1, 2. (1) ¿Imanötaq wakin cristiänukuna sientikuyan vïdankunachö cambiukuna kaptin? (Rikäri kë yachatsikïpa qallananchö këkaq fötuta). (2) Salmus 131 kaq capïtuluchö ninqannöpis, ¿imaraq yanapamäshun mas alli sientikunapaq?

LLOYD jutiyoq wawqi y warmin Alexandraqa, 25 watapitapis masmi Betel wayichö sirwiyarqan. Betelchö manana sirwiyänampaq niriyaptinmi alläpa llakikuyarqan. Lloyd wawqin kënö nin: “Betelchö trabajëqa alläpam gustamaq, tsëmi imëpis Betel-llachö yanapakïta munarqä. Tsënö kaptimpis, cambiukuna imanir kanqantaqa entiendirqämi, peru semänakuna y killakuna pasanqanmannömi alläpa llakikoq kä. Höraqa tsë cambiukuna allipaq kashqa kanqantam pensaq kä, peru tsëpitaqa llakishqanam sientikoq kä”.

² Mana pensanqantsik höra cambiukuna kaptinqa alläpam yarpachakuntsik y llakikuntsik (Prov. 12:25). Y manam fäciltsu yachakärintsik. ¿Imaraq yanapamäshun tsë cambiukunachö mas tranquïlu sientikunapaq y yachakänapaq? (Leyi Salmus 131:1-3 *). Rikärishun  Diospa unë y kanan sirweqninkuna vïdankunachö cambiukuna kaptin ima yanapashqa kanqanta.

3. ¿Imakunapataq Josëqa pasarqan?

³ Jacobqa wamran Josëtam alläpa kuyaq. Tsëmi Josëtaqa wawqinkuna alläpa chikiyaq, y 17 watayoqnö këkaptinmi esclävu kanampaq rantikuyarqan (Gen. 37:2-4, 23-28). Josëqa cäsi 13 watapam Egiptuchö esclävu karnin y carcelchö llawirarnin sufrishqa karqan, y masqa sufrirqan kuyashqa teytampita karu markachö karninmi. ¿Imaraq yanaparqan alläpa mana yarpachakunampaq y mana piñakunampaq?

4. (1) Carcelchö llawiranqan witsanqa, ¿imataq Josëtaqa yanaparqan? (2) Y ¿imanötaq Jehoväqa yanaparqan?

⁴ Carcelchö llawirëkarqa, Josëqa Jehovä imanö yanapëkanqanmanchi mas yarpararqan (Gen. 39:21; Sal. 105:17-19). Jinamampis, wamra këkarnin suëñunqankunachi Diosman mas markäkunampaq yanaparqan (Gen. 37:5-11). Y atska kutichi Josëqa imanö sientikunqanta Jehoväta willarqan (Sal. 145:18). Y Jehoväqa mañakunqanta contestarqanmi y pë yanapanampaq kaqman mas confiakunampaqmi yanaparqan (Hëch. 7:9, 10). *

5. ¿Imanötaq Diosqa yanapamantsik pëta sirwirnin sïguinapaq?

⁵ Kanan tiempuqa illaqpitam mana allikuna pasaramashwan. Tsënö kaptimpis alläpa mana yarpachakunapaqmi Jehoväqa ‘yamë këninwan’ yanapamënintsikta puëdin (leyi Filipensis 4:6, 7). Tsëmi alläpa yarpachakïyoq kanqantsik höra y mana alli sientikunqantsik hörakuna Jehoväman mañakushun. Y pëqa yamë këtam qomäshun, tsëmi sirwirnin sïguinapaq yanapamäshun. Rikärishun wakin wawqikunata y panikunata Jehovä imanö yanapanqanta.

6, 7. Imanö sientikunqantsikta Jehoväta willanqantsikqa, ¿imanötaq yanapamantsik mas alli sientikunapaq? Willakaramï.

⁶ Ryanwan warmin Julietteqa alläpam llakikuyarqan precursor especialnö manana kayänampaq niriyaptin. Tsëmi jinan höra Jehoväman mañakuyarqan. Ryanmi kënö nin: “Kananqa Jehoväman alläpa confiakuyanqätam rikätsikuyänä karqan. Yanapakïkäyanqä congregacionchöqa, mëtsikaq wawqikuna y panikunam tsëllaraq bautizakushqa kayarqan, tsëmi Jehoväman mañakuyarqä pëkunapaq alli ejemplun kayänäpaq”.

⁷ ¿Imanötaq Jehoväqa mañakuyanqanta contestarqan? Ryanmi kënö nin: “Mañakurirllam alli sientikuyarqä y yarpachakïnïkunapis karqannatsu. Diospa yamë këninmi yanapayämarqan llakikur manana yarpachakuyänäpaq. Y cuentatam qokuriyarqä Jehoväpa kaqkunachö mas yanapakur sïguita munarqa, Jehoväman confiakuyäna precisanqanta”.

8-10. (1) Alläpa mana yarpachakunapaqqa, ¿imanötaq Diospa santu espïritun yanapamantsik? (2) Imapapis pasëkarnin Diospa kaqta puntaman churashqaqa, ¿imanötaq Jehovä yanapamäshun?

⁸ Jehoväqa santu espïritunwanmi mas tranquïlu sientikunapaq yanapamantsik, jina ima mas precisaq kanqanta rikätsikoq textukunata yarpänapaqpis yanapamantsikmi (leyi Juan 14:26, 27). Rikärishun Philip jutiyoq wawqi y warmin Mary ima cambiukunapa pasayanqanta. Pëkunaqa cäsi 25 watapam Betelchö yanapakuyarqan. Peru Betelpita yarquriyanqanchö chusku killallatam, ishkampa mamäninkuna y Philip-pa juk familian wanukïkurqan. Jinamampis, Marypa papäninqa qeshyëkarqanmi y pëtam cuidayänan karqan.

⁹ Phlip wawqim kënö nin: “Tsë pasayämanqankunachö  alli aguantëkanqätam pensaq kä, tsënö kaptimpis mana allim sientikoq kä. Juk kutim Täpakoq revistata leyikarnin Colosensis 1:11 textuta tarirqä, tsëmi cuentata qokurirqä Biblia ninqannö mana rurëkanqäta. Kë textum rikätsimarqan ima problëmapa pasarnimpis, kushishqa y pacienciakur aguantanäpaq kaqta. Y yarpärirqämi alli sientikunapaq y kushishqa kanapaqqa imapis pasamanqantsikpita mana kanqanta, sinöqa Diospa santu espïritun yanapamanqantsikpita kanqanta”.

¹⁰ Awmi, Philipwan Maryqa Jehoväpa kaqtam puntaman churayarqan, y tsënö rurayanqampitam Jehoväqa bendicishqa. Betelpita yarqurirllam, Bibliapita yachakïta munaq nunakunata taririyarqan, y tsë nunakunaqa rasllam yachakur qallëkuyarqan. Tsëman yarparmi Maryqa kënö nin: “Diosta reqiyänampaq tsë nunakunata yanapayanqämi alläpa kushitsiyämashqa. Y Jehovä yanapëkäyämanqantam rikäyarqä”.

11, 12. (1) ¿Imatataq Josë rurarqan Jehoväpa bendicionninta chaskinampaq? (2) ¿Imanötaq Jehoväqa Josëta bendicirqan?

¹¹ Mana pensanqantsik höram kawënintsikqa cambiarinman, tsëqa alläpa yarpachakïtam apamun. Këman pensarishun, Josëqa manam problëmankunallamantsu yarparäkurqan, tsëpa rantinqa llapan puëdinqanmannömi mëchö këkarpis alli rurëta procurarqan. Por ejemplu, Potifarpa wayinchö trabajanqannöllam, Josëqa carcelchö llawirëkarpis, niyanqankunata alli rurëta procurarqan y tsënö ruranqampitam Jehoväqa bendicirqan (Gen. 39:21-23).

¹² Juk kutim Faraonpa cortinchö trabajaq ishkaq nunakunata carcelman llawiyarqan, y pëkunata cuidanampaqmi Josëta churayarqan. Josëqa tsë nunakunata alleqmi tratarqan, tsëmi tsë nunakunaqa Josëman mas confiakurnin imakunaman yarpachakuyanqanta y tsë ampi imata suëñuyanqanta willariyarqan (Gen. 40:5-8). Josëqa manachi ichikllapis pensarqantsu tsë nunakuna willayanqan, vïdanchö alläpa yanapanampaq kaqta. Awmi, ishkë wata pasariptinmi carcelpita yarqurqan y yarqunqan junaqllam Egiptuchö puëdeq nuna tikrarirqan (Gen. 41:1, 14-16, 39-41).

13. Jehovä bendicimänata munarqa, ¿imatataq ruranantsik?

¹³ Itsa noqantsikpis problëmakunapa pasëkantsik, y Josënöpis controlëta puëdishuntsu. Peru pacienciawan y llapan puëdinqantsikmannö alli kaqta rurëta procurashqaqa, Jehoväqa bencimäshunmi (Sal. 37:5). Tsënö kaptimpis höraqa llakikuntsikmi, peru apostol Pablu ninqannöpis manam “yarqïta pasëpa mana puëdeqnötsu” këkantsik (2 Cor. 4:8). Awmi, Jehoväta sirwirnin sïguinapaq kallpachakushqaqa pëqa yanapamäshunmi.

14-16. Vïdanchö cambiukuna kaptimpis, ¿imata rurartaq Felïpiqa sïguirqan?

¹⁴ Vïdantsikchö ima cambiukuna kaptimpis, Diosta sirwir sïguinapaqqa Felïpi jutiyoq punta cristiänupitam yachakïta puëdintsik. Felïpiqa Jerusalen congregacionchö yanapakunampaqmi juk mushoq carguta chaskirqan y kushishqam yanapakïkarqan (Hëch. 6:1-6). Peru Diospa sirweqnin Estëbanta wanuratsiyanqanllachömi cristiänukunata chikir qatikachar qallëkuyarqan. * Tsëmi wakin cristiänukunaqa Jerusalenpita escapar ewkuyarqan, peru Felïpiqa Diospita yachatsikur sïguinampaqmi Samaria markata ewkurqan, porqui tsë markachöqa tsëllaraqmi Diospita yachatsikur qallayashqa kayarqan (Mat. 10:5; Hëch. 8:1, 5).

¹⁵ Felïpiqa listum këkarqan, Diospa santu espïritun pushaptin mëmampis yachatsikoq ëwanampaq. Tsëmi Jehoväqa utilizarqan Diospita manaraq yachatsikuyanqan markakunachö yachatsikunampaq. Tsë witsanqa, Samariapita nunakunatam judïukunaqa alläpa chikiyaq y mana allipam tratayaq. Peru Felïpiqa llapantapis igualpam tratarqan, tsëchi Samaria nunakunaqa alli sientikuyarqan y yachatsinqantapis shumaq wiyakuyarqan. (Hëch. 8:6-8).

¹⁶ Jina Asdod y Cesarëa markakunachö yachatsikunampaqpis santu espïritum Felïpitaqa pusharqan. Tsëchöqa mana judïu kaq nunakunam täräyaq (Hëch. 8:39, 40). Samariachö 20 watapanö Diospita yachatsikïkaptinmi Felïpipa vïdanqa yapë cambiarirqan. Tsëmi Familiayoqna karnin Diospita yachatsikïkanqan markachö quedakurqan. Tsë cambiukunapa pasëkarnimpis Felïpiqa Diospita yachatsikurninmi ocupädu karqan, y tsënö ruranqampitam pëta y familianta Jehoväqa alläpa bendicirqan (Hëch. 21:8, 9).

17, 18. Cambiukuna kaptimpis Diospita yachatsikur ocupädu kashqaqa, ¿imanötaq yanapamantsik?

¹⁷ Llapan tiempunkunawan Diosta sirweq wawqikuna y panikunam niyan, cambiukuna kaptimpis Diospita yachatsikur ocupädu kayanqan alli tsarakuyänampaq yanapashqa kanqanta. Rikärishun Sudafricapita Obsorne jutiyoq wawqita y warmin Politeta ima pasanqanta. Pëkunaqa Betelpita yarqurirlla trabäjuta y täräyänampaq wayita raslla tariyänampaq kaqtam pensayarqan. Peru manam tsënötsu karqan. Y tsë wawqim kënö nin: “Manam pensayanqänötsu trabäjutaqa ras tariyarqä”. Y paninam kënö nin: “Kima killapam trabäjuta tariyarqätsu y qellënïkunapis manam karqantsu. Tsëmi noqakunapaqqa alläpa yarpachakïpaq karqan”.

¹⁸ ¿Imataq kë wawqikunata yanaparqan alli  tsarakuyänampaq? Obsorne wawqim kënö nin: “Yarpachakurlla mana kayänäpaqmi, congregacionchö cristiänu mayïkunawan yachatsikur kayanqä alläpa yanapayämashqa. Awmi, problëmäkunaman yarpachakuyänäpa rantinmi, Diospita yachatsikur mas ocupädu kayarqä. Tsëmi alläpa kushitsiyämashqa y trabäjutapis taririyarqämi”.

19-21. (1) Yamë kënintsik mana ushakänampaqqa, ¿imaraq yanapamäshun? (2) Cambiukuna kaptin raslla yachakanqantsikqa, ¿imanötaq yanapamäshun?

¹⁹ Kë ejemplukunapitaqa yachakuntsik, imapapis pasarqa Jehoväman mas confiakunapaq y puëdinqantsikmannö imatapis ruranapaqmi. Tsëqa yamë y tranquïlu sientikunapaqmi yanapamäshun (leyi Miquëas 7:7 *). Itsa rikarquntsik tsë cambiukunaman yachakëta procuranqantsikqa, Diospa kaqchö mas fuerti kanapaq yanapamanqantsikta. Polite jutiyoq panim imapa pasanqampita kënö nin: “Juk mushoq asignacionta chaskiyanqämi yanapamashqa mana allikunapa pasëkarnimpis Jehoväman mas confiakuyänäpaq. Kananqa Dioswanmi mas amïgu kayä”.

²⁰ Kë yachatsikïpa 8 kaq pärrafuchö parlanqantsik pani Maryqa, papäninta cuidëkanmi y precursöranömi yanapakur sïguin. Y kënömi nin: “Alläpa yarpachakunqä hörakunaqa, Diosmanmi mañakü, tsëmi alli sientikunäpaq yanapaman. Kananqa imapapis pasarninqa Jehovämanmi confiakü. Tsëqa hasta shamoq tiempuchöpis yanapamanqam”.

²¹ Qallanan pärrafuchö parlanqantsik Lloyd jutiyoq wawqi y warmin Alexandranam kënö niyan: “Vïdäkunachö cambiukunaqa Diosman markäkuyanqätam pruëbaman churakashqa. Jina kënömi niyan: “Pruëbakunapa pasanqantsikqa markäkïnintsik sinchi këkanqanta o mana këkanqantam rikantsik. Y kananqa mas alli nunanam kayä”.

22. Puëdinqantsikmannö kallpachakurqa, ¿imapitataq següru këkäshun vïdantsikchö cambiukuna kaptimpis?

²² Juk asignacionrëkur, salornintsikrëkur o familiantsikta cuidanantsikrëkur cambiukuna kaptinqa vïdantsikqa illaqpitam cambiarinman.Tsënö kaptimpis Jehovä yanapamänapaq kaqmanmi confiakunantsik (Heb. 4:16; 1 Pëd. 5:6, 7). Tsëqa puëdinqantsikmannö alli kaqta rurëkäshun. Y teytantsik Jehoväwan mas amïgu kanapaq mañakushun y cuidamänapaq kaqman confiakushun. Tsëmi yanapamäshun vïdantsikchö ima cambiukuna kaptimpis tranquïlulla këkänapaq.