1, 2. ¿Imatataq rurashwan Bibliata leyir y estudiar alli yachakunapaq? Juk igualatsikuywan willakaramuy.

 JUK wayita rantita munarqa, ¿imatataq rurankiman? ¿Fötuchö rikärinqëkillawantsuraq rantirinkiman? Manachi. Imanö kanqanta musyanëkipaq y ëka cuartuyoq kanqanta musyanëkipaqchi rikaqraq ëwankiman. Y capazchi alli rurashqa o mana alli rurashqa kanqanta musyanëkipaq, plänutapis rikärinkimanraq. Tsënö alli rikapärirchi musyankiman tsë wayi imanö kanqanta.

² Tsë wayita alli rikapaq cuentam, Bibliata estudiarnimpis alli yachakunantsik. Juk librum nin Biblia willakunqankunaqa “jatusaq törriyoq y alli fondu cimientuyoq jatun edificiunö” kanqanta. ¿Imatataq rurashwan Bibliata leyirnin alli entiendinapaq? Apurädu leyirqa, fäcil kaqkunallatam entiendishun y sasa o aja kaqkunataqa manam entiendishuntsu (Heb. 5:12). Tsëmi rurinman yëkuykur wayita alli rikapaqnöpis Bibliata estudiarqa, wakin librunkunachö willakunqankunawan imanö igualanqanta entiendita procuranantsik. Manam creinqantsikllawanqa conformakunantsiktsu, tsëpa rantinqa imanir creinqantsiktam alli musyanantsik.

3. ¿Imata rurayänampaqtan cristiänu mayinkunata Pablu animarqan, y imanirtan tsëta rurayänan karqan? (Efesius 3:14-19).

³ Diospa Palabran yachatsikunqankunata alli entiendinapaqqa, mana entiendipaq kaqkunatam alli yachakunantsik. Apostol Pablum cristiänu mayinkunata nirqan gänas gänaslla Diospa Palabranta yachakuyänampaq, tsënöpam pëkunaqa ‘anchunta, largunta’, jatun kanqanta y ruri kanqanta alli entiendiyänan karqan. Tsënö entiendirmi markäkuyninkunachö o yärakuyninkunachö alli ‘firmi kayänan’ karqan (leyi Efesius 3:14-19). Noqantsikpis tsëtam ruranantsik. Këchömi yachakurishun, Diospa Palabranta alli entiendinapaq y imanö  kanqanta musyanapaq imata ruranqantsik yanapamanqantsikta.

4. ¿Imatataq rurashwan Jehoväta maslla reqinapaq? Juk igualatsikuywan willakaramuy.

⁴ Cristiänukunaqa manam Bibliapita puntata yachakunqantsikkunallawanqa conformakunantsiktsu. Tsëpa rantinqa, mas sasa o aja yachatsikuyninkunata entiendinapaqmi kallpachakunantsik, tsëpaqqa santu espïritum yanapamäshun (1 Cor. 2:9, 10). ¿Imanirtan Jehoväta maslla reqinëkipaq Diospa Palabranta maslla yachakunkitsu? Imëkapitam yachakuyta puëdinki. Capazchi yachakunkiman unë sirweqninkunata kuyarnin Jehovä imakunata ruranqanta, y tsëmi yanapashunki qamtapis kuyashunqëkita entiendinëkipaq. Capazchi yachakunkiman israelïtakuna imanö adorayänampaq Jehovä patsätsinqanta y tsëtanam igualatsinkiman kanan witsanchö cristiänukuna adorayänampaq patsätsinqantawan. O capaz yachakunkiman kë Patsachö Jesus këkar kawanqanwan y yachatsikunqanwan puntallapitana Jehovä willakunqankuna imanö cumplikanqanta.

5. ¿Ima tëmakunataraq yachakuyta gustankiman?

⁵ Mana entiendinqëki kaqkunapitaqa, ¿ima tëmakunataraq yachakunkiman? “ Yachakunapaq tëmakuna” neq recuadruchömi yachakunëkipaq atska tëmakuna kan. Bibliapita alli yachakoqkunata tapuyaptinmi, tsë tëmakunapita yachakuyta munayanqanta niyarqan. Y yachakunëkipaqqa utilicëta puëdinki Índice de las publicaciones Watch Tower neq librutawan Jehoväpa Testïgunkuna yachakur ashinapaq neq follëtutam. Tsë tëmakunapita yachakurqa, Diosnintsiktam maslla reqinki y pëmanmi maslla markäkunki o yärakunki (Prov. 2:4, 5). Kananqa sasa o aja entiendinan kaqkunata juk ishkëllata yachakurishun.

6. (1) ¿Imachötan jukläya imatapis rurëta munanqantsikwan imanö ruranapaq kaqta pensanqantsik? (2) ¿Imanirtan nishwan nunakunapaq y kë Patsapaq Diosnintsik rurëta munanqanqa imë karpis cumplikänampaq kaqta? (Efesius 3:11).

⁶ Diosnintsik rurëta munanqampaq Biblia willakunqanman pensarishun. Imatapis rurëta munanqantsikqa manam igualtsu imanö ruranapaq kaqta pensanqantsikwan. Imanö  ruranapaq kaqta pensanqantsikta puntata entiendirishun. Juk markaman ëwëta munankiman, peru tsëpaqqa alliran pensanki më nänipa ëwanëkipaq kaqta. Peru ima problëmapis kaptin tsë pensanqëki nänipa ëwëta mana puëdirqa, juk nänipana ëwanëkipaqmi cambiarita puëdinki. Y imatapis rurëta munanqantsikqa tsë markaman chëta munanqantsiknömi. Tsëtaqa manam cambiantsiktsu, clärum musyantsik më markaman chëta munanqantsikta. Tsëmi ëwanantsikpaq decidinqantsik nänipa päsi mana kaptimpis, juk nänipapis tsë markamanqa chëta puëdishwan. Tsënöllam Teytantsik Jehoväpis rurëta munanqantaqa cambiashqatsu, imë karpis cumplinqam. Y tsëtam Palabran Bibliachö ichikllapa ichikllapa musyarëkätsimarquntsik (Efes. 3:11). Jehoväqa “imapis yarpanqannö rurakänampaqmi” imëkatapis juknöpa juknöpana rurarëkan (Prov. 16:4). Y Jehovä ruranqankunaqa manam imëpis ushakantsu. Tsëqa, ¿imatataq Jehovä Diosnintsik rurëta munan? ¿Imakunatataq cambiashqa rurëta munanqanta cumplinampaq?

7. Adanwan Ëva jutsata rurariyaptin, ¿ima cambiutataq Jehovä rurarqan rurëta munanqanta cumplinampaq? (Mateu 25:34).

⁷ ¿Nunakuna imanö kayänantataq Diosnintsik munarqan? Adantawan Ëvatam kënö nirqan: “Mëtsika tikrayänëkipaq y patsachö junta kayänëkipaq wamrëkikuna atska katsun. Qamkunapa makikikunachömi kanqa [...] patsachö llapan kawaq animalkuna” (Gen. 1:28). Peru Adanwan Ëva mana cäsukoq kayanqampitam nunakunaqa jutsasapa tikrayarqan. Peru ¿tsërëkurtsuraq Jehovä munanqanqa cumplikanmannatsu karqan? Manam. Diosnintsikqa imanö ruranampaq kaqllatam cambiarirqan. Adanwan Ëva jutsata rurariyaptinllam ciëluchö juk gobiernuta patsätsinampaq kaqta decidirqan y tsë gobiernum nunakunapaq y Patsapaq munanqanta cumplimunan karqan (leyi Mateu 25:34). Tsëpitanam Jehoväqa kuyakoq karnin Tsurinta kë Patsaman mandamurqan. Y kë Patsachö këkarnam Jesusqa Diospa Gobiernumpita nunakunata yachatsirqan, y nunakunata jutsapita y wanuypita salvanampaqmi wanurqan. Tsëpitanam ciëluchö kawanampaq y gobernamunampaq Diosnintsik kawaritsimurqan. Diosnintsik rurëta munanqankunapitaqa maskunamanran pensëta puëdintsik.

8. (1) ¿Diosnintsik imata ruranampaq kaqpitataq Bibliaqa mas willakun? (2) Efesius 1:8 a 11 ninqannö, ¿imatataq Jehoväqa logrëta munan? (Rikäri jana qaranchö këkaq dibüjuta).

⁸ Bibliachöqa mas willakun Jehovä Diosnintsik jutinta respetatsinampaq kaqtam, tsëpaqqa kë Patsaman gobernamunampaqmi Jesucristuta churashqa. Jehovä rurëta munanqantaqa manam ni ima michanqatsu (Is. 46:10, 11, nötakuna; Heb. 6:17, 18). Y tiempuwanqa kë Patsam Shumaq Patsaman tikranqa, y tsëchömi Adanpita y Ëvapita mirashqa jutsannaq nunakuna imëyaqpis kawakuyanqa (Sal. 22:26). Peru Jehovä Diosnintsikqa maskunatam ruranqa. Pëqa munan ciëluchö kawaq kaqkunawan Patsachö kawaq kaqkuna juk familianölla llapankuna unïdu kayänantam, y Pëlla Llapanta Gobernaq kanqanta respetayänantam munan (leyi Efesius 1:8-11). ¿Manaku alläpa kushikuntsik Jehovä rurëta munanqankunata llapanta cumplimunampaq kaqta musyarnin?

9. Bibliata leyirninqa, ¿shamoq tiempu imanö kanampaq kaqtataq musyantsik?

⁹ ¿Ima pasakunampaq kaqtataq Eden huertachö Jehovä willakurqan? Genesis 3:15 b textuchömi nin Jehovä munanqanta imanö  cumplinampaq kaqta, peru tsëpaqqa mëtsika watakunaran pasanan karqan. Jehovä änikunqanqa jukqa karqan, Abrahanpa kastampita Cristu yurinampaq kaqmi (Gen. 22:15-18). Y tiempuwannam 33 watachö Biblia willakunqannö Jesuspa atakanta culebra kanirqan (Hëch. 3:13-15). Y mil watakuna masran pishin, culebrapa o Satanaspa peqanta o umanta Jesus jarunampaq. Tsëran Genesis 3:15 willakunqanqa llapan cumplikärinqa (Apoc. 20:7-10). Peru Bibliaqa tsë asuntupaq maskunataran willakun. Satanas gobernanqan nunakunawan Jehovä Diospa sirweqninkuna chikinakuyanqan tiempu manaraq ushakaptin, imëkakuna pasakunampaq kaqtam willakun.

10. (1) ¿Imatan ichik tiempullachöna pasakunqa? (2) ¿Imatataq rurashwan tsë tiempupaq listu këkänapaq? (Rikäri nötata).

¹⁰ Bibliaqa willakun mantsakëpaqkuna pasakunampaq kaqtam. Puntataqa nacionkunam, “¡yamëna y segürunam këkantsik!” niyanqa (1 Tes. 5:2, 3). Tsënö nikäyaptinmi, nacionkunaqa mana alli religionkunata illaqpita ushakätsiyanqa, y tsënam alläpa sufrimientu qallëkunqa (Apoc. 17:16). Tsëpitanam “pukutë jananchö mëtsika poderyoq y chipapäkur” Nunapa Tsurin shamuptin imëka mantsakëpaqkuna pasakunqa (Mat. 24:30). Tsë tiempum Jesusqa nunakunata juzganqa, y cabrakunapita üshakunata rakeqnömi alli nunakunata mana alli nunakunapita rakinqa (Mat. 25:31-33, 46). Y Satanasqa alläpam cölerakunqa. Tsëmi Magog markachö këkaq Gogta o juk grüpu nacionkunata utilizanqa, Jehoväpa sirweqninkunata atacayänampaq (Ezeq. 38:2, 10, 11). Tsë tiempuchömi kë Patsallachöraq këkaq ciëlupaq akrashqakunaqa ciëluta ëwakuyanqa. Tsëchömi Jesuswan y angelkunawan juntakarkur Armagedon guërrachö pelyayämunqa, y tsë tiempum alläpa sufrimientu ushakärinqa (Mat. 24:31; Apoc. 16:14, 16). c Tsëpitaqa Jesusnam Mil Watapa kë Patsaman gobernar qallëkamunqa (Apoc. 20:6).

11. Mana wanurna kawakunqantsik tiempuchöqa, ¿imanöraq kawakunki? (Rikäri fötutawan dibüjuta).

¹¹ Kananqa pensarishun, Mil Watapa Jesus  gobernanqan tiempu ushariptin imanö kawakunapaq kaqman. Bibliachömi Diosnintsikpaq kënö nin: “Nunakunapa shonqunmampis imëyaqpis kawakuyta munayänampaqmi churashqa” (Ecl. 3:11). Mana wanuypa kawakunqantsik tiempuchöqa, ¿imanöraq kawakunki y Jehovä Diosnintsiktaqa mastsuraq reqinki? Acerquémonos a Jehová librupa 319 kaq päginanchömi kënö nin: “Mëtsika mil watakunapa o mëtsika millon watakunapa kawakunqantsik tiempuchöqa, Jehovä Diosnintsikpitam kanan yachakunqantsikpitapis masta yachakushun. Tsënö karpis, manam Jehovä Diosnintsik imanö kanqampitaqa yachakuyta ushashuntsu. […] Shumaq Patsachöqa imëkata rurarmi kushishqa kawakushun. Peru imëkata ruranqantsikpitapis mas shumaqqa kanqa, Jehovä Diosnintsikpa mas amïgun tikranqantsikmi”. Peru tsë tiempu chämunqanyaqqa, ¿ima maskunatataq Diosnintsikpa Palabranchö yachakushwan?

12. ¿Imanötan ciëluman rikëkaq cuenta kashwan? Willakaramuy.

¹² Diospa Palabranta leyirmi entiendita puëdintsik “ciëluchö kawaq Teyta” Jehovä imanö kanqanta (Is. 33:5). Bibliaqa willamantsik ciëluchö Jehovä Diosnintsik imanö kanqanta y ciëluchö sirweqninkuna imanö kayanqantam (Is. 6:1-4; Dan. 7:9, 10; Apoc. 4:1-6). Këllaman pensarishun: ‘Ciëlu kichakäriptinmi’ Ezequielqa, ‘Teyta Dios revelanqankunata’ rikarqan y tsëkunatam leyita puëdintsik (Ezeq. 1:1).

13. Ciëluchö Jesus imëkakunata ruranqankunaman pensar, ¿imanötan sientikunki? (Hebrëus 4:14-16).

¹³ Tsënöllam pensanantsik, ciëluchö Gobernanti karnin Jesus ruranqankunaman y alläpa llakipäkoq Mandakoq Sacerdöti kanqanman. Pë yanapamashqam mana allikunapa pasanqantsik hörakuna llakipëkamänantsikpaq Diosnintsikman mañakuyta puëdintsik (leyi Hebrëus 4:14-16). Cada junaqmi pensanantsik  Jehoväwan Jesus noqantsikpaq rurayämunqankunaman y kanan witsampis rurëkäyämunqanman. Jehovä Diosnintsikta rasumpa kuyarqa, cada junaqmi kushishqa sirwita puëdishun (2 Cor. 5:14, 15).

14. Jehovätawan Jesusta kuyarqa, ¿imatataq masqa ruranantsik? (Rikäri fötutawan dibüjuta).

¹⁴ Diosnintsikta y Jesusta agradecikurqa, wakin nunakunatam yachatsinantsik Jehoväpa sirweqnin tikrayänampaq y Jesuspa qateqnin tikrayänampaq. Tsëta rurashqam pëkunaqa alläpa kushikuyanqa (Mat. 28:19, 20). Apostol Pablupis tsëtam rurarqan Jehovä Diosnintsikta y Cristuta agradecikurnin. Pëqa clärum musyarqan “llapan nunakuna salvakuyänanta y rasumpa kaqta” yachakuyänanta Jehovä munanqanta (1 Tim. 2:3, 4). Tsëmi nunakuna salvakuyänanta munar nunakunata mana dejëpa yachatsirqan (1 Cor. 9:22, 23).

15. Salmus 1:2 textu ninqannö, ¿imata rurartan kushishqa kashun?

¹⁵ Salmus qellqaqmi nirqan, ‘Diospa leyninta’ cäsukoq y ‘paqasta junaqta’ leyeq y leyinqanman alli pensaq nunaqa kushishqa kanqanta y ima ruranqampis alli yarqunqanta (Sal. 1:1-3). Tsë textukunapaq parlarmi, Bibliata traduceq nuna kënö nin: “[Bibliata leyeq nunaqa] Diospa consëjunkunata gustarmi Bibliachö ashinan, allim yachakunan y yachakunqankunamanmi pensanan. […] Y Bibliapita yachakurnin mana entiendishqa karqa, tsë tiemputa perdishqa kanqantam pensanqa” (Studies in the Psalms, Joseph Rotherham). Noqantsikpis Diosnintsikpa Palabranta estudianapaq kallpachakurninqa, imëkakunapaq yachatsikunqankunatam entiendishun, y wakin versïculukunawan imanö igualanqantapis entiendishunmi. Diosnintsikpa Palabranta tukuynöpa yachakurnin y entiendirqa, ¡kushishqam kashun!

16. ¿Imatataq qateqninchö yachakushun?

¹⁶ Llapantsikmi Palabranchö Diosnintsik yachatsimanqantsikkunataqa yachakunan mana fäcil kaptimpis, entiendita puëdintsik. Tsëmi qateqnin kaqchöqa yachakushun Jehoväpa templumpita. Tsë templupaqqa apostol Pablu parlarqan hebreu cristiänukunaman cartakurmi. Tsëpita yachakunqantsikqa alläpa shumaqmi kanqa.