Teyta Jehovä yanaparqan (Ezeq. 3:22; 8:1; 33:22; 37:1; 40:1). Teyta Diospa poderninmi, ‘mana cäsukoq y rumi shonqu’ judïukunata mana mantsakuypa parlapänampaq yanaparqan (Ezeq. 3:7). Jehovämi kënö nirqan: “Cärëkitam y urkuykitam, pëkunapa cärankunatanö y urkunkunatanö chukruta tikratsirqö. Urkuykitam diamanti rumitanö chukruta tikratsirqö, pedernal rumipitapis mas chukrutam tikratsirqö. Ama tsë nunakunata mantsankitsu. Ama mantsanëpaq cärankunata rikarnin mantsankitsu” (Ezeq. 3:8, 9). Kënö neq cuentam parlapëkarqan: “Mana cäsukoq  kayanqampita ama qelanäkuritsu. Noqam valienti kanëkipaq yanapashqëki”.

⁹ Tsëpita patsëmi Diospa poderninqa, yachatsikunampaq kaq sitiukunaman Ezequielta aparqan. Ezequielmi kënö nirqan: “Teyta Jehoväpa poderninqa allipam yanapamarqan”. Ezequielqa juk semänataran yachakunqankunata entiendirqan, tsëran llapan shonqunwan willakunan karqan (Ezeq. 3:14, 15). Tsëpitanam, juk pampata ëwanampaq Teyta Jehovä nirqan y tsëchömi Diospa podernin yanaparqan (Ezeq. 3:23, 24). Tsënöpam Ezequielqa Diospa jutinchö willakunampaq listu këkarqan.

10. ¿Imatataq wanantsik Dios mandamanqantsikta cumplinapaq, y imanir?

¹⁰ ¿Imatataq wanantsik Dios mandamanqantsikta cumplinapaq? Tsëta musyanapaq Ezequielman pensarishun. Diospita yachatsikur manaraq qallaptinmi, kallpayoq kanampaq Diospa podernin yanaparqan. Diospa podernin mana yanapamashqaqa, noqantsikpis manam Diospita alli noticiakunata willakuyta puëdishwantsu. ¿Imanirtan tsëta nintsik? Diospita yachatsikunata Satanas imëkanöpa michämashqam (Apoc. 12:17). Nunakunapa rikënimpaq Satanas alläpa puëdeq kaptimpis, Diospita yachatsikurmi Satanasta vencikantsik (Apoc. 12:9-11). Diospita cada yachatsikurmi, Satanas mana allita ruramënintsikta munanqantaqa mana kaqpaq churantsik y vencintsik. Tsëmi chikimashqapis yachatsikunqantsikwan cläru rikakärin poderninwan Jehovä yanapëkamanqantsikta y pëpa rikëninchö alli këkanqantsikta (Mat. 5:10-12; 1 Pëd. 4:14).

11. ¿Imanötan Diospa podernin yanapamäshun, y imatataq rurashwan imëpis yanapamänapaq?

¹¹ Ezequielpa cäranta y urkunta Jehovä chukruyätsinqanwanmi següru këkantsik, yachatsikushqa michämaqnintsikkunata Diospa poderninwan vencinapaq kaqta (2 Cor. 4:7-9). Tsëqa, ¿imatataq rurashwan Diospa  podernin imëpis yanapamänapaq? Jehovä wiyamänapaq kaqman confiakurmi, poderninwan yanapamänapaq seguïdu mañakunantsik. Qateqninkunatam Jesus nirqan: “Mañakur sïguiyë”, “ashir sïguiyë” y “punkuta takakur sïguiyë”. ¿Imatataq Jehovä ruranqa tsënö mañakushqaqa? ‘Santu espïritunta mañakoqkunatam poderninwan yanapanqa’ (Lüc. 11:9, 13; Hëch. 1:14; 2:4).

12. Ezequiel 2:9 a 3:3 ninqannöpis, ¿mëpitataq tsë röllu shamurqan, y tsëchöqa imatan qellqarëkarqan?

¹² Diospa podernin yanapaptimpis, Ezequielqa Diospa Palabrampitam o pë ninqampitam seguïdu yachakurqan. Suëñuyninchönömi juk rölluta juk maki apëkaqta rikarqan (leyi Ezequiel 2:9–3:3). ¿Mëpitataq tsë röllu shamurqan? ¿Imatan tsë rölluchö nirqan? ¿Imanötan tsë rölluta mikoq cuenta karqan? Tsë rölluqa, Jehovä tëkanqampitam shamurqan. Ezequiel rikanqan chuskoq angelkunapita juknin kaq angeltachi Diosqa mandarqan rölluta entreganampaq (Ezeq. 1:8; 10:7, 20). Tsë rölluchöqa qellqarëkarqan, juk markachö prësunö këkaq mana wiyakoq nunakunata Dios condenanqanmi. Y tsëtam Ezequiel willakunan karqan (Ezeq. 2:7). Willakunampaq kaqqa, röllupa ishkan lädunchömi qellqarëkarqan.

13. Ezequieltaqa, ¿imata ruranampaqtan Jehovä mandarqan, y tsë rölluqa imanirtan mishkirqan?

¹³ Ezequieltam Jehovä mandarqan: “Pachëki juntanqanyaq kë rölluta mikuy”. Tsëmi Ezequielqa llapanta mikukurkurqan. Tsëta ruranqanqa, ¿ima ninantan karqan? Ezequielqa willakunampaq kaqtam alli entiendinan karqan y creinan karqan, tsënöpa llapan shonqunwan yachatsikunampaq. Ezequielpaqqa, tsë rölluqa ‘mielnöraqmi shiminchö mishkirqan’ (Ezeq. 3:3). ¿Imanirtan tsënöqa mishkirqan? Pëpaqqa, mishkeq mielnöran Jehoväpa jutinchö willakuy alläpa shumaq kaq (Sal. 19:8-11). Willakoqnin kanampaq Jehovä akranqantaqa alläpam agradecikoq.

14. Dios mandanqanta cumplinampaqqa, ¿imatan Ezequielta yanaparqan?

¹⁴ Tsëpitanam, Ezequielta Jehovä kënö nirqan: “Parlapanqaqkunata shumaq wiyamë. Parlapanqaqkunaman alli pensë” (Ezeq. 3:10). Jehoväqa rölluchö qellqarëkaq palabrakunata yarpänampaq y tsëkunaman pensanampaqmi nikarqan. Tsëta ruranqanmi, Diosman mas markäkunampaq o yärakunampaq y nunakunata cläru parlapänampaq yanapanan karqan (Ezeq. 3:11). Dios ninqanta shiminchö y shonqunchö katsirmi, Ezequielqa willakunampaq y Dios mandanqanta cumplinampaq listu këkarqan (Salmus 19:14 ninqantawan igualaratsi).

15. Diospita yachatsikuyta mana dejanapaqqa, ¿imatataq llapan shonquntsikwan creinantsik?

¹⁵ Diospita yachatsikuyta mana dejanapaqqa, Ezequiel ruranqannömi Diospa Palabrampita imëpis yachakunantsik. Jehovä nimanqantsiktam llapan shonquntsikwan creinantsik. Kanan witsanqa, Palabran Bibliawanmi Jehoväqa parlapämantsik. Peru pensënintsikchö, sentimientuntsikchö y imata rurëta munanqantsikchö Diospa Palabran yanapamänapaqqa, ¿imatataq ruranantsik?

16. Diospa Palabranta entiendinapaqqa, ¿imatataq ruranantsik, y imanötan tsëta lograshun?

¹⁶ Pachata mikushqam cuerpuntsikqa mas fuerti y kallpayoq tikran. Tsënöllam, Diosnintsikpa Palabranta estudianqantsik y estudianqantsikman pensanqantsikpis pëman mas  markäkunapaq o yärakunapaq yanapamantsik. Tsëtam Jehoväqa yachatsimënintsikta munan Ezequielta juk rölluta rikätsinqanwan. Pëqa munan, pacha junta mikoqnö, Bibliata imëpis estudianata y estudianqantsikta entiendinatam. Y tsëpaqqa, Diosnintsikmanmi mañakunantsik, Bibliatam leyinantsik y leyinqantsikmanmi pensanantsik. Peru puntataqa, manaraq leyirmi Diosnintsikman mañakunantsik leyinqantsikta entiendinapaq. Tsëpitanam Bibliata leyinantsik. Y tsëpitaqa, leyinqantsikmanmi alli pensanantsik. ¿Imatataq tsëta rurarnin lograshun? Leyinqantsikman alli pensarqa, masmi Diospa Palabranta entiendishun.

17. ¿Imanirtan Bibliata leyinqantsikman pensanantsik?

¹⁷ ¿Imanirtan Bibliata leyinantsik y leyinqantsikman pensanantsik? Tsëta ruranqantsikmi yanapamäshun, Diospa Gobiernumpita kanan witsan nunakunata mana mantsakushpa parlapänapaq, y shamoq tiempuchöqa capazchi condenashqa kayanqantana willashun. Y manam tsëllatsu, Jehovä imanö kanqanman pensarqa masmi pëta kuyashun y allita rurëkanqantsikta musyarmi kushishqa y yamë sientikushun (Sal. 119:103).

18. ¿Imatataq nunakuna cuentata qokuyanqa, y imanir?

¹⁸ Ezequielnö Diospita revelacionta mana chaskishqapis, Jehoväqa Palabran Bibliachömi llapan willakunqankunata qellqatsimushqa. Y noqantsikqa “amana yachatsikuyënatsu”, nimanqantsikyaqmi Diosnintsikpita yachatsikur sïguishun. Tsëmi mana alli nunakunata Jehovä ushakätsinan junaqqa kënö nir tsapakuyanqatsu: “Noqataqa manam willayämarqantsu”, “noqataqa manam Dios cuentaman churamashqatsu” (Ezeq. 3:19; 18:23). Tsënö niyänampa rantinmi, Diosnintsik mandamashqantsik kaptin yachatsikur purinqantsikta cuentata qokuyanqa.

19. ¿Imatan yanapamäshun yachatsikuyta imëpis mana dejanapaq?

¹⁹ ¿Imatan yanapamäshun Diosnintsikpita yachatsikuyta imëpis mana dejanapaq? Ezequielta yanapanqankunam. Tsëkunaqa, kë kimanmi kayan: Jehovä mandamanqantsikta musyar yachatsikur sïguinqantsik, poderninwan yanapamanqantsik y Diospa Palabrampita imëpis yachakunqantsikmi. Jehovä yanapamashqam yachatsikunapaq mandamanqantsikta cumplishun y ‘ushananyaq alli tsarakunapaq’ listu këkäshun (Mat. 24:13).