1, 2. ¿Imakunatataq anciänukuna rurayan?

 UNËPANA siervu ministerial karqa, capazchi anciänu kanëkipaq Biblia ninqankunata cumplikankina. ¿Maslla kallpachakunkimantsuraq ‘alläpa alli rurëta’ ruranëkipaq o anciänu kanëkipaq? (1 Tim. 3:1).

² ¿Imakunatataq anciänukuna rurayan? Diospita yachatsikuychömi punta puntachö kayan, wawqi panikunatam watukarnin animayan, yachatsiyan y rurayanqankunawan y niyanqankunawanmi congregacionchö wawqi panikunata yanapayan Diosnintsikta sirwir sïguiyänampaq. Tsëchi Bibliachöqa pëkunapaq nin ‘qarë’ cuenta kayanqanta (Efes. 4:8).

3. ¿Imanötan juk wawqi kanman anciänu kanampaq? (1 Timoteu 3:1-7; Tïtu 1:5-9).

³ ¿Imanötan juk wawqi kanman anciänu kanampaq? Anciänu këqa manam juk trabäjuman yëkuynötsu. Juk trabäjuman yëkoq nunaqa, tsë trabäjuchö imata ruranampaq kaqkunatam alli yachanan. Peru anciänu kanampaqqa, manam yachatsikuyllatatsu ni nunakunata Diospita parlapëllatatsu yachanan. Tsëpa rantinqa 1 Timoteu 3:1 a 7 y Tïtu 1:5 a 9 (leyi) textukunachö ninqantam cumplinan. Tsëmi këchöqa kë kimanta yachakushun: imanö portakunqampita wawqi panikuna allita parlayanqanta, familianta alli diriginqanta y wawqi panikunata yanapanampaq listu këkanqanta.

 ALLI PORTAKUNQAMPITAM REQISHQA KANAN

4. ¿Ima nitataq munëkan ‘imapitapis mana parlashqam’ kanan nirqa?

⁴ Juk anciänuqa, “imapitapis mana parlashqa[m]” kanan. Juk parlakuychöqa, imanö portakunqampitam wawqi panikuna allita parlayänan. Tsënöllam, ‘congregacionchö mana kaqkunapis pëpaq allita parlayänan’. Diosta mana sirweqkunapis, honrädu kanqanta y alli kanqantaqa clärum rikäyänan (Dan. 6:4, 5). Tsëmi kënö tapukunëki: “¿Noqapaqqa allitaku parlayan wawqi panikuna y Diosta mana sirweqkunapis?”.

5. ¿Ima ninantan “alli kaqtam kuyanan” ninanqa?

⁵ “Alli kaqtam kuyanan”. Alli kaqta kuyarqa, wakinkuna allikunata rurayanqantam alkäbu kanan y imanö kayanqampitam felicitänan. Tsënöllam wakinkunata kushishqa yanapanan y ruranampaq kaqpitapis mastam ruranan (1 Tes. 2:8). Juk anciänuqa wawqi panikunata watukanampaq y ruranampaq kaqkunata alli atiendinampaqmi tiempunta patsätsinan (1 Pëd. 5:1-3). Tsënö tiempunta rakirpis y ruranampaq kaqkuna sasa o aja kaptimpis kushishqam sientikunqa (Hëch. 20:35).

6. ¿Imanötan juk anciänuqa nunakunata shumaq chaskinman? (Hebrëus 13:2, 16; rikäri fötuta).

⁶ “Nunakunata shumaq chaskeqmi kanan”. Nunakunata shumaq chaskirqa, manam reqinakushqankunallatatsu ni amïgunkunallatatsu shumaq chaskinan (1 Pëd. 4:9). Juk libru ninqannöpis, “mana reqishqakunatapis chaskinampaqmi listu këkänan”. Tsëmi kënö pensanëki: “¿Visïtakunata shumaq chaskeq kanqäpitaku reqiyäman?” (leyi Hebrëus 13:2, 16). Pitapis shumaq chaskeq nunaqa visïtakunata, faltapakuykaqkunata y Diospa kaqchö alli trabajaqkunata o congregacionkunata watukaqkunata o discursuta rurar visitakoqkunatam imallatapis qaran (Gen. 18:2-8; Prov. 3:27; Lüc. 14:13, 14; Hëch. 16:15; Rom. 12:13).

7. ¿Imanötan juk anciänu rikätsikunman qellëta mana kuyanqanta?

⁷ “Manam [...] qellëta kuyaqtsu kanan”. Juk anciänuqa manam imëkayoq këta munar trabajarlla kakunantsu. Tsëpa rantinqa,  rïcu kar o pobri karpis Diospa kaqkunatam mas puntaman churanan (Mat. 6:33). Tsëmi tiempunta, kallpanta y llapan kapunqankunata utilizänan Jehoväta sirwinampaq, familianta y wawqi panikunata yanapanampaq (Mat. 6:24; 1 Juan 2:15-17). Tsëmi kënö pensanëki: “¿Noqaqa alläpaku qellëta kuyä? ¿Kushishqaku kawakü tarinqäkunallawan? ¿O qellëta masta munarku y imëkayoq këta munarku trabajarlla kakü?” (1 Tim. 6:6, 17-19).

8. ¿Imanötan juk wawqi rikätsikunman kawakunqanchö ‘controlakuyta yachanqanta’?

⁸ ‘Imëkachöpis controlakuytam yachanan’. Mikuy asuntuchö y upuy asuntuchöpis controlakuytam yachanan, alli juiciuwanmi vistikunan y tiempuntapis manam llutaqa utilizänantsu. Manam kë munduchö nunakuna rurayanqanta qatinantsu (Lüc. 21:34; Sant. 4:4). Y ofendiyaptimpis, manam rasllaqa o sasllaqa cölerakunantsu. Tsënöllam juk anciänuqa “machakoqtsu kanan” ni alläpa upunqampita reqishqatsu kanan. Tsëmi kënö pensanëki: “¿Imanötan rikätsiküman kawakunqächö controlakuyta yachanqäta?”.

9. ¿Imanötan rikätsikuyanman “alli juiciuyoq” y “ordenädu” kayanqanta?

⁹ “Alli juiciuyoqmi kanan”. Juk anciänuqa imata decidinan kaptimpis, Biblia ninqankunamanran alli pensanan. Biblia ninqankunaman alli pensarmi ima asuntupis imanö kanqanta alli musyanqa y tsëmannömi decidinqa. Manam imatapis alliraq mana musyapakurqa, “kënömi” o “waknömi” ninqatsu (Prov. 18:13). Tsënö alli musyapakurirmi Jehovä munanqannö imatapis decidinqa. Tsënöllam juk anciänuqa “ordenädu” kanan. Juk parlakuychöqa, anciänu këta munaq wawqiqa imata ruranampaqpis allim patsätsinan y tiempuchömi ruranan. Llapankunam musyayänan confiakuypaq kanqanta, y imata rurarpis anciänukuna niyanqannömi ruranan. Tsënö ruraptinqa, wawqi panikunam respetayanqa. Peru ¿imanötan juk wawqi Biblia ninqannö familianta diriginman? Kananqa tsëpita yachakurishun.

FAMILIANTA ALLI DIRIGEQMI KANAN

10. ¿Imanötan juk wawqi rikätsikunman ‘familianta’ alli diriginqanta?

¹⁰ Juk wawqi anciänu kanampaqqa, familianmi Diospa kaqchö alli kanan. Tsëmi Diosnintsikqa munan juk wawqi ‘familianta shumaq dirigeq’ kananta. Manam familianta descuidanantsu, kuyakoqmi kanan y Diosnintsikta shumaq sirwiyänampaqmi yanapanan. Tsëta mana rurarqa, manam anciänu këta puëdintsu. Apostol Pablum kënö nirqan: “Juk nuna familianta shumaq dirigita mana yacharqa, ¿imanöraq Teyta Diospa congregacionninchö kaqkunata cuidanqa?” (1 Tim. 3:5).

11, 12. Juk wawqi anciänu kanampaqqa, ¿imanötan familian portakunman? (Rikäri fötukunata).

¹¹ Wamrankunatapis kuyëllapam yachatsinan ‘cäsukoq y alli portakoq kayänampaq’. Musyanqantsiknöpis, wamrakunataqa asikuy y pukllëmi gustan. Peru shumaq yachatsiyaptinqa, cäsukoq, respetakoq y alli portakoqmi kayanqa. Tsënöllam yanapanan Jehoväpa amïgun kayänampaq, Biblia ninqannö kawakuyänampaq y bautizakuyänampaq.

¹² “Tsurinkunapis cristiänum kayänan y manam lluta kawayanqampita o munayanqanta rurayanqampita acusashqatsu kayänan”. Peru ¿imaraq pasakunman bautizakushqana wamran jutsata rurariptin? Papänin  mana yachatsishqa kar o mana corregishqa karqa, manam anciänu këta puëdinqatsu (leyiri 1996 wata 15 de octubrichö yarqamoq La Atalaya revistapa 21 kaq päginanchö 6 y 7 kaq pärrafunkunata).

YANAPAKUNAMPAQMI LISTU KËKÄNAN

13. ¿Imanötan juk wawqi rikätsikunman pensanqanllächö mana tsarakoq kanqanta y ‘orgullösu’ mana kanqanta?

¹³ Jehovä munanqannö kawakoq wawqikunaqa, congregacionchömi juk bendicion kayan. Juk anciänuqa manam “pensanqanllächö tsarakoqtsu kanan”. Pensanqanllächö mana tsarakoq wawqiqa alli kawakunapaqmi yanapamantsik. Pensanqëkillachö tsarakoq këta mana munarqa, wakinkuna niyanqantam shumaq wiyanëki y niyanqankunatam cuentachö katsinëki. Këllaman pensarishun: juk reunionchö anciänupura këkäyankiman, y pëkuna decidiyanqanqa qam munanqëkinötsu kanman. Tsëqa, Biblia ninqampa contran mana kaptinqa, ¿decidiyanqankunata yanapankimantsuraq? Tsënöllam juk anciänuqa “orgullösutsu kanan”. Manam kikin munanqannölla imatapis rurayänampaqqa exigikunantsu. Tsëpa rantinqa, wakinkunapis yanapakuyanqampitam kushikunan (Gen. 13:8, 9; Prov. 15:22). Tsënöllam juk anciänuqa, “pleytu asheqtsu” kanan ni “manam rastsu o sastsu cölerakunan”. Lasaq shimimpa contestakunampa rantinmi respëtuwan parlanan. ‘Yamë këta asheqmi’ kanan. Wakinkuna discutiyaptimpis, manam discutir sïguiyänantaqa permitinqatsu (Sant. 3:17, 18). Cölerashqa këkäyaptimpis, shumaq parlakunqantsikqa alli kawakunapaqmi yanapakun, hasta chikimaqnintsikkunatapis alliyäratsinmi (Juëc. 8:1-3; Prov. 20:3; 25:15; Mat. 5:23, 24).

14. ¿Imanötan juk anciänu rikätsikun ‘tsëllaraq creikoq tikrashqa’ mana kanqanta y Diosta mana dejaq kanqanta?

¹⁴ “Manam tsëllaraq creikoq tikrashqatsu kanan”. Bautizakunqampita atska watakuna manaraq pasashqa kaptimpis, poqu  cristiänu tikranampaqqa tiemputaran wanan; tsëran anciänu këtaqa puëdin. Manaraq anciänu karninmi, Jesusnö humildi kanqanta rikätsikunan y Jehovä ninqanta imë höra karpis y mëchö karpis cäsukunampaq listu këkänan (Mat. 20:23; Filip. 2:5-8). “Manam jukkunata [o Diosta] dejanantsu”. Tsë ninanqa Jehovämanmi confiakunan y mandakunqankunatam cäsukunan. Tsëtaqa ruranqa sirweqninkunata dirigimoqkuna niyanqankunata cäsukurninmi (1 Tim. 4:15).

15. Juk wawqi anciänu kanampaqqa, ¿alli discursëtaraqku yachanan?

¹⁵ ‘Alli yachatsikuyta yachaqmi’ kanan. Tsëqa, ¿anciänu kanampaqqa discursëta alli yachaqraqku kanan? Manam. Wakin anciänukunaqa alli discursëta mana yacharpis, Diospita yachatsikuyta y wawqi panikunata animëtaqa allipam yachayan (igualaratsi 1 Corintius 12:28, 29 y Efesius 4:11 textukunatawan). Tsënö karpis, anciänu këta munaq wawqiqa, alli yachatsikoq kanampaqmi kallpachakunan. ¿Imanötan tsëta logranman?

16. ¿Imatataq juk wawqi ruranman alli yachatsikoq kanampaq? (Rikäri fötukunata).

¹⁶ “Teyta Diospa confiakuypaq palabran ninqannömi yachatsikunan”. Juk anciänu reunionkunachö yachatsikur o pitapis consejarqa, Diospa Palabran ninqannömi yachatsikunan y pitapis consejanan. Bibliata y publicacionkunatam alli estudianan (Prov. 15:28; 16:23). Y estudiarninqa, cada versïculu imanö yanapakunqantam alli entiendinan. Tsënöllam yachatsikurninqa alli cläru entienditsikunan. Tsënö alli yachatsikoq kanampaqqa yanapanqa alli yachaq anciänukunata tapukunqan y pëkuna niyanqannö ruranqanmi (1 Tim. 5:17). Tsënöllam juk anciänuqa, wawqi panikunata “kallpayoq kayänampaq” animëta yachanan. Y consejarninqa, kuyëllapam parlapänan. Kuyakoq kar y Diospa Palabran ninqannö yachatsikurqa, Jesusnömi alli yachatsikoq kanqa (Mat. 11:28-30; 2 Tim. 2:24).

 KALLPACHAKUR SÏGUI

17. (1) ¿Imaraq juk siervu ministerialta yanapanqa anciänu kanampaq? (2) ¿Imatataq anciänukuna yarpäyänan juk wawqita anciänu kanampaq churëta munarqa? (Leyiri “ Anciänukuna, ama llapantapis allillata rurayänantaqa shuyaräyëtsu” neq recuadruta).

¹⁷ Anciänukuna imanö kayänanta Jehovä munanqanta yachakurirqa, capazchi juk siervu ministerialqa cumplita mana puëdinampaq kaqta pensanqa. Peru yarpänëkim, manam Jehoväpis ni sirweqninkunata dirigeqkunapis llapanta mana pantëpa cumplinëkitaqa shuyaräyantsu (Sant. 3:2). Jehoväpa santu espïritunmi yanapashunki alliyëta munanqëkikunachö (Filip. 2:13). Y qamqa, ¿imakunachötan mas alliyëta munanki? Tsë asuntupaq Jehoväman mañakuy, tsë tëmapaq alli estudië y anciänukunata nï yanapayäshunëkipaq.

18. ¿Imatataq llapan siervu ministerialkuna rurayanman?

¹⁸ Wawqikuna, anciänuna karpis llapëkikunam këchö yachakunqantsikkunata cumpliyänëkipaq kallpachakuyänëki (Filip. 3:16). Y siervu ministerial karqa, kallpachakur sïgui anciänu kanëkipaq. Jehoväta mañakuy ruranëkipaq kaqkunachö yanapashunëkipaq y pë munanqannö kanëkipaq, tsënöpam congregacionchö yanapakuyta puëdinki (Is. 64:8). Anciänu kanëkipaq kallpachakuptikiqa, Jehoväqa bendicishunkim.