44 KAQ
33 KAQ CANCION Llapan yarpachakïnïtam Jehoväqa musyan
¿Imatataq rurashwan pipis mana alli tratamashqa?
“Ama mana alli vencishunëkita dejëtsu, sinöqa mana alli kaqta alli kaqwan vencir sïgui” (ROM. 12:21).
¿IMATATAQ YACHAKUSHUN?
Këchöqa yachakushun pipis mana alli tratamashqa, mas problëmaman mana chäkurinapaq imakunata ruranapaq kaqtam.
1, 2. ¿Imakunapatan pasashwan?
KË PATSACHÖ Jesus kanqan tiempuqa, nuna mayinkunatam nunakuna alläpa mana alli tratayaq. Tsëmi Jesusqa juk kuti parlarqan justiciata ashirnin juezman juk viuda kutin kutin ëwanqampaq. Jesuspa qateqninkunaqa allichi entiendiyarqan tsë viuda imanö sientikunqanta (Lüc. 18:1-5). Kanan witsampis nunakunaqa mana allim tratamantsik, tsëmi tsë viuda imanö sientikunqantaqa entiendita puëdintsik.
2 Kanan witsampis nunakunaqa mana allim kayan y mana allim tratamashwan (Ecl. 5:8). Juk nunakuna mana alli tratamashqaqa aguantantsikmi, peru wawqi panikuna mana alli tratamashqaqa alläpam llakikushwan. Awmi, Diosta mana kuyaq nunakunanöqa manam wawqi panikunaqa tratamäshuntsu, peru ofendimashqaqa alläpam llakikushwan. Peru ¿imatataq Jesus rurarqan chikeqninkuna mana alli tratayaptin? Pëkunapita yachakunqantsikmi yanapamäshun chikimaqnintsikkuna mana alli tratamashqa imata ruranapaq kaqta musyanapaq. Peru këman pensarishun: Diosta mana sirweq nunakuna ofendimashqa aguantëkarqa, ¿manatsuraq wawqi panintsikkunataqa masraq aguantashwan? ¿Imanötan Jehoväqa sientikun juk wawqi, juk pani o wakin nunakuna mana alli tratamashqa? ¿Manatsuraq cuentaman churan?
3. ¿Imanötan musyantsik wakinkuna imanö tratamanqantsikta Jehovä musyëkanqanta?
3 Teytantsik Jehoväqa musyëkanmi jukkuna imanö tratamanqantsikta. Pëqa “justicia rurëtam gustan” (Sal. 99:4). Jesusmi Jehoväpaq nirqan sirweqninkunapaqqa, justiciata ras o sas ruranampaq kaqta (Lüc. 18:7, 8). Y ichik tiempullachönam Jehoväqa, llapan sufrimientukunata ushakätsinqa y manam permitinqanatsu nunakuna sufritsimänata (Sal. 72:1, 2).
4. ¿Imanötan Jehovä yanapamantsik?
4 Peru tsë alli kawakuy tiempuqa manam chämunraqtsu. Tsëmi Jehoväqa yachatsimantsik pipis mana alli tratamashqa imata ruranapaq kaqta musyanapaq (2 Pëd. 3:13). Këllaman pensarishun: mas problëmaman mana chäkurinapaqmi yachatsimantsik, Tsurin Jesuspita yachakunapaqmi nimantsik y Palabran Bibliamanmi consëjukunata qellqatsimushqa.
MAS PROBLËMAMAN MANA CHÄNAPAQ CUIDAKUSHUN
5. Pipis mana alli tratamashqaqa, ¿imanirtan cuidakushwan?
5 Pipis mana alli tratamashqaqa, alläpam cölerakushwan o llakikushwan (Ecl. 7:7). Tsënömi Jobwan Habacucpis sientikuyarqan (Job 6:2, 3; Hab. 1:1-3). Tsënö sientikunqantsik entiendipaq kaptimpis, imatapis lluta rurar mas problëmaman mana chäkurinapaqmi cuidakunantsik.
6. ¿Imatataq yachakuntsik Absalon ruranqampita? (Rikäri dibüjuta).
6 Pipis mana alli tratamashqaqa, capazchi cölerarnin ruramanqantsiknölla kutitsita munashun. Peru tsëta rurarqa, mas problëmakunamanmi chäkurishun. Pensarishun gobernanti Davidpa tsurin Absalonman. Pëqa panin Tamarta Amnon violariptinmi alläpa cölerakurqan. Moises Qellqanqan Leywan juzgayaptinqa, Amnonqa wanunanmi karqan (Lev. 20:17). Peru Absalonqa alläpa cölerakurmi justiciata kikin rurarqan. Cölerakunqan entiendipaq kaptimpis, ruranqanqa manam allitsu karqan (2 Sam. 13:20-23, 28, 29).
Absalonqa paninta violashqa kayanqanta musyarirmi alläpa cölerakurnin justiciata kikin rurarqan. (Leyiri 6 kaq pärrafuta).
7. ¿Imanötan Salmus qellqaq nuna sientikurqan nunakuna mana allikunata rurayaptin?
7 Mana allikunata rurayanqanta pitapis mana taripuyaptin o mana castigayaptinqa, capazchi pensarishwan allikunata ruranqantsikqa mana välinqanta. Tsënömi sientikurqan Salmus qellqaq nunapis. Pëqa clärum rikarqan alli nunakunata mana alli tratayanqanta y mana alli nunakuna kushishqa kawakuyanqanta. Tsëmi kënö nirqan: “Mana alli nunakunaqa tsënömi kayan, imatapis fäcil-llam rurariyan” (Sal. 73:12). Nunakunata mana allikunata rurayanqanta rikarmi alläpa llakikurqan y Jehoväta sirwitapis dejaritam munarqan. Kënömi nirqan: “Manam entiendirqätsu mana alli nunakuna imanir tsënö kayanqanta, tsëmi llakikurqä...” (Sal. 73:14, 16). Y tsëpitam kënö nirqan: “Noqaqa alli kaq nänipitam cäsi yarqukurirqä, cäsim mana allikunaman ishkirqä” (Sal. 73:2). Kë Salmus qellqaqtanömi wawqintsik Albertutapis a pasarqan.
8. ¿Imatataq juk wawqi rurarqan “qellëtam suwashqa” nir tumpayaptin?
8 Wawqintsik Albertutaqa, “congregacionpa qellënintam suwashqa” nirmi tumpayarqan. Y mananam anciänunatsu karqan. Tsë problëmata musyaq wawqi panikunapis mananam respetayarqannatsu. Wawqi Albertum kënö nin: “Alläpam cölerakurqä y llakikurmi ima rurëtapis puëdirqätsu”. Tsënö sientikurmi pitsqa watapa Jehoväta sirwirqannatsu. Wawqintsik Albertuta pasanqanwanmi musyantsik, wakinkuna mana alli tratamashqa alläpa cölerakurqa o alläpa llakikurqa Jehoväta sirwita dejarinapaq kaqta.
JESUS RURANQANNÖ RURASHUN
9. ¿Imanötan Jesusta tratayarqan? (Rikäri dibüjukunata).
9 Pipis mana alli tratamashqa imata ruranapaq kaqtaqa, Jesuspitam yachakuyta puëdintsik. Jesustaqa mëtsikaq nunakunam mana alli tratayarqan. Këllaman pensarishun: Diospa Akrashqan kanqanta mana creirmi wakin familiankuna pensayarqan löcu këkanqanta. Pushakoq religiösukunanam niyarqan demoniukuna yanapayaptin milagrukunata ruranqanta. Y romänu soldädukunanam burlakuyarqan, maqayarqan y wanutsiyarqan (Mar. 3:21, 22; 14:55; 15:16-20, 35-37). Peru Jesusqa tsë llapantam aguantarqan y manam vengakurqantsu. ¿Imatataq Jesuspita yachakuntsik?
Pipis mana alli tratamashqaqa, Jesuspitam yachakuyta puëdintsik imata ruranapaq kaqta. (Leyiri 9 y 10 kaq pärrafukunata).
10. ¿Imatataq Jesus rurarqan mana alli tratayaptin? (1 Pëdru 2:21-23).
10 (Leyi 1 Pëdru 2:21-23). b Pipis mana alli tratamashqaqa, Jesuspitam imata ruranapaq kaqta yachakuyta puëdintsik. Jesusqa musyarqanmi imë parlanampaq kaqta y imë upälla kakunampaq kaqta (Mat. 26:62-64). Këllaman pensarishun: pëpaq imëkakunata ulikuyaptinmi o llullakuyaptinmi, pëqa upälla kakurqan (Mat. 11:19). Y defendikurninqa, manam chikeqninkunata mana alli tratarqantsu ni amenazarqantsu. Jesusqa clärum musyarqan ‘allita rurar juzgaqpa makinchö’ tsë llapanta dejarinampaq kaqta. Musyarqanmi mana alli tratayanqantaqa Jehovä rikëkanqanta, y imë karpis juzganampaq kaqmanmi confiakurqan.
11. Pipis ofendimashqa parlanantsik kaptinqa, ¿imanirtan alliraq pensashwan? (Rikäri fötukunata).
11 Pipis mana alli tratamashqa imanö contestanapaqqa, Jesusnömi alliraq pensanantsik. Ofendimanqantsik alläpa grävi mana kaptinqa, dejëkunantsikmi o upällam kakunantsik. Tsënöpam mas problëmakunaman chäshuntsu (Ecl. 3:7; Sant. 1:19, 20). Peru pitapis mana alli tratëkäyanqanta rikar o Diosnintsikpaq mana allita parlayaptinqa, defendinantsikmi (Hëch. 6:1, 2). Peru defendirninqa, respëtuwan y tranquïlum parlanantsik (1 Pëd. 3:15). c
Pipis mana alli tratamashqaqa, Jesusnömi alliraq pensanantsik imata ruranapaq kaqtapis. (Leyiri 11 y 12 kaq pärrafukunata).
12. ¿Imatataq rurashwan pipis mana alli tratamashqaqa?
12 Pipis ofendimashqaqa, Jesus ruranqannömi ‘alli kaqta rurar juzgaqpa’ o Jehoväpa makinchö tsë problëmata dejanantsik. ¿Imanötan tsëta rurashwan? Pipis noqantsikpaq ulikuptin o llullakuptin o mana alli tratamashqaqa, rasumpa kaqta Jehovä musyanqanmanmi confiakunantsik. Tsëmi yanapamäshun aguantar sïguinapaq y imë karpis Jehovä Diosnintsik altsamunampaq kaqman confiakunapaq. Jehoväman confiakurqa, manam alläpa cölerakushuntsu ni llakikushuntsu. Alläpa cölerakurqa mana allikunamanmi chäshun, manam kushishqa këta puëdishuntsu, hasta Jehovä Diosnintsikwan amïgu kanqantsiktam perdirishwan (Sal. 37:8).
13. Nunakuna mana alli tratamanqantsikpita alläpa llakikurqa, ¿imatataq yarpänantsik?
13 Peru Jesusnö ruranantsikqa manam fäciltsu. Capazchi höraqa lluta parlarishun o imatapis mana pensëpa rurarishun y tsëpita llakikushun (Sant. 3:2). Capazchi wakin nunakuna mana allita ruramanqantsikpita o mana alli tratamanqantsikpita atska tiempupana sufrikantsik o sufrir sïguishunraq. Tsëkunapa pasëkarqa, yarpänëkim imanö sientikunqëkita Jehovä musyanqanta. Y Jesuspis imanö sientikunqëkitaqa allim musyan, pëtapis mana allim tratayarqan (Heb. 4:15, 16). Jehovä Diosnintsikqa, nunakuna mana alli tratamashqa imata ruranapaq yachatsimarnintsikmi Tsurin Jesus pasanqankunata y mas consëjukunata Palabran Bibliaman qellqatsimushqa. Yachakurishun Romänus librupa ishkë versïculunkunapita.
“MANA ALLITA RURAYANQANWAN TEYTA DIOS CÖLERAKUNANTA DEJAYË”
14. ¿Imata ruranapaqtan apostol Pablu consejamantsik? (Romänus 12:19).
14 (Leyi Romänus 12:19). Apostol Pabluqa consejamantsik “mana allita rurayanqanwan Teyta Dios cölerakunanta” dejanapaqmi. Tsë consëjuta cäsukurninqa, tsë problëmata Jehovä altsanampaqmi dejanantsik. Pëqa musyanmi imanö y imë ruranampaq kaqtapis. Tsëtam John jutiyoq wawqintsik rurarqan juk wawqi mana alli tratashqa kaptin. Kënömi nin: “Kikï munanqänö mana altsanäpaqmi kallpachakurqä. Tsëpaqqa Romänus 12:19 ninqanmi yanapamarqan mas pacienciakoq kanäpaq y Jehoväman confiakunäpaq”.
15. ¿Imanirtan problëmantsikkunata Jehoväpa makinchö dejarishwan?
15 Problëmantsikta Jehovä altsamunampaq dejanqantsikmi mas alliqa kanqa. Jehoväpa makinchö tsë problëmata dejarqa, manam kikintsik altsëta munarninqa alläpa yarpachakushuntsu. Jehoväqa yanapamënintsikta munarmi kënö neq cuenta nikämantsik: “Tsë asuntutaqa noqata dejapëkamë. Noqam tsëtaqa altsaramushaq”. Jehovämi tsë problëmantsikta altsamuyta munan y pëqa musyanmi imanö altsamunampaq kaqta. Änimanqantsikman confiakurqa, manam cölerashqallaqa kakushuntsu. Punta kaq pärrafuchö parlanqantsik Johntapis Jehoväman confiakunqanmi yanaparqan. Kënömi nin: “Tsë problëmata Jehovä altsamunampaq dejarninqa, segürum këkä mas alli altsakänampaq kaqta”.
“MANA ALLI KAQTA ALLI KAQWAN VENCIR SÏGUI”
16, 17. ¿Imanötan Jehoväman mañakunqantsik yanapamäshun alli kaqta rurar sïguinapaq? (Romänus 12:21).
16 (Leyi Romänus 12:21). Apostol Pablum kënö nirqan: “Mana alli kaqta alli kaqwan vencir sïgui”. Y Jesusnam kënö nirqan: “Chikiyäshoqnikikunata kuyayë, y imëkata rurar sufritsiyäshoqnikikunapaq mañakuyë” (Mat. 5:44). Jesusqa kikin ninqantam cumplirqan. Pëtaqa mana kaqpitam romänu soldädukuna mana alli tratayarqan, maqayarqan y qeruman warkur wanutsiyarqan. ¡Tsë llapantam Jesusqa aguantarqan!
17 Peru Jesusqa manam tsëta rurëkäyaptimpis, cölerakurqantsu y manam Teytanta mañakurqantsu tsë soldädukunata castiganampaq. Tsëpa rantinqa, kënömi Teytanta nirqan: “Perdonëkuy Teyta, pëkunaqa manam musyayantsu imata rurëkäyanqanta” (Lüc. 23:34). Noqantsikpis, mana allita ruramaqnintsikkunapaq Jehoväman mañakurqa, manam alläpa cölerakushuntsu ni resentikushuntsu.
18. ¿Imanötan Albertutawan Johnta yanaparqan Jehoväman mañakuyanqan?
18 Punta kaq pärrafukunachö parlanqantsik wawqikunataqa, Jehovä Diosnintsikman mañakuyanqanmi yanaparqan mana allikunapa pasayanqankunata aguantayänampaq. Albertum kënö nin: “Jehovä Diosnintsikmanmi mana alli tratamaq wawqikunapaq mañakurqä. Tsënöllam kutin kutin mañakurqä mana alli tratayämanqanta qonqëkunäpaq”. Albertuqa, kananqa kushishqam Jehovä Diosnintsikta sirwikan. Y Johnnam kënö nin: “Mana allita tratamaq wawqipaqmi kutin kutin Jehoväman mañakurqä. Tsënö mañakunqämi yanapamarqan tsë wawqiwan cölerashqalla mana kanäpaq, mana juzganäpaq y tranquïlu sientikunäpaq”.
19. Pipis mana alli tratamashqaqa, ¿imatataq ruranantsik? (1 Pëdru 3:8, 9).
19 Kë tiempuqa imëka mana allikunaparan pasashun. Peru imëka mana allikunapa pasarpis, manam Jehovä Diosnintsikta sirwitaqa dejashuntsu. Chikeqninkunata Jesus tratanqannö, noqantsikpis mana allita ruramaqnintsik nunakunata shumaq tratashun y Bibliachö consëjukunata cäsukushun. Tsëta rurashqaqa, Jehovä Diosnintsikmi bendicimäshun (leyi 1 Pëdru 3:8, 9).
38 KAQ CANCION Jehovämi cuidashunki
a Wakinkunapa jutinkunaqa jukmi.
b 1 Pëdru librupa 2 y 3 kaq capïtulunkunachömi apostol Pëdru parlarqan, wakin cristiänukunataqa patronninkuna sufritsiyanqanta y wakin cristiänakunataqa mana cristiänu qowankuna o runankuna sufritsiyanqanta (1 Pëd. 2:18-20; 3:1-6, 8, 9).
c Rikäri jw.org päginachö Kuyakoq kanqantsikmi yanapamäshun yamë kanapaq neq videuta.
