1, 2. (1) ¿Ima rurëtaq Jesuspaqqa mas precisarqan, y imanir? (2) Diospa alli minkankuna kanapaqqa, ¿imatataq ruranantsik?

JESUSQA carpintëru y Diospita yachatsikoqmi karqan (Mar. 6:3; Rom. 15:8). Pëqa ishkan trabäjuntapis allim rurarqan. Carpintëru karninqa llapan herramientankunatam alli utilicëta yachakurqan, tsënöpa qerupita imëkata ruranampaq. Y Diospa Palabrampita nunakunata yachatsinampaqmi, yachaq këninta y entiendeq këninta alleq utilizarqan (Mat. 7:28; Lüc. 24:32, 45). 30 watayoq këkarninmi, Jesusqa carpintërunö trabäjunta dejarïkur Diospa Gobiernumpita yachatsikurllana karqan. Porqui kikin nirqan, kë Patsaman tsëta ruranampaq Teytan kachamushqa kanqanta (Mat. 20:28; Lüc. 3:23; 4:43). Tsëmi pëpaqqa Diospita yachatsikï masqa precisarqan. Y wakinkunapis pënölla rurayänantam munarqan (Mat. 9:35-38).

² Manam llapantsiktsu carpintërunö trabajantsik, tsënö kaptimpis Diospa alli willakïninkunataqa llapantsikmi yachatsikunantsik. Kë rurëqa Diospaq alläpam precisan, tsëmi kikimpis tsë rurëchö yanapakun. Bibliachöqa nimantsik, ‘Diospa minkankuna’ kanqantsiktam (1 Cor. 3:9; 2 Cor. 6:4). Alleqmi musyantsik, Diospa Palabranllachö rasumpa kaq këkanqantaqa (Sal. 119:159, 160). Tsëmi, Diospita yachatsikurnin “rasumpa kaq palabranta” alli utilicëta yachakunantsik (leyi 2 Timoteu 2:15). Jehoväpita, Jesuspita y Diospa Gobiernumpita rasumpa kaqta yachatsikunapaqqa, Bibliam yanapamantsik. Tsëmi kallpachakunantsik cada junaq Bibliata mas alli utilizänapaq. Jina Jehoväpa markanqa mas yanapakïkunatam jorqamushqa alli yachatsikoq kanapaq.  Tsë yanapakïkunaqa kayan yachatsikunantsikpaq publicacionnintsikkunam.

3. (1) Kë ushanan junaqkunachöqa, ¿imata ruranantsiktaq masqa precisan? (2) Hëchus 13:48 textu ninqannöpis, ¿pikunatataq yachatsinantsik?

³ ¿Imanirtaq yachatsikunantsikpaq publicacionnintsikkuna nir reqintsik, y Diospita willakunapaqmi nirtsu? Tsënöqa reqintsik, porqui Diospita willakïqa, nunakunata Diospita parlapëllam. Peru yachatsikïqa, nunakuna entiendiyänampaq y yachakuyanqanmannö kawakuyänampaq yanapëmi. Kë ushanan junaqkunachö mas precisaq rurënintsikqa kanman, nunakunata Bibliapita y rasumpa kaqta yachatsinantsikmi. Tsëta ruranapaqqa, Diospita yachakïta munaqkunata llapan puëdinqantsikmannö ashinantsik, y Jehoväpa sirweqnin tikrayänampaqmi yanapanantsik (leyi Hëchus 13:44-48).

4. ¿Imatataq ruranantsik Diospita yachakïta munaqkunata tarinapaq?

⁴ ¿Imatataq ruranantsik ‘imëyaqpis kawakïta chaskiyänampaq kallpachakïkaqkunata’ tarinapaq? Apostolkuna kawayanqan witsanchö rurayanqannöllam Diospita yachatsikunantsik, tsëta rurarllam wiyakïta munaqkunataqa tarishun. Tsëpaqqa Jesus kënö mandakunqantam cäsukunantsik: “Më markaman o caserïuman yëkurpis, alli chaskikoq kaqta tariyanqëkiyaq ashiyanki” (Mat. 10:11). Musyantsikmi orgullösukuna y Diospita yachakïta mana munaqkunaqa, yachatsikunqantsikta mana chaskikuyänampaq kaqta. Tsëmi alli shonquyoq kaqkunata, humildi kaqkunata y rasumpa kaqta yachakï munaqkunata ashintsik. Tsëta maslla entiendirinapaq këllaman pensarishun. Jesusqa mas alli kaq qerutam asheq; y herramientankunatam alleq utilizaq, punkukunata, yügukunata, sïllakunata, mësakunata y maskunata ruranampaq. Tsënöllam noqantsikpis rurantsik, puntataqa alli shonquyoq nunakunatam ashinantsik; y tsëpitanam Jesuspa qateqnin tikrayänampaq qomanqantsik yanapakïkunata alli utilizänantsik (Mat. 28:19, 20).

5. Yachatsikunantsikpaq publicacionnintsikkunata imanö utilizänapaq kaqta willakaramï (rikäri kë yachatsikïpa qallananchö këkaq fötukunata).

⁵ Herramientakunaqa tukïta ruranapaqmi yanapakun. Carpintërunö trabajarnin Jesus utilizanqan herramientakunaman pensarishun. * Wakin herramientankunaqa, qeruta medinampaq y marcanampaqmi sirweq. Wakinqa qeruta roqunampaq, uchkunampaq y llaqllanampaqmi sirweq. Y wakinnam qeruta parijanampaq y armanampaq sirweq. Tsënöllam yachatsikunantsikpaq publicacionnintsikkunatapis, cada cäsuman pensëkur rurayämushqa. Tsëchö këkaqkunaqa llapampis alläpa precisan y imanö utilizänapaq kaqta rikärishun.

6, 7. (1) ¿Imanötaq jw.org tarjëtakunata utilizarqunki? (2) Reunionpaq invitacionkunaqa, ¿ima ishkë rurëkunapaqtaq yanapakun?

⁶ Jw.org tarjëtakuna. Këkunaqa takshalla yanapakïkunam kayan, peru pikuna kanqantsikta reqimänapaq y Internetchö päginantsikman yëkuyänampaqqa alläpam yanapakun. Päginantsikchöqa mëtsika yachatsikïkunatam tarita puëdiyan, jina tsëllapam Bibliapita yachatsiyänampaqpis mañakurita puëdiyan. Kananyaqqa, jw.org päginantsikpam, 400 milpitapis mas nunakuna Bibliapita yachatsiyänampaq mañakuyashqa. Y ¡cada junaqmi mëtsikaq Bibliapita yachatsiyänampaq mañakur sïguikäyan! Tsëmi alläpa alli kanman kë tarjëtantsikkunata imëpis puritsinantsik, tsënöpam mëchö këkar y imata rurëkarpis Diospita yachatsikurita puëdishun.

⁷ Invitacionkuna. Reunionkunapaq invitacionchöqa, “Jehoväpa testïgunkunawan Bibliapita yachakunëkipaqmi invitariyaq” ninmi. Tsëpitanam Bibliapita mëchö yachakïta munanqanta rikätsikun. Tsëtaqa rurëta puëdiyan reunionkunachö o wayinkunachöpis. Kë yanapakïqa, manam  pikuna kanqantsikta reqimänantsikllapaqtsu yanapakun, sinöqa ‘Dios pushananta wanaqkunatapis’ Bibliapita yachatsinapaqmi yanapakun (Mat. 5:3). Bibliapita yachakïkaqta o mana yachakïkaqtapis reunionkunaman shamuptinqa shumaqmi chaskintsik. Reunionkunaman ëwarqa, kikinkunam cuentata qokuriyanqa Bibliapita mëtsikata yachakïta puëdinqanta.

8. ¿Imanirtaq alläpa precisan reunionnintsikman shayämunampaq nunakunata invitanantsik? Juk pasakunqanwan willakaramï.

⁸ ¿Imanirtaq alläpa precisan juk kutillapis reunionnintsikman shayämunampaq nunakunata invitanantsik? Porqui reunionnintsikkunaman shamurninqa, kikinkunam cuentata qokuriyanqa mana alli religionkunapita Jehoväpa testïgunkuna jukläya kanqantsikta. Jina cuentatam qokuriyanqa rasumpa kaqta yachatsikunqantsikta y Diosta reqiyänampaq yanapanqantsikta (Is. 65:13). Raytawan warmin Lindata pasanqanta rikärishun. Pëkunaqa Estädus Unïdus nacionpitam kayan, y Diosta mas reqita munarmi markanchö këkaq iglesiakunaman ëwayänampaq decidiyarqan. Markanchöqa atska iglesiakuna y mëtsika religionkunam karqan. Tsëmi pëkunaqa decidiyarqan, juk iglesiachö quedakuyänampaqqa ishkë rurëkunata rikëta munayanqanta. Puntataqa rikëta munayarqan, tsë iglesiachö imata yachatsikuyanqantam. Tsëpitanam rikëta munayarqan, tsë iglesiaman ëwaq nunakuna imanö vistishqa ëwayanqanta. Atska watakunapam markanchö këkaq llapan iglesiakunamanqa ëwayarqan, peru manam ni mëqan religionpis pensayanqannötsu karqan, porqui manam imatapis yachakuyarqantsu y tsëman ëwaqkunaqa manam shumaqtsu vistikuyaq. Ultimu kaq ëwayanqan iglesiapita yarqurirmi Lindaqa trabajaq ëwakurqan y Raynam wayinta kutikurqan. Wayinta kutikarmi, Rayqa Diosta adoranantsik wayita rikärirqan, tsëmi kënö pensarirqan: “¿Imanirtaq yëkurïtsu imata rurayanqanta musyanäpaq?” Musyanqantsiknöpis, yëkurirqa alläpa kushishqam sientikurqan. Porqui tsëchö këkaq nunakunaqa alläpa shumaqmi chaskiyarqan y shumaq vistishqam kayarqan. Rayqa puntachömi täkurqan y Bibliapitam imëkata yachakurqan. Reunionkunaman puntata ëwaqkunapaq apostol Pablu ninqannömi karqan. Tsë nunakunaqa kënömi niyarqan: “Diosqa rasumpam qamkunachö këkan” (1 Cor. 14:23-25). Tsëpita patsëqa, llapan domingukunam Rayqa reunionkunaman ëwar qallëkurqan y tsëpitanam llapan reunionkunaman ëwarqan. Y warmin Lindapis yanaqarmi qallëkurqan. Y 70 watapitapis masyoq këkarmi Bibliapita yachakuyänampaq decidiyarqan y bautizakuyarqan.

9, 10. (1) ¿Imanirtaq tratädukunata utilicëqa fäcil-lla? (2) ¿Imataq Diospa Gobiernun? tratäduwan imanö yachatsikunapaq kaqta, willakaramï.

⁹ Tratädukuna. Nunakunata parlapar qallanapaq fäcil utilizänalla puwaq tratädukunam kapamantsik. Tsë tratädukunataqa 2013 watachömi jorqayämurqan, y tsëpita patsëqa 5 mil millonnömi jorqakämushqa. Tsë tratädukunataqa fäcil-llam utilicëta puëdintsik, porqui jukta utilicëta yachakurirqa wakintapis utilicëta yachashunnam. Peru ¿imanötaq nunakunata parlapar qallanapaqqa kë tratädukunata utilizashwan?

¹⁰ ¿Imataq Diospa Gobiernun? nishqan tratäduwan itsa yachatsikïta decidirqunki. Tsëqa jana qaranchö këkaq tapukïta rikäratsir kënö tapuri: “¿Imëllapis tapukurqunkiku Diospa Gobiernun ima kanqanta? Këkunapitaqa ¿mëqan kanqantaraq pensanki?”. Alli o mana alli contestamushqa kanqanta mana nishllapa “Biblia yachatsikunqan” nishqan päginata rikäratsi, y tsëchö këkaq Daniel 2:44 y Isaïas 9:6 textukunata leyiriyë. Y yachëkätsinqëki nuna masta yachakïta munaptinqa, yachatsirnin sïgui. Y tsëpitana, “Këta tapukï” nishqanchö këkaq tapukïta rurari. Tsëchöqa kënömi nin: “¿Imanöraq kawakï kanqa Diospa Gobiernunchö?”. Tsë tapukïqa yanapamäshun watukaq kutinapaqmi. Y watukaq kutirninqa, Diospa alli willakïninkuna nishqan follëtupa 7 kaq yachatsikïninta  rikäratsi. Kë follëtuqa rurakämushqa, Bibliapita yachatsikur qallanapaqmi.

11. ¿Imapaqtaq revistantsikkunaqa jorqakämun, y imatataq tsë revistakunapita musyanantsik?

¹¹ Revistakuna. Täpakoqwan ¡Despertad! revistakunaqa imëka publicacionkunapitapis mas traducishqam, y entëru Patsamanmi chan. Mëtsika nacionkunachö leyiyaptinmi, jana qaranchö imapita parlanampaq kaqtaqa alleq pensëkur churayan, tsënöpa entëru Patsachö këkaq nunakuna Diospita yachakïta maslla munayänampaq. Tsë revistakunataqa utilizantsik, kawëninkunachö ima mas precisaq kanqanta nunakunata yachatsinapaqmi. Tsënö kaptimpis, tsë revistakuna yanapakunampaqqa cada revista pikunapaq rurashqa kanqantam alleq musyanantsik.

12. (1) ¿Pikunapaqtaq ¡Despertad! revistataqa jorqayämushqa, y imapaqtaq kë revistaqa yanapakun? (2) Diospita yachatsikunqëkichö kë revista imanö yanapashunqëkita willakaramï.

¹² ¡Despertad! * revistataqa, Bibliapita ichiklla o mana imatapis musyaq nunakunapaqmi jorqayämushqa. Tsë nunakunaqa itsa rasumpa kaqta musyayantsu, religionman alläpa markäkuyantsu o kawëninkunachö Bibliapa consëjunkuna imanö yanapakunqanta musyayantsu. Kë revistaqa, Dios rasumpa kanqanta nunakuna creiyänampaqmi masqa yanapan (Rom. 1:20; Heb. 11:6). Jina kë revistaqa, Biblia Diospa Palabran kanqanta nunakuna creiyänampaqmi yanapan (1 Tes. 2:13). 2018 watachö tsëllaraq yarqamoq ¡Despertad! revistapa tïtulunkunaqa kayan, “El camino de la felicidad”, “12 claves para una familia feliz” y “Ayuda para quienes están de duelo” nishqankunam.

13. (1) Täpakoq revistaqa, ¿pikunapaqtaq jorqakämushqa? (2) Diospita yachatsikunqëkichö kë revista imanö yanapashunqëkita willakaramï.

¹³ Llapan nunakunapaq yarqamoq Täpakoq revistaqa, jorqakämushqa Diosta y Palabranta respetaq nunakunapaqmi. Tsë nunakunaqa Bibliapita ichikllatam musyayan, peru imata yachatsikunqantaqa manam alleqllaqa entiendiyantsu (Rom. 10:2; 1 Tim. 2:3, 4). 2018 watachö tsëllaraq yarqamoq Täpakoq revistapa tïtulunkunaqa këkunam kayan: “¿Bibliaqa kanan witsan yanapakuntsuraq?”, “Shamoq tiempuqa ¿imanöraq kanqa?” y “¿Diosqa qampaq yarpachakunku?”.

14. (1) ¿Imapaqtaq yanapakun yachatsikunantsikpaq publicacionnintsikkunachö këkaq videukunaqa? (2) Diospita yachatsikunqëkichö kë videukuna imanö yanapashunqëkita willakaramï.

¹⁴ Videukuna. Jesus kawanqan witsan carpintërukunaqa, makillawan utilizäna herramientakunallatam utilizäyaq. Peru kananqa electricidäwan utilizäyanqan herramientakunam kan. Tsë herramientakunapita wakinqa kayan, qeruta roquyänampaq, uchkuta rurayänampaq, lïjayänampaq y clavayänampaq mäquinakunam. Tsënöllam kanan witsampis papelchö yarqamoq publicacionkunallatsu kapamantsik, sinöqa alläpa shumaq videukunapis kapamantsikmi. Tsë videukunaqa yachatsikunantsikpaq publicacionnintsikkunachömi këkan. Y këkunam kayan: ¿Imanirtaq Bibliapita yachakunkiman?, ¿Imanötaq Bibliapita yachatsikïnëkuna?, ¿Imanötaq reunionnïkuna? y ¿Pikunataq Jehoväpa testïgunkunaqa kayä? Parlapar qallanapaqqa, ishkë minütu o mas wallkaqlla duraq videukunatam utilicëta puëdintsik. Y tsëpita mas tiempu duraqkunataqa yapë watukaq ëwanapaq y mas tiempunkuna kaq nunakunata yachatsinapaqmi utilicëta puëdintsik. Kë videukunaqa yanapakun, nunakuna Bibliapita yachakïta munayänampaq y reunionkunaman ëwëta munayänampaqmi.

15. Idiömankunachö rikäyanqan videukuna imanö yanapakushqa kanqanta willakaramï.

¹⁵ Videukuna imanö yanapakunqanta rikärishun. Micronesia nacionpita juk warmitam, juk pani ¿Imanirtaq Bibliapita yachakunkiman? neq videuta yapes idiömachö rikäratsirqan. Videu qallëkuptinmi tsë warmiqa kënö nirqan: “¡Manam creiritsu,  parlanqä idiömachötaq kë videuqa këkan! Y tsëchö parlëkaq nunaqa täranqä islachö parlayanqannömi parlan”. Tsëpitanam nirqan, jw.org päginachö këkaq yapes idiömachö publicacionkunata leyinampaq y videukunata rikänampaq (igualaratsi Hëchus 2:8, 11 textuwan). Jina Estädus Unïduspita juk panipis, juk nacionchö täraq sobrinunmanmi tsë videullata idiömanchö rikänampaq nirirqan. Tsëpaqqa Internetchö këkaq päginapa direccionnintam mandarirqan. Tsë videuta rikärirnam, tsë jövinqa juk mensäjipa tiyanta kënö nirqan: “Tsë videupitaqa masqa gustamashqa, kë munduta juk chikikoq makinchö këkätsinqanta musyanqämi. Tsëmi Bibliapita yachatsiyämänampaq mañakurirqö”. Kë jövinqa, yachatsikunqantsikta michäkuyanqan nacionchömi täran.

16. Willakaramï kë follëtukuna pikunata yachatsinapaq kanqanta: (1) Diosta wiyakï imëyaqpis kawakunëkipaq. (2) Diospa alli willakïninkuna. (3) ¿Pikunataq Jehoväpa munëninta rurëkäyan?

¹⁶ Follëtukuna. Juk nuna alläpa leyita mana yachaptin o idiömanchö publicacionkuna mana kaptinqa, ¿imanötaq rasumpa kaqta yachatsita puëdishwan? Tsëpaqqa Diosta wiyakï imëyaqpis kawakunëkipaq * neq follëtum yanapashunki. Jina Diospa alli willakïninkuna nishqan follëtupis, nunakunata Bibliapita yachatsir qallanapaqmi yanapamantsik. Tsë follëtuwan imanö yachatsikunapaq kaqta rikärishun. Puntataqa ushanan päginachö këkaq 14 yachatsikïninkunata rikäratsi y tsëpitana mëqanta yachakïta munanqanta tapuri, y akranqan yachatsikïpita yachakuye. ¿Imëllapis watukaq kutirnin tsënö yachatsikurqunkiku? Yachatsikunantsikpaq publicacionnintsikkunachö këkaq kima kaq follëtuqa, ¿Pikunataq Jehoväpa munëninta rurëkäyan? nishqanmi. Kë follëtuqa yanapakun, Bibliapita yachakïkaqkuna Jehoväpa markanta maslla reqiyänampaqmi. Imanö utilizänapaq kaqta musyëta munarqa, Reunionchö Yachakunapaq marzu 2017 nishqanta rikäri.

17. (1) ¿Imachötaq yanapakun Bibliapita yachatsikunapaq utilizanqantsik librukunaqa? (2) ¿Imatataq llapan bautizakushqakuna rurayänan, y imanir?

¹⁷ Librukuna. Juk follëtuwan Bibliapita pitapis yachëkätsirqa, ¿Imakunatataq Biblia yachatsimantsik? nishqan librumanmi cambiarita puëdintsik. Kë libruqa, Bibliapa precisaq yachatsikïninkunata entiendiyänampaqmi yanapakun. Tsë libruta yachakur usharishqana kaptin y Dios munanqannöna kawëkaptinqa, Dios Yayapa kuyakïninchö imëpis kawakuyë nishqan libruwanmi yachatsir sïguinantsik. Kë libruqa, Bibliapita yachakunqanmannö ruranampaqmi yanapanqa. Tsë ishkan librukunapita yachakur manaraq usharnin bautizakushqa karnimpis, yachakurmi sïguinan hasta ushanqanyaq. Tsënöpam yachëkätsinqantsik nunaqa shonqupita patsë rasumpa kaqta kuyanqa (leyi Colosensis 2:6, 7).

18. (1) 1 Timoteu 4:16 textuchö ninqannö, ¿imatataq ruranantsik, y ruranqantsikpitaqa imatataq nunakuna chaskiyanqa? (2) ¿Imapaqtaq yachatsikunantsikpaq publicacionnintsikkunata utilizänantsik?

¹⁸ Nunakuna imëyaqpis kawakïta tariyänampaqmi, Jehoväpa testïgunkunaqa rasumpa kaqta yachatsikuntsik (Col. 1:5; leyi 1 Timoteu 4:16). Y tsë rurënintsikchö yanapamänapaqmi, yachatsikunantsikpaq publicacionnintsikkunachö atska yanapakïkuna kapamantsik (rikäri “ Yachatsikunantsikpaq publicacionnintsikkuna” neq recuadruta). Tsë yanapakïchö këkaqkunapita mëqan publicacionkunata y imë utilizänapaq kaqtaqa cada publicadorkunam decidiyänan. Peru yarpänantsikmi, noqantsikqa manam publicacionkunata qarakoqllatsu ëwantsik ni wiyakïta mana munaq nunakunata jaqipoqtsu. Tsëpa rantinqa, “imëyaqpis kawakïta chaskiyänampaq” kallpachakïkaqkunata, alli shonquyoq nunakunata y humildi nunakunata rasumpa kaqta yachatsinapaqmi ëwantsik. Tsënöpa, pëkunapis Jesuspa qateqninkuna tikrayänampaq (Hëch. 13:48; Mat. 28:19, 20).