47 KAQ
Jehoväpita ama imapis rakishuytsu
“Noqaqa Teyta Jehovä, qammanmi confiakamü” (SAL. 31:14).
122 KAQ CANCION Alleq tsarakushun
¿IMATATAQ YACHAKUSHUN? a
1. ¿Imanötan musyantsik Jehoväqa pëman witinata munanqanta?
JEHOVÄQA, pëman mas witinapaqmi nimantsik (Sant. 4:8). Tsëmi Diosnintsik, Teytantsik y amïguntsik këta munan. Mañakunqantsiktam contestamun y imëka problëmakunapa pasashqam yanapamantsik. Llapan sirweqninkunawanmi yachatsimantsik y cuidamantsik. Peru ¿imatataq ruranantsik Diosnintsikpita imapis mana rakimänapaq?
2. ¿Imatataq rurashwan Jehoväman witinapaq?
2 Jehovämanqa witintsik pëman mañakurnin, Palabranta leyirnin y leyinqantsikman pensarninmi. Tsëta rurarqa, masmi kuyashun y imëkapitam agradecikushun. Pëllatam wiyakuyta y alabëta munashun (Apoc. 4:11). Pëpita mas yachakurqa, pëman y cuidamänapaq churanqan llapan sirweqninkunamanmi confiakushun.
3. (1) ¿Imanötan Diabluqa Jehoväpita rakimënintsikta procuran? (2) ¿Imatataq ruranantsik Diosnintsikpita y sirweqninkunapita mana rakikäkurinapaq? (Salmus 31:13, 14).
3 Tsënö kaptimpis, Diabluqa Jehoväpitam rakimënintsikta procuran y masqa problëmakunapa pasanqantsik höram. ¿Imanötan ruran? Jehoväman y llapan sirweqninkunaman manana confiakunapaqmi imëkata ruran. Peru Jehoväman markäkur o yärakur y pëman confiakurqa, allim tsarakushun y manam Jehoväta sirwïta dejashuntsu (leyi Salmus 31:13, 14).
4. ¿Imapitataq këchö yachakushun?
4 Këchöqa pasanqantsik kima problëmakunapitam yachakushun. Tsë problëmakunaqa Jehoväman y sirweqninkunaman markäkunqantsiktam ichikllapa ichikllapa ushakäratsinman. ¿Imanötan tsëkunaqa Diosnintsikpita rakikätsimashwan? Y ¿imatataq rurashwan Satanas munanqanman mana ishkinapaq?
PROBLËMAKUNAPA PASAR
5. ¿Imanötan problëmakunapa pasanqantsikqa Jehoväman y sirweqninkunaman confiakunqantsikta ushakäratsinman?
5 Höraqa familiantsikmi Diosta adoranqantsikrëkur contrantsik churakanqa o trabäjuntsikpita qarqaramäshun. ¿Imanöraq tsëkunapa pasar Jehoväpita rakikäkurishwan y llapan sirweqninkunaman confiakushwannatsu? Ima problëmachöpis unëpana karqa, manana altsakänampaq kaqtam pensashwan y qelanäkurishwanmi. Tsëkunatam Satanasqa provechan Jehovä mana kuyamanqantsikta pensatsimänapaq. Pëqa munan Jehoväpa o dirigimänapaq churanqan nunakunapa culpan tsë problëmakunapa pasëkanqantsikta pensanatam. Tsëmi pasarqan Egiptu nacionchö këkaq wakin israelïtakunatapis. Qallananllachöqa creiyarqanmi esclävu kayanqampita libranampaq Moisestawan Aaronta Jehovä akrashqa kanqanta (Ex. 4:29-31). Peru faraon mas sufritsir qallëkuptinmi, Moisestawan Aaronta culparnin kënö niyarqan: “Qamkunapa culpëkikunam gobernaqpis y sirweqninkunapis chikiyäman, y qamkuna qallapäyashqa kayaptikim kananqa ushakätsiyämanqapis” (Ex. 5:19-21). ¡Alläpa llakikuypaqmi karqan Diosta sirweq nunakunata culpayanqanqa! Y qamqa, atska tiempupana juk problëmachö tsarakuykarqa, ¿imatataq rurankiman Jehoväman y llapan sirweqninkunaman confiakur sïguinëkipaq?
6. ¿Imatataq Habacucpita yachakuntsik? (Habacuc 3:17-19).
6 Imanö këkanqëkita Jehoväta willë y yanapashunëkipaq kaqman confiakuy. Diospa willakoqnin Habacucqa imëka problëmakunapam pasarqan. Juk kutichöqa, Jehovä mana yanapëkanqantam pensarqan. Tsëmi imanö këkanqanta willarnin, kënö nirqan: “Teyta Jehovä, ¿imëyaqtan wiyëkamänëkipaq rogakamushaq? […] ¿Imanirtan wakinkunata mana alli tratayänanta permitinki?” (Hab. 1:2, 3). Habacuc tsënö mañakunqantaqa Jehovä contestarqanmi (Hab. 2:2, 3). Sirweqninkunata Jehovä imanö salvashqa kanqanman pensarirmi, Habacucqa yapë kushishqa sirwir qallëkurqan. Y segürum karqan pëman Jehovä yarpachakunqanta y imapa pasaptimpis yanapanampaq kaqta (leyi Habacuc 3:17-19). ¿Imatataq këpita yachakuntsik? Ima problëmayoqpis karqa, Jehoväta mañakushun, imanö këkanqantsikta willashun y yanapamänapaq kaqman confiakushun. Tsarakur sïguinëkipaq Jehovä kallpayoqta tikratsishunëkipaq kaqman confiakuy. Y yanapëkäshunqëkita rikarqa, masmi pëman markäkunki o yärakunki.
7. Jehoväpita rakikänanta munar, ¿ima nirqantaq Shirleyta juk familian, y imatan yanaparqan Jehoväman confiakur sïguinampaq?
7 Diosta sirwir ruranqëkikunata ama dejëtsu. Tsëta ruranqanmi, Papüa Nueva Guinëa nacionchö täraq Shirley b jutiyoq panita problëmakunapa pasanqan höra yanaparqan. Familianqa waktsam karqan y höraqa mikuyänampaq wallkallatam tariyaq. Jehoväman manana confiakunampaqmi juk familian kënö nirqan: “Qamqa Diospa podernin yanapëkäshunqëkitam ninki. Peru ¿imanötan yanapëkäshunki? Qamkunaqa imëpis waktsallam këkäyanki. Diospita yachatsikurqa tiempuykitam perdikanki”. Tsënö niptinmi Shirleyqa, pëpaq y familiampaq Jehovä mana yarpachakunqanta pensarirqan. Peru ¿imatataq rurarqan? Kënömi willakun: “Jinan höram Jehoväman mañakurqä y imanö këkanqätam willarqä. Bibliata y publicacionnintsikkunatam leyir sïguirqä, y manam Diospita yachatsikuyta ni reunionkunaman ëwëta dejarqätsu”. Shirleyqa cuentatam qokurirqan familianta Jehovä cuidëkanqanta. Pëkunapaqa, manam mikuyninkuna pisheqtsu y kushishqam këkäyarqan. Pëmi kënö nin: “Mañakunqäta Jehovä contestamunqantam rikarqä” (1 Tim. 6:6-8). Diosta sirwinqëkichö rurënikikunata mana dejaptikiqa, manam problëmakuna ni imëkata niyäshunqëkipis Jehoväpita rakishunkitsu.
DIRIGIMAQNINTSIKKUNATA MANA ALLI TRATAYAPTIN
8. ¿Imatataq dirigimaqnintsikkunapaq nunakuna niyanman?
8 Noticiakunachö o Internetpam chikimaqnintsikkunaqa, dirigimänapaq Jehovä churanqan nunakunapaq mana kaqta willakuyan (Sal. 31:13). Wakin wawqikunataqa, prësuyashqam y “delincuenti” nirmi acusayashqa. Apostolkuna kawayanqan witsampis, tsënöllam pasakurqan. Apostol Pablutam mana kaqpita tumpayarqan y prësuyarqan. Peru ¿imatataq tsë witsan cristiänukuna rurayarqan?
9. ¿Imatataq wakin cristiänukuna rurayarqan apostol Pablu prësurëkaptin?
9 Röma nacionchö prësurëkaptinmi, Pablutaqa wakin cristiänukuna dejariyarqan (2 Tim. 1:8, 15). ¿Delincuentitanö rikäyaptintsuraq Pablupita penqakuyarqan? (2 Tim. 2:8, 9). ¿O pëkunatapis chikir qatikachäyänantatsuraq mantsayarqan? Imanö kashqa kaptimpis, Pabluqa alläpachi dejariyanqampita llakikurqan. Imëkatam aguantashqa karqan y pëkunarëkurmi vïdantapis peligruman churashqa karqan (Hëch. 20:18-21; 2 Cor. 1:8). Yanapayänanta Pablu wanëkaptin dejareq cristiänukunanöqa ama imëpis kashuntsu. ¿Imatataq yarpänantsik dirigimaqnintsikkunata chikir qatikachäyaptin?
10. ¿Imatataq yarpänantsik dirigimaqnintsikkunata chikir sufritsiyaptin, y imanir?
10 Imanir chikimanqantsikta y pipa munëninta rurëkäyanqanta yarpë. 2 Timoteu 3:12 textum kënö nin: “Teyta Diosta llapan shonqunkunawan sirwita munaq Cristu Jesuspa llapan qateqninkunatam, imëkata rurar sufritsiyanqa”. Tsëmi dirigimaqnintsikkunata Satanas sufritsinqampitaqa espantakushwantsu. Pëqa Jehoväta sirwita dejariyänanta y mantsakätsimënintsiktam munan (1 Pëd. 5:8).
Carcelchö Pablu këkaptinmi, Onesïforuqa valienti kar wananqanchö yanaparqan. Kë fötuchö rikanqantsiknöpis, kanan witsan wawqi panikunapis carcelchö këkaq wawqi panikunatam yanapëkäyan. (11 y 12 kaq pärrafukunata rikäri).
11. ¿Imatataq Onesïforu ruranqampita yachakuntsik? (2 Timoteu 1:16-18).
11 Carguyoq wawqikunata mana dejëpa yanapashun (leyi 2 Timoteu 1:16-18). Apostol Pablu prësurëkaptinqa, juk alli wawqim yanapëta procurarqan. Pëpa jutinqa, Onesïforum karqan. Pablum pëpaq kënö nirqan: “Manam carcelchö cadenarëkanqäpita penqakushqatsu”. Onesïforuqa, imëkanöpam Pabluta tarinqanyaq ashirqan y wananqanchömi yanaparqan. ¡Përëkurmi vïdantapis peligruman churarqan! ¿Imatataq pëpita yachakuntsik? Ama nunakunata mantsarqa, qatikachëkäyanqan wawqikunata y panikunata yanapëta dejëtsu. Llapan puëdinqëkimannö defendi y yanapë (Prov. 17:17). Pëkunaqa, kuyanantsikta y yanapanantsiktam wanayan.
12. ¿Imatataq Rusiachö wawqi panikunapita yachakuntsik?
12 Kuyashqa wawqi panikunata carcelariyaptin, Rusiachö wawqikuna y panikuna imata rurayanqanman pensari. Pëkunaqa, juezkuna juzgayaptinmi cortikunaman ëwayan tsë wawqi o pani japallan mana sientikunampaq. ¿Imatataq pëkunapita yachakuntsik? Dirigimaqnintsik wawqikunata mana kaqpita acusayaptin, prësuyaptin o qatikachäyaptinqa ama mantsakëtsu. Pëkunapaq mañakuy, familiankunata cuidë y imëkanöpa yanapë (Hëch. 12:5; 2 Cor. 1:10, 11).
NOQANTSIKPITA BURLAKUYAPTIN
13. Noqantsikpita burlakuyanqanqa, ¿imanötan Jehoväman y dirigimänapaq churanqan nunakunaman confiakunqantsikta ushakätsinman?
13 Capazchi Bibliapita yachatsikushqa o Jehovä mandamanqantsikkunata respetashqa wakin familiantsikkuna, trabajaq mayintsikkuna o estudiaq mayintsikkuna noqantsikpita burlakuyanqa (1 Pëd. 4:4). Capaz kënö nimashwan: “Alli nunam kanki, peru religionnikichöqa alläpatam exigikuyan”. Capaz wakinqa, congregacionpita qarqushqakunata imanö tratanqantsikpaq mana allita parlayanqa y kënö nimashwan: “Pëkunata tsënö tratëkarqa, ¿imanötan nunakunata kuyayanqëkitaqa niyanki?”. Tsënö niyanqanman yarpachakur capazchi kënö pensar qallëkushwan: “¿Jehoväqa alläpatatsuraq exigikun? Y dirigimänapaq churanqan nunakunapis, ¿alläpatatsuraq exigikuyan?”. Tsënö pensarqa, ¿imatataq rurankiman Jehoväpita y dirigimänapaq churanqan nunakunapita mana rakikäkurinëkipaq?
Jobqa manam creirqantsu burlakoq amïgun tukoqkuna niyanqanta. Jehoväta mana dejëpa sirwinampaqmi churapakashqa karqan. (14 kaq pärrafuta rikäri).
14. Jehovä mandamanqantsikkunata respetanqantsikrëkur wakin nunakuna burlakuyaptin, ¿imatataq rurashwan? (Salmus 119:50-52).
14 Jehovä mandakunqankunata imëpis cäsukuy. Pëpita burlakuykäyaptimpis, Jobqa Jehovä mandakunqankunatam wiyakurqan. Juknin amïgun tukoqqa, mandakunqankunata wiyakunqanta Dios cuentapaq mana churanqantam creitsita munarqan (Job 4:17, 18; 22:3). Peru Jobqa manam ninqanta creirqantsu. Ima alli o ima mana alli kanqanta Jehovä ninqantaqa, rasumpa kanqantam musyarqan y wiyakurqanmi. Manam wakinkuna niyanqanta cäsurqa Diosta sirwita dejarirqantsu (Job 27:5, 6). ¿Imatataq pëpita yachakuntsik? Ama qampita burlakuyanqanrëkurqa, “¿Jehovä mandakunqankunaqa rasumpatsuraq llapampis allilla?” nir pensar qallëtsu. Mandakunqankunata cäsukurnin, imanö kawashqa kanqëkiman pensë. ¿Manaku Jehoväta cäsukurqa mas alli kawakurqunki? Diospa llapan sirweqninkunata yanapë, pëkunam mandakunqankunata cäsukuyan. Tsëta rurarqa, qampita nunakuna mëläya burlakuyaptimpis, manam Jehoväpita rakikäkurinkitsu (leyi Salmus 119:50-52).
15. ¿Imanirtan Brizitqa familiankuna burlakuyanqanta aguantarqan?
15 India nacionpita Brizit jutiyoq pani imapa pasanqanta rikärishun. Pëqa Testïgu kanqanrëkur familiankuna burlakuyanqantam aguantarqan. 1997 watachömi bautizakurqan y tsëpita ichik tiempullatam qowanta o runanta trabäjumpita qarquriyarqan, pëqa manam Testïgutsu karqan. Tsëmi qowanqa Brizit-ta y wamrankunata pushakurkur juk markachö täkoq papäninkunapa wayinman ëwakurqan. Peru qowan trabäjuta mana tariptinmi Brizitqa familianta manteninampaq llapan junaqkuna trabajarqan. Y mas amänuchö këkaq congregacionqa, 350 kilömetrus karuchöran karqan. Qowampa familianqa, Testïgu kanqanrëkurmi Brizit-ta chikipäyarqan. Suegrunkunapa wayinchö alläpa problëmakuna kaptinmi, Brizitwan familianqa juk lädupana ëwakuyarqan. Tsënö këkäyaptinmi, qowan wanurirqan. Y tsëpitanam, 12 watayoqllaraq warmi wamran cancer qeshyawan wanurirqan. Peru manam tsëllatsu pasakurqan. Brizitpa familiankunam tsë llapan desgraciakuna pasakunqampita, pëta culpatsayarqan. Jehoväpa testïgun këman mana yëkushqa kaptinqa, tsëkuna mana pasakunampaq kaqtam niyarqan. Peru pëqa, Jehoväman confiakurninmi sïguirqan y llapan sirweqninkunapitaqa manam rakikäkurirqantsu.
16. ¿Ima bendicionkunatataq Brizit chaskirqan Jehoväpita y sirweqninkunapita mana rakikäkurinqampita?
16 Brizitpa wayin Congregacionpita alläpa karuchö kaptinmi, congregacionkunata watukaq wawqiqa, täkunqan markachö yachatsikunampaq y wayinchö reunionkunata ruranampaq nirqan. Qallananllachöqa, tsëta rurëta mana puëdinampaq kaqtam pensarqan. Peru congregacionta watukaq wawqita cäsukurmi, Diospita yachatsikur, reunionkunata rurar y warmi wamrankunawan Bibliapita yachakur qallëkuyarqan. ¿Imatataq ruranqanwan lograrqan? Mëtsikaq nunakunatam Bibliapita yachatsir qallëkurqan, y atskaqmi bautizakuyarqan. Y 2005 watachömi, precursor regular tikrarirqan. Jehoväman confiakunqampita y sirweqninkunapita mana rakikäkurinqampitam bendicionta chaskirqan. Warmi wamrankunaqa Jehoväta sirwirmi sïguiyan y kananqa tsë markachöqa ishkë congregacionkunam kan. Imëka problëmakunachö alli tsarakunampaq y familian burlakunqanta aguantanampaq Jehovä kallpayoqta tikratsishqa kanqantam Brizitqa següru këkan.
JEHOVÄTA NI SIRWEQNINKUNATA DEJASHUNTSU
17. ¿Imata ruranapaqtan churapakänantsik?
17 Mana allikunapa pasanqantsik höra Jehovä dejaramanqantsikta y llapan sirweqninkunata cäsukunqantsik mas mana alliman chätsimanqantsikta creinatam Satanasqa munan. Y dirigimaqnintsik wawqikunata mana kaqpita tumpayaptin, chikir qatikachäyaptin o carcelayaptin mantsakänatam munan. Tsënöllam noqantsikpita burlakuyaptin, Jehoväman y llapan sirweqninkunaman confiakunqantsikta Satanasqa ushakätsita munan. Peru noqantsikqa musyantsikmi Satanas imakunata ruranqanta y manam engañamänata dejashuntsu (2 Cor. 2:11). Ama creishuntsu imata ruraptimpis o imata niptimpis. Tsëpa rantinqa, Jehoväwan y llapan sirweqninkunawan imëpis këkäshun. Yarpäshun, Jehoväqa manam imëpis dejamäshuntsu (Sal. 28:7). Tsënö kaptinqa, ¡ama dejashuntsu Jehoväpita imapis rakimänata! (Rom. 8:35-39).
18. ¿Imatataq qateqnin kaqchö yachakushun?
18 Këchöqa yachakurquntsik, Jehoväman y llapan sirweqninkunaman confiakunqantsikta ushakätsita puëdeq problëmakunapitam. Peru congregacionchö pasakunqankunapis pëkunaman confiakunqantsiktaqa ushakäratsinmanmi. ¿Imatataq rurashwan tsëkuna pasakuptin alli tsarakunapaq? Qateqnin kaqchömi tsëpita yachakushun.
118 KAQ CANCION “Markäkuyänäpaq yanapëkayämë”
a Kë ushanan tiempuchö alli tsarakuyta y Diosllata sirwita munarqa, Jehoväman y llapan sirweqninkunamanmi confiakur sïguinantsik. Diabluqa pëkunaman confiakuyta dejanatam munan. ¿Imatataq ruran pëkunaman manana confiakunapaq, y imatataq rurashwan alli tsarakunapaq? Kimallata yachakurishun.
b Wakinkunapa jutinkunaqa jukmi.