ISHKË KAQ Jatun Guërra witsanmi, näzi soldädukunapa mandaqnin juk grüpu Testïgukunata kënö nirqan: “Francia y Inglatërra nunakunapa contran guërrachö pelyëta mëqëkillapis mana munayaptikiqa, ¡llapëkitam wanutsiyashqëki!”. Tsë amänunkunallachö mëtsikaq soldädukuna armankunawan këkäyaptimpis, Testïgukunaqa manam ni mëqampis guërraman ëwëta munayarqantsu. Tsë Testïgukunaqa, ¡valientim kayarqan! Pëkunanöllam, Jehoväpa testïgunkunaqa autoridäkuna wanutsimënintsikta munayaptimpis guërraman ëwantsiktsu.

1. UNËQA DIOSTA SIRWEQKUNA JUK NACIONLLACHÖMI TÄKUYARQAN

Unëqa, Israel naciontam Jehovä akrarqan sirweqninkuna kayänampaq. Pëkunatam kënö nirqan: ‘Ninqäkunata cäsukur y ruranqantsik acuerduta cumplirqa, akranqä kuyë markämi kayanki’ (Ex. 19:5). Israelïtakunaqa, Diosnintsik entreganqan markakunallachömi täkuyaq, juk nacionkunachöqa manam markankuna karqantsu. Tsëmi guërraman ëwarqa, juk nacion nunakunallawan pelyayaq. a

Kanan witsan, Jehoväpa sirweqninkunaqa, mëtsë nacionpita, mëtsë markapita, tukuy kastapita y tukuyläya idiömata parlaqkunam kayan (Apoc. 7:9). Tsëqa, ¿allitsuraq kanman Testïgukuna guërraman ëwayänan? Manam. Ëwarninqa, Testïgu mayinkunatachi wanutsiyanman.

 2. JEHOVÄ MANDAPTINMI GUËRRAMAN ËWAYAQ

Unëqa, Jehovämi israelïtakunata mandarqan pelyaq ëwayänampaq. Yarpärishun cananeu nunakunallaman. Tsë nunakunaqa, mana allikunatam rurayaq, demoniukunatam adorayaq, jukwan jukwanmi punukuyaq y santukunata adorarmi wamrankunata rupatsiyaq. Tsëmi, Jehoväqa israelïtakunata mandakurqan tsë nunakunata ushakätsiyänampaq. Tsënöpa tsë nunakuna rurayanqanta israelïtakuna mana rurayänampaq (Lev. 18:24, 25). Y Canaan markachö unëpana kawëkäyaptinmi, Jehoväqa israelïtakunata mandarqan chikeqninkunapita defendikuyänampaq (2 Sam. 5:17-25). Peru Jehoväqa, manam imëpis israelïtakunata permitirqantsu kikinkuna munar guërrata rurayänanta, tsëta rurarqa mana allichömi ushayaq (Nüm. 14:41-45; 2 Crön. 35:20-24).

Kanan witsan, nunakunataqa manam Diosnintsik mandantsu guërrata rurayänampaq. Nacionkunaqa kikinkuna munarmi y nacionninkuna mas jatun kananta munar, mas rïcu këta munar, polïtica asuntu o kikinkunapa pensëninkunata välitsirmi guërrata rurayan. Peru, ¿allitatsuraq rurëkäyan creenciankunata defendir o “Diospa chikeqninkunatam ushakëkätsï” nir guërrata ruraqkunaqa? Manam, pëkunatapis Jehoväqa manam mandashqatsu. Jehoväqa nin sirweqninkunata kikin salvanampaq kaqta y chikeqninkunata Armagedon guërrachö kikin ushakätsinampaq kaqtam (Apoc. 16:14, 16). Tsë guërrachöqa, manam Diosnintsikpa kë Patsachö këkaq sirweqninkunatsu pelyayanqa, sinöqa ciëluchö këkaq soldädunkunam (Apoc. 19:11-15).

3. JEHOVÄMAN MARKÄKOQ KAQTAQA MANAM WANUTSIYAQTSU

Unë witsanqa, Jehovä mana perdonanqan kaqkunallatam israelïtakuna guërrachö wanutsiyaq, peru Jehoväman markäkoq o yärakoq kaqtaqa manam wanutsiyaqtsu. Tsëmi pasakurqan Rahab jutiyoq warmiwan. Jehovämi israelïtakunata mandarqan Jericö markata ushakätsiyänampaq, peru Jehoväman Rahab markäkuptinmi, pëta ni familianta wanutsiyarqantsu (Jos. 2:9-16; 6:16, 17). Tsënöllam Gabaon markachö nunakunapis  Jehoväta respetar arrepentikuyarqan, tsëmi israelïtakuna wanutsiyarqantsu (Jos. 9:3-9, 17-19).

Kanan witsan guërrachö pelyaq soldädukunaqa, llapan nunakunatam wanutsiyan; Diosnintsikman markäkoq o yärakoq nunakunata y guërrachö mana pelyaq kaqkunatapis.

4. ISRAELÏTAKUNAQA GUËRRAPAQ LEYTAM CUMPLIYAQ

Unëqa, israelïtakunata Jehovä mandarqan guërrapaq churanqan leyta cumpliyänampaqmi. Tsë leykunaqa këkunam karqan: juk markachö nunakunata atacarqa, puntatam tsë nunakunata niyänan karqan mana pelyayänampaq (Deut. 20:10); campamentunkunatam limpiu katsiyänan karqan y kikinkunapis limpium kayänan karqan (Deut. 23:9-14); atacayanqan markakunachö manam warmikunata violayänantsu karqan, tsëtaqa Jehoväta mana respetaq juk nacion soldädukunallam rurayaq; y juk israelïta prësu apanqan warmiwan casakuyta munaptinqa juk killaran pasanan karqan (Deut. 21:10-13).

Kanan witsanqa, mëtsika nacionkunam guërrapaq leyta patsëkatsir firmayashqa. Tsë leytaqa patsätsiyashqa guërraman mana ëwaq nunakunata cuidarmi, peru guërrata rurarqa manam tsë leyta respetayantsu.

5. GUËRRACHÖQA KIKIN DIOSMI YANAPAQ

Unë witsanqa, israelïtakunata yanaparmi kikin Jehovä pelyaq o hasta milagrukunatapis ruraq. Yarpärishun Jericö markata ushakätsinqanta. Israelïtakunaqa Jehovä mandanqanta cäsukurmi, guërrachö këkaqnö qapariyarqan. Tsëmi markapa entëru murällanta Jehovä ishkiratsirqan. Y israelïtakunaqa fäcil-llanam ushakätsiyänampaq markaman yëkuyarqan (Jos. 6:20). Y tiempuwannam, amorreukunatapis venciyarqan. Jehovämi ciëlupita jatusaq rumikunata tamyatsimur amorreukunata wanutsirqan. Israelïtakunapa espädankunawan wanuyanqampitapis tsë rumikunawanmi masqa wanuyarqan (Jos. 10:6-11).

DIOSPA SIRWEQNINKUNAQA ALLI KAWAKUYTAM PROCURAYAN

Yachakurinqantsiknöpis, kanan tiempuqa manam israelïtakunapa tiempunchönötsu kawëkantsik. Peru, ¿tsërëkurllaku guërramanqa ëwantsiktsu? Manam. Diosnintsikmi nirqan kë ushanan tiempukunachöqa sirweqninkuna guërrapaq mana yachakuyänampaq ni guërrachö mana yanapakuyänampaq (Is. 2:2-4). Jesusnam nirqan qateqninkunaqa, “kë munduchö nunakunanö” mana kayanqanta y kë munduchö ima asuntumampis mana mëtikuyanqanta (Juan 15:19).

Jesusqa qateqninkunata mandarqan pelyaman y guërraman chätsikoq rurëkunapita cuidakuyänampaqmi. Tsëmi cuidakuyänan karqan nuna mayinkunata chikipita y pëkunawan cölerakuypita (Mat. 5:21, 22). Tsënöllam mandarqan llapan nunakunawampis alli kawakuyänampaq y hasta chikeqninkunatapis kuyayänampaq (Mat. 5:9, 44).

Noqantsikpis Jesus tsënö ninqantaqa cäsukunantsikmi. Imanömi guërraman ëwëta munantsiktsu, tsënöllam wakinkunata shonquntsikchö chikipëtapis dejanantsik. Shonquntsikchö chikiparqa, manam pëkunawan juntu juntunatsu kashun y hasta congregacionchö wawqintsikkunawan panintsikkunawampis mananam unïdunatsu kashun. Pitapis shonquntsikchö chikipëkanqantsikta cuentata qokurqa, jinan höram cambianantsik (Sant. 4:1, 11).

Guërrata rurayaptin nacionkunata yanapanapa rantinmi, noqantsikqa kuyanakur alli kawakuyta procurantsik (Juan 13:34, 35). Manam ni ichikllapis kë munduchö guërrakunamanqa mëtikuyta munantsiktsu. Ichik tiempullachöna llapan guërrakunata Jehovä ushakäratsimunantam shuyarëkantsik (Sal. 46:9).