1. ¿Imëtan Jehoväta sirwiqa fäciltsu kanman?

JEHOVÄTA sirwiqa, ¿imanirtan fäciltsu kanman? Yamë kashqaqa fäcil-llam Jehoväta sirwiqa, peru imëka mana alli pasamashqaqa yanapëkamänapaqmi mañakunantsik. Yamë karqa, ¿imatatan rurantsik? Itsa Jehoväta sirwinapaq kallpachakushunnatsu. Këkunapita cuidakuyänampaqmi Jehoväqa israelïtakunata yarpätsirqan (Deut. 6:10-12).

2. Rey Asäpitaqa, ¿imatatan yachakuntsik?

² Rey Asämi Jehoväman markäkunapaq o yärakunapaq yachatsimantsik. Pëqa alli tiempuchö y mana alli tiempuchöpis Jehovä sirwitaqa manam dejarqantsu. Asäqa jövin kanqampita “wanukushqanyaqmi TEYTA DIOS munashqannö kawakurqan” (1 Rey. 15:14). Y Judä nacionchö santukunatam ushakätsirqan. Tsëtam Bibliachöqa juk nacion santukuna adorayanqan sitiukuna ushakätsinqanta nin (2 Crön. 14:3, 5). Awilan Maacäqa nunakuna adorayänampaqmi juk santuta ruratsishqa kanaq, tsëmi Asäqa reyna kënimpita qarqurqan (1 Rey. 15:11-13).

3. ¿Imakunapitatan yachakushun?

³ Asäqa Judä markachö santukunatam ushakätsirqan y israelïtakuna Jehoväta yapë sirwiyänampaqmi yanapakurqan. Tsëmi Jehoväqa, Asätawan israelïtakunataqa yamë këwan chunka watapa bendicirqan * (2 Crön. 14:1,  4, 6). Yamë kayanqan witsan Asä ruranqampita y punta cristiänukuna rurayanqampitam yachakushun. Tsëpitanam täranqantsik markachö yamë kë kaptinqa, ¿imanötan tiempuntsikta alli utilizashwan? neq tapukuypita yachakushun.

4. 2 Crönicas 14:2, 6, 7 ninqannö, ¿imatatan Asäqa yamë kayanqan tiempuchö ruratsirqan?

⁴ (Leyi 2 Crönicas 14:2, 6, 7 *). “Yamëna kawakuyänanpaq” Jehovä Dios permitishqa kanqantam Asäqa marka mayinkunata nirqan. Pëqa mana qeläkushpam jatusaq markakunata, jatusaq perqakunata, törrikunata y punkukunata ruratsirqan. Judächö täraqkunatam kënö nirqan: “Teyta Diosnintsikta ashishqam pë yanapëkämantsik”. Tsënöqa nirqan libri rurayänampaq tiempu kaptinmi. Tsëmi llapan nunakunata alli kallpachakuyänampaq nirqan.

5. ¿Imanirtan Asäqa mas soldädukunayoq këta munarqan?

⁵ Asäqa tsë tiempuchömi mas atska soldädunkuna kanampaq mandakurqan (2 Crön. 14:8). Tsënö ruranqanqa, ¿Jehoväman mana markäkunqanta o yärakunqantaku rikätsikun? Manam. Pëqa rey karninmi imëkata rurarqan marka mayinkuna alli kayänampaq. Musyarqanmi yamë këqa ushakäreqlla kanqanta y tsënömi karqan.

6. Punta cristiänukunaqa, ¿imatatan rurayarqan yamë kayanqan tiempuchö?

⁶ Punta cristiänukunaqa atska kutim, imëka mana allikunapa pasayarqan. Tsënö kaptimpis, yamë tiempukunachö karqa ollqupis warmipis Teyta Diospita yachatsikurmi kayaq. Hëchus libruchöqa “Diospa kaqchö mas sinchiyar” wawqi panikuna yachatsikuyaptin “mirar sïguiyarqan” ninmi. Awmi, yamë kë tiempuchö kushishqa yachatsikuyanqantaqa Jehovä bendicirqanmi (Hëch. 9:26-31).

7, 8. Apostol Pabluwan punta cristiänukunaqa, ¿imatatan rurayarqan?

⁷ Punta cristiänukunaqa Teyta Diospa alli willakuyninkunata yachatsikuyänampaqmi kallpachakuyarqan. Tsëmi Pabluqa Diospita yachatsikoq ëwëta y parlapaq kutitaqa “juk jatun punku” kichakaqtanö rikarqan. Tsërëkurmi Ëfesu markachöpis quedakurqan (1 Cor. 16:8, 9).

⁸ Apostol Pabluwan punta cristiänukunaqa señalakuyänampaq asuntutam patsätsiyarqan. Tsëpitanam imëkanöpa yachatsikur qallëkuyarqan (Hëch. 15:23-29). Tsënöllam tsë witsan wawqi panikunaqa “Jehoväpa palabrampita alli willakïkunata yachatsikur” qallëkuyarqan (Hëch. 15:30-35). Tsëtam Bibliaqa “creikoqkuna markäkïninkunachö mas sinchiyar qallëkuyarqan, y waran waranmi mas mirar sïguiyarqan” nin (Hëch. 16:4, 5).

9. ¿Imatatan kanan witsan rurëta puëdintsik? Y ¿imatatan tapukunantsik?

⁹ Kanan witsan mana michäkuyaptinmi më tsëchö yachatsikuyta puëdintsik. Täranqantsik markachö tsënö kaptinqa, “¿maslla yachatsikunäpaqku tiempuntsikta utilicëkantsik?”. Kë ushanan tiempukunachöqa, Jehoväpa testïgunkunaqa imëkata rurarmi më tsëchö yachatsikur këkantsik (Mar. 13:10). Llapantsikmi Jehovä munanqannö yachatsikur yanapakunqantsikpitaqa kushikuntsik.

10. 2 Timoteu 4:2 ninqannö, ¿imatatan ruranantsik?

¹⁰ Yamë tiempuchö kawarqa, ¿imatatan ruranantsik? (Leyi 2 Timoteu 4:2). Tsëpaqqa kikintsik y familiantsik Diospita maslla yachatsikunapaqmi tiempuntsikta alli patsätsinantsik. Kanan tiempuqa imapis ushakäreqlla kaptinmi qellëta y imatapis ashirnin këkänantsiktsu (Prov. 11:4; Mat. 6:31-33; 1 Juan 2:15-17).

11. Wakin wawqi panikunaqa, ¿imatatan rurayan mas nunakunata yachatsiyänampaq?

¹¹ Atskaq wawqi panikunam quechua parlëta yachakuyan mas nunakunata yachatsiyänampaq. Tsëmi Jehoväqa nunakuna parlayanqanmannö yachakuyänampaq, më tsë nacionchö librukunata y revistakunata rurëkätsin.

12. Teyta Diospita quechuachö nunakuna wiyarqa, ¿imanötan sientikuyan? Pani willakunqantawan parlakaramuy.

¹² Parlayanqanmannö Jehovä Diospita wiyarninqa, ¿imatatan nunakuna niyan? Tsëta rikärishun juk pani Memphis (Tennessee, Estädus Unïdus) markachö juk asamblëaman ëwanqanchö. Tsëchö asamblëaqa rurakänaq Ruanda, la Republica Democrätica del Congo y Uganda nacionkunachö parlayanqannömi. Tsë asamblëa ushariptinmi paniqa kënö  nirqan: “17 watanam Estädus Unïdus nacionchö tärä, peru kananran asamblëachö parlayämunqanqa shonquyaq chärishqa”. Tsëmi tiempuntsik kaptin o puëdirninqa, quechua parlëta yachakushun wakinkunata yanapanapaq. Tsë llapantaqa ruranantsik wawqi panintsikkuna y mas nunakuna quechuachö parlapashqa kushikuyaptinmi. Awmi, kallpachakurqa rikäshunmi yachatsikunqantsik nunakunapa shonqunyaq chärinqanta.

13. Yamë kayanqan tiemputa, ¿imanötan alli utilizäyarqan Rusiachö wawqi panintsikkuna?

¹³ Wakin nacionkunachö yachatsikunata michäkuyaptinmi, wawqi panintsikkunaqa libri yachatsikuyta puëdiyantsu. Tsëtaqa rikantsik Rusia nacionchö wawqi panintsikkunata pasanqanchömi. Mëtsika watakunapa qatikachashqa karirmi 1991 wata marzu killachö librina yachatsikuyänampaq juiciuta ganayarqan. Tsë witsanqa 16 mil-llam wawqi panintsikkuna kayarqan. 20 wata pasariptinnam 170 milna kayarqan. Tsë nacionchö wawqi panintsikkunaqa allim tiempunkunata utilizäyarqan. Peru yamë këqa manam unëtsu tsarakurqan, tsënö kaptimpis mana qelanashpam Jehovä Diospita yachatsikur këkäyan.

14, 15. ¿Imanötan Jehoväqa Asäta yanaparqan?

¹⁴ Asäpita yapë parlarishun. Etiopïa nacionpita juk millon soldädunkuna Judä markata ashipaq ëwayanqanchömi, yamë kayanqan tiempuqa ushakärirqan. Tsë soldädukunapa mandaqnin Zërahqa, Judä markata ushakäratsinampaqmi nirqan. Peru Asäqa Jehovämanmi markäkurqan o yärakurqan. Tsëmi, “yanapamaptikiqa vencishaqmi. Tsëmi  qamllaman markäkur conträkunawan pelyaq shutikichö shayämurqü” nirqan (2 Crön. 14:11).

¹⁵ Etiopïa nacionpita soldädunkunaqa, Judä markapa soldädunkunapita ishkë kuti masmi kayarqan. Tsënö kaptimpis Jehovä Dios yanapanampaq kaqtam Asäqa següru këkarqan. Y pë yanapaptinmi, mëtsika Etiopïa soldädukunata ushakätsiyarqan (2 Crön. 14:8-13).

16. Yamë kanqantsik tiempu ushakänampaq kaqtaqa, ¿imanötan musyantsik?

¹⁶ Shamoq tiempuchö Jehoväpa sirweqninkunawan ima pasanampaq kaqtaqa manam musyantsiktsu. Tsënö kaptimpis, Jesusqa “llapan nacion nunakuna chikiyäshunki” nirqanmi. Tsëmi musyantsik yamë kanqantsik tiempu ushakänampaq kaqta (Mat. 24:9). Apostol Pablunam “Cristu Jesusta qatirnin llapan shonqunkunawan Diosta sirwita munaqkunapis, llapankunam chikishqa y sufritsishqa kayanqa” nirqan (2 Tim. 3:12). Y yarpäshun “alläpa piñashqam” Diabluqa këkan, tsëmi chikimarnintsik imëkata ruramäshun (Rev. 12:12).

17. ¿Imanirtan markäkoq o yärakoq kanantsik?

¹⁷ Ichikllachönam ‘alläpa jatun sufrimientu kanqa’. Tsënöqa “manaran ni imëpis kashqaraqtsu nunakuna qallanqampita, y mananam yapëqa kanqanatsu” ninmi Bibliachöqa. Tsëmi markäkoq o yärakoq kanantsik (Mat. 24:21). Itsa tsë witsankunaqa familiantsikkuna contrantsik kayanqa y kanannö yachatsikuytapis puëdishunnatsu (Mat. 10:35, 36). Tsëqa tapukushun: “¿Jehovä yanapamänampaq kaqtaqa Asänö següruku këkantsik?”.

18. Hebrëus 10:38, 39 ninqannö, ¿imatan shamoq tiempuchö yanapamäshun?

¹⁸ Shamoq tiempupaq listu kanata munarmi, kananllapitana markäkoq o yärakoq kanapaq kallpachakunata Jehoväqa munan. Tsëmi ‘alli juiciuyoq y markäkïpaq sirwipakoqta’ churamushqa. Y “tiempunchö mikïnin qaranampaq” nirqa, mana dejëpa Jehoväta sirwinapaqmi parlëkan (Mat. 24:45). Tsëmi kikintsik  Jehoväman markäkunapaq o yärakunapaq kallpachakunantsik (leyi Hebrëus 10:38, 39).

19, 20. 1 Crönicas 28:9 ninqannö, ¿imatatan tapukunantsik? Y ¿imanir?

¹⁹ Noqantsikpis Rey Asänömi Jehoväta ashinantsik (2 Crön. 14:4; 15:1, 2). Jehovä kuyanqantsiktaqa rikätsikuntsik imëkanöpa yachakurnin y bautizakurninmi. Tsënö rurëkanqantsikta musyanapaq tapukushun: “¿Llapan reunionkunaman ëwanäpaqku kallpachakü?”. Tsë reunionkunachömi wawqi panintsikkunawan yanapanakuntsik y kushishqa Jehoväta sirwinapaq yachakuntsik (Mat. 11:28). Y kënö tapukushun: “¿Seguïduku Bibliapita yachakü? Familiantsikwan kawarqa, ¿cada semänaku Diospita yachakuntsik? Japallantsiklla karqa, ¿tiempuntsikta rakintsikku Diospita yachakunapaq? ¿Alliku tiempuntsikta rakintsik Diospita yachatsikunapaq?”.

²⁰ ¿Imanirtan tsënö tapukunantsik? Bibliachö ninqannö, Jehoväqa musyanmi ima pensanqantsikta y ima shonquntsikchö kanqantapis. Tsë tapukuykunam yanapamäshun (leyi 1 Crönicas 28:9 *). Tsëmi rurënintsikchö o pensënintsikchö ima mana allitapis tarirqa Jehovä yanapëkamänapaq mañakunantsik. Awmi, yamë kanqantsik tiempuchömi alli alistakunantsik.