1, 2. Eclesiastes 11:6 ninqanqa, ¿imanötan Diospita yachatsikunqantsikchö yanapamantsik?

WAKIN nacionkunachöqa Diospita yachatsikushqa wiyakuyanmi. Peru wakin sitiukunachöqa manam Diospita y Bibliapita parlapanqantsikta wiyakuyantsu. Markantsikchö imanö kaptimpis Jehoväqa yachatsikur sïguinatam munan, këyaqllana ninqanyaq.

² Jehovä patsätsinqan tiempu chämunqanyaqmi yachatsikunantsik “tsëpitanam, ushakë chäramunqa” (Mat. 24:14, 36). Tsë junaq chämunqanyaqqa, Eclesiastes 11:6 * (Leyi) ninqannömi mana qelanashpa yachatsikur sïguinantsik.

3. ¿Imapitatan kananqa yachakushun?

³ “Nunakunata pesquëtam yachatsiyashqëki” Jesus ninqampitaqa pasaqchönam yachakurqantsik (Mat. 4:19). Kananqa ima pasakuptimpis Diospita yachatsikur sïguinapaq, pacienciayoq kanapaq y markäkoq o yärakoq kanapaqmi yachakushun.

4. ¿Imanirtan Jehovä nimanqantsiknö yachatsikunantsik?

⁴ Jesusqa willakushqanam karqan, kanan witsan nunakuna imanö kayänampaq kaqtaqa. Y nirqanmi Teyta  Diospita yachatsikuy mana fäcil kanampaq kaqtapis. Tsëmi qateqninkunata “mäkoq mäkoqlla këkäyë” nirqan (Mat. 24:42). Kanan tiempupis Noëpa tiempunchönömi Diosnintsik ninqankunataqa wiyakuyta munayantsu (Mat. 24:37-39; 2 Pëd. 2:5). Tsëmi imëpitapis mas Jehovä nimanqantsiknö yachatsikur këkänantsik.

5. Hëchus 1:6-8 ninqannö, ¿mëyaqtan yachatsikunantsik karqan?

⁵ Jesusqa willakushqanam karqan wanuriptimpis më tsëchö yachatsikur sïguiyänampaq kaqtaqa. Tsënö mandakunqanta cäsukurmi kanan witsanqa më tsëchö Teyta Diospita yachatsikur sïguikantsik (Juan 14:12). Jesus wanuriptinqa wakin qateqninkunaqa pescäduta tsareqmi kutikuyarqan. Tsënö këkäyaptinnam Jesus kawariramur atska pescäduta tsariyänampaq juk milagruta rurarqan. Tsënö ruranqanwanmi qateqninkunata nirqan, Teytampita yachatsikur sïguiyänampaq (Juan 21:15-17). Ciëluta manaraq kutikurmi qateqninkunata nirqan më tsë nacionkunachö yachatsikuyänampaq kaqta (leyi Hëchus 1:6-8). Watakuna pasariptinnam “Señorpa junaqninchö” * ima pasanampaq kaqta apostolnin Juanta musyatsirqan. “Mana ushakaq alli willakïkunatam [...] llapan nacionkunata, kastakunata, idiömakunata y markakunata” angelkunapa yanapakuyninwan yachatsiyanqanta Juan rikarqa manam creirqantsu (Rev. 1:10; 14:6). Awmi, Jehoväqa ushananyaq alli willakuykunata yachatsikur sïguinatam munan.

6. ¿Imanötan Teyta Diospita yachatsikur këkänantsik?

⁶ Jehovä yanapamanqantsikman pensanqantsikmi yanapamäshun yachatsikur  sïguinapaq. Pëqa librukunawan, revistakunawan, videukunawan y JW Broadcastingwanmi yanapamantsik. Y cada markächö parlayanqannö kanampaqmi Internetman churayänantapis permitin (Mat. 24:45-47). Kanan tiempuqa polïtica, religion y imëkankunapita gälakoqkunam munëninkunata rurakuyan, tsënö këkaptimpis Teyta Diospa sirweqninkunaqa öchu millon këkarpis juk familianömi kayan. Tsënö kayanqanmi rikakurqan 2019 wata viernis 19 de abril killachö, tsë junaqmi Jehoväpa testïgunkunaqa juk shumaq videuta rikarqantsik. Y tsë paqasllam 20.919.041 nunakuna juntakäyarqan Jesuspa wanuyninta yarpänapaq reunionman. Tsënö kanan witsan pasakunqanqa, ¿manaku juk shumaq milagru? Kë llapanman pensanqantsikmi yanapamäshun Diospa Gobiernumpita yachatsikur sïguinapaq.

7. ¿Imanötan Jesus yanapamantsik yachatsikur sïguinapaq?

⁷ Jesusqa, Teytampita yachatsikurqa manam permitirqantsu imapis michänanta. Noqantsikpis Jesus ruranqannö rurarqa yachatsikur sïguishunmi (Juan 18:37). Jesusqa manam jutsallakurqantsu Diablu “patsachö llapan gobiernukunata y riquëzankunata” këmi qampaq niptin ni nunakuna reynin kanampaq churëta munayaptimpis (Mat. 4:8, 9; Juan 6:15). Pëtaqa manam imëkayoq këta munë y chikiyanqampis jutsaman ishkitsirqantsu (Lüc. 9:58; Juan 8:59). Pabluqa willakurqannam Jesusnö yachatsikur sïguinapaq, tsënö rurashqaqa manam imapis markäkïnintsikta o yärakuynintsikta ushakätsinqatsu (Heb. 12:3).

8. ¿Imanötan pacienciayoq këqa yanapamäshun?

⁸ Pacienciayoq nunaqa mana piñakushpam imatapis shuyaran. Tsënö mana allikuna pasamashqa, unëna munanqantsik mana pasaptinqa pacienciawanmi shuyaränantsik. Tsënömi pasarqan Diospa willakoqnin Habacucta, pëqa Judä markachö mana allikuna ushakänantam munarqan (Hab. 1:2). Jesuspa qateqninkunaqa ‘Diospa Gobiernun rikakänampaq kaqtam pensayarqan’, tsënöpa Röma nacionpita libri quedayänampaq (Lüc. 19:11). Y noqantsikqa Diospa Gobiernun mana allikunata ushakäratsir kë Patsata mushoqyätsinantam shuyarëkantsik (2 Pëd. 3:13). Tsëtaqa, Jehovä permitinqanyaqmi pacienciawan shuyaränantsik. Tsënömi Jehoväqa pacienciayoq kanapaq yachatsimäshun.

9. ¿Imanötan pacienciayoq këta Jehovä yachatsimantsik?

⁹ Jehovämi pacienciayoq këtaqa yachatsimantsik. Tsënö kanqantaqa rikantsik Noë arcata ruranampaq y “alli kaq rurëkunapita willakoq” kanampaq shuyaranqanchö (2 Pëd. 2:5; 1 Pëd. 3:20). Kutin kutin Sodömatawan Gomörrata ushakätsinampaq kaqpita Abrahan parlapaptin shuyaranqanchö (Gen. 18:20-33). Mëtsika watakunapa mana cäsukoq israelïtakunata shuyaranqanchö (Neh. 9:30, 31). Y kanan tiempupis mas nunakuna reqiyänampaq shuyaranqanchömi Jehoväpa pacienciayoq këninqa rikakun (Juan 6:44; 1 Tim. 2:3, 4; 2 Pëd. 3:9). Jehovänö pacienciayoq karqa mas allim yachatsikushun. Pëqa atska igualatsikuykunatam Palabranman churatsimushqa  pacienciayoq këta yachatsimänapaq.

10. Santiägu 5:7, 8 ninqannö, ¿imatatan murukoqkuna rurayanqampita yachakuntsik?

¹⁰ (Leyi Santiägu 5:7, 8). Pacienciayoq këtaqa yachakuntsik murukoq nuna ruranqampitam. Wakin plantakunaqa rasllam winayan y wakinnam unëtaraq winayan. Unë Israel nacionchöqa joqta killachöraqshi murukuyanqankunata cosechar ushayaq. Tamya qallanqan witsanshi murukuyaq y usya qallanqan witsannash cosechar qallayaq (Mar. 4:28). Mana fäcil kaptimpis, murukoqkunapitam pacienciayoq këtaqa yachakuntsik.

11. ¿Imanötan pacienciayoq kë yanapamäshun yachatsikunapaq?

¹¹ Jutsa ruraq karmi nunakunaqa raslla imatapis rurarita munantsik. Tsëmi murukoqkunapita pacienciayoq këta yachakuntsik. Pëkunaqa chakrataran alistayänan, muruyänan, mana alli qorakunata jipiyänan y parquyänanmi. Tsënöllam noqantsikpis yachatsinqantsik nunakuna creiyanqanta dejayänampaq y Jehovä munanqannö kawayänampaqqa pacienciawan yanapanantsik. Y yachatsikoq ëwashqa mana wiyamënintsikta munayaptimpis, yachatsikur sïguinapaqmi pacienciayoq kanqantsik yanapamäshun. Jesuspa qateqninkunapaqpis manam fäciltsu karqan llapan yachatsikunqankunata yachakuyqa (Juan 14:9). Noqantsikqa muruntsik y parquntsikllam, peru Jehovämi winatsirqa sïguinqa (1Cor. 3:6).

12. Familiantsikta yachatsirqa, ¿imanötan pacienciayoq kanqantsikta rikätsikuntsik?

¹² Pacienciayoqmi kanantsik familiantsikta yachatsinapaqqa. Eclesiastes 3:1, 7 ninqanmi yanapamäshun, tsëchömi nin: “Tiempu kanmi upälläkunantsikpaq  y parlakunantsikpaqpis”. Imanö kënintsikwanmi Teyta Diospita yachatsikuy munanqantsiktaqa rikätsikuntsik (1 Pëd. 3:1, 2). Gänas gänasllam pï mëta y familiantsiktapis yachatsinantsik, tsëmi pacienciayoq kanantsik.

13, 14. ¿Pikunapitatan pacienciayoq këta yachakuntsik?

¹³ Pacienciayoq këta yachakurishun unëna y kanan tiempu Teyta Diospa sirweqninkunapita. Habacucqa mana allikuna ushakänanta munarmi kënö nirqan: “Rikachakuna törrichö markata täpaq nuna mäkuq mäkuq kanqannöllam noqapis shuyarëkä” (Hab. 2:1). Apostol Pablupis ushanqanyaq yachatsikuytam munarqan. Tsënö kaptimpis “Diospa alläpa alli kënimpita alli willakïkunata” yachatsikurmi sïguirqan (Hëch. 20:24).

¹⁴ Galaad escuëlapita yarqamoq wawqitawan warmintam mandayarqan ichiklla Jehoväpa testïgunkuna kanqan nacionman. Tsë nacionchöqa cäsi llapan nunakunapam religionninkuna kayapun, tsëmi Bibliapita yachakuy munaqkuna tarinanqa fäciltsu. Peru juk nacionman mandayanqan amïgunkunaqa nunakuna bautizakuyanqampitam fötukunata apatsiyaq. Tsënö kaptimpis wawqiwan warminqa pacienciawanmi Diospita yachatsikur sïguiyarqan. Öchu watapa yachatsikur këkäyaptinran Bibliapita yachatsiyanqan juk bautizakurqan. Unë y kanan pasanqankunaqa, ¿imatatan yachatsimantsik? Mana qelanashpa Teyta Diospita yachatsikushqaqa, pacienciakoq kanqantsikpitam Jehovä bendicimäshun. Awmi, ‘markäkur y pacienciakur änikïta chaskishqa kaqkunanö’ rurar sïguishun (Heb. 6:10-12).

15. Markäkoq o yärakoq kanapaqqa, ¿imanötan yachatsikunqantsik yanapakun?

¹⁵ Teyta Diospita yachatsikunqantsikman y Palabranman markäkur o yärakurmi, Jehoväta mas nunakuna reqiyänanta munantsik (Sal. 119:42; Is. 40:8). Rikarquntsiknam kanan tiempu wakin Bibliachö ninqankuna cumplikaqta. Y rikarquntsiknam Biblia ninqanta cäsukoq nunakuna mas kushishqa kawayanqantapis. Kë llapan pasakunqanmi rikätsimantsik Teyta Diospita yachatsikur sïguinapaq.

16. Salmus 46:1-3 ninqannö, ¿imanötan yanapamantsik yachatsikunqantsikqa?

¹⁶ Jehovämanqa markäkuntsik o yärakuntsik kikin yachatsimashqam, y Jesusmannam reynintsik kaptin (Juan 14:1). Imëka pasamashqapis Jehoväqa tsapämäshunmi (leyi Salmus 46:1-3 *). Y musyantsikmi Jehovä rey kanampaq churashqa kaptin, Jesusqa ciëlupita patsë yachatsikunapaq yanapamanqantsikta (Mat. 28:18-20).

17. ¿Imanirtan yachatsikur sïguinantsik?

¹⁷ Jehovä Diosnintsikqa bendicimäshunmi markäkur o yärakur yachatsikunapaq kallpachakushqaqa (Ecl. 11:6). Cada junaqmi mëtsika nunakuna mostradorkunachö atska librukunata y revistakunata rikäyan. Tsënö yachatsikunqantsikqa, ¿yanapakunku? Awmi. 2014 wata noviembri killapaq Diospita Yachatsikunapaq neqchömi, universidächö  estudiaq shipash Jehoväpa testïgunkunapaq qellqanqanta yachakurqantsik. Jehoväpa testïgunkuna Yachakuyänan Wayitaqa manam tarirqantsu, peru librukunayoq y revistakunayoq mostradortam rikärirqan. Tsënömi qellqanampaq mas yanapakuyta taririrqan. Tiempuwanqa bautizakurqanmi y kananqa llapan tiempunwanmi Diospita yachatsikun. Tsënö yachakuyta munaq nunakuna kayaptinmi Diospa Gobiernumpitaqa yachatsikur sïguinantsik.

18. Jehovä ninqankuna cumplikanqantaqa, ¿imanirtan següru këkantsik?

¹⁸ Jehoväqa imatapis tiempunchö ruraq karmi, musyanna imëyaq yachatsikunapaq kaqta. Tsënöllam Noë kawanqan witsampis Jehoväqa patsätsirqan imë tamya qallanampaq kaqtaqa, tsëtaqa musyatsikurqan 120 watakuna manaraq apakuy tamya qallaptinmi. Noë arcata ruranampaqqa atska watakuna pasashqanchöran nirqan. Tsënam Noëqa nunakuna mana wiyëkäyaptimpis apakuy tamyapaq yachatsikur sïguirqan. Tsëtaqa rurarqan 40 o 50 watakunapam, tukuyläya animalkunata arcaman yëkatsinampaq Jehovä ninqanyaq. Awmi, patsätsinqan tiempuchömi “arcapa punkunta TEYTA DIOS wichqarkurqan” (Gen. 6:3; 7:1, 2, 16).

19. Yachatsikur sïguishqaqa, ¿imatatan chaskishun?

¹⁹ Ichikllachönam Jehoväqa manana yachatsikunapaq nimäshun. Tsëpaqqa Diablu mana allikuna ruranqantam ushakätsinqa, tsëpitanam kë Patsata mushoqyätsimunqa. Tsë tiempuyaqqa Noë, Habacuc y wakin sirweqninkuna rurayanqannöllam yachatsikur sïguinantsik. Imëpis Diospita yachatsikur këkäshun, pacienciayoq këkäshun y änimanqantsikkunaman markäkur o yärakur këkäshun.