1. ¿Apostol Pabluqa siervu ministerialkunata valorarqanku?

 SIERVU MINISTERIALKUNAQA allipam congregacionchö yanapakuyan. Tsëchi apostol Pabluqa alläpa valorarnin, Filïpus cristiänukunaman cartakurnin, siervu ministerialkunapaq y anciänukunapaq salüduta apatsirqan (Filip. 1:1).

2. ¿Imanötan Luis sientikun siervu ministerialnö yanapakur?

² Mëtsikaq bautizakushqa wawqikunam jövin o mayor karpis, siervu ministerial kayan y kushishqa yanapakuyan. Pensarishun Ivan a y Luis jutiyoq wawqikunaman: Ivantaqa 18 watayoq këkaptinmi siervu ministerial churayarqan y Luistanam 50 watayoq këkaptin. Luismi imanö sientikunqampaq kënö nin: “Congregacionchö wawqi panikunaqa alläpam kuyayäman, tsëmi noqapis siervu ministerialnö kushishqa yanapakü”.

3. ¿Ima tapukuykunapa respuestantataq këchö yachakushun?

³ Wawqillä, ¿bautizakushqana karqa siervu ministerial këta munankimantsuraq? ¿Imanirtan siervu ministerial këta munankiman? Y ¿Bibliachö ima ninqantataq cumplinkiman siervu ministerial kanëkipaq? Tsë tapukuykunapa respuestantam këchö yachakushun. Peru puntataqa parlarishun siervu ministerialkuna imakunachö yanapakuyanqantaraq.

¿IMAKUNACHÖTAN SIERVU MINISTERIALKUNA YANAPAKUYAN?

4. ¿Imakunachötan siervu ministerialkuna yanapakuyan? (Rikäri fötukunata).

⁴ Siervu ministerial kayänampaqqa, bautizakushqa ollqukunatam churayan. Pëkunataqa santu espïritu yanapap tinmi congregacionchö anciänukunata yanapayänampaq churayan. Siervu ministerialkunaqa yanapakuyan yachatsikunapaq territoriukunata y publicacionkunata alistar, Diosta adoranantsik wayita limpiar, imapis malograqkunata altsar, reunionman ëwaqkunata chaskir y audiu videuta manejarmi. Tsëkunachö yanapakurpis siervu ministerialkunaqa Diospa amïgun këtam mas puntaman churayänan; Jehovätam kuyayänan, mandakunqannömi kawayänan y wawqi panikunatam llapan shonqunkunawan kuyayänan (Mat. 22:37-39). Peru ¿imatataq bautizakushqa wawqikuna rurayanman siervu ministerial kayänampaq?

5. ¿Imatataq siervu ministerial kayänampaq rurayanman?

⁵ Siervu ministerial kayänampaq imakunata rurayänampaqqa, Bibliachömi willakuykan (1 Tim. 3:8-10, 12, 13). ¿Imatataq rurankiman Biblia ninqannö kawanëkipaq? Siervu ministerialkunapaq Biblia ninqantam alli estudianëki y cumplinëki. Peru ¿imanirtan siervu ministerial këtaqa munankiman? Tsëta yachakurishun.

¿IMANIRTAN SIERVU MINISTERIAL KËTA MUNANKI?

6. ¿Imanirtan juk wawqiqa, llapan wawqi panikunata yanapanman? (Mateu 20:28; rikäri dibüjuta).

⁶ Jesusman pensarishun. Pëqa Teytanta y nunakunata kuyarninmi imëkata rurarqan, y wakin nunakuna despreciayanqan rurëkunatapis rurarqanmi (leyi Mateu 20:28; Juan 13:5, 14, 15). Jehovä Diosnintsikta y nuna mayintsikta kuyaptikiqa, Jehovämi bendicishunki y siervu ministerial kanëkipaqmi yanapashunki (1 Cor. 16:14; 1 Pëd. 5:5).

7. ¿Imanirtan allitsu kanman wakinkunapita mas alli këta munarlla ima carguyoqpis këta munanqantsik?

⁷ Jehoväta mana sirweq nunakunaqa wakinkunapita mas alli kayanqantam pensayan y imanö kayanqampitam alabakurlla kayan. Peru Jehoväpa sirweqninkunaqa manam tsënötsu kanantsik. Jesusnö, Jehoväta y nuna mayintsikta kuyarqa, manam wakinkunapa mandaqnin këta o wakinkunapita mas alli këta munashuntsu. Mëqan wawqipis wakinkunapita mas alli këta munarlla carguta chaskirqa, manam wakinkuna despreciayanqan rurëkunata ruranqatsu  ni manam Jehoväpa sirweqninkunatapis shumaq cuidanqatsu (Juan 10:12). Tsënö nunakuna rurayanqantaqa manam Jehovä bendicinqatsu (1 Cor. 10:24, 33; 13:4, 5).

8. ¿Imanö nirtan Jesusqa apostolninkunata corregirqan?

⁸ Jesuspa qateqninkunapis höraqa wakinkunapita mas alli këta munarmi imatapis rurayaq. Tsëtam rurayarqan Santiäguwan Juan. Pëkunaqa Jesustam mañakuyarqan mas precisaq carguman churanampaq. Tsëta mañakuyanqampitaqa manam Jesus felicitarqantsu, tsëpa rantinqa 12 apostolninkunatam kënö nir corregirqan: “Mëqëkipis mas carguyoq këta munarqa, wakinkunapa sirweqninkunam kayänëki, y mëqëkipis puntachö këta munarqa, wakinkunapa sirweqninkunam kayänëki” (Mar. 10:35-37, 43, 44). Jehovä Diosnintsikta y wawqi panikunata rasumpa kuyarnin ima cargutapis chaskinëkipaq kallpachakuptikiqa, Jehovämi bendicishunki (1 Tes. 2:8).

¿IMATATAQ RURANKIMAN WAKINKUNATA YANAPËTA MUNANËKIPAQ?

9. ¿Imamantan pensankiman wakinkunata yanapëta munanëkipaq?

⁹ Capazchi Jehoväta y wawqi panikunata kuyarpis, siervu ministerial këtaqa mantsapakunki. Peru ¿imatataq rurankiman congregacionchö maslla yanapakuyta munanëkipaq? Tsëpaqqa Jesus kënö ninqanmanmi alli pensanëki: “Imatapis chaskir kushikunqantsikpitaqa, imatapis qarakurmi masqa kushikuntsik” (Hëch. 20:35). Jesusqa wakinkunata yanaparmi rasumpa kushishqa sientikurqan. Y qampis tsënömi sientikunki.

10. ¿Imanötan Jesusqa rikätsikurqan wakinkunata yanaparnin kushishqa sientikunqanta? (Marcus 6:31-34).

¹⁰ Nunakunata yanaparmi Jesusqa kushishqa sientikurqan. Juk cäsullata rikärishun (leyi Marcus 6:31-34). Juk kutim, Jesuswan apostolninkunaqa alläpa utishqa o pishipashqa karnin jamariyänampaq juk sitiuta ëwayarqan. Pëkunapaqa, manam “mikuyänanllapaqpis tiempunkuna” karqantsu. Peru nunakunaqa, mëpa ëwëkäyanqanta musyarirmi puntata chäriyarqan. Mana munarqa, manam Jesus yachatsinmantsu karqan, o juk ishkëta yacharatsirmi kutikuyänampaq ninman karqan. Peru Jesusqa manam tsëtatsu rurarqan, tsëpa rantinqa nunakunata alläpa kuyarmi “imëkata yachatsirqan”. Peru cuentata qokurinampaqqa, “alläpa tardinam” karqan (Mar. 6:35). Jesusqa manam nunakuna ëwashqa kayaptinllatsu yachatsirqan, sinöqa ‘alläpa llakiparnin’ y kuyarninmi. Jesusqa wakinkunata yanaparmi rasumpa kushishqa sientikoq.

11. ¿Imanötan Jesusqa nunakunata yanaparqan? (Rikäri dibüjutawan fötuta).

¹¹ Peru Jesusqa manam yachatsirqanllatsu, sinöqa llapan wanayanqankunachömi yanaparqan. Tsëmi milagruta rurar ichiklla mikuyta miratsirqan y discïpulunkunatam nirqan nunakunata repartiyänampaq (Mar. 6:41). Tsënömi discïpulunkunata yachatsirqan wakinkunata yanapayänampaq, siervu ministerialkunapis tsënömi wakinkunata yanapayan. Apostolkunaqa alläpa kushishqachi repartikuyarqan milagruta rurar Jesus miratsinqan mikuyta. Y llapan nunakunam “pacha junta mikuyarqan” (Mar. 6:42). Peru Jesusqa manam tsë kutillatsu nunakunata yanaparqan. Kë Patsachö kanqan tiempuqa, llapan puëdinqanmannömi nunakunata yanaparqan (Mat. 4:23; 8:16). Jesusqa alläpa kushishqam sientikoq wakinkunata yachatsir  y humildi nunakunata yanaparnin. Qampis siervu ministerial karnin yanapakurqa, Jesusnömi kushishqa sientikunki.

12. ¿Imanirtan congregacionchö yanapakuyta mana yachanqëkita pensanëkitsu?

¹² Peru capazchi imatapis rurëta mana yachanqëkita pensanki. Tsënö karqa, manam qelanäkurinëkitsu. Congregacionchöqa imëkachömi yanapakuyta puëdinki. Peru tsëpaqqa Jehovämanmi alli mañakunëki y 1 Corintius 12:12 a 30 ninqantam leyinëki. Tsëchömi apostol Pabluqa entienditsikun cada cristiänu congregacionchö alläpa välinqanta. Tsëmi siervu ministerial këta manaraq puëdirqa, yarpachakunëkitsu. Tsëpa rantinqa, Jehovä Diosnintsikta y wawqi panikunata sirwinëkipaqmi kallpachakunëki. Y anciänukunaqa imatapis rurëta puëdinqëkita cuentaman churëkurmi, imata ruranëkipaqpis niyäshunki (Rom. 12:4-8).

13. ¿Carguyoq këta munaq kaqkunallaku Biblia ninqanta cumpliyänan?

¹³ ¿Siervu ministerialkunallaku Biblia ninqanta cumpliyänan? Manam, llapan cristiänukunam. Llapankunam kallpachakuyänan Jehoväpa mas amïgun kayänampaq, wawqi panikunata yanapayänampaq y Jehovä munanqannö kawakuyänampaq. Tsëta musyanqëkim yanapashunki siervu ministerial këta munanëkipaq. Peru ¿imakunatataq carguyoq këta munaq wawqikuna cumpliyanman?

KËKUNATAM CUMPLINAN

14. ¿Imatataq siervu ministerialkunaqa rurayanman “respetëpaq” kayänampaq? (1 Timoteu 3:8-10, 12).

¹⁴ Kananqa siervu ministerialkuna imanö kayänampaq kaqta 1 Timoteu 3:8 a 10 y 12 (leyi) ninqanta yachakurishun. Siervu ministerialkunaqa “respetëpaq[mi] kayänan”. Tsënö nirqa, manam mana asikuyänampaqtsu ni brömata mana rurayänampaqtsu nikan (Ecl. 3:1, 4). Tsëpa rantinqa, juk siervu ministerialqa, llapan ruranampaq kaqkunatam alli cumplinan y confiakuypaqmi kanan. Tsënöpam congregacionchö wawqi panikunaqa respetayanqa.

15. ¿Ima nitataq munëkan “manam ishkëtatsu parlayänan” y “manam engañakur imatapis tarita munaqtsu kayänan” nirqa?

¹⁵ “Manam ishkëtatsu parlayänan”. Tsënö nirqa nikan rasumpa kaqta parlayänampaq y confiakuypaq kayänampaqmi. Parlayanqantaqa cumpliyänanmi y manam  pitapis engañayänantsu (Prov. 17:20). “Manam engañakur imatapis tarita munaqtsu kayänan”. Tsënö nirqa nikan negociu asuntuchö honrädu kayänampaq y congregacionpa qellënintapis alli cuidayänampaqmi. Y manam qellëta ganëta munarqa, cristiänu mayinkunapita provechakuyänantsu.

16. (1) ¿Ima nitataq munëkan “manam alläpa vïnuta upuyänantsu” nirqa? (2) ¿Ima nitataq munëkan ‘limpiu concienciayoqmi’ kayänan nirqa?

¹⁶ “Manam alläpa vïnuta upuyänantsu”. Tsënö nirqa nikan machayanqanyaq alcoholta mana upuyänampaqmi o alläpa upyaq kayanqampita reqishqa mana kayänampaqmi. Tsënöllam ‘limpiu concienciayoq’ kayänan. Tsënö nirqa nikan Jehovä mandakunqankunata cäsukur kawakuyänampaqmi. Rasunmi, llapantsikpis pantantsikmi, peru Jehovä mandakunqankunata cäsukurninqa kushishqam kawakushun.

17. ¿Imanötan anciänukuna musyayanman juk wawqi siervu ministerial këta puëdinampaq kaqta? (1 Timoteu 3:10; rikäri fötuta).

¹⁷ “Puntataqa carguta chaskinampaqnö kayanqantaraq rikäyë”. Tsënö nirqa nikan siervu ministerial kanampaq manaraq churarnin confiakuypaq kanqantaraq alli rikäyänampaqmi. Tsëmi imatapis ruranampaq anciänukuna mandayaptinqa, pëkuna niyanqannölla y Jehoväpa sirweqninkunata dirigeqkuna niyanqannölla rurayänampaq kallpachakuyänan. Clärum musyayänan imanö rurayänampaq kaqta y imë ushayänampaq kaqta. Rurayänampaq kaqkunata alli cumpliyaptinqa, congregacionchö wawqi panikunam cuentata qokuyanqa Diospa kaqchö alli poquykäyanqanta. Anciänukuna, ¿congregacionnikikunachö mëqan wawqikunatataq siervu ministerial kayänampaq yanapëta puëdiyankiman? (Leyi 1 Timoteu 3:10). Këllaman pensarishun: ¿congregacionnikichö kayanku 10 a 14 watayoq o mas jövin wawqikuna? Bibliata japallankunalla estudiayaptin, reunionkunachö parlakuyaptin y yachatsikoq seguïdu yarquyaptinqa, edäninkunata cuentaman churëkur y imakunata rurëta puëdiyanqanta cuentaman churëkurmi imachö yanapakuyänampaqpis churëta puëdiyanki. Tsënöpam cuentata qokuyanki tsë jövin confiakuypaq o mana confiakuypaq kanqanta. Y mas jövinyäriptinqa, clärunam musyayanki siervu ministerial këta puëdinqanta o mana puëdinqanta.

18. ¿Ima nitataq munëkan ‘imapitapis mana acusashqam’ kanan nirqa?

 ¹⁸ Siervu ministerialkunaqa, ‘imapitapis mana acusashqam’ kayänan. Tsënö nirqa nikan juk wawqi jutsata rurashqa karqa o rurëkarqa, siervu ministerial këta mana puëdinampaq kaqtam. Rasunmi, cristiänukunataqa Jesustanöpis höraqa mana kaqpitam acusayanman. Jesusqa clärum nirqan qateqninkunataqa mana kaqkunapita acusayänampaq kaqta (Juan 15:20). Tsënö kaptimpis, juk wawqiqa Jesusnömi alli portakunan, y tsënö portakuptinqa congregacionchö wawqi panikunapis respetayanqam (Mat. 11:19).

19. ¿Ima nitataq munëkan ‘juk warmiyoqllam’ kanan nirqa?

¹⁹ Siervu ministerialkunaqa, ‘juk warmiyoqllam’ kayänan. Casädu vïdata qallananchö Jehovä patsätsinqantam respetayänan. Tsëmi siervu ministerial këta munaq wawqiqa, juk warmillawan casädu kanan (Mat. 19:3-9). Y manam warminta traicionarnin juk warmikunawan kakunantsu (Heb. 13:4). Y manam tsëllatsu, warmintam respetanan y manam juk warmikunataqa enamorëpa parlapänantsu ni atiendipänantsu (Job 31:1).

20. ¿Imanötan juk wawqi familianta alli diriginman?

²⁰ Siervu ministerialkunaqa, ‘wamrankunata y familiankunata shumaq dirigitam’ yachayänan. Familiayoq karqa, familianta alli cuidëta y dirigitam yachanan. Diosta Adoranantsik Höratam cada semäna rurayänan y llapan familianwanmi yachatsikoq seguïdu yarquyänan. Y wamrankunatam Jehoväpa mas amïgun tikrayänampaq yanapayänan (Efes. 6:4). Familianta alli cuidaq wawqiqa, wawqi panikunatapis allim cuidanqa (igualaratsi 1 Timoteu 3:5 textutawan).

21. Manaraq siervu ministerial karqa, ¿imatataq rurankiman?

²¹ Manaraq siervu ministerial karqa, ¿imatataq rurankiman? Jehovämanmi mañakunëki, kë yachatsikuytam alli estudianëki y cumplinëkipaqmi kallpachakunëki. Jehoväta y wawqi panikunata kuyanqëkiman alli pensë, y pëkunata yanapanëkipaq kallpachakuy (1 Pëd. 4:8, 10). Yarpë, wawqi panintsikkunaqa familiantsik cuentam kayan. Pëkunata yanaparqa, kushishqam sientikunki. Siervu ministerial kanëkipaq kallpachakuykanqëkichö, ¡Jehovä Diosnintsik yanapëkushuy! (Filip. 2:13).