Kë pasanqampita imanö ushanqanta manaraq willakur, willariyashqëki imanir llapan tiempüwan Jehoväta sirwir qallanqäta.

Papänïqa Surinam nacionchömi yurikurqan, peru trabajaqmi Curazäu nacionta ëwakurqan. Yurikunäpaq juk ishkë wata pishikaptinmi, papänïqa bautizakurirqan. Noqaqa 1942 watachömi Curazäu isla nacionchö yurikurqä. Tsë witsampaqqa, Curazäu nacionchöqa papänïllam Testïgu karqan. a Papänïpaqa pitsqaqmi wamrankuna kayarqä, y mana gustëkäyämaptimpis llapäkunatam cada semäna Bibliapita yachatsiyämaq. Papänïpa mamänin edäna kaptinmi, 14 watayoq këkaptï, Surinam nacionman kutikuyarqä awiläta cuidayänäpaq.

Surinam nacionchöqa, Jehoväta kushishqa sirweq jövinkunawanmi amïgu kayarqä. Pëkunaqa juk ishkë watallapam mayornïkuna kayarqan y precursor regularmi kayaq. Diospita yachatsikuyanqampitaqa kushishqam parlayaq kayä. Reunionkuna ushariptinqa, Biblia yachatsikunqampitam maslla parlakuriyaq kayä y höraqa paqasyaqmi quedakuyaq kayä. Kënö amïgukunayoq kanqämi, Jehoväta llapan shonqüwan sirwinäpaq yanapamarqan. Tsëmi 16 watayoq këkar bautizakurirqä, y 18 watayoq këkarnam precursor regular karqä.

Precursor regular kanqächöqa, imëkatam yachakurqä. Tsëmi yanapamarqan Diosta llapan tiempüwan sirwinqächö. Jukqa karqan, wawqikunata mas yanapakuyänampaq yachatsi precisanqanmi. Precursor kanqä witsanqa, juk nacionkunata watukakoq wawqi Willem van Seijlmi alläpa yanapamarqan. b Pëqa congregacionchö  alli yanapakunäpaqmi yachatsimarqan. Tsë kutichöqa, manam ichikllapis pensarqätsu yachatsimanqan yanapamänampaq kaqta. Juk wata pasarinqanllachömi, precursor especial kanäpaq niyämarqan y Surinam nacionchömi selva kaq lädunchö yanapakurqä. Wawqikuna yachatsiyämanqampitaqa, ¡alläpam agradecikü! Pëkunanöllam noqapis kallpachakurqö y wawqikunata yachatsinäpaqmi tiempüta patsätsirqö.

Tsënöllam yachakurqä kapamanqanllawan kushishqa kawakuyta y imata ruranäpaqpis alliraq patsätsita. Täräyanqä precursor especial wawqiwanmi, cada killa qallanqanchö wanayanqäkunata rantiyänäpaq patsätsipakuyaq kayä. Y wanayanqäkunata karu markachöraq rantikuyaptinmi, juknïkunalla viajayaq kayä. Cada killa chaskiyanqä qellëta y mikuynïkunataqa juk killapaqmi tinkutsiyaq o paqtatsiyaq kayä. Wanayanqäkuna ushakaptinqa, täräyanqä sitiuchö manam pipis yanapayämëta puëdiyanmantsu karqan. Jehoväta sirwir sïguinäpaqqa, jövin kanqäpita kapamanqanllawan y imatapis alli patsätsipakur ruranqämi yanapamashqa.

Y juk kaq yachakunqänam karqan, Diospita nunakunata yachatsirqa parlayanqan idiömachö yachatsinä precisanqanta. Noqaqa wamra kanqäpitam holandes, ingles, papiamentu y surinames (sranan nirpis reqiyanmi) idiömakunata parlëta yachakurqä. Peru yanapakunqä sitiukunachöqa manam tsë idiömakunata parlayantsu, y idiömankunachö Diospita yachatsikuptiqa nunakuna masmi wiyakuyaq. Y parlayanqan idiömata yachakuyqa, saramacänu idiömanömi fäciltsu karqan. Tsë idiömapa tönunqa höram fuertipa y despaciulla wiyakan. Parlayanqan idiömata yachakunäpaq kallpachakunqäqa, mëtsika watakunapa nunakunata Diospita yachatsinäpaqmi yanapamashqa.

Saramacänu idiömata parlanqächöqa, atska kutim pantarqä. Juk kutichömi, Bibliapita yachëkätsinqä warmipa pachan nanarqan. Tsëmi, saramacänu idiömachö imanö këkanqanta tapuyta munarqä. Peru “¿qeshyaqku këkanki?” nirmi tapunaq kä. Y pëtaqa manam tsënö tapunqä gustarqantsu. Tsënö pantarpis, parlayanqan idiömata yachakunäpaq y parlanäpaqqa kallpachakuykarqämi.

1970 watam, congregacionkunata watukakunäpaq churayämarqan. Tsë watallam, “Visitando la central mundial de los testigos de Jehová” neq videuta selvachö këkaq grüpukunaman rikätsikoq ëwarqä. Tsë grüpukunaman ëwayänäpaqqa, qerupita rurashqa bötiwanmi wawqikunawan ëwayarqä. Tsëchömi, juk baterïata, gasolïnata, lamparakunata y videuta rikätsikuyänäpaq llapan wanayanqäkunata apayarqä. Ëwayanqä sitiuman chärirnam, videuta rikätsikuyänäpaq cösaskunata tsë sitiuyaq chakipa apayarqä. Nunakuna Diospita yachakurnin kushishqa kayanqanta y alläpa agradecikuyanqantam masqa yarpä. Jehovä Diosta y sirweqninkunata nunakuna reqiyänampaq yanapakunqäpitam kushishqa sientikü. Imëkata  rurarnin utishqa o pishipashqa këkarpis, Jehovä Diospita bendicionkunata chaskiwanqa manam imapis igualantsu.

Soltëru këkar congregacionkunata watukakuyqa, alläpam yanapakun. Tsënö kaptimpis, casakuytaqa munarqämi. Tsëmi, Teyta Jehoväta mañakurqä juk alli warmita tarinäpaq y ishkäkuna selvachö sirwiyänäpaq y mana fäcil kaptimpis, juntu y kushishqa kayänäpaq. Juk wata pasarinqanllachömi, Ethel jutiyoq paniwan reqinakuyarqä. Pëqa precursöra especialmi karqan. Ethelqa, jövin kanqampitam apostol Pablunö Jehoväpita yachatsikuyta munarqan. 1971 wata septiembri killachömi casakuyarqä, y congregacionkunata watukarmi yanapakuyarqä.

Ethelqa manam imëkayoq winashqatsu karqan. Tsëmi congregacionkunata watukayanqächö raslla yachakärirqan. Juk kutichömi, selvapita mas karu kaq markata visitaq ëwayänäpaq, wanayanqäkunallata alistarirnin ëwayarqä. Tsëchöqa, mayuchömi taqshakuyaq y bañakuyaq kayä. Y wawqi panikunanam, piräña niyanqan pescäduta, jatun arashnö iguänata o mayupita imatapis tsariyanqanta cocinarir qarayämaq y tsëtam mikuyaq kayä. Mana plätu kaptinmi, plätanuspa rapranchö mikuyaq kayä. Y cuchara mana kaptinnam, makiwan mikuyaq kayä. Warmï Ethelwanqa, cuentata qokuyarqö llapan tiempükunawan Jehoväta sirwiyanqäqa, kimapashqa waskanö kayänäpaq yanapayämanqantam (Ecl. 4:12). Tsënö kawakuytaqa, ¡manam imawampis cambiayämantsu!

Qallananchö imapa pasayanqäta willayanqaqqa, selvapita mas karu kaq sitiupita kutikäyämunqächömi pasakurqan. Corrienti yakupa pasëkäyaptï pirägua bötïkuna hundikärirpis, rasmi yarqaramurqan. Noqakunaqa mana hundikäyänäpaq chalëkushqa karmi hundikäyarqätsu.  Peru bötimanqa yakum juntarirqan. Tsëmi tazonnïkunachö këkaq mikuyta mayuman jichayarqä y tsëwanmi bötïkunapita yakuta laqchiyarqä.

Y imapis mana mikuyänäpaq kaptinmi, mayupita imallatapis pesquëta munayarqä. Peru manam imatapis tsariyarqätsu. Tsëmi tsë junaq mikuynïkuna kanampaq, Jehoväta mañakuyarqä. Mañakur ushariyaptïmi, juk wawqi mayuman anzuëluta jitarirnin juk pescäduta tsariramurqan, y tsëtam pitsqäkuna pacha junta mikuriyarqä.

Pitsqa watakunapana congregacionkunata yanapakuykarmi, juk bendicionta chaskiyarqä: wamräkunam kanan karqan. Tsëmi kushishqa këkarqä, peru tsëpita ima pasakunampaq kaqtaqa manam cläru musyarqätsu. Warmï Ethelwanqa, llapan tiempükunawanmi Jehoväta sirwir sïguita munayarqä. 1976 watachömi, mayor kaq Ethniël wamräkuna yurirqan, y ishkë wata pasarinqanllachömi, Giovanni wamräkuna yuririrqan.

Surinam nacionchö congregacionkunata watukakoqkuna mana kaptinmi, congregacionkunata watukakur sïguiyänäpaq niyämarqan. Wamräkuna pishillaraq kayaptinmi, wallka congregacionkunallata watukayaq kayä. Tsëmi cada killachö ishkë semänapa congregacionkunata watukar ëwaq kä. Tsëpitanam, congregacionnïchö precursornö yanapakoq kä. Wayï amänunchö congregacionkunata watukarqa, warmïwan y wamräkunawanmi ëwayaq kayä. Selvachö congregacionkunaman y asamblëakunamanqa japallämi ëwaq kä.

Llapan ruranäpaq kaqkunata cumplinäpaqqa, imëkatapis alliran patsätseq kä. Y familiäwannäqa, cada semänam mana dejëpa Diospita yachakuyaq kayä. Selvachö congregacionkunata watukakoq ëwaptïqa, warmï Ethelmi familianö Diosta Adorayänä hörata ruraq. Familiäkunawanqa imallatapis rurayaqmi kayä. Y höraqa, wamräkunawanmi imallatapis pukllayaq kayä o amänun sitiukunatam pasiaq ëwayaq kayä. Atska paqaskunapam preparakurnin tardiyaq quedakoq kä, tsënöpa cargüta alli cumplinäpaq. Warmï Ethelqa, Proverbius 31:15 ninqannömi alli warmi kashqa. Pëqa tempränullam sharkoq wamräkuna escuëlata  manaraq ëwayaptin Llapan junaqkuna Bibliapita yachakunapaq neq follëtuta juntu leyiyänäpaq y desayünuta upuyänäpaq. Tsënö shumaq yanapamanqampitaqa, alläpam warmïta agradecikü, tsënöpam llapan cargüta alli cumplirqö.

Ethelwanqa, wamräkunata yachatsiyarqö Jehoväta kuyayänampaq y pëpita kushishqa yachatsikuyänampaqmi. Teyta Jehoväta llapan tiempunkunawan sirwiyänantam munayarqä, peru kikinkuna decidiyänantam munayarqä. Llapan tiempuntsikwan Jehoväta sirwirqa, kushishqa kanqantsiktam imëpis niyaq kayä. Y mana fäcil kaptimpis, Jehovä Dios imëpis yanapayämanqanta y bendiciyämanqantam rikätsiyarqä. Y Jehovä Diosta llapan shonqunkunawan sirweq jövinkunawan juntakuyänantam procurayaq kayä.

Jehovä yanapayämaptinmi, imäkunapis faltarqantsu. Y familiäta cuidanäpaqqa, allim kallpachakurqä. Jövin këkarnin selvachö precursor especial kanqäqa, imatapis alli patsätsinäpaq y qellënïta alli utilizänäpaqmi yanapamashqa. Peru höraqa tinkutsita o paqtatsita munayaptïpis manam tinkoqtsu. Peru segürum karqä tsë hörakuna Jehovä yanapayämanqanta. 1980 wata ushëkunam, Surinam nacionchö guërra qallëkurqan. Tsëmi höraqa, wanayanqäkunata tari fäciltsu karqan. Peru Jehoväqa imëpis yanapayämarqanmi (Mat. 6:32).

Teyta Jehoväqa manam imëpis dejayämashqatsu y kushishqa kawayänäpaqmi yanapayämashqa. Wamräkunaqa juk bendicionmi kayan, y Jehoväta kuyayänampaq yanapayanqäqa alläpa kushikuypaqmi kashqa. Llapan tiempunkunawan Jehoväta sirwiyänampaq decidiyanqantaqa, alläpam kushikuyä. Ethniëlwan Giovanniqa, Diospita yachakuyänan escuëlakunamanmi ëwayashqa y kananqa Surinam nacion sucursalchömi warminkunawan yanapakuyan.

Warmï Ethelwanqa edänam kayä, peru tsënö kaptimpis, precursor especialmi sïguiyä. Tsëmi alläpa ocupädu karnin, nadëtapis yachakurqötsu. Y manam imapitapis pësakütsu. Llapan pasanqäkunata rikarmi, cuentata qokü jövin kanqäpita llapan tiempüwan Jehoväta sirwinäpaq decidinqäqa, imawampis mana igualanqanta.