1. ¿Imatan imapitapis mas alli?

TEYTAKUNA mana allita rurarqa, wamrankunatam höraqa mana alliman chätsiyan. Peru allita rurarqa, alli kawakuyänampaqmi yanapayanqa. Tsënö kaptimpis, wamrakunaqa imatapis alli rurëtam yachayänan. Tsëqa kuyakoq Teyta Jehoväta sirwir kawakuymi (Sal. 73:28).

2. Josë, Marïa y Jesusqa, ¿imatatan puntaman churayarqan?

² Josëwan Marïaqa Jesuswan juk kaq wamrankuna Jehoväta sirwiyänampaqmi kallpachakuyarqan. Tsëmi imata rurayanqanchöpis Jehoväta puntaman churayarqan (Lüc. 2:40, 41, 52). Jesuspis Jehovä munanqanta rurananrëkurmi imëkatapis alli rurarqan (Mat. 4:1-10). Pëqa alli y cäsukoq wamram karqan. Teytakunaqa wamrankuna tsënö kayänantam munayan.

3. ¿Imatatan yachakushun?

³ Kananqa yachakushun Jesus alli kawanampaq Jehovä imanö yanapanqanta, Josëpitawan Marïapita teytakuna imata yachakuyanqanta, y Jesuspitana wamrakuna imata yachakuyanqantam.

4. Jesus Patsaman shamur alli kawakunampaqqa, ¿imatatan Jehovä rurarqan?

⁴ Jehoväqa, alli nunata y alli warmitam Jesuspa teytankuna kayänampaq akrarqan (Mat. 1:18-23; Lüc. 1:26-38). Marïa imanö parlanqanta Bibliachö leyirmi cuentata qokuntsik Jehoväta y Palabranta kuyar respetanqanta (Lüc. 1:46-55). Y Josëpis Jehoväta kuyar y kushitsita  munarmi pë mandanqanta cäsukurqan (Mat. 1:24).

5, 6. ¿Imakunapa Jesus pasanantatan Jehovä permitirqan?

⁵ Jehoväqa manam imëka jananchö kawaq teytakunatatsu Jesuspaq akrarqan. Josëwan Marïaqa waktsallam kayarqan, tsëmi Jesus yurikushqanchöqa ‘ishkë llullu palumallata’ Jehoväta qarayänampaq apayarqan (Lüc. 2:24). Y Josëqa itsa wayinllachö carpintërunö trabajaq. Qanchisnö wamrankuna kaptinchi puëdiyanqanmannölla kawakuyaq (Mat. 13:55, 56).

⁶ Jehoväqa imëka mana allikunapitam Jesusta tsaparqan, peru höraqa permitirqanmi llakikuykunapa pasananta (Mat. 2:13-15). Jesusqa llakikurqanchi wakin familiankuna Diospa Akrashqan kanqanta mana creiyaptin (Mar. 3:21; Juan 7:5). Itsachi papänin Josë wanukuykuptin imëka llakikuypa pasarqan. Mayor wamra këkarqa, pënachi familianta rikänampaq imëkanöpapis trabajarqan (Mar. 6:3). Tsëqa musyarqanchi trabajë imanö kanqanta.

7. (1) Teytakunaqa, ¿imamantan pensayanman? (2) Proverbius 2:1-6 ninqannö, ¿imatatan teytakunaqa wamrankunata yachatsiyanman?

⁷ Wamrayoq këta munaqkunaqa këman pensayë: “Jehovä Diosnintsik wamrëkikuna qarayäshuptiki shumaq cuidayänëkipaqqa, ¿humildi y llapanchöku Jehoväta cäsukuyanki?” (Sal. 127:3, 4). Y wamrayoq kaqkunaqa këman pensayë: “¿Wamrëkikunata yachëkätsiyankiku trabäjuta mana mantsayänampaq?” (Ecl. 3:12, 13). “¿Imëkanöpaku yanapëkäyanki mana allikunaman mana chäyänampaq?” (Prov. 22:3). Musyanqantsiknöpis, llapan problëmakunapita tsapëtaqa manam puëdintsiktsu. Peru Bibliachö ninqankunata cuentaman churayänampaq yachatsiyaptikiqa, imëkachöpis allim tsarakuyanqa (leyi Proverbius 2:1-6 *). ¿Imanötan tsëta  yachatsiyankiman? Mëqan familiëkikunapis Jehovä sirwita dejariptinqa, wamrëki Jehoväta llapanchö cäsukunampaq Biblia ninqanwan yanapë (Sal. 31:23). O pïnikikunapis wanukuykuptinqa, yamë këta tariyänampaq Biblia ninqanwan yachatsiyë (2 Cor. 1:3, 4; 2 Tim. 3:16).

8. Deuteronomiu 6:6, 7 ninqantaqa, ¿imanötan Josëwan Marïa cäsukuyarqan?

⁸ Josëwan Marïaqa Jehovä mandakunqanta cäsukurmi Jesusta yanapayarqan imëkachö Jehoväta kushitsinampaq (leyi Deuteronomiu 6:6, 7 *). Pëkunaqa Jehovätam llapan shonqunkunawan kuyayarqan, y tsënö kuyayänampaqmi wamrankunatapis yanapayarqan.

9. ¿Imakunatatan Josëwan Marïaqa rurayaq?

⁹ Josëwan Marïaqa Nazaret-tam Diospa wayinman cada semäna ëwayaq y cada watam Jerusalenchö Pascua fiestaman ëwayaq (Lüc. 2:41; 4:16). Itsachi Jerusalenman ëwaq nänichö Jesustawan wakin wamrankunata Jehoväta sirweq unë nunakunapita y imakunapa pasayanqampita yachatsiyaq. Peru mas wamrankuna kaptinchi tsëta rurëqa fäciltsu karqan. Tsënö kaptimpis, Jehoväta puntaman churayanqanqa allipaqmi karqan, tsënöpam llapankuna Jehoväta alli sirwiyarqan.

10. ¿Imatatan Josëpitawan Marïapita teytakuna yachakuyan?

¹⁰ Qamkunapis parlayanqëkiwan y rurayanqëkikunawan Jehoväta rasumpa kuyayanqëkita wamrëkikunata rikätsiyë. Jehoväta kuyayänampaq wamrëkikunata yanapayë. Y imapitapis masqa Biblia ninqanta yachakuyänampaq, mañakuyänampaq y reunionkunam ëwayänampaq mana faltëta yachatsiyë (1 Tim. 6:6). Imëka wanayanqankunatapis procurayänëkim (1 Tim. 5:8). Wamrëkikuna salvakuyänampaq y Shumaq Patsaman chäyänampaqqa, Jehoväta llapanchö  cäsukuyanqanmi yanapanqa (Ezeq. 7:19; 1 Tim. 4:8). *

11. (1) 1 Timoteu 6:17-19 ninqanqa, ¿imachötan teytakunata yanapan? (2) Imatapis familianö rurarqa, ¿ima bendicionkunatatan chaskiyanqa? (Rikäri “ ¿Imakunata rurayänëkipaqtan churapakäyankiman?” neqtawan).

¹¹ Më tsëchö teytakunam wamrankunawan Jehoväta alli sirwiyänampaq imëkata rurëkäyan. Llapankunam mana faltëpa yachatsikoq yarquyan, reunionkunaman y asamblëakunaman ëwayan. Y wakinkunaqa, mana yachatsikuyanqan sitiukunamanmi yanapakoq ëwayan. Jukkunanam kikinkunapa qellëninkunawan Betel reqipakoq ëwayan y Diospa wayinta rurar yanapakuyan. Y tsë llapanmi yanapan Jehoväta mas alli sirwiyänampaq (leyi 1 Timoteu 6:17-19). Tsënö familiayoq wamrakunaqa, jatunyarkurpis tsënöllam rurar sïguiyan y teytankuna yachatsiyanqantam agradecikuyan (Prov. 10:22). *

12. ¿Imanirtan Jesusqa imatapis ruranampaq kikin akraq?

¹² Teytan Jehovä y patsacho Jesuspa teytankunaqa imëpis allillatam rurayaq. Peru jatunyärirqa kikinnam imëkatapis rurakunampaq akrarqan (Gäl. 6:5). Pëpis noqantsiknöllam imatapis ruranampaq libri karqan. Peru munanqanta rurakunampa rantinmi, Jesusqa Jehoväta alli sirwinampaq churapakarqan (Juan 8:29). Kanan jövinkunapis pëpitaqa imëkatam yachakuyta puëdiyan.

13. ¿Imanö wamratan Jesusqa karqan?

¹³ Wamra kanqampitam Jesusqa teytankunata cäsukurqan. Pëqa manam munanqantatsu rurakurqan, ni manam teytankunata mana kaqpaq churarqantsu. Bibliachö ninqannöpis, “pëkunata cäsukurmi sïguirqan” (Lüc. 2:51). Mayor këkarqa imëkataraq rurarqan familianta yanapanampaq. Papänin Josëpitachi alli trabajador këta yachakurqan.

14. Teyta Diospita Jesus yachakunqantaqa, ¿imanötan musyantsik?

¹⁴ Josëwan Marïaqa itsa Jesusta willayarqan imanö yurikunqanta y angelkuna pëpaq ima niyanqanta (Lüc. 2:8-19, 25-38). Peru Jesusqa kikinmi masta musyanampaq kallpachakurqan. 12 watayoqllaraq këkarmi alli musyaq nunakunata  yachatsirqan y “llapan wiyaqninkunam alli yachaq kanqanta y llapantapis yachëwan contestanqanta rikar alläpa espantakuya[rqan]” (Lüc. 2:46, 47). 12 watayoqllaraq karpis Jesusqa allim musyarqan Jehovä Teytan kanqanta (Lüc. 2:42, 43, 49).

15. ¿Imanötan musyantsik Jesusqa Teytan Jehovä cäsukunqanta?

¹⁵ Jesusqa, Teytan Jehovä munanqanta musyarirmi kushishqa cäsukurqan (Juan 6:38). Nunakuna chikiyänampaq kaqta musyarpis, pëqa kushishqam Jehovä munanqanta rurarqan. 29 watachö bautizakurirqa Jehovä munanqallatanam imëpis rurarqan (Heb. 10:5-7). Y qeruchö warkurëkarpis, pëqa Jehoväta cäsukuykarqanllam (Juan 19:30).

16. ¿Imatatan Jesuspita wamrakuna yachakuyanman?

¹⁶ Teytëkikunata cäsukuy. Josënö y Marïanöllam teytëkikunapis allillataqa rurayanqatsu. Peru Jehoväqa pëkunatam cuidayäshunëkipaq y yachatsiyäshunëkipaq churashqa. Tsëmi teytëkikunata respetakur y ima niyäshunqëkitapis cäsukurqa alli kawakunki (Efes. 6:1-4).

17. Josuë 24:15 ninqannö, ¿imatatan jövinkunaqa rurayanman?

¹⁷ ¿Pitatan sirwinkiman? Kikikim yachakunëki Jehovä imanö kanqanta, ima munanqanta y imanö cäsukunëkipaq kaqtaqa (Rom. 12:2). Tsëmi yanapashunki Jehoväta sirwinëkipaq y tsëta rurarqa mas allim kawakunki (leyi Josuë 24:15 *; Ecl. 12:1). Bibliata seguïdu leyir y mas yachakurqa masmi Jehoväta kuyar pëman markäkunki o yärakunki.

18. ¿Imatatan jövinkunaqa puntaman churayanman?

¹⁸ Jehovä Diosta puntaman churë. Jehoväta mana cäsukoqkunaqa, imëkata estudiar y yachakur kushishqa kawakunëkipaq kaqtam creitsiyäshunki. Peru rasumpa kaqchöqa imëkata asheqkunaqa,  “imëka nanatsikïkunata[m] kikinkunapaq ashiyashqa” (1 Tim. 6:9, 10). Peru qam, Jehoväta cäsur y pë munanqanta rurarqa allim imëpis kawakunki, y “llapan ruranqëkikunapis alli[m] kanqa” (Jos. 1:8).

19. ¿Imatatan teytakuna imëpis yarpäyänan?

¹⁹ Teytakuna, llapan puëdiyanqëkimannö wamrëkikunata yanapayë Jehoväta sirwiyänampaq. Pëqa allita rurayänëkipaqmi yanapayäshunki (Prov. 3:5, 6). Yarpäyë imatapis niyanqëkipitaqa, rurayanqëkim wamrëkikunataqa mas yanapanqa. Tsëpaqmi Jehoväta imëpis cäsukuyänëki.

20. ¿Imanötan jövinkuna kawakuyanqa Jehoväta sirwirqa?

²⁰ Jövinkuna, teytëkikunaqa imatapis allilla rurayänëkipaqmi yanapëkäyäshunki. Peru Jehoväta kushitsinëkipaq o mana kushitsinëkipaqqa kikikipitam kanqa. Jesus ruranqannölla kuyakoq Teytantsik Jehoväta sirwiyänëkipaq churapakäyë. Tsënö rurarqa, imëkachö yanapakurmi yamë y kushishqa kawakuyanki (1 Tim. 4:16). Y kë Patsa Shumaq Huertaman tikraramuptinnäqa kushishqam kawakuyanki.