¿Imatataq rurankiman Bibliata cada semäna estudianëkipaq?
BIBLIATA cada semäna estudiëtaqa, ¿ajatanöku o sasatanöku rikanki? ¿Qelanankiku yachakuyta? Llapantsiktam tsëqa pasamantsik. Peru këman pensarishun: ruranan sasa o aja kaptimpis o qelanëpaq kaptimpis seguïdum imatapis rurantsik. Bañakunampis manam fäciltsu, peru bañakurirqa kushishqam sientikuntsik. Tsënöllam Diospa Palabranta estudiarpis, yakuwan bañakureqnö kushishqa sientikushun (Efes. 5:26). Peru ¿imaraq yanapashunki? Këkunata rurë:
Tiempuykita alli patsätsi. Diospa Palabranta estudiëqa imëkapitapis masmi välin, tsëmi dejanantsiktsu (Filip. 1:10). Tsëqa, ¿imatataq rurankiman estudianëkipaq patsätsinqëki hörata mana qonqarinëkipaq? Juk höjaman apuntarirmi, mas fäcil-lla rikänëki sitiuman churankiman o refrigeradörëkiman laqankiman, o alarmatam celularnikiman churankiman.
Puëdinqëkimannölla yachakunëkipaq patsätsi. Wakinkunaqa mëtsikata yachakurpis manam utiyantsu o ajayäyantsu, peru wakinkunaqa atskata yachakuyta mana puëdirmi ichik ichiklla yachakuyänampaq patsätsiyan. Y qampaqqa, ¿atskata yachakunqëkiku o ichik ichiklla yachakunqëkiku mas alli? Tsëtam cuentachö katsinëki yachakunëkipaq tiemputa patsätsirnin. Y yachakunëki höra chäramuptin gänasniki mana kaptinqa, allim kanman 10 minütusllapis yachakurinqëki, mana kanqampitaqa tsëllapis allim kanqa. Capazchi qelanëkar qallashqa kaptikipis gustarishunki y mas tiempupa yachakurita munanki (Filip. 2:13).
Puntallapitana akrë imapita yachakunëkipaq kaqta. Höranllachö imata estudianëkipaq kaqta pensarqa manam tiempuykita alli provechankitsu (Efes. 5:16). Tsëqa ¿imataraq rurankiman? Puntallapitana ima tëmapita o ima publicacionta estudianëkipaq kaqta juk listaman apuntë, o estudianqëki höra o juk hörakunachö ima asuntutapis maslla musyëta munarqa apuntanëkim.
Patsätsinqëki hörachö yachakuyta mana puëdirqa juk hörakunachö yachakunëkipaq patsätsi. Ama dejëtsu cada semäna yachakuyta. Tsëmi patsätsinqëki hörachö mana puëdirqa juk junaqchöna, juk hörachöna y ëka tiempupa y ima tëmata yachakunëkipaq kaqta patsätsinëki.
Bibliapita cada semäna yachakunqëkiqa alläpam yanapashunki: Jehoväwanmi mas amïgu kanki, imatapis allim decidinki y mas kushishqam sientikunki (Jos. 1:8).
