1, 2. (1) ¿Ima cargutataq Salomon chaskirqan? (2) ¿Imanirtaq Davidqa yarpachakurqan?

JEHOVÄMI Salomonta akrarqan Jerusalenchö juk precisaq templuta ruratsinampaq. Tsë templuqa shumaq kënimpitam më tsë nacionchö alläpa reqishqa kanan karqan, peru tsëpitapis masqa Jehovä Diosta adorayänan wayim kanan karqan (1 Crön. 22:1, 5, 9-11).

² Rey Davidqa wamran Salomonta Dios yanapanampaq kaqmanmi confiakurqan. Peru tsënö karpis jövinllaraq kaptinmi yarpachakurqan. ¿Salomonqa valientitsuraq kanman karqan templuta ruranampaq? ¿O jövinllaraq kartsuraq mantsapakunman karqan? Alli yarqapakïta munarqa, valientim kanan karqan y rurarmi qallanan karqan.

3. ¿Imatataq Salomonqa teytampita yachakurqan?

³ Salomonqa teytan Davidpitachi valienti këtaqa yachakurqan. Davidqa jövinllaraq këkarmi üshanta mikoq mantsëpaq  chukaru animalkunata wanutsirqan (1 Sam. 17:34, 35). Jina Dios yanapaptinmi, alläpa pelyëta yachaq y mantsanëpaq mëtsikan nunatapis juk uchuk rumillawan wanuratsirqan (1 Sam. 17:45, 49, 50).

4. ¿Imanirtaq Salomonqa valienti këta wanarqan?

⁴ Davidqa valienti karmi wamran Salomontaqa templuta ruranampaq animëta puëdirqan (leyi 1 Crönicas 28:20 *). Sïkush mantsapakurnin Salomonqa templu rurëta qallanmantsu karqan, tsëqa mana alli yarqapakunqampitapis mas peormi kanman karqan.

5. ¿Imanirtaq valienti këta wanantsik?

⁵ Noqantsikpis valienti kanapaqqa, Salomonnömi Jehovä yanapamänata wanantsik. Tsënöpam mandamanqantsikkunata cumplita puëdishun. Tsëqa yachakurishun valienti nunakunapita, y pensashun pëkunanö ruranantsikpaq kaqman.

6. ¿Imatataq Josëpita yachakuntsik?

⁶ Potifarpa warminmi Josëta exigirqan punukïkuyänampaq. Josëqa alleqchi musyarqan tsë warmi ninqanta mana rurarqa problëmachö kanampaq kaqta. Peru valienti karninmi warmi ninqanta cäsurqantsu (Gen. 39:10, 12).

7. ¿Imanötaq Rahabqa valienti kanqanta rikätsikurqan? (Rikäri kë yachatsikïpa qallananchö këkaq dibüjuta).

⁷ Rahab jutiyoq warmipis valientim karqan. Juk kutim ishkaq israelïtakuna wayinman chäriyarqan, y tsëllanam Jericöpita nunakuna tsë israelïtakunata ashirnin chäriyarqan. Peru Rahabqa Jehoväman confiakurninmi tsë nunakunata salvëta munar pakëkurqan (Jos. 2:4, 5, 9, 12-16). Pëqa creirqanmi Jehovä rasumpa kaq Dios kanqanta, y Canaanchö markakunata israelïtakunata qonampaq kaqta. Awmi, valienti kanqampitam familianwan salvakuyarqan (Jos. 6:22, 23).

8. ¿Imatataq apostolkuna Jesuspita yachakuyarqan?

⁸ Jina Jesuspa apostolninkunapis valientim kayarqan. Y tsëtaqa Jesuspitam yachakuyarqan (Mat. 8:28-32; Juan 2:13-17; 18:3-5). Juk kutim saduceu grüpupita mandakoq religiösukuna obligayarqan Jesuspita manana parlayänampaq, peru pëkunaqa manam cäsuyarqantsu (Hëch. 5:17, 18, 27-29).

9. ¿2 Timoteu 1:7 textu ninqannö pitaq valienti kanapaq yanapamantsik?

⁹ Josë, Rahab, Jesus y apostolkunapis alli kaqta rurayänampaqqa valientim kayarqan. Jehovämanmi confiakuyarqan y manam kikinkunamantsu. Y noqantsikqa, ¿problëmakunapa pasarnin Jehovämanku confiakuntsik o kikintsikllamanku? (leyi 2 Timoteu 1:7). Rikärishun familiachö y congregacionchö valienti kanqantsikta imanö rikätsikunapaq kaqta.

10. ¿Imanirtaq jövinkunaqa valienti këta wanayan?

¹⁰ Jövinkunaqa imëkakunapam pasayan, tsëmi Jehovä munanqannö imatapis rurayänampaqqa valienti kayänan. Salomonpitam yachakïta puëdiyan. Pëqa alli kaqta decidinampaq y templuta ushatsinampaqqa valienti këtam wanarqan. Awmi, jövinkunataqa teytankunam yanapëta puëdiyan, peru imatapis akrayänampaq kaqtaqa kikinkunam decidiyänan (Prov. 27:11). Amïgunkunata akrëchö y kushikï asuntuchö imata akrayänampaq, portakïninkunachö limpiu kayänampaq y bautizakuyänampaqqa kikinkunam  decidiyänan. Tsëpaqqa valientim kayänan, porqui Jehovä Diospita burlakoq Satanas mana gustanqan kaqtam rurëkäyan.

11, 12. (1) ¿Imanötaq valienti kanqanta Moises rikätsikurqan? (2) ¿Imanötaq jövinkuna Moises ruranqanta qatiyanman?

¹¹ Shamoq tiempuchö imata rurayänampaq kaqtaqa, kananmi jövinkunaqa decidiyänan. Wakin nacionkunachöqa universidäman ëwayänampaq y alli trabäjuyoq kayänampaqmi jövinkunata exigiyan. Y wakin nacionkunachönam alläpa waktsa kë kaptin jövinkunaqa pensayan familiankunata yanapayänampaq mas trabajayänan precisanqanta. Jövin, tsëkunapa pasëkarninqa Moises ruranqanman pensë. Pëqa Faraonpa willkannö imëka jananchö winëkarpis y egipciu familiankuna y yachatseqninkuna alläpa precisaq këman y rïcu këman chänampaq exigïkäyaptimpis, valienti karmi Diosta sirwinampaq decidirqan. Egiptupita yarqurir y imëkanta jaqirirqa Jehovämanmi confiakurqan (Heb. 11:24-26). Y Jehoväqa bendicirqanmi y shamoq tiempuchöpis bendicinqam.

¹² Moises ruranqanta qatirnin y Diospa kaqta puntaman churarninqa, jövinkunaqa bendicishqam kayanqa. Familiankuna wanayanqanta tariyänampaqmi Jehovä yanapanqa. Jövin Timoteupis llapan kawëninwanmi Jehoväta sirwirqan, y qampis tsënö rurëtaqa puëdinkim * (leyi Filipensis 2:19-22).

13. ¿Imanötaq juk shipashta valienti kanqan yanapashqa?

¹³ Estädus Unïduspita juk shipashmi Jehoväpa kaqchö masta rurëta alläpa mantsapakoq. Kënömi nin: “Alläpa mantsallïsham karqä. Reunionkunaman ëwarqa manam piwampis parlëta puëdeqtsu kä. Y wayin wayin yachatsikïtanäqa alläpam mantsëkoq kä”. Kë shipashqa teytankuna y cristiänu mayinkuna yanapayaptinmi precursöra tikrarirqan. Y kënömi nin: “Satanaspa makinchö këkaq nunakunaqa universidäman ëwë, reqishqa kë, qellëyoq kë y imëkayoq këqa imëkapitapis mas alli kanqantam niyan. Peru tsëtaqa manam lograyanllatsu. Tsëpa rantinqa alläpa utishqa y yarpachakïyoqmi ushayan. Peru noqataqa Jehoväta sirwinqämi kushishqa kawakunäpaq yanapamashqa”.

14. ¿Ima cäsukunachötaq teytakuna valienti kayänan?

¹⁴ Teytakunapis valienti këtam wanayan. Itsa Familiachö Diosta Adorana Hörachö yachakuyänan këkaptin, yachatsikoq yarqunan këkaptin o reunionninman ëwanan këkaptin patronninqa mas hörakuna trabajanampaq ninqa. Y “manam” ninampaqqa valienti këtam wanan. Tsënöpam precisaq kaqta puntaman churëta wamrankunata yachatsinqa. Jina congregacionchö wakin teytakuna wamrankuna rurayänanta permitiyanqankunataqa, itsa pëqa wamrankuna rurayänanta permitinqatsu. Y tsë permiteq teytakunaqa itsa tsë rurëkunata wamrankunata imanir mana permitinqanta tapuyanqa, tsëqa valienti këtam wanan imanir mana permitinqanta respëtuwan contestanampaq.

15. ¿Imanötaq teytakunata yanapan Salmus 37:25 y Hebrëus 13:5 textukuna?

¹⁵ Jina teytakunaqa valienti kayanqanta rikätsikuyan Diospa kaqchö masta rurayänampaq wamrankunata yanaparninmi. Itsa wakin teytakunaqa edäyëman chäyaptin cuidëta mana puëdiyänampaq kaqta mantsapakurnin wamrankunata animayanqatsu precursor kayänampaq, Betelman  ëwayänampaq, Diosta adorana wayikunata o asamblëa localkunata rurëman o yachatsikoqkunata mas wanayanqan markakunam yanapakoq ëwayänampaq. Peru teytakuna valienti karninqa Jehovä cuidanampaq kaqmanmi confiakuyanqa (leyi Salmus 37:25 * y Hebrëus 13:5). Tsënöpam wamrankunata yachatsiyanqa valienti këta y Jehoväman confiakïta (1 Sam. 1:27, 28; 2 Tim. 3:14, 15).

16. (1) ¿Imanötaq wakin teytakuna wamrankunata yanapayashqa Diospa kaqchö masta rurayänampaq? (2) Y tsënö rurayanqanqa, ¿imanötaq wamrankunata yanapashqa?

¹⁶ Estädus Unïduspita juk teytam wamrankunata imanö yanapayanqampita kënö nin: “Wamräkuna manaraqpis parlayaptin ni puriyaptinmi, congregacionchö yanapakï y precursor këqa alläpa shumaq kanqanta warmïwan parlapäyaq kayä. Kananqa tsënö yanapakïtam munayan. Tsëmi yanapan tentacionkunachö alleq tsarakuyänampaq y Jehovällata sirwita munayänampaq”. Ishkë wamrayoq juk wawqipis kënömi nirqan: “Mëtsikaq teytakunam wamrankuna ima profeciontapis lograyänanta munar tiemputa y qellëta gastayan. Peru mas alliqa, Jehoväwan amïgu kayänampaq yanapanqantsikmi. Alläpam kushikuyä Diospa kaqchö mas yanapakïta wamräkuna munayanqanta y tsëta logrëkäyanqanta”. Diospa kaqchö masta rurayänampaq wamrankunata yanapaq teytakunataqa Jehovä bendicinqam.

17. ¿Imanötaq congregacionchö valienti kanqantsikta rikätsikushwan?

¹⁷ Jina congregacionchöpis valienti kanqantsiktaqa rikätsikunantsikmi. ¿Imakunachö? Anciänu kaqkunaqa, jatun jutsata rurashqa cristiänukunata juzgarnin, yawar asuntuchö yanapakurnin y carcelkunachö Bibliapita yachatsikurnin y reunionkunata rurarninmi. Jina soltëra panikunapis  Jehoväpa kaqchöqa mastam rurëta puëdiyan; precursöra këta, yachatsikoqkunata wanayanqan markakunaman ëwëta, Diosta adorana wayikunata y asamblëa localkunata rurëchö yanapakïta o Diospa Gobiernumpita Yachatsikoqkunapaq Escuëlapaq o Galaad escuëlapaq solicitudta llenëtapis puëdiyanmi.

18. ¿Imanötaq mayorna panikuna valienti kayanqanta rikätsikuyanman?

¹⁸ Jina congregacionchö mayorna kaq panikunatapis alläpam kuyantsik. Puntatanö rurëta manana puëdirpis, congregacionchöqa yanapakïta puëdiyanmi (leyi Tïtu 2:3-5). Këllaman pensarishun, itsa anciänukuna niyanqa juk shipashlla panita vistikï asuntuchö yanapayänampaq. Y tsëpaqqa valientim kayänan, porqui mana piñapashllapam Biblia ninqannö vistikunampaq shumaq consejayänan (1 Tim. 2:9, 10). Mayorna cristiänakuna kuyakoq kayanqan y wakinkunata yanapëta procurayanqanmi congregacionta alläpa yanapan.

19. (1) ¿Imanötaq bautizakushqa ollqukuna valienti kayanqanta rikätsikuyanman? (2) ¿Imanötaq bautizakushqa kaq ollqukunata Filipensis 2:13 y 4:13 textu yanapan?

¹⁹ Jina bautizakushqa kaq ollqukunapis valientim kayänan y carguta chaskiyänampaqmi yanapakur qallayänan. Pëkuna cargukunata chaskiyanqanqa congregacionchö alläpam yanapakun (1 Tim. 3:1). Itsa wakinkunaqa siervu ministerial o anciänu këta mana mereciyanqanta pensayan unëna jutsata rurashqa karnin, o shumaq yanapakïta mana puëdiyänampaq kaqta pensarnin. Peru ama mantsapakïtsu, Jehovämi yanapashunki (leyi Filipensis 2:13; 4:13). Yarpë, Moisespis Dios mandanqanta ruranampaqqa mana puëdeqnömi sientikurqan (Ex. 3:11). Peru Jehovämi valienti kanampaq y llapan rurëninta cumplinampaq yanaparqan. Tsëmi qamtapis yanapashunëkipaqqa Jehoväta mañakunëki, cada junaq Bibliata leyinëki y unë witsan valienti nunakuna imanö kayanqanman pensanëki. Jina anciänukunatam mañakunëki imallachöpis yanapakunëkipaq y shumaq yachatsiyäshunëkipaq. Carguta manaraq chaskishqa bautizakushqa llapan ollqukunatam animayaq valienti kayänampaq y congregacionchö alleq yanapakuyänampaq.

20, 21. (1) ¿Imanirqantaq Salomonta teytan David? (2) ¿Y tsënö rurarninqa imatataq chaskishun?

²⁰ Rey Davidmi Salomonta nirqan templuta rurëta ushanqanyaq Jehovä yanapanampaq kaqta (1 Crön. 28:20). Salomonqa alleqchi yarpararqan teytan ninqanta, tsëchi jövinllaraq këkarpis mantsapakurqantsu. Valienti karmi templu rurëta qallarirqan, y Jehovä yanapaptinmi qanchis wata pullanllachö juk shumaq templuta qeshpiratsirqan.

²¹ Salomontanömi noqantsiktapis Jehoväqa yanapamäshun valienti kanapaq y familiachö y congregacionchö carguntsikta cumplinapaq (Is. 41:10, 13). Tsënö këkaptinqa, valorta tsarir ruranantsikpaq kaqta rurashun. Tsënö rurashqaqa kanan y shamoq tiempuchöpis Jehoväqa bendicimäshunmi.