1. ¿Imanirtaq Jehovällata sirwinantsik?

KAMAMASHQANTSIK kaptinmi, Jehoväqa pëllata sirwinantsikta munan (Rev. 4:11). Jehoväta kuyashqa y respetashqapis, juk asuntukunam pantaratsimashwan y pëllata sirwinata michämashwan. Tsë mana pasamänapaqqa, tsëman imanö ishkirinapaq kaqtam alleq entiendinantsik. Peru puntataqa, Diosllata sirwi ima ninan kanqanta rikärishun.

2. Exodu 34:14 textu ninqannö, ¿imatataq rurashuntsu Jehovällata sirwirqa?

² Jehovällata sirwinantsikpaqqa llapan shonquntsikwan pëllata kuyanantsik alläpa precisanqantam Bibliachöqa nin. Y pëllata sirwinapaqqa, pëllatam adoranantsik. Pëtanöqa, manam ni imata ni pita kuyashwantsu (leyi Exodu 34:14 *).

3. ¿Imata yachakunqantsikpitataq Jehovällata sirwintsik?

³ Jehovätaqa sirwintsik, pëpita yachakunqantsikpitam. Imanö kanqampitam yachakurquntsik. Imata gustanqanta y mana gustanqantam musyantsik y noqantsikpis pënölla kanapaqmi kallpachakuntsik. Noqantsikpaq imata munanqantam musyantsik y tsë voluntänin cumplikänampaqmi mandakunqannö kawarnin yanapakuntsik. Amïgun kanapaq permitimanqantsikpitam alläpa agradecikuntsik (Sal. 25:14). Kamamaqnintsikpita llapan yachakunqantsikmi pëwan mas alli amïgu kanapaq yanapamantsik (Sant. 4:8).

4. (1) Jehovällata mana sirwinapaqqa, ¿imatataq Diabluqa ruran? (2) Kë yachatsikïchöqa, ¿imatataq yachakushun?

⁴ Kë munduchö imëka kaqkunaqa, Diablupa makinchömi këkan, y tsëkunatam utilizan juk cösaskunata mas precisaqpaq  churanapaq y mana alli munënintsikkunata tsaränan mas difïcil kanampaq (Efes. 2:1-3; 1 Juan 5:19). Jehovällata sirwinantsikpa rantinmi, juk cösaskunata kuyanata munan. Ishkë asuntuchö tsëta logrëta puëdinqanta rikärishun. Puntataqa, imëkayoq kanapaqmi tentamënintsikta munan. Y ishkë kaqchöqa, kushikunapaq rurëkunata mana alli akranapaqmi tentamantsik.

5. ¿Imanirtaq qellëta kuyëman mana ishkinapaq cuidakushwan?

⁵ Mikïta, röpata y täränapaq juk sitiutaqa llapantsikmi munantsik. Peru qellëta kuyëpitam alläpa cuidakunantsik. Kanan witsan nunakunaqa, ‘qellëtam kuyayan’ y tsëwan imëkayoq këtam gustayan (2 Tim. 3:2). Qateqninkunapis qellë kuyëman ishkita puëdiyanqantaqa Jesusqa musyarqanmi, tsëmi kënö nirqan: “Manam pipis ishkë patronpa sirweqnin këtaqa puëdintsu; porqui bienmi jukninta chikinqa y jukninta kuyanqa, o bienmi jukninta yachananqa, y jukninta desprecianqa. Qamkunapis manam Diospa y Kapoqyoq Këpa sirweqnin këta puëdiyankitsu” (Mat. 6:24). Diosta adorëkar imëkayoq kanampaq trabajaq nunaqa, ishkë patronta sirwikaq cuentam këkanman. Manam Jehovällatatsu sirwin.

6. Laodicëa markachö creikoqkunata Jesus ninqampitaqa, ¿imatataq yachakuntsik?

⁶ Apostolkuna kawayanqan tiempu ushëkaptinmi, Laodicëa markachö këkaq creikoqkunaqa kënö niyaq: “Kapoqyoqmi kä y imëkakunatam tarirqö y manam ni imatapis wanätsu”. Peru Jehoväpa y Jesuspa rikëninchöqa, llakipëpaq, waktsa y wiskum kayarqan, jina qalapächu cuentam këkäyarqan. Jesusqa manam imëkayoq kayanqampitatsu piñaparqan, sinöqa kapoqyoq kayanqan Jehoväwan amïgu këninkunata ushakëkätsiptinmi (Rev. 3:14-17).  Shonquntsikchö imëkayoq këta munë yurikanqanta cuenta qokurirqa, jinan höram tsë munëta ushakätsinantsik (1 Tim. 6:7, 8). Tsëta mana rurashqaqa, shonquntsikmi ishkëman rurakärinqa y llapan shonquntsikwan pëllata sirwinantsikta Jehovä munaptinmi, adoranqantsiktaqa chaskinqatsu (Deut. 4:24). ¿Imataq qellë kuyëman ishkiratsimashwan?

7-9. ¿Imatataq creikoqkunata rikaq David wawqipita yachakuntsik?

⁷ Estädus Unïdus nacionchö täraq y creikoqkunata rikaq alli trabajaq David wawqita ima pasanqanta rikärishun. Pëqa alli trabajador kanqantam nin. Trabajanqan emprësachömi mas precisaq carguman churariyarqan, y tsë trabäjuchöqa wakinkunapitapis tsë nacionchö mas yachaq kanqantam niyarqan. Pëmi kënö willakun: “Tsë witsankunaqa tsë llapanta logranqäqa Jehoväpa bendicionnin kanqantam pensarqä”. Peru ¿tsënöku karqan?

⁸ Jehoväwan amïgu këninta ushakëkätsinqantam cuentata qokurirqan. Kënömi nin: “Reunionkunachö këkar y Diospita yachatsikïkarpis, trabäjuchö problëmakunamanmi pensakïkaq kä. Mëtsika qellëtam ganaq kä, peru mas utishqam sientikoq kä y casädu kawënïchöpis problëmakunam yurir qallëkamurqan”.

⁹ Tsëmi Davidqa, imakunata mas precisaqpaq churanampaq kaqta pensar qallëkurqan. Kënömi nin: “Mas precisaq cösaskunata puntaman churanäpaqmi churapakarqä”. Tsëmi mas wallka tiempullana trabajanampaq decidirqan y patronnintam tsëta willarirqan. Peru trabäjumpitam qarquriyarqan. ¿Y imatataq rurarqan? Kënömi willakun: “Waränin junaqmi precursor auxiliar kanäpaq solicitudnïta creikoqkunata rikaqkunata entregarirqä”. Y warminwanmi wayikunata limpiapakur trabajar qallëkuyarqan. Ichik mas tiemputanam  Davidqa precursor regular kanampaq mañakurqan, y tsëpita mas tiemputanam warmimpis precursöra regular tikrarirqan. Wakinkuna despreciayanqan trabäjuchömi trabajar qallëkuyarqan, peru tsënö rikäyanqantaqa manam cuentapaq churayarqantsu. Unë ganayanqampita chunka kuti mënusta ganarpis, cada killa gastunkunapaqqa tinkunmi. ‘Diospa Gobiernunta y pëpa rikëninchö alli kaq rurëkunata’ puntaman churayanqampita Jehovä imanö cuidanqantam rikäyashqa (Mat. 6:31-33).

10. ¿Imanötaq shonquntsikta cuidanantsik?

¹⁰ Atskata o ichikllata ganashqapis, shonquntsiktam cuidanantsik. ¿Imanö? Imëkayoq këta mana munapar y Jehoväta sirwipita trabäjuntsikta puntaman mana churarmi. Imata puntaman churëkanqantsikta musyanapaqqa, kënömi tapukunantsik: “¿Reunionkunachö këkar y Diospita yachatsikïkarpis trabäjümanku mas yarparäku? ¿Warë warätin imawan kawanäpaq kaqmanku alläpa yarpachakü? ¿Qellërëkur y imëkayoq këta munanqärëkurku casädu kawakïnïchö problëmakuna kan? Jehoväta mas sirwinäpaqqa, ¿wakinkuna despreciayanqan trabäjuta chaskikümanku?” (1 Tim. 6:9-12). Tsëkunaman yarpachakurqa, ama qonqashuntsu Jehovä alläpa kuyamanqantsikta y shonqupita patsë sirweqninkunata këta äninqanta: “Manam ni imëpis jaqirishqëkitsu, y manam ni imëpis qampita witikurishaqtsu”. Tsëmi apostol Pabluqa kënö consejakurqan: “Kawayanqëkichöqa [ama] qellë kuyë katsuntsu” (Heb. 13:5, 6).

11. ¿Imanötaq kushikunapaq rurëkunaqa mana allikunaman chätsimashwan?

¹¹ Jehoväqa kushishqa kawakunatam munan, y tsëpaqqa kushikunapaq rurëkunam yanapamashwan. Bibliachöpis kënömi nin: “Nunapaqqa, mikunqampita, upunqampita y alli trabajar logranqampita kushikïnöqa, manam ni imapis kantsu” (Ecl. 2:24). Peru kë munduchö kushikunapaq rurëkunaqa, cäsi llapanmi mana allikunalla kayan. Alli kaq rurëkunatam mana allitanö rikätsikun y Diospa Palabran condenanqankunata rurayänampaqmi nunakunata inkitan.

12. 1 Corintius 10:21 y 22 textuchö ninqannö, ¿imanirtaq kushikunapaq rurëkunata alli akranantsik?

¹² Noqantsikqa Jehovällatam sirwita munantsik, tsëmi “Jehoväpa mësampita” y “supëkunapa mësampita” mikoq cuentaqa këkashwantsu (leyi 1 Corintius 10:21, 22). Piwampis  imallatapis mikuyanqanqa amïgu kayanqantam rikätsikun. Tsëmi kushikunapaqqa maqanakïkaqkunata, brujerïata rurëkaqkunata, rakchakunata rurëkaqkunata o noqantsikchö mana alli munëkunata o rurëkunata yuritseqkunataqa mana rikashwantsu. Tsëqa, Diosta chikeqkuna cocinayanqanta mikurinapaq täkureq cuentam kanman. Tsëta rurashqaqa, kikintsiktam mana allita rurakushun y Dioswan amïgu kënintsiktam ushakätsishun.

13, 14. (1) ¿Imachötaq kushikunapaq rurëkunaqa mikunqantsik mikïwan igualan? (2) Santiägu 1:14 y 15 textu ninqannö, ¿imanirtaq noqantsikchö mana alli munëkunata yuritseqkunataqa rurashwantsu ni rikashwantsu?

¹³ ¿Imachötaq kushikunapaq rurëkunaqa mikunqantsik mikïwan igualan? Mikunqantsik höraqa, kikintsikmi imata mikunapaq kaqta rikantsik. Peru pachantsikman charkuptinqa, manam ima rurëta puëdintsiknatsu. Pachantsikchöqa, alimentämänapaq kaqkunaqa kikinllanam entëru cuerpuntsikman chärin. Allikunata mikushqaqa, manam qeshyashuntsu, peru mana allikunata mikushqaqa qeshyarishunmi. Y tsëtaqa manam waränin junaqllatsu rikäshun, sinöqa mas tiempu pasariptinraqmi.

¹⁴ Kushikunapaq rurëkunawampis tsënöllam pasakun. Noqantsikmi peqantsikman imata yëkatsinapaq kaqta decidintsik. Peru peqantsikman yëkuriptinqa, alli o mana alli pensëkunata y alli o mana alli munëkunataqa kikinllanam yuritsin. Kushikunapaq alli kaq rurëkunata akrashqaqa, kushikushunmi, peru mana allita akrashqaqa mana allimanmi chätsimäshun (leyi Santiägu 1:14, 15). Mana alliman chätsimanqantsiktaqa, itsa waränin junaqllatsu rikärishun, peru mas tiempu pasariptinqa clärum rikakärinqa. Tsëmi Bibliachöqa kë consëju escribirëkan: “Cuidakuyë pantatsishqa këpita: Diospitaqa manam pipis burlakïta puëdintsu. Porqui imatam nuna murïkan, tsaq tsëllatam seganqapis; porqui pipis jutsasapa ëtsanman yarpëkur murïkaq kaqqa, jutsasapa ëtsampitam ushakëta seganqa” (Gäl. 6:7, 8). Tsëmi, Jehovä chikinqan mana alli rurëkunaman inkitakoq kushikunapaq rurëkunataqa, ni imata akrashwantsu (Sal. 97:10).

15. ¿Ima qarëtataq Jehoväpita chaskirquntsik?

¹⁵ Jehoväta sirweq mëtsikaq wawqi panintsikkunatam, JW Broadcasting^® päginantsikta rikëta gustan. Marilyn jutiyoq panim kënö nin: “Internetchö këkaq tsë päginaqa, mas kushishqa kanäpaqmi yanapamashqa, y llapampis allilla kaptinmi, mantsaq mantsaqlla rikätsu. Japallä y qelanashqa sientikunqä höraqa, juk discursuta o Qoyakunapa Bibliapita Yachatsikayämunqantam tarirï y tsëqa yapëmi kallpäta yuriratsin. Tsëqa Jehoväman y sirweqninkunamanmi mas wititsimashqa. JW Broadcastingchö videukunaqa, chipyëpam kawënïta cambiarishqa”. ¿Jehoväpa tsë qarëninta provechëkantsikku? Cada killa yarqamoq videukunapitapis, imë höra karpis juk videukunata, grabacionkunata y shumaq cancionkunatam wiyëta y rikëta puëdintsik.

16, 17. ¿Imanirtaq kushikur rurëkunachö ëka tiempu kanqantsikta alli rikänantsik, y imanötaq tsëtaqa rurashwan?

¹⁶ Manam kushikunapaq imata akranqantsikllatatsu alli rikänantsik. Jina tsëkunawan kushikur ëka tiempu kanqantsikpitapis allim rikänantsik, sinöqa Jehoväta sirwinapa rantinmi, kushitsimanqantsik rurëkunata rurakur mas tiempu kakushun. Wakinqa manam tsëkunata rurar ëka tiempu kayänampaq kaqta decidita puëdiyantsu. 18 watayoq Abigail panim kënö nin: “Alläpa utishqa këkanqä junaqqa, televisionta rikëmi jamaratsiman. Peru tiempüta mana controlaptïqa, mëtsika höram rikaräkü”. Y Samuel jövinnam kënö nin: “Höraqa, Internetchö wallkalla duraq videukunatam atska hörakuna rikaräkurqö.  Jukllëta rikarmi qallëkü, y cuentata qokurinäpaqqa 3 ö 4 hörakunanam pasarishqa”.

¹⁷ ¿Kushikunapaq rurëkunachö ëka tiempu kanapaq kaqtaqa imanötaq rikashwan? Puntataqa, tsëkunachö ëka tiempu kanqantsiktam musyanantsik. Itsa tsëpaqqa, juk semänachö televisionta rikarar, Internet-ta rikarar y celularchö o tablëtachö pukllar ëka höra kanqantsikta juk calendariuman apuntarishwan. Tsëkunata rurar atska tiempu këkanqantsikta cuenta qokurirqa, tiempuntsiktam shumaq patsätsinantsik. Puntataqa, precisaq cösaskunapaqmi tiempuntsikta patsätsinantsik, tsëpitanam kushikunapaqqa. Tsëpitaqa, patsätsinqantsikmannö ruranapaqmi Jehoväta yanapamänapaq mañakunantsik. Tsëta rurashqaqa, Bibliata estudianapaq, familiantsikwan estudiar Diosta adoranapaq, reunionkunapaq y Diospita yachatsikunapaq y Jesuspa qateqninkuna kayänampaq nunakunata yanapanapaqmi tiempuntsik y kallpantsik kapamäshun. Tsëkunata puntata rurashqaqa, kushikur ruranqantsikpitaqa manam mana alliqa sientikushuntsu.

18, 19. ¿Imanötaq Jehovällata sirwinqantsikta rikätsikushwan?

¹⁸ Satanaspa makinchö këkaqkuna ushakänampaq kaqta y mushoq Patsa kanampaq kaqta escribirirmi, apostol Pëdruqa kënö nirqan: “Kuyashqa wawqikuna y panikuna, tsëkunata shuyarëkarninqa llapan puëdiyanqëkita rurayë ushananchö limpiuta, llapanchö allita y yamë këkaqta pë tariyäshunëkipaq” (2 Pëd. 3:14). Tsë consëjuta wiyakushqa y llapan kawënintsikchö y Diospa kaqchö limpiu kanapaq llapan puëdinqantsikmannö kallpachakushqaqa, Jehovällata sirwikanqantsiktam rikätsikushun.

¹⁹ Satanas y pëpa makinchö këkaqkunaqa, juk cösaskunata mas puntaman churanapaqmi tentamarnintsik sïguiyanqa (Lüc. 4:13). Peru ima problëmakunapa pasashqapis, Jehovällata mas puntaman churanapaqqa manam ni ima ni pï michämänataqa jaqinantsiktsu. Pëllata sirwinapaqmi churapakarquntsik.