1. Diospita yachatsikunqantsikqa, ¿imanötan mana wanushpa kawakuyänampaq yanapakun?

NUNAKUNA Diospita yachakurqa mananam wanuyanqanatsu. Mateu 28:19, 20 Jesusqa “ëwayë”, “qatimaqnïkuna tikrayänampaq” “bautizatsirnin” nunakunata yanapayë nir mandamarqantsik. Y musyanqantsiknöpis bautizakoqkunaqa salvakuytam puëdiyanqa. Jesus wanunqanman y kawarimunqanman markäkur o yärakur bautizakoq nunakunaqa salvakuyta puëdiyanqam. Tsëtam apostol Pëdrupis cristiänukunata nirqan: “Tsënö kaqllam bautizakïpis qamkunata kanan salvëkäyäshunki [...] Jesucristu kawarimunqampita” (1 Pëd. 3:21). Awmi, pipis bautizakurninran mana wanushpa kawëtaqa puëdinqa.

2. 2 Timoteu 4:1, 2 ninqannö, ¿imanötan yachatsikunantsik?

² Nunakuna bautizakuyänampaqqa, “shumaq yachatsikur” yanapakunapaq kallpachakushun (leyi 2 Timoteu 4:1, 2). Jesus mandamarqantsik “ëwayë”, “qatimaqnïkuna tikrayänampaq” nunakunata “yachatsirnin” yanapayë. Apostol Pabluqa nunakunata yachatsir sïguinampaqmi Timoteuta nirqan. Y kënöpis nirqanmi: “Tsëta rurarmi kikikita salvakunki y wiyashoqnikikunatapis salvanki”. Tsëchi “imanö yachatsikïkanqëkita imëpis alleq rikë” nir yanaparqan (1 Tim. 4:16). Tsëmi nunakuna bautizakuyänampaqqa alliraq yachatsinantsik.

3. ¿Imapitatan kananqa yachakushun?

 ³ Cada semänam mëtsikaq nunakunata Bibliapita yachatsintsik. Yachakurqantsiknam nunakuna bautizakuyänampaq imanö yanapanapaq kaqtaqa. Y kanannam nunakuna bautizakuyänampaq imanö noqantsik yachatsikunapaq kaqta rikäshun.

4. Bibliapita yachatsikurqa, ¿imanirtan alläpaqa parlakunantsiktsu? (Willakuytawan rikäri).

⁴ Diospa Palabrampita yachatsikuy gustamashqam, hörataqa ushëpa ushar kikintsiklla parlakuntsik. Tsënö kaptimpis Täpakoqpita, Bibliapita yachakunapaq librupita o Bibliapita yachatsikunqantsik höraqa manam alläpaqa parlakunantsiktsu. Tsëpa rantinqa Bibliata yachatsikurqa manam llapan yachanqantsikpitatsu parlakunantsik, sinöqa Biblia ninqampitam yachatsinantsik (Juan 16:12). * Yarpäshun tsëraq bautizakushqa karqa manam atskatatsu Bibliapita yacharqantsik, sinöqa wakin wakinllatam (Heb. 6:1). Tsëmi Bibliapita yachatsinqantsik nunakuna raslla yachakuriyänantaqa shuyarashwantsu.

5. (1) 1 Tesalonicensis 2:13 ninqannö, ¿imatatan Biblia yachakoqqa musyanan? (2) Bibliapita yachakoq parlakamunampaqqa, ¿imatatan rurashwan?

⁵ Bibliapita yachatsinqantsik nunakunaqa clärum rikäyänan, yachatsinqantsikkunaqa Diospa Palabrampita kanqanta (leyi 1 Tesalonicensis 2:13). Tsëmi Bibliata leyirirqa tsëpaq imata pensanqanta parlakaramunampaq ninantsik. Tsëpaqqa Biblia leyinqan imanö yanapanampaq kaqta willakamunampaqmi tapupänantsik (Lüc. 10:25-28). Kënö tapupäshun: “¿Jehoväpa imanö kënintatan kë leyinqëkichö rikanki?”, “Yachakunqëkiqa, ¿imanötan yanapashunki?”, “¿Imanötan sientikunki yachakurinqëkiwan?” (Prov. 20:5). Yachakunqampitapis masqa Jehoväta kuyanqan y cäsukunqanmi yanapanqa.

6. Unëna yachatsikoq wawqi panintsikkunataqa, ¿imanirtan yanapamänapaq mañakushwan?

⁶ Biblia ninqanwan yachatsikunqantsikta musyanapaqqa, unëna yachatsikoq wawqi panikunata imanö yachatsikuykanqantsikta tapupärishun.  Humildi karqa nimanqantsikkunata wiyakurmi mas alli yachatsikoq kashun (Hëch. 18:24-26). Y Biblia yachatsinqantsikkunapaq ima pensanqanta tapupärishun. Juk ishkë semänapa mëtapis ëwakurqa, Bibliata yachatsinqantsik nunakunaman pë ëwanampaq nishun. Tsënö rurashqaqa pëkunapaq yarparanqantsiktam rikäyanqa y yachakurpis sïguiyanqam. Noqantsikllatsu manam Bibliapitaqa yachatsita puëdintsik. Biblia yachakoqkunapaqa manam duëñuntsu kantsik. Pëkuna bautizakuyänanta munarmi kë llapantaqa rurantsik.

7. Bibliapita yachakoqtaqa, ¿imaraq maslla yachakunampaq yanapanqa?

⁷ Bibliata yachakoqkunaqa, Diospita yachatsikur kushishqa kanqantsiktam rikäyänan (1 Tes. 1:5). Tsënö rurashqaqa, masllam yachakuyta munayanqa. Bibliapita yachakunqantsik imanö yanapamanqantsikpita pëkunawan parlakushun. Tsëmi pëtapis shumaq kawakunampaq yanapanqa.

8. Bibliata yachakuykaqtaqa, ¿imanö mastan yanapashwan?

⁸ Bibliata yachakuykaq ima problëmapapis pasaptinqa, tsënöpa pasar wawqi panikuna ima rurayanqanta willarishun. Y parlapanqantsik wawqiwan o paniwan yachatseq ëwanapaq patsätsishun. Y jw.org päginachö, “La Biblia les cambió la vida” neqwampis yachatsita puëdintsikmi. * Tsëchö yachatsikuykuna y videukunam yanapanqa Biblia ninqankunata maslla yachakunampaq.

9. Yachakuykaqkuna familiankunata y amïgunkunata parlapäyänampaqqa, ¿imanötan yanapashwan?

⁹ Bibliata yachakuykaqpa majantapis yachatsinapaq nishun. Y Biblia yachatsinqantsikkunata familiankunata y amïgunkunata yachakunqankunapita parlapänampaq nishun (Juan 1:40-45). Kënö tapupärishun: “¿Imanötan këpita familiëkita parlapärinkiman?” “Biblia ninqanwan, ¿imanöraq amïguïkita parlapärinkiman?”. Tsënöpam yanapakushun pëkunapis shumaq yachatsikuyänampaq.  Tsënöpam, manaraq bautizakurnin, wawqi panikunawan yachatsikuytapis puëdinqa. Y reqinqankunapita, pillapis Bibliapita yachakuy munanqanta tapushun. Pillapis yachakuyta munaptinqa, raslla yachatsinapaq patsätsishun. Y ¿Imanötaq Bibliapita yachatsikïnëkuna? * neq videutapis rikäratsishun.

10. 1 Tesalonicensis 2:7, 8 ninqannö, ¿imata ruranapaqtan apostol Pablupita yachakuntsik?

¹⁰ Bibliapita yachakuykaqkunataqa, wawqi panintsikkunatanönam rikänantsik (leyi 1 Tesalonicensis 2:7, 8). Jehoväta sirwiyänampaqqa, manam fäciltsu amïgunkunata dejë y kawëninkunachö cambiukunata rurëqa. Tsëmi yanapanantsik wawqi panikunawan amïgu kayänampaq. Pëkunawan amïgu kanqantsiktaqa, manam yachatsikoq ëwarllatsu rikätsikuntsik. Sinöqa mas seguïdum pëkunawan juntakunantsik, watukanantsik, qayanantsik y celularninkunamanmi qellqapänantsik. Tsënömi kuyanqantsikta rikätsishun.

11. Bibliapita yachakoqkuna, ¿imanö sientikuyänantatan munantsik?

¹¹ Wakinqa këtam niyan: “Juk wamrata wätayänampaqqa marka mayinkunapis yanapakuyanmi”. Tsënöllam noqantsikpis nishwan: “Jesuspa qateqnin tikrayänampaqqa llapan wawqi panikunam yanapakuyan”. Tsëmi unëna yachatsikoqkunaqa, Bibliapita yachatsiyanqan nunakunata wawqi panikunapita yachakuyänampaq reqitsiyan. Tsënöpa Diospa kaqchö y yarpachakuyninkunachö pëkuna yanapayänampaq. Llapantsikmi munantsik Bibliapita yachakoqkunawan familianö Jehovä sirwita y kuyanqantsikta musyayänanta. Noqantsikwan kushishqa sientikuyaptinqa, mas fäcilmi kanqa unë amïgunkunata dejayänampaq (Prov. 13:20). Unë amïgunkuna mana alli tratayaptinqa, Jehoväpa sirweqninkunawanmi amïgu këta munanqa (Mar. 10:29, 30; 1 Pëd. 4:4).

12. Jehovä sirwita änikuyänampaq y bautizakuyänampaqqa, ¿imanirtan parlapashwan?

¹² Jehovällatana sirwita änikuyänampaq y bautizakuyänampaq mana mantsakushpa parlapäshun. Nunakunataqa, Bibliapita yachatsintsik bautizakuyänampaq  y Jehoväta sirwiyänampaqmi. Atska killapana seguïdu Bibliapita yachakur y reunionkunaman ëwaptinqa, Jehoväpa testïgun kanampaqmi yanapanantsik.

13. Bibliapita yachakoq bautizakunampaqqa, ¿imakunatatan ruranan?

¹³ Bibliapita yachakoqkuna bautizakuyta munarqa imëkatam rurayan. Puntataqa, Jehoväta kuyayänampaq y pëman markäkuyänampaq o yärakuyänampaqmi yachakuyänan (Juan 3:16; 17:3). Tsëpitaqa, Jehovämanmi mas witiyan y wawqi panikunawanmi amïgu kayan (Heb. 10:24, 25; Sant. 4:8). Tsëpitanam, mana allikunata rurayannatsu y rurayanqankunapita arrepentikuyan (Hëch. 3:19). Bibliapita yachakuyanqanman markäkur o yärakurmi jukkunatapis yachatsiyan (2 Cor. 4:13). Tsëkunata ruranqanmi yanapanqa Jehovällatana sirwita änikunampaq y bautizakunampaq (1 Pëd. 3:21; 4:2). Bautizakuyaptinqa llapantsikmi kushikuntsik. Tsëmi bautizakuyänampaq kallpachakuyaptinqa, rurayanqan alli kanqanta ninantsik.

14. Bibliapita yachakuykaq bautizakuy munanqantaqa, ¿imanötan musyashwan?

¹⁴ Jehovällatana sirwita änikuyänampaq y bautizakuyänampaqqa pacienciawanmi yanapakunantsik. Tsënö kaptimpis tsëta munayanqanta o mana munayanqanta musyanantsikpaqqa, kënö tapukushun: “¿Jesus mandakunqanta cäsukunampaq kallpachakunku?” “¿Shumaq kaptinllaku Bibliapita yachakun?”.

15. Bibliapita yachakoq bautizakunampaq kallpachakunqantaqa, ¿imanötan rikätsikun?

¹⁵ Bibliapita yachakoq bautizakunampaqqa imakunata rurëkanqantam rikänantsik. Tsëta ruranapaq tapukushun, ¿rikätsikunku Jehoväta kuyanqanta? ¿Jehoväman mañakunku? (Sal. 116:1, 2). ¿Bibliata leyiqa gustanku? (Sal. 119:97). ¿Llapan reunionkunamanku ëwan? (Sal. 22:22). ¿Yachakunqanmannöku kawëkan? (Sal. 119:112). ¿Familiankunata y amïgunkunata parlapanku yachakunqampita? (Sal. 9:1). Y, ¿rasumpaku Jehoväpa testïgun këta munan? (Sal. 40:8). Këkunata mana rurayaptinqa  imanir mana rurëkäyanqanta yachëllapa musyapakushun, tsëpitana imanir tsëkunata rurayänampaq shumaq parlapäshun. *

16. Pitapis Bibliapita manana yachatsinapaqqa, ¿imatatan cuentaman churanantsik?

¹⁶ Bibliapita yachatsinqantsikmannömi rikänantsik yachatsir sïguinantsikpaq o manana yachatsinapaqpis. Y kënömi tapukunantsik: “¿Cada yachatsinäpaqku leyipar alistakun? ¿Reunionnintsikkunaman ëwëta munanku? ¿Mana alli rurëninkunata dejashqanaku? ¿Mana alli religionpita yarqushqanaku?”. Tsëkunata mana ruraptinqa Bibliapita yachatsinqantsikqa, pipis arpa toquëta mana munëkaptin yachatsinöchi kanman. Yachakunqankunata mana cuentaman churaptin y yachakunqanmannö mana ruraptinqa manam yachatsishwannatsu.

17. Bibliapita mas alli yachatsikunapaqqa, ¿imanötan 1 Timoteu 4:16 yanapakun?

¹⁷ Nunakuna bautizakuyänampaqqa, alliran kallpachakunantsik. Noqantsikqa, Bibliapita yachatsinqantsik nunakuna bautizakuyänanta munarmi yanapakunantsik. Tsëpaqqa, Bibliachö ninqanwan y kushishqam Diospita yachatsinantsik. Wawqi panikunawan amïgu kayänampaqmi yanapanantsik. Jehoväta sirwita änikuyänampaq y bautizakuyänampaqmi parlapänantsik. Y yachakuyanqanmannö rurëkäyanqantam rikänantsik. (“ Bibliapita yachatsikoq ruranampaq” neqtawan rikäri). Nunakuna salvakuyänampaq yanapakuyqa, alläpam kushitsimantsik. Tsëmi, Bibliapita yachatsinqantsikkuna bautizakuyänampaq llapan puëdinqantsikmannö yanapakunantsik.