Tsë witsankunaqa, Jehovä Diosqa yanaparqanmi alli willakuykunata kushishqa yachatsikuyänampaq. Tsë watachöqa 225 llapan tiempunkunawan yachatsikoqkunapitaqa 350 mirariyarqan. Tsë watachöran öchu milpitapis mas Diospa willakoqninkunaqa, ëka höra yachatsikuyanqanta sucursalman willakuyarqan. Jehovämi pëkunataqa bendicikarqan.

1920 wata 21 de marzuchömi Biblia yachakoqkunapa dirigeqnin wawqi Joseph Rutherfordqa, “Kanan tiempu kawaqkunaqa manam imëpis wanuyanqatsu” nishpa yachatsikurqan. Tsë reunionman ëwayänampaqmi Biblia yachakoqkunaqa tukuynöpa pï mëta invitayarqan. Pëkunaqa Nueva York markachömi mas jatun kaq localta alquilayarqan. Tsëpitanam cäsi 320.000 invitacionkunawan invitakuyarqan.

Tsë localmanqa cincu mil nunapitapis masshi juntariyänaq y sieti milnash waqtallachö quedakuyänaq. Tsëpaq parlarmi tsë witsan revistantsikqa, “tsë kutichönö Biblia yachakoqkuna mana ëllukäyanqanta” nirqan.

Biblia yachakoqkunaqa “Kanan tiempu kawaqkunaqa manam ni imëpis wanuyanqatsu” niyanqanwanmi reqishqa tikrariyarqan. Tsë witsanqa, Diospita yachatsikuyänampaq atskaraq pishinqanta mana musyarpis kushishqam pëkunaqa yachatsikuyarqan. 1902 wata pani Ida Olmstead reunionkunaman ëwar qallanqantam kënö willakun: “Mëtsika bendicionkunata nunakuna chaskiyänampaq kaqta musyarmi Diospa alli willakuyninkunataqa pï mëta yachatsir sïguiyarqä”.

Nunakuna Diospita yachakur sïguiyänampaqmi wawqikunaqa Betelchö revistakunata y librukunata rurar qallëkuyarqan. Tsëpaqqa mäquinakunatam rantiyarqan y Brooklyn Betelpa amänunllachömi juk edificiuta alquilayarqan, tsëmanmi tsë mäquinakunataqa patsätsiyarqan. Tsë sitiuqa këkarqan Myrtle cällichömi.

Leo Pellewan Walter Kessler wawqikunaqa 1920 wata enëru killachömi Betelchö yanapakur  qallayarqan. Waltermi cuentakun: “Chäriyashqällachömi imprentachö carguyoq wawqiqa, ichikllanam almuerzupaq pishin niyämarqan. Tsëmi cäjakunata lloqatsir qallëkuyarqä”.

Leonam qateqnin junaqchö pasakunqanta willakun: “Tsë junaqqa Myrtle cällichö këkaq edificiuchömi limpiapakuyarqä. Alläpa sasa kaptimpis kushishqam limpiapakuyarqä”.

Juk ishkë semänallachömi tsëchö yanapakoqkunaqa imprimir qallëkuyarqan The Watch Tower revistata, castellänuchöqa La Torre del Vigía ninmi. 1920 wata 1 de febrëru killapaq revistatam 60.000 imprimiyarqan. Y wawqikunaqa juk mäquina mastam patsätsiyarqan. Tsë mäquinatam Acorazädu nir jutitsiyarqan. Tsëchömi imprimiyarqan Despertad revistata. 1920 wata 14 de abrilpaq revistatam tsëchö imprimir qallayarqan. Tsë llapan rurayanqantaqa Jehovä bendicirqanmi.

Jehovä Diosta mana dejëpa sirweqkunaqa yapëmi kushishqa yachatsikur qallëkuyarqan. Peru wakin Biblia yachakoqkunaqa 1917 watapita hasta 1919 watayaqmi Diospita yachatsikuyta dejashqa kayarqan. ¿Imanöraq yanapayarqan?

1920 wata 1 de abril The Watch Tower revistachömi “Yamë kawakushun” neq yachatsikuychö kënö nirqan: “Segürum këkäyä, Teyta Diospa yanapakuyninwan imëka rurayanqankunata dejayänampaq kaqta. Tsënö rurarnin juknölla y kushishqa kawakuyänampaq kaqta”.

Mëtsikaqmi tsë yachatsikuyta wiyakuyarqan, tsëtam juk familia kënö qellqarqan: “Noqakunaqa alläpam llakikuyarqä juk wata maspa Teyta Diospita mana yachatsikuyanqäpita, mananam yapëqa dejëta munayänatsu”. Kë wawqi panikunaqa imëkataran rurayänan karqan.

1920 wata 21 de junium Biblia yachakoqkunaqa imëkanöpa “El misterio terminado” libruta rakikur qallëkuyarqan. Tsë librutaqa 1918 watachöshi rakikuyänanta  michäkuyaptin atskata guardëkushqa kayänaq.

Tsë libruta qarakuyänampaqqa llapan Biblia yachakoqkunatam invitayarqan. Tsëpaqmi kënö qellqayarqan: “Llapan bautizashqa wawqi panikunam ‘El misterio terminado’ libruta kushishqa qarakuyänan”. Wawqi Edmund Hoopermi nirqan atskaq wawqi panikunaqa tsëraq wayin wayin yachatsikur qallayanqanta. Y kënöpis nirqanmi: “Wayin wayin yachatsikuy më tsëman chänampaq kaqtam musyariyarqä”.

Punta kaq Jatun Guërra pasarishqanchömi, wakin nacionkunachö Biblia yachakoqkunawan parlëqa manam fäciltsu karqan. Tsëmi wawqi Rutherfordqa pëkuna yapë yachatsikuyänampaq yanapaq ëwarqan. Pëwan chuskoq yanaqinkunaqa 1920 wata 12 de agostuchömi Gran Bretäña nacionpa y mas nacionkunapa yanapakoq ëwayarqan.

Gran Bretäñachö Biblia yachakoqkunaqa kima asamblëata y 12 reunionkunatam rurayarqan. Tsëmanqa 50.000 nunakunam juntakäyarqan. Kë revistam tsëpaq kënö willakun: “Wawqi panikunaqa alläpam kushikuyarqan juknölla y kuyanakur Jehovä Diosta sirwiyanqampita. Shonqunkunapis ankashyäriptinmi kushishqana sientikuyarqan”. Paris markachönam wawqi Rutherfordqa yapë “Kanan tiempu kawaqkunaqa manam imëpis wanuyanqatsu” nir yachatsikurqan. Tsë reunionmanqa mëtsikaqmi juntakäyarqan y 300 nunakunam mas yachakuyta munayarqan.

Qateqnin semänakunanam wawqikunaqa Atenas, El Cairu y Jerusalenman ëwayarqan. Tsë markakunachö nunakuna yachakuyta munayaptinmi, wawqi Rutherfordqa Ramäla markachö librukuna y revistakuna kanampaq juk localta patsätsirqan. Tsëpitanam librukunata y revistakunata imprimiyänampaq juk sucursalta rurayänampaq patsätsirqan.

1920 wata setiembri killachömi, 27 kaq The Golden Age revista willakurqan 1918 watachö Biblia yachakoqkuna qatikachashqa kayanqanta. Tsënö këkarpis paqasta junaqtash Acorazädu mäquinawanqa 4 millonpitapis mas revistakunata imprimiyänaq.

 Tsë revistata leyeqkunaqa, Estädus Unïdus nacionpa San Bernardïnu markapita llapan tiempunwan yanapakoq pani Emma Martinpa cäsuntash musyariyänaq. 1918 wata 17 de marzuchömi paniqa wawqi Edward Hammwan, Edward Sonnenburgwan y Ernest Stevenswanshi Biblia yachakoqkunapa reunionninkunaman ëwayänaq.

Juk nunaqa manash Diospita yachakoqtsu ëwashqa kanaq. Tsëtam kënö willakun: “Tsë reunionmanqa juk fiscalmi mandamarqan imallatapis taripurnin pëkunata acusayänäpaq”. Tsë nunaqa, “El misterio terminado” librutash acusayänampaq taririnaq. Tsëpita juk ishkë junaqkunallachöshi pani Martintawan kiman wawqikunataqa tsaririyänaq. Michäkuyanqan libruta rakikuyanqanrëkurshi pëkunataqa acusariyänaq.

1920 wata 17 de mäyum kima watapa carcelchö kayänampaq chuskunta llawiriyarqan. Peru mana pensayanqanshi pasakunaq.

San Franciscu markachömi 1920 wata 20 de juniuchö, juk asamblëachö wawqi Rutherfordqa tsë cristiänukunawan pasanqanta willakurqan. Tsënö mana kaqpita acusayanqanta musyarirshi, tsë asamblëachö wawqi panikunaqa Estädus Unïduspa presidentinman cartakuyänaq: “Emma Martintaqa mana kaqpitam acusayarqunki. Pëtaqa kikin autoridäkunam mana kaqta ashïkurnin tumpatsar carcelman llawitsiyarqun”.

Qateqnin junaqllam Woodrow Wilson presidentiqa pani Martinta, wawqi Hammta, wawqi Sonnenburgta y wawqi Stevensta libri dejayänampaq mandakurqan. Tsënöpam acusayanqampita libri quedariyarqan.

1920 wata ushëqa, Biblia yachakoqkunaqa imëkapitam kushikuyarqan. Sucursalkunachöqa librinam trabajëta puëdiyarqan. Y wawqi panintsikkunaqa, Diospa Gobiernunlla imëka mana allikunata ushakätsinampaq kaqtam kushishqa yachatsikur këkäyarqan (Mat. 24:14). Y 1921 wataqa masnam Diospa Gobiernumpita yachatsikur qallëkuyarqan.