ALLÄPA tamyanampaq kaqta o räyukunampaq kaqta rikaq nunaqa, kutin kutinmi computadörata rikan. Y juk markachö räyukur alläpa tamyananta musyarirqa, nunakunaman yarpachakurmi, tsë tamya manaraq chaptin kutin kutin willatsikun.

Tsëkuna pasakunampaq willatsikoq nunanöllam, Jehoväqa, Patsachö llapan nunakunata alläpa jatun desgracia kanampaq kaqta willatsikïkan, tsë desgraciaqa manam räyukur alläpa tamyanöllatsu kanqa. ¿Imanötaq willatsikïkan? ¿Y imanirtaq nintsik tsëkuna pasakunampaq kaqta atska tiempuraq pishikanqampita willatsikïkanqanta? Tsëta musyanapaqqa, unë witsanchö pasakunqankunapaq Jehovä willatsikushqa kanqanta rikärishun.

Unë witsankunaqa, mandakunqankunata musyëkar mana wiyakoqkunata castiganampaq kaqtaqa, Jehoväqa atska kutim willatsikurqan (Prov. 10:25; Jer. 30:23). Castiganampaq atska tiempuraq pishikaptinmi, Dios munanqannö kawayänampaq imata rurayänampaq kaqta tsë nunakunata willatsirqan (2 Rey. 17:12-15; Neh. 9:29, 30). Y pë munanqannö kawayänampaqqa, Jehoväqa Patsachö mana jaqipa sirweqninkunatam mandarqan tsë castïgukunapita willakuyänampaq, y tsë nunakuna ras cambiayänan alläpa urgenti kanqanta musyatsiyänampaq (Amos 3:7).

Tsë willakoq nunakunapitaqa Noëmi jukqa karqan. Mana alli kaqta ruraq y lïsu nunakunatam, Apakï Tamya kanampaq kaqta mana mantsakushpa atska watapa willarqan (Gen. 6:9-13, 17). Jina mana wanuyänampaq imata rurayänampaq kaqtapis willarqanmi. Gänas gänaslla tsëta willakushqa kanqampitam, “alli kaq rurëkunapita willakoq” nunanö reqishqa karqan (2 Pëd. 2:5).

Kutin kutin willakïkaptimpis, Noë kawanqan witsan nunakunaqa, manam Dios willatsikunqan willakïta creiyarqantsu ni cäsukuyarqantsu. Tsëmi ‘Apäkï Tamya shamur llapankunata ushakäratsirqan’ (Mat. 24:39; Heb. 11:7). Dios willatsikushqa kanqantaqa Manam neguëta puëdiyarqantsu.

Juk kutikunachöqa, castïguta apamunampaq ichikllana pishikaptinmi Jehoväqa nunakunata willatsirqan. Tsënö kaptimpis, nunakuna mana ushakäyänampaq tiempunkuna kanampaqmi alli segurakurqan. Tsëtam rurarqan Egiptuta 10 castïgukunawan castiganqanchö. 7 kaq castïguchö runtuta manaraq tamyatsiptin ima pasakunqanta rikärishun. Egiptuchö gobernaqta y sirweqninkunata willayänampaqmi, Jehoväqa Moisestawan Aaronta mandarqan. Waränin junaqran runtunan karqan, tsëqa, ¿tiempunkuna karqanku wayinkunaman yëkuyänampaq? Bibliachömi kënö nin: “Egiptuchö gobernaqpa wakin sirweqninkunaqa, Jehovä ninqanta cäsukurmi animalninkunata qeykupakuyarqan, y sirweqninkunatapis wayi rurinman yëkuyänampaqmi niyarqan. Peru Jehovä ninqanta mana cäsukoqkunaqa, manam animalninkunata qeykupakuyarqantsu y sirweqninkunatapis manam wayi rurinman yëkuyänampaq niyarqantsu” (Ex. 9:18-21). Clärum këkan, Jehoväqa atska tiempu pishikaptinmi tsë castïgupaq willatsikurqan. Tsënö kaptinmi, jinan höra wiyakoq nunakunaqa tsë castïgupita salvakuyarqan.

Jina Jehoväqa 10 kaq castïguta manaraq apamurmi, Egiptuchö gobernaqta y pëpa sirweqninkunata willatsirqan. Peru pëkunaqa mana wiyakoq karmi imatapis rurayarqantsu (Ex. 4:22, 23). Tsëmi mayor kaq tsurinkuna wanuyarqan. Tsëqa alläpa llakikïpaqchi karqan (Ex. 11:4-10; 12:29). ¿Tiempunkuna karqantsuraq wamrankunata imanöpapis salvayänampaq? Awmi. ¿Imanirtaq tsëta nintsik? Moisesqa, tsë castïgu shamunampaq kaqta y familiankuna mana wanuyänampaq imata rurayänampaq kaqtam llapan israelïtakunata willatsirqan (Ex. 12:21-28). ¿Y ëkaqtaq Moises  ninqanta wiyakuyarqan? Kima millon nunakunam. Tsë nunakunachöqa, manam israelïtakunallatsu këkäyarqan, jina “mana israelïta kasta kaqkunapis mëtsikaqmi” wiyakuyarqan, wakinqa Egiptu nunakunam kayarqan. Tsë llapan nunakunam Diospa castïgunkunapita salvakuyarqan y Egiptupita ëwakuyarqan (Ex. 12:38).

Këchö rikärinqantsiknöpis, Jehoväqa atska tiempu pishikaptinmi castïgukunata apamunampaq nunakunata willatsirqan, tsënöpa tsë nunakuna wiyakuyänampaq o mana wiyakuyänampaqpis kikinkuna decidiyänampaq (Deut. 32:4). ¿Imanir? Apostol Pëdrum kënö nirqan: “[Jehoväqa] manam munantsu pipis ushakänanta; tsëpa rantinqa, llapankuna arrepentikuyänantam munan” (2 Pëd. 3:9). Awmi, Diosqa llapan nunakunapaqmi yarpachakun. Pëqa, castïguta manaraq apamuptin nunakuna arrepentikuyänanta y consejakunqankunata wiyakuyänantam munan (Is. 48:17, 18; Rom. 2:4).

Kanan witsankunapis entëru Patsapa willakïkäyanqan willakïtam nunakuna urgenti wiyakuyänan. Jesusqa Patsachö këkarmi kanan witsan nunakuna ‘alläpa jatun sufrimientuchö’ ushakäyänampaq kaqta willakurqan (Mat. 24:21). Tsë junaq manaraq chämuptin imakuna pasakunampaq kaqta y imakunapa pasayänampaq kaqtam qateqninkunata musyatsirqan. Entëru Patsachö kanan witsankuna rikëkanqantsik alläpa espantëpaq cösaskuna pasakunampaq kaqtam nirqan (Mat. 24:3-12; Lüc. 21:10-13).

Jesus musyatsikunqanqa cumplikëkannam, tsëmi mandakunqankunata wiyakuyänampaq y sirwiyänampaq Jehoväqa willatsikïkan. Pëqa, kanan witsan llapan wiyakoqkuna mas alli kawakuyänanta y Mushoq Patsachö mëtsika bendicionkunata chaskiyänantam munan (2 Pëd. 3:13). Änikunqankunaman nunakuna confiakuyänampaqmi, Jehoväqa ‘Gobiernumpita alli willakïkunata’ willatsikïkan, y tsëta wiyakurqa, nunakunaqa salvakïta puëdiyanmanmi. Jesusqa, tsë willakï ‘llapan nacion nunakuna musyayänampaq entëru patsachö willakushqa kanampaq’ kaqtam nirqan (Mat. 24:14). Diosqa, tsë willakïta 240 nacionkunachö y juk sitiukunachö musyatsikuyänampaqmi sirweqninkunata churashqa. Tsë willakïta mëtsika nunakuna wiyayänanta y tsë castïgupita salvakuyänantam munan (Sof. 1:14, 15; 2:2, 3).

Tsëqa, manam castïguta manaraq apamur ëka tiempuwan willatsikunqantatsu tapukunantsik, sinöqa, willatsikunqanta nunakuna cäsukuyänampaq kaqta o mana cäsukuyänampaq kaqtam. Rikärinqantsiknöpis, Jehoväqa atska tiempu pishikaptinmi castïguta apamunampaq willatsikun. Diospita willakoqkunaqa, mana allikunapa ushakënin manaraq chämuptinmi, llapan puëdinqantsik nunakunata yanapëta tïranantsik.