1. ¿Imanirtan mëtsika nunakuna pantashqa këkäyan?

MËTSIKA religionkunam, cristiänu kayanqanta y Dios munanqannö adorayanqanta niyan. Tsëchi mëtsika nunakunaqa pantashqa këkäyan y kënö tapukuyan: “¿Kanku jukllëlla rasumpa kaq religion, o llapan religionkunaku Diospaqqa alli kayan?”. ¿Y noqantsikqa? ¿Següruku kantsik Jehoväpa testïgunkuna rasumpa kaqta yachatsikunqantsikta y munanqantsiknö adorashqa noqantsikllata alli religiontanö rikämanqantsikta? ¿Tsënö kanqampita rasumpa següru këta puëdintsikku? ¿Tsëta rikätsikoq pruëbakuna kanku?

2. ¿Imanirtan apostol Pabluqa següru këkarqan creinqan rasumpa kaq kanqanta? (1 Tesalonicensis 1:5).

² Apostol Pabluqa segürum këkarqan, yachakunqan rasumpa kaq kanqanta (leyi 1 Tesalonicensis 1:5). Tsëtaqa creirqan, Diospa Palabranta alli estudianqampitam. Pëqa, ‘llapan qellqashqa këkaq Diospita shamunqantam’ creeq (2 Tim. 3:16). Diospa Palabranta estudiarmi cläru musyarqan, shamunampaq Akrashqa nuna Jesus kanqanta. Peru judïukunata pushaq religiösukunaqa, manam tsë pruëbakunata cuentapaq churayarqantsu. Tsë mana penqakoq nunakunaqa, Diospita yachatsikuyanqantam niyaq, peru rurëninkunaqa manam tsëta rikätsikoqtsu (Tïtu 1:16). Peru Pabluqa, Diospa Palabranchö llapan ninqantam creeq. “Diospa llapan munëninta” willakunampaq y ruranampaqmi listu këkarqan (Hëch. 20:27).

3. Diospita rasumpa kaqta yachakuykanqantsikta musyanapaqqa, ¿llapan tapukuykunapa respuestantaku musyanantsik? (Jina rikäri, “ Jehovä ruranqankunata y pensanqankunataqa, manam entiendita puëdintsiktsu” neqta).

³ Wakinqa niyan, rasumpa kaq religionqa llapan tapukuykunata contestanampaq kaqtam, tsë respuestakuna Bibliachö  mana këkaptimpis. ¿Tsënö kananta shuyarëqa alliku? Pablu ima ninqanta rikärishun. Pëqa llapan cristiänukunatam nirqan, ‘llapan cösaskunapita alleq segurakuyänampaq’, peru llapanta mana entiendinqantapis nirqanmi (1 Tes. 5:21). Pëqa, ‘wakin wakinllata musyanqantsikta’ y ‘metalpita espëjupanö paqus paquslla rikanqantsiktam’ nirqan (1 Cor. 13:9, 12). Pabluqa manam llapantatsu entiendirqan y noqantsikpis manam. Tsënö kaptimpis, Jehoväpita Biblia yachatsikunqantaqa, clärum entiendeq. Tsëmi següru karqan, Diospita rasumpa kaqta yachakunqanta.

4. ¿Imata rurartan Diospita rasumpa kaqta yachakuykanqantsikta masraq segurakushun y imatataq këchö yachakushun?

⁴ ¿Imatataq rurashwan Diospita rasumpa kaqta yachakuykanqantsikta masraq segurakunapaq? Juknöpaqa tsëta rurashwan, Diosta Jesus imanö adoranqantawan, Jehoväpa kanan witsan Testïgunkuna imanö adoranqantsiktawan igualatsirmi. Këchöqa, rasumpa kaq cristiänukuna këkunata rurayanqantam rikäshun: 1) manam santukunata adorayantsu, 2) Jehoväpa jutintam respetayan, 3) rasumpa kaq yachatsikuytam kuyayan y 4) juknin jukninkunam alläpa kuyanakuyan.

5. ¿Imanötan Diosta Jesus adorarqan y imanötan noqantsikpis pënölla rurashwan?

⁵ Jesusqa Jehoväta alläpa kuyarmi, ciëluchö këkar y Patsachö këkarpis pëllata adorarqan (Lüc. 4:8). Y qateqninkunatapis Pëllata adorayänampaqmi yachatsirqan. Manam ni pë ni qateqninkunapis, Diosta adorayänampaqqa santukunata utilizäyarqantsu. Diosnintsik mana rikakoq espïritu kaptinmi, nunakuna imata rurayanqanwampis igualëta puëdintsu (Is. 46:5). ¿Peru allitsuraq kanman nunakuna rurayanqan santukunata  rezapanqantsik? Chunka Mandamientukunapita ishkë kaqchömi, Jehovä kënö nirqan: “Ama ima ïdulutapis rurankitsu ni ciëluchö këkaq niraqta, ni kë patsachö këkaq niraqta ni lamar rurinchö këkaq niraqtapis. Tsëkunamanqa ama qonqurikunkitsu ni adorankitsu” (Ex. 20:4, 5). Diosta sirweqkunapaqqa, këchö ninqanqa clärum këkan.

6. ¿Pikuna rurayanqantataq Jehoväpa testïgunkuna kanan witsan qatiyan?

⁶ Unë pasakunqankunata willakoqkunaqa, punta cristiänukuna Diosllata adorayanqantam niyan. Diosta unë adoraqkunapaq parlaq libruchömi nin, punta cristiänukunaqa, manash Diosta adorayänan wayikunaman santukunata churëtaqa ni pensayanmanllapistsu karqan (History of the Christian Church). Kanan witsan Jehoväpa testïgunkunaqa, punta cristiänukunanöllam Diosta adorantsik. Manam santukunata, angelkunata ni Jesusllatapis mañakuntsiktsu. Jina manam bandërata saludantsiktsu, himnu nacionalta cantantsiktsu ni manam nacionkuna adorayanqanta adorantsiktsu. Ima kanan kaptimpis, Jesus kënö ninqantam wiyakuyta procurantsik: “Jehovä Diosnikillatam adoranëki” (Mat. 4:10).

7. ¿Imakunachötan Jehoväpa testïgunkuna juk religionkunapita jukläya kayan?

⁷ Kanan witsan nunakunaqa, pushakoq religiösukunatam imëka adoraq cuenta alläpa respetayan. Iglesiankunachömi junta junta kayan, rurayanqan librukunatam rantiyan y mëtsika qellëwanmi pëkunata yanapayan. Wakinqan llapan yachatsiyanqantam chipyëpa creiyan. ¡Manachi Jesusta rikëkurpis tsëläyaqa respetayanmantsu! Peru Jehoväta rasumpa adoraqkunaqa, manam ni pï nunata pushamaqnintsiktanö qatintsiktsu. Dirigimaqnintsikkunata respetarnimpis, Jesus kënö ninqantam yarpantsik: “Qamkunaqa llapëkipis wawqim kayanki” (Mat. 23:8-10). Manam pushakoq religiösukunata y juk nacionta gobernaqkunata, adoraq cuenta respetantsiktsu. Diosllata sirwirmi, rurayanqankunachö yanapakuntsiktsu. Tsë llapankunachömi, cristiänu tukoq religionkunapita jukläya kantsik (Juan 18:36).

8. ¿Imanötan musyantsik jutinta respetatsinantsikta y wakinta musyatsinantsikta Jehovä munanqanta?

⁸ Juk kutichömi Jesus kënö mañakurqan: “Teyta, jutikita alläpa precisaqpaq churë”. Tsëmi Jehoväqa, imëka räyu janraraqnöraq contestarqan, y tsëta ruranampaq änirqan (Juan 12:28). Diospita Patsachö yachatsikunqan witsanqa, Jesusqa Teytampa jutintam respetatsirqan (Juan 17:26). Tsëmi rasumpa kaq cristiänukunapis, Diospa jutinta kushishqa parlantsik y wakinkunata musyatsintsik.

9. ¿Imanötan punta cristiänukuna Diospa jutinta respetayanqanta rikätsikuyarqan?

⁹ Apostolkuna kawayanqan witsanchö punta kaq congregacion patsakäriptinmi, Jehoväqa juk nacion nunakunaman yarpachakur qallëkurqan, pëkunapita “jutinta apaq markata” jorqamunampaq (Hëch. 15:14). Tsë cristiänukunaqa, Diospa jutinta parlar y wakinkunata musyatsiyanqampitam kushishqa këkäyarqan. Pëkunaqa Diospita yachatsikurmi jutinta utilizäyarqan y Bibliamampis qellqayarqan. * Tsënömi rikätsikuyarqan Diospa jutinta apaq nunakuna kayanqanta (Hëch. 2:14, 21).

10. ¿Imakunatan rikätsikun Jehoväpa testïgunkuna Diospa jutinta apayanqanta?

¹⁰ Jehoväpa testïgunkunaqa, ¿Jehoväpa jutinta  apaq nunakunaku kayan? Tsëta imakuna rikätsikunqampaq parlarishun. Kanan witsan pushakoq religiösukunaqa, Diospa jutinta nunakuna mana musyayänampaqmi imëkata rurayashqa. Juk idiömakunaman tumatsiyanqan Bibliakunachöqa, manam Diospa jutinta churayashqatsu y cultunkunachö Diospa jutinta mana parlayänampaqmi mandakuyashqa. * Peru pï mëmi musyan, Jehoväpa testïgunkunalla Diospa jutinta alläpa respetarnin parlayanqantaqa. Manam ni ima religionpis noqantsiknöqa Diospa jutinta reqitsikuyantsu. Jutintsik ninqannömi, Jehoväpa testïgunkuna kanqantsikta rikätsikunapaq kallpachakuntsik (Is. 43:10-12). Mushoq Patsachö Kawaqkunapaq Diospa Palabran Bibliatam, 240 millonpitapis masta rurarquntsik, y juk idiömaman tumatseq nunakuna Jehoväpa jutinta mana churayanqanmanmi churarquntsik. Y Jehoväpa jutin yureq publicacionkunatam, mil idiömakunapitapis maschö rurëkantsik.

11. Punta kaq cristiänukunaqa, ¿imanötan rikätsikuyarqan Diospita rasumpa kaq yachatsikuyta kuyayanqanta?

¹¹ Jesusqa, Diospita y ruramunampaq kaqpita rasumpa kaq yachatsikuytam alläpa kuyaq. Tsëta yachakunqanmannömi kawarqan y wakinkunatapis musyatsirqan (Juan 18:37). Jesuspa rasumpa kaq qateqninkunapis, Diospita rasumpa kaq yachatsikuytam kuyayaq (Juan 4:23, 24). Tsëmi apostol Pëdruqa,  cristiänu religion “rasumpa kaq nänipita” yachatsikunqanta nirqan (2 Pëd. 2:2, nöta). Punta kaq cristiänukunaqa, Diospita rasumpa kaq yachatsikuytam alläpa kuyayaq. Tsëmi juk religionkuna yachatsikuyanqanta, nunakunapa costumbrinkunata o llutanta yachatsikoq nunakunata qatiyaqtsu (Col. 2:8). Tsënöllam Diosta kanan witsan sirweqkunapis, Diospita rasumpa yachakuyanqanmannö kawayänampaq kallpachakuyan (3 Juan 3, 4). Tsëtaqa rurayan, creiyanqankuna y imanö portakuyanqan Jehoväpa Palabran ninqannö kanampaq segurakurmi.

12. ¿Imatataq dirigimaqnintsikkuna rurayan imachöpis cambianantsik wananqantsikta rikar y imanirtan tsëtaqa rurayan?

¹² Jehoväpa testïgunkunaqa, manam Biblia ninqanta llapanta musyayanqantatsu niyan. Höraqa, Bibliachö wakin ninqantam juknöpa entiendiyashqa o congregacionkuna imanö kayänampaq patsätsichömi pantayashqa. Peru manam tsënö pasakunqampita espantakuntsiktsu, Bibliachöqa, tiempu pasanqanmannö Diospita mas cläru yachakuyänampaq kaqtam nin (Col. 1:9, 10). Jehoväqa, ichikllapa ichikllapam rasumpa kaqta entienditsimantsik. Tsëmi imatapis alli entiendinapaqqa pacienciakur shuyaränantsik (Prov. 4:18). Imatapis entiendinqantsikchö o ruranqantsikchö cambianantsik wanakanqanta rikarqa, dirigimaqnintsikkunaqa jinan höram cambiarayämun. Wakinkunaqa religionninkunachö kushishqa kayänampaq o wakin nunakuna allita parlayänampaqmi imatapis cambiariyan. Peru Jehoväpa testïgunkunaqa, Diospita mas yachakunapaq y Jesus yachatsikunqannö Diosta adoranapaqmi imatapis cambiarintsik (Sant. 4:4). Imatapis cambiarqa, Bibliachö ninqanta mas alli entiendirmi cambiantsik y manam nunakuna pensayanqannö pensëta munartsu. Rasumpa kaqta kuyanqantsikqa clärum këkan (1 Tes. 2:3, 4).

13. Diosta rasumpa sirweqkunaqa, ¿imanö kayanqampitataq reqishqa kayan y imanötan Jehoväpa testïgunkunaqa tsëta rikätsikuyan?

¹³ Punta cristiänukunata imëkachö alli kayanqampita reqirpis, masqa, kuyakoq kayanqampitam reqiyaq. Jesusmi kënö nirqan: “Këta rurayaptikim llapankuna musyayanqa qateqnïkuna kayanqëkita, jukniki juknikikuna kuyanakuyaptiki” (Juan 13:34, 35). Kanan witsan Jehoväpa testïgunkunaqa, entëru Patsachömi juk familianölla kayan y kuyanakuyan. Tsëmi waktsa o rïcu kayanqampita, ima color kayanqampita o juk nacionpita kayanqampitaqa jukläya rikänakuyantsu. Y alläpa kuyanakunqantsiktaqa, reunionnintsikkunachö y asamblëantsikkunachömi rikantsik. Tsë llapankunam rikätsimantsik, Jehovä munanqannöqa, noqantsiklla adoranqantsikta.

14. Colosensis 3:12 a 14 ninqannö, ¿imanötan juknintsik juknintsik kuyanakunqantsikta rikätsikuntsik?

¹⁴ Bibliachöqa, “jukniki juknikikuna alläpa kuyanakuyë” ninmi (1 Pëd. 4:8). Tsënö kuyanakunqantsiktaqa rikätsikuntsik, pantanqantsikkunachö perdonanakurnin y aguantanakurninmi. Jina llapan wawqi panintsikkunawanmi, hasta llakitsimashqantsik kaqkunawampis, qarakoq y alli nuna kantsik (leyi Colosensis 3:12-14). Awmi, tsënö kuyakoq kanqantsikmi, Diospa rasumpa sirweqninkuna kanqantsikta rikätsikun.

15. ¿Jina imakunachötan punta cristiänukunanölla kantsik?

¹⁵ Diosta adoranqantsikchöqa, jukkunachöpis punta cristiänukunanöllam rurantsik.  Këllaman yarpärishun: apostolkuna kawayanqan witsanchönöllam, congregacionkunata watukaqkuna, creikoqkunata rikaqkuna y creikoqkunata rikaqkunata yanapaqkuna kayan (Filip. 1:1; Tïtu 1:5). Y pëkunanöllam, pununakuyta, casädu kawakuyta y yawar sagrädu kanqanta rikantsik. Jina congregacionchö kaqkuna alli kayänampaqmi, jutsankunapita mana arrepentikoqkunata qarquntsik (Hëch. 15:28, 29; 1 Cor. 5:11-13; 6:9, 10; Heb. 13:4).

16. ¿Imatataq Efesius 4:4 a 6 ninqampita yachakuntsik?

¹⁶ Mëtsikaq nunakuna qateqnin tukuyänampaq kaqtam Jesusqa nirqan (Mat. 7:21-23). Jina Diospa Palabranchöqa, kë ushanan junaqkunachö ‘Diosta sirweq tukoqkuna’ mëtsikaq kayänampaq kaqtam nirqan (2 Tim. 3:1, 5). Peru Bibliachöqa, “juk creikïlla” Diospa rikënimpaq alli kanqantam nin (leyi Efesius 4:4-6).

17. ¿Pikunallatan Jesus yachatsikunqannö Diosta adorayan y rasumpa kaq religion kayan?

¹⁷ Tsëqa, ¿pikunatan rasumpa kaq religionchö kayan? Diosta imanö adoranapaq Jesus yachatsikunqanta, punta kaq cristiänukuna pënölla rurayanqanta y kanan witsankuna pikuna tsënö rurëkäyanqantam rikarquntsik. Clärum këkan: Jehoväpa testïgunkunallam rasumpa kaq religionqa kantsik. Diospa familiampita kanqantsik y Jehoväpitawan ruramunampita rasumpa kaqta yachakunqantsikwanqa manam imapis igualantsu. Tsëqa, Diospita rasumpa kaqta yachakuykanqantsikta següru këtaqa ama dejashuntsu.