Tsë watam Bibliata Estudiaqkunata dirigeqkunaqa, Jehoväta juknölla adorayänampaq reunionkunachö cambiukunata rurayarqan. Diosman Mañakuyanqan, Cantayanqan y Dios Imanö Yanapanqanta Cuentakuyanqan neq reunionkunachö yachakuyänampaqmi, cada semänapaq textuta The Watch Tower revistawan entienditsikayämoq. Tsënöllam Bibliata Estudiaqkunaqa juk calendariuta rurayarqan. Tsëchömi apuntaraq cada semäna textuta yachakuyänampaq, y cancionkunapis qellqaraqmi japallankunalla o familiankunawan Bibliapita yachakur cantayänampaq.

Reunionkunachöqa Diospita yachatsikurnin pasayanqankunatam cuentakuyaq, Jehovätam agradecikuyaq, cancionkunatam cantayaq o Jehovämanmi mañakuyaq. 15 watayoqllaraq këkar 1923 watachö bautizakoq Ëva Barneymi kënö willakun: “Dios yanapanqanta cuentakuyta munarqa kënö nirmi qallayaq: ‘Alläpa alli karnin yanapamanqampitam Señorta agradecikü...’”. Wakin wawqikunataqa alläpam cuentakuy gustaq. Pani Barneymi kënö nin: “Godwin jutiyoq turiqa mayornam karqan y imëkapitam Señorta agradecikoq. Peru alläpa parlaptinmi reunionta dirigikaq turiqa aburrikur qallëkoq, tsëta rikarmi turi Godwinpa warminqa turi Godwinta säcumpita sutapäreq, tsënam pëqa jamakureq”.

Killachö juk kutim cada cläsi o congregacion Diosman Mañakuyanqan, Cantayanqan y Dios Imanö Yanapanqanta Cuentakuyanqan reunionta rurayaq. Tsëtam 1923 wata 1 de abrilchö yarqamoq The Watch Tower revistachö entienditsikurqan. Kënömi nirqan: “Pullan kaq reunionchöqa, yachatsikuyaptin Dios imanö yanapanqantam cuentakuyänan y trabajaqkunatam animayänan […]. Tsëta rurayaptin mas unïdu kayänampaq yanapanampaq kaqtam creiyä”.

Tsë reunionqa 19 watayoq Charles Martin jövintam yanaparqan, pëqa karqan Canadä nacionpa Vancouver markampitam y cläsichömi trabajador o publicador karqan. Martinmi kënö nin: “Tsë reunionchömi yachakurqä wayin wayin yachatsikunäpaq. Tsëchömi willakayämoq wayin wayin imanö yachatsikuyanqanta. Tsëmi yanapamaq wayiyoqkuna ima niyämaptimpis, imata ninäpaq o imanö yachatsinäpaq”.

Diospita yachatsikuyanqanmi llapankunataqa yanaparqan juknölla kayänampaq. 1923 wata 1 de  abrilchö yarqamoq The Watch Tower revistachömi kënö nirqan: “Tsë trabäjullachö llapantsik unïdu kanapaqmi […], 1923 wata martis 1 de mäyu Diosnintsikpita llapantsik yachatsikushun. Tsënömi cada killa kanqa, qallanan semänapa martis junaqninchömi llapantsik yachatsikushun […]. Tsë junaqqa cläsichö llapan kaqkunam imanöllapis yanapakuyänan”.

Mas jövin kaqkunapis yachatsikuyaqmi. 1923 watachö, 16 watayoq Hazel Burford jutiyoq panim kënö nirqan: “Nunakunata imanö yachatsiyänäpaqqa, Bulletin follëtuchömi yarqamoq, tsëtam dememoria yachakuyänä karqan. a Kushishqam awilüwan yachatsikoq yarqoq kä”. Peru Hazel jövinlla kaptinmi, juk wawqiqa Diosnintsikpita yachatsikunanta munarqantsu. Hazelmi kënö nin: “Juk mayorna turim Diosnintsikpita yachatsikunäta pasëpa munarqantsu. Tsë witsankunaqa, Bibliata Estudiaqkunaqa wakinqa manam entiendiyaqtsu ‘jövinkuna [y] shipashkuna’ Teyta Diosnintsikta alabar yachatsikuyänan precisanqanta” (Sal. 148:12, 13). Tsënö kaptimpis, Hazelqa yachatsikurmi sïguirqan. Y watakuna pasariptinmi, Galaad Escuëlaman ëwarqan. Tsëpitanam Panamächö misionëra karqan. Jövinkuna yachatsikuyänanta mana entiendeq wawqikunaqa, tiempuwanqa entiendiyarqannam Diosnintsikpita yachatsikuyta puëdiyanqanta.

Asamblëakuna rurayanqampis wawqi panikunatam yanaparqan juknölla kayänampaq. Cäsi llapan asamblëachömi patsätsiyaq yachatsikoq juk junaq yarquyänampaq. Tsëtam rurayarqan Canadä nacionpa Winnipeg markanchö. 31 de marzuchö asamblëaman llapan ëwaqkunam yachatsikoq yarquyänampaq patsätsiyarqan. Yachatsikuyanqantaqa mëtsikaq nunakunam wiyakuyarqan. Tsë watallachömi, 5 de agostuchö Winnipeg markachö siëti milnö nunakuna asamblëaman ëwayarqan. Canadä nacionchöqa manam imëpis tsënö mëtsikaq nunakunaqa asamblëaman ëwashqatsu kayarqan.

1923 wata 18 a 26 de agostum Californiapa Los Angeles markanchö juk asamblëata rurayarqan. Tsë asamblëa kanampaq semänakuna pishikaptinmi, Bibliata Estudiaqkunaqa periödicukunachö willakuyarqan asamblëa kanampaq kaqta. Invitacionkunatam mediu millon masta nunakunata dejapuyarqan, y cärrunkunapa puntanman y  nunakuna viajayanqan cärrukunapa puntanmampis letrërukunatam churayarqan.

Säbadu 25 de agostum, wawqi Rutherford, “Üshakuna y cabrakuna” neq tïtuluyoq discursuta rurarqan, y entienditsikurqanmi “üshakunaqa” alli shonquyoq nunakuna kayanqanta y Shumaq Patsachö imëyaqpis kawakuyta puëdiyänampaq kaqta. Tsënöllam mana alli religionkuna mana alli këkäyanqanta rikätsikurnin “Amonestacion” neq discursuta rurarqan. Y alli shonquyoq nunakunatam cläru nirqan ‘Alläpa Puëdeq Babiloniapita’ o mana alli religionpita yarqukuyänampaq (Apoc. 18:2, 4). Tiempuwannam tsë yachatsikunqanta mëtsika millonta imprimiyarqan, y tsë tratädukunatam mëtsikaq nunakunata entregayarqan.

Ultimu junaq asamblëachömi wawqi Rutherfordqa, “llapan nacionkunam Armagedonchö ushakäyanqa, peru mëtsika millon kanan kawëkaqkunaqa manam wanuyanqanatsu” neq tïtuluyoq discursuta rurarqan. Tsëtaqa treinta milpitapis mas nunakunam wiyayarqan. Tsë asamblëaman mëtsikaq nunakuna ëwayänampaq kaqta musyarmi, Bibliata Estudiaqkunaqa Coliseu de Los Angeles jutiyoq estadiuta alquilayarqan. Y llapan ëwaqkuna shumaq wiyakuyänampaqmi tsë estadiuchö këkaq mäquinakunata utilizäyarqan. Tsë witsampaqqa, tsë churayanqan mäquinakunataqa manaran jukkunaqa katsiyarqanraqtsu. Y asamblëaman mana ëwaqkunaqa mëtsikaqmi radiupa wiyayarqan.

1923 watachömi Africachö, Euröpachö, Indiachö y Sudamëricachö nunakuna Diosnintsikpita yachakur qallëkuyarqan. Indiachöqa, Adavimannathu Joseph jutiyoq wawqim hindi, tamil, telugu y urdu idiömakunachö publicacionkunata rurar yanapakurqan. Wawqi Josephqa casädum karqan y seismi wamrankuna karqan.

Siërra Leöna nacionpitanam Bibliata Estudiaq Alfred Joseph y Leonard Blackman Nueva Yorkchö këkaq Brooklyn oficïnaman yanapayänanta munar cartakuyarqan. Y cartakuyanqantaqa 1923 wata 14 de abrilmi contestayarqan. Alfredmi kënö willakun: “Säbadu paqasmi telëfunupa qayarayämarqan y parlapämaq nunapa vozninqa fuertim karqan. Kënömi nimarqan: ‘¿Qamku Sociedad Watch Towerman Diospita yachatsikoqkunata mañakurnin cartakurqëki?’. ‘Awmi’ niptïnam, ‘noqatam mandayämashqa’ nimarqan. ¿Pitan parlapëkämarqan? William Brown jutiyoq wawqim”. Pëqa tsë junaqllaran Carïbipita warmin Antoniawan y Louise y Lucy wamrankunawan chäyämushqa kayänaq. Tsëpitaqa wawqi panikunawanmi tinkuriyarqan.

Alfredmi maslla kënö cuentakun: “Waräninnam  cada semäna rurayanqänö Leonardwan Bibliapita yachakuykäyaptï punkupa juk jatun nuna yurirkamurqan. ¿Pitan karqan? Wawqi William Brownmi. Diosnintsikpita alläpa yachatsikuyta munarmi waränin junaq discursu rurëta munarqan”. Chämunqampita juk killapis manaraq cumpliptinmi apamunqan llapan publicacionkunata nunakunata dejapur usharirqan. Tsëpitam cincu mil masta librukunata chaskirqan y tsëtapis rasllam o sasllam usharirqan. Peru nunakunaqa manam libruta rantikoqtanötsu reqiyaq. Bibliawan imëpis yachatsikuptinmi, “Bibliapita yachatsikoq Brown” nir reqiyaq.

Tsë tiempupaqqa, Alemania nacionpa Barmen markachö këkaq sucursalchö trabajaqkunaqa atskaqnam kayarqan y Betel wayiqa manam tinkurqannatsu. Y frances soldädukunam tsë markata atacayänanna karqan. Tsëmi Bibliata Estudiaqkunaqa, Magdeburgo markachöna juk wayita tariyarqan publicacionkunata imprimiyänampaq. Y 19 de junium llapan cösaskunawan y imprimiyänampaq mäquinakunata apakurkur Magdeburgo Betelmanna ëwakuyarqan. Ëwakuyanqampita waränin junaq Principal Oficïnaman ëwakuyanqanta willakuriyanqanllachönam, periödicukunachöqa willakuriyarqan, frances soldädukuna Barmen markata atacashqa kayanqanta. Wawqi panikunaqa alläpam kushikuyarqan tsë desgraciapita Jehovä cuidashqa kanqanta.

Brasilchönam, George Young jutiyoq wawqi entëru Brasilpa viajarqan Diosnintsikpita yachatsikurnin. Y tsë nacionchömi juk sucursalta rurayarqan y portugues idiömachömi The Watch Tower revistata imprimir qallëkuyarqan. Juk ishkë killakunallachömi siëti milpitapis masta publicacionkunata nunakunata dejapushqa karqan. Wawqi George Brasilman ëwanqanqa alläpam yanapakurqan. Tsëchömi Sarah Ferguson jutiyoq warmi karqan. Pëqa 1899 watapitam The Watch Tower revistata leyishqa kanaq, peru manam bautizakuyta puëdinaqtsu. Wawqi George chanqampita juk ishkë killakunallatam, tsë warmiqa chusku wamrankunawan bautizakuriyarqan.

Tsë watam 1923 wata 15 de diciembrichö yarqamoq The Watch Tower revistachö willakurqan reunionkunachö, Diospita yachatsikuyanqanchö y asamblëakunachö cambiukunata rurayanqan alläpa yanapakushqa kanqanta. Kënömi nirqan: “Cläsichö këkaqkuna Diosnintsikta sirwir alli këkäyanqanqa clärum rikakun […]. Diosnintsik nimanqantsik armakunata alli churakurkur Diosnintsikta empëñu empëñu y kushishqa sirwishun, wataqa usharamunqanam”.

1924 watachöpis Bibliata Estudiaqkunaqa mëtsikatam rurayänan karqan. Brooklynchö Principal Oficïnachö trabajaq wawqikunaqa, Brooklynpa amänunchömi Staten Island neq sitiuchö juk edificiuta rurëkäyarqan. Y 1924 wata qallananchömi ushayarqan. Tsë edificium yanapakurqan wawqi panikuna juknölla kayänampaq y mëtsikaq nunakunata Diosnintsikpita yachatsiyänampaq.