DIOSPA markanchö rurayanqëkitaqa, entëru Patsachö anciänukunaqa alläpam valorayan. Jina tsënöllam, noqakunapis yanapakuyanqëkipitaqa alläpa kushishqa sientikuyä. Peru qepa watakunallataran edäna anciänukunata mañayashqa, mas jövin kaq anciänukunata precisaq cargunkunata qoyänampaq.

Edäna anciänukuna tsëta rurayänampaq mañayanqampitaqa, congregacionkunata watukaq y Diospa escuëlankunachö yachatsikoq kaqkunaqa 70 watata cumplirirmi cargunkunata jaqikäyan. Jina tsënöllam Sucursalta Rikaqkuna rurayänanta rikaq y anciänupura rurayänanta rikaq anciänukunapis, 80 watata cumplirir cargunkunata jaqiyashqa. Tsëtaqa rurayashqa, mas jövin anciänukunana tsë cargukunachö yanapakuyänampaqmi. Peru ¿imatataq rurayashqa edäna cristiänukunaqa tsë cambiukunata chaskirir? Pëkunaqa Jehoväta y markantam shonqupita patsë cäsukuyashqa.

Ken wawqiqa, cäsi 49 watakunapam Sucursalta Rikaqkuna rurayänanta rikaq karqan. Tsë pasakunqanta yarparmi, kënö nin: “Tsë cambiukuna kanampaq kaqta musyarirqa, alläpa kushishqam sientikurqä. Tsë qoyallaran Jehoväta mañakushqa karqä, juk jövin anciänuna noqa ruranqäta ruranampaq”. Ken wawqinöllam, entëru Patsachö mëtsika edäyashqa  cristiänukuna pensayan. Peru llapan shonqunkunawan Jehoväta sirwishqa karninmi, wakin anciänukunaqa cargunkunata jaqirir ichik llakinashqa sientikuyarqan.

Esperandiu wawqiqa, congregacionninchömi anciänupura rurayänanta rikaq karqan. Pëqa cargunta jaqinampaq kaqta musyarir, ichik llakinashqa sientikunqantam nin. Jina ninmi, edäninrëkur qeshyapäkunqantana y salorninta cuidanampaq mas tiemputana wananqantapis. Tsënö sientikushqa karpis, shonqupita patsëmi Jehoväta sirwirnin y cristiänu mayinkunata yanaparnin sïguikan.

Y ¿imanötaq sientikuyarqan mëtsika watapana congregacionkunata watukaqkunaqa? 38 watapana tsë carguchö yanapakushqa Allan jutiyoq wawqiqa, kënömi willakun: “Tsë cambiukuna kanampaq kaqta musyarirqa, manam imanö sientikunqäta musyarirqätsu”. Peru pëqa cuentatam qokushqa mas jövin anciänukunata yachatsiqa alläpa alli kanqanta, y Jehoväta sirwirmi sïguikan.

Russell jutiyoq wawqiqa, 40 watakunapam yanapakurqan congregacionkunata watukaqnö y Diospa markanchö kaq escuëlakunachö yachatsikoqnö. Pëqa willakun, qallananllachöqa warminwan ishkan llakinashqa sientikuyanqantam. Kënömi nin: “Diospa markanchö cargükunataqa alläpam valorayarqä y tsëta rurëta puëdiyanqätaran pensayarqä”. Kanan witsanqa, yanapakuyanqan congregacionchömi yachakuyanqanta shumaq utilicëkäyan, tsëmi cristiänu mayinkunaqa tsëchö këkäyanqampita alläpa kushishqa sientikuyan.

Itsa noqantsikqa pëkunanötsu sientikurquntsik. Peru 2 Samuel libruchö këkaq juk willakïpita yachakunqantsikqa, pëkuna imanö sientikuyanqanta entiendinapaqmi yanapamäshun.

Teytan Davidpa contran Absalon tikrakurinqan tiemputa yarpärishun. Tsurin wanutsita munaptinmi, rey Davidqa Jerusalenpita Jordan mayu kinrëchö këkaq Mahanaim markaman escapar ëwakurqan. Tsëchö këkarmi, Davidwan këkaq nunakunaqa imëkata wanayarqan. Tsënö pishipakïkäyaptinqa, ¿imataq pasarirqan?

Tsë markakunapita kimaq alläpa alli nunakunam cämankuna, mikïninkuna y mas wanayanqan cösaskunata apayäpurqan. Pëkunapita juk kaqqa, Barzïlai nunam karqan (2 Sam. 17:27-29). Absalon wanuriptinmi, Davidqa Jerusalenta kutita puëdirqanna, tsëmi Barzïlaiqa Jordan mayuyaq yanaqarqan. Davidqa, Jerusalenta pëwan ëwanampaq y mikïnimpis mana faltatsinampaq kaqtam nirqan. Peru Barzïlaiqa kapoqyoq nuna karmi, tsëkunata wanarqantsu (2 Sam. 19:31-33). Alli nuna kanqanrëkur y atska watapana kawashqa karnin alli consëjukunata qokïta puëdinqanrëkurchi, Davidqa alläpa valorarnin Jerusalenta apëta munarqan. Y Barzïlaipaqqa, palaciuchö tärë y trabajëqa alläpa kushikïpaqchi kanman karqan.

Tsënö kaptimpis, Barzïlaiqa humildi y mëyaqlla rurëta puëdinqantam alleq musyarqan. Tsëmi Davidta nirqan, 80 watayoq karnin “allita o mana alli kaqta cuentata qokïta” manana puëdinqanta. Barzïlaiqa mëtsika watapana kawashqa karchi  yachaq nuna karqan. Jina rey Rehoboamta consejaq “edäna nunakunanöchi”, pëpis alli consëjukunata qokïta puëdeq (1 Rëy. 12:6, 7; Sal. 92:12-14; Prov. 16:31). Tsëqa, ¿imanirtaq “allita o mana alli kaqta cuentata qokïta” manana puëdinqanta nirqan? Itsa tsëtaqa nirqan, edäna nuna karnin y qeshyapäkurnin. Jina mikunqampa y upunqampa gustunta manana tarinqanta y manana wiyëta puëdinqantam nirqan (Ecl. 12:4, 5). Tsërëkurmi Davidta consejarqan Kimham jutiyoq jövinta Jerusalenta apanampaq, itsa tsë jövinqa Barzïlaipa tsurin karqan (2 Sam. 19:35-40).

Kë yachatsikïpa qallananchö parlanqantsik cambiukunaqa, itsa Barzïlaita pasanqanwan igualan. Barzïlaita pasanqanchöqa, pëpa kawënin imanö kanqanman y imata rurëta puëdinqanllamanmi pensarquntsik. Peru kanan witsanqa, alläpam precisan entëru Patsachö këkaq edäyashqa anciänukunaman pensanantsik.

Kë edäna anciänukunaqa humildim kayashqa y tsë cambiukuna allipaq kashqa kanqantam cuenta qokuyashqa. Jina Jehoväpa markan mas miraptin yanapakuyänampaqmi, mas jövin wawqikunata cargunkunata jaqipuyashqa. Y wakin edäyashqa cristiänukunaqa, mas jövin kaqkunatam cargunkunata imanö cumpliyänampaq yachatsiyashqa. Tsëtaqa rurayashqa Barzïlai tsurinta yachatsinqanta y apostol Pablu Timoteuta yachatsinqanta qatirninmi (1 Cor. 4:17; Filip. 2:20-22). Tsërëkurmi mas jövin kaq cristiänukunaqa, juk ‘qarënö’ kayanqanta rikätsikïkäyan y “Cristupa cuerpun kaqkunata sinchiyätsiyänampaq” yanapakïkäyan (Efes. 4:8-12; igualaratsi Nümerus 11:16, 17, 29 textutawan).

Entëru Patsachö mëtsika edäna wawqikunaqa, wakin cargunkunata jukkunana rurayänampaqmi jaqiyashqa, y tsëqa Jehoväpita mas yachatsikuyänampaqmi yanapashqa.

19 watakunapa congregacionkunata watukaqnö yanapakushqa Marcu jutiyoq wawqim, tsëpaq parlarnin kënö nin: “Kananqa, congregacionnïchö panikunapa mana Testïgu qowankunatam Bibliapita mas yachatsita puëdï”.

28 watakunapa congregacionkunata watukaqnö yanapakushqa Geraldu jutiyoq wawqim kënö nin: “Warmïwan noqaqa Diosta sirwiyanqächö mas kallpachakuyänäpaqmi decidiyarqö. Tsëmi Diospa kaqchö qelanashqakunata yanapayänäpaq y mas nunakunata Bibliapita yachatsiyänäpaq tiempükunata patsätsiyarqö”. Kananqa 15 nunakunata Bibliapita yachëkätsiyanqanta y atskaq qelanashqakuna reunionkunaman ëwëkäyanqantam willakuyan.

Qallananchö parlanqantsik Allanmi kënö nin: “Kananqa Diospita yachatsikurninmi mas ocupädu këkäyä. Nunakuna mas kayanqan sitiukunachö, mercädukunachö y vecïnükunata yachatsiqa alläpam gustayäman. Ishkaq vecïnükunam reunionkunaman ëwayashqana”.

Mushoq carguta chaskishqa karninqa, ¿imatataq rurankiman? Mëtsika watakunapa llapan tiempïkiwan Diosta sirwinqëkichö yachakunqëkita, jövin kaq cristiänukunata willapë. Tsëta rurarmi, Jehoväpa markanchö yanapakur sïguikanki. Qallanan pärrafukunachö parlanqantsik Russell wawqim kënö nin: “Jehoväqa allikunata ruraq y yachaq jövin cristiänukunatam, markanchö yanapakuyänampaq yachëkätsin y utilicëkan. Y Jehovä tsëta ruranqampitam, llapan cristiänu mayintsikkunaqa tsë jövin wawqikuna shumaq yachatsikuyanqampita y Diospa markanta shumaq cuidayanqampita alläpa kushishqa sientikuyan” (rikäri “ Llapan puëdiyanqanmannö yanapakuyänampaq jövinkuna yanapë” neq recuadruta).

Tsëllaraq carguïkita jaqishqa karqa ama llakikïtsu, tsëpa rantinqa kushishqa yanapakur sïgui. Shonqupita patsë Diospa markanchö ruranqëkiqa, mëtsikaq nunakunatam yanapashqa o itsa yanapakïkanraq. Qamtaqa alläpam kuyayäshunki, y imëpis kuyëkäyäshunkillam.

Peru tsëpitapis mas precisaqqa, ruranqëkikunawan Jehoväpa shonqunta alläpa kushitsinqëkim. Tsëmi Jehoväqa niyäshunki, “qamkuna rurayanqëkikunata,  y jutinta kuyarnin santu nunakunata sirwir kayanqëkita y sirwirnin sïguikäyanqëkita” ni imëpis mana qonqëkunampaq kaqta (Heb. 6:10). Kë textuqa, manam unë ruranqantsikta Jehovä yarpanqanllatatsu rikätsimantsik. Jehoväpaqqa alläpa valoryoqmi kantsik, tsëmi kushitsita munar unë ruranqantsikta y kanan witsan rurëkanqantsiktapis pëqa qonqëkunqatsu.

Y noqantsik juk mushoq carguta mana chaskishqa karninqa, ¿imallachöpis tsë cambiukuna yanapamantsikku? Awmi. Tsëta rikärishun.

Itsa cargunkunata jaqishqa edäna cristiänu mayintsikkunawan juntakuntsik. Tsëqa, Diospa kaqchö poqu cristiänu kayanqampita y imëkata rurëta yachayanqampitam yachakïta puëdintsik. Tsëmi alläpa alli kanman consëjunkunata y imatapis imanö ruranapaq kaqta willaramänapaq mañakunqantsikqa. Jinamampis, cargunkunata kanan witsan imanö cumplikäyanqantam rikëta puëdintsik.

Carguntsikta jaqishqa juk edäna cristiänu kashqa o tsë cristiänukuna rurayanqampita yachakoqkuna kashqapis, unë witsan y kanampis llapan tiempuntsikwan yanapakunqantsiktaqa Jehoväqa alläpam valoran.