1. Cäsukoq nunakunaqa, ¿pïninkunatanötaq Jehoväta rikäyan?

JEHOVÄTA adoraqkunaqa, familianmi kayan. Y pëkunapita wakinqa, “llapan kamashqa kaqkunapita mas punta kaq” tsurin Jesus y mëtsika millon angelkunam kayan (Col. 1:15; Sal. 103:20). Cäsukoq nunakuna Jehoväta Teytankunatanö rikëta puëdiyanqantam, Patsachö këkarnin Jesus rikätsikurqan. Tsëmi qateqninkunawan juk kutichö Jehoväpaq parlëkarnin, kënö nirqan: ‘Teytäman y qamkunapa Teytëkikunamanmi’ witsä (Juan 20:17). Y Jehovällatana sirwinapaq änikur y bautizakurqa, alläpa kuyakoq wawqi panikunawanmi familia këman chärintsik (Mar. 10:29, 30).

2. ¿Imatataq këchö yachakushun?

² Diosta wakin sirweqkunapaqqa, Jehoväta kuyakoq Teytankunatanö rikëqa manam fäciltsu. Itsa wakinkunaqa wawqi paninkunata kuyayanqanta imanö rikätsita musyayantsu. Këchöqa, Jehoväta kuyakoq Teytantsiktanö rikänapaq Jesus yachatsimanqantsiktam yachakushun. Jina Jehovä tratamanqantsiknölla, wawqi panintsikkunata imanö tratanapaq kaqtam rikäshun.

3. ¿Jehoväta imanö rikänapaqtan padrenuestru mañakuy yanapamantsik?

³ Jehoväqa kuyakoq Teytam, tsëmi Jesusqa wamrankunata imëpis wiyaq Teytatanö rikänata munan, y manam mana kuyakoq autoridätanöqa. Y Jesusqa tsëta imëpis yarpänata munarmi, qateqninkunata mañakuyänampaq yachatsirnin kënö nir qallarqan: “Teytalläkuna” (Mat. 6:9). Jesusqa Jehoväpaq Bibliachö kënö ninqankunapa qayanapaq kaqtam nimashwan  karqan: “Llapanpaq poderyuq”, ‘Kamakoq’ o “Imëpita imëyaqpis kaq” (Gen. 49:25; Is. 44:2; 1 Tim. 1:17). Peru pëqa kuyëpa Teyta nir qayanapaqmi nirqan.

4. ¿Imanötan musyantsik pëpita yachakunata Jehovä munanqanta?

⁴ ¿Imanirtan wakinnintsikpaqqa Jehoväta kuyakoq Teytatanö rikëqa fäciltsu? Itsa tsënöqa pasamantsik, wamra kanqantsikchö mana allikunapa pasashqa karnin. Jehoväqa imanö këkanqantsikta allim musyan, pëqa yanapamënintsiktam munan. Tsëmi Palabran Bibliachö kënö nimantsik: “Diosman witiyë, y pëqa qamkunamanmi witimunqa” (Sant. 4:8). Jehoväqa alläpam kuyamantsik y pëpita mas alli Teytatanö mana tarinapaq kaqtam nimantsik.

5. Lücas 10:22 ninqannö, ¿imanötan Jesusqa Jehoväpita mas yachakunapaq yanapamantsik?

⁵ Jehoväta mas reqinapaqqa Jesusmi yanapamäshun. Pëqa Teytanta allim reqin y imanö kanqantam Patsachö këkarnin rikätsikurqan. Tsëmi kënö nirqan: “Noqata rikämashqa kaqqa, Teytatapis rikashqam” (Juan 14:9). Jesusqa mayor kaq wawqintsik cuentam, Teytantsik Jehoväta respetanapaq, wiyakunapaq, pëpa voluntäninta ruranapaq y rikëninchö alli kanapaq yachatsimantsik. Peru masqa Patsachö këkarninmi, Jehovä alläpa alli y kuyakoq kanqanta rurëninkunawan rikätsikurqan (leyi Lücas 10:22). Wakin wakinllata rikärishun.

6. ¿Imanirtan nintsik Jesusta Jehovä wiyashqa kanqanta?

⁶ Jehoväqa wamrankunatam wiyan. Punta kaq Tsurinta wiyanqampita yachakurishun. Patsachö këkar Jesus llapan mañakunqantam wiyarqan (Lüc. 5:16). Imatapis manaraq patsätsir mañakunqantam wiyarqan. Jukqa 12 apostolninkunata akranampaq mañakunqanmi karqan (Lüc. 6:12, 13). Imëka sufrimientukunapa pasëkaptin mañakunqantapis Jehoväqa wiyarqanmi. Jüdas traicionanampaqna këkaptinmi, imëka sufrimientukunapa pasanampaq kaqchö alli tsarakunampaq Teytanta rogakurqan. Jehoväqa manam kuyashqa  wamranta wiyarqanllatsu, kallpata tsarinampaqmi juk angelta yanapanampaq mandarqan (Lüc. 22:41-44).

7. ¿Imanötan yanapashunki mañakunqëkita Jehovä wiyanqanta musyanqëki?

⁷ Kanan witsampis, Jehoväqa mañakunqantsikta wiyanmi. Y mas wananqantsik höram yanapamantsik (Sal. 116:1, 2). Tsënö kanqantaqa India nacionpita juk panintsikta pasanqanmi rikätsimantsik. Pëqa imëkapaq yarpachakurmi qeshyëkarqan. Tsëmi Jehovä yanapëkunampaq mañakurqan. Pëmi kënö willakun: “2019 wata mäyu killapaq JW Broadcasting^® progrämachömi, alläpa yarpachakurqa imata ruranapaq kaqpaq parlarqan. Tsëta wiyëtam wanëkarqä. Jehoväqa tsë progrämawanmi, mañakunqäta contestamurqan”.

8. Jesusta kuyanqantaqa, ¿imanötan Jehovä rikätsirqan?

⁸ Patsachö këkaptin tsurinta kuyanqannöllam, Jehoväqa noqantsiktapis kuyamantsik (Juan 5:20). Pëqa pëman mas markäkunampaq, valoryoq kanampaq y imampis mana faltanampaqmi yanaparqan. Y kuyanqanta y allita ruranqantam nirqan (Mat. 3:16, 17). Jesusqa kuyakoq Teytan imëpis yanapëkanqantaqa musyarqanmi (Juan 8:16).

9. ¿Imanötan musyantsik Jehovä kuyamanqantsikta?

⁹ Jehovä kuyamanqantsiktaqa Jesusnömi rikarquntsik. Këllaman yarpärishun: Jehoväqa pëpita yachakunapaqmi yanapamarquntsik. Pëqa pëpita yachakunapaq, kuyakoq wawqi panikunawan juk familianölla kanapaq y kushishqa kanantsikpaqmi yanapamarquntsik (Juan 6:44). Jina pëman mas markäkunapaq o yärakunapaqmi imëkanöpa yachatsimantsik. Y kawanapaq wananqantsikkunata tarinapaqmi yanapamantsik (Mat. 6:31, 32). Jehovä kuyakoq kanqanman yarparqa, masran pëta kuyantsik.

10. ¿Imanötan wawqi panintsikkunata Jehovänölla kuyashwan?

¹⁰ Jehoväqa wawqi panintsikkunata kuyanmi. Peru itsa höra höraqa pëkunata kuyëqa noqantsikpaqqa fäciltsu kanman. Tsëqa itsa juk costumbrikunayoq, o imanö watashqa kanqantsikpita kanman. Y llapantsikmi imallachöpis pantanqantsikwan wakinkunata llakitsintsik o piñatsintsik. Tsënö kaptimpis, wawqi panikunata Jehovä kuyanqannölla kuyarqa juk familianölla kanapaqmi yanapakushun (Efes. 5:1, 2; 1 Juan 4:19). Pëpita imata yachakunqantsikta rikärishun.

11. ¿Imanötan Jesusqa rikätsikurqan “shonqupita patsë” Jehovä ankupäkoq o llakipäkoq kanqanta?

¹¹ Jehoväqa “shonqupita patsë alläpa ankupäkoq” o llakipäkoqmi (Lüc. 1:78). Llakipäkoq nunaqa, wakinkunata sufrikaqta rikarmi imëkanöpa yanapëta y shoqëta procuran. Nunakunata imanö Jesus tratanqanchömi, pëkunapaq Jehovä yarpachakunqanta rikantsik (Juan 5:19). Juk kutichömi, ‘mëtsikaq nunakunata rikëkur alläpa ankuparqan, porqui mitseqninnaq üshakunanömi sufritsir ushashqa y ramakashqa këkäyarqan’ (Mat. 9:36). Peru Jesusqa manam nunakunata llakiparqanllatsu. Pëqa qeshyëkaqkunatam kachakätsirqan y imëka yarpachakuykunawan këkaqkunatam yanaparqan (Mat. 11:28-30; 14:14).

12. ¿Imakunata rurartaq llakipäkoq kanqantsikta rikätsikushwan?

¹² Wawqi panintsikkunata llakipänapaqqa, puntataqa ima problëmakunapa pasëkäyanqantam rikänantsik. Itsa juk paniqa alläpa qeshyëkanman, nanatsikunqanta mana willakurpis itsa yanapayänantaqa wanan. ¿Puëdinku familian wananqanta tarita? ¿Manatsuraq agradecikunman mikuynin rurashqa o wayinta  pitsapakushqa? Kananqa juk wawqita trabäjumpita qarqurishqa kayanqanman pensarishun. ¿Manatsuraq trabäjuta tarinqanyaq pï kanqantsikta mana willakurlla ëkallawampis yanaparishwan?

13, 14. ¿Imanötan Jehovänö alli kanqantsikta rikätsikushwan?

¹³ Jehoväqa alläpa alli Diosmi (Mat. 5:45). Llakipäkoq karqa manam wawqi panintsikkuna yanapanata nimänataraqtsu shuyaränantsik. Jehovänöllam imatapis manaraq mañakuyaptin, yanapëta procurashwan. Pëqa mana mañakuykashqapis cada junaqmi, agradecikoqkunapaq o mana agradecikoqkunapaqpis Intita o Rupayta yarqatsimun. ¿Manaku wananqantsikkunata procuramurnin Jehoväqa alläpa kuyamanqantsikta rikätsimantsik? ¡Alläpa alli y kuyakoq kanqampitam Pëta kuyantsik!

¹⁴ Jehovänöllam mëtsikaq wawqi panikuna, yanapayänampaq mana mañakuykäyaptimpis kayäpunqanwan wakinkunata yanapayan. 2013 watachö Haiyan nir reqiyan lamarpita yarqamoq tamyantin alläpa shukukuy vientu, Filipïnas nacionpa wakin markankunata ushakäratsiptin imakuna pasakunqanta rikärishun. Mëtsikaq wawqi panikunam wayinkunata y kayäpunqanta oqrayarqan. Peru entëru Patsapita familian cuenta wawqi panikunam yanapayarqan. Imëkawan yanapakuyanqampita y trabajarnin mëtsikaq yanapakuyanqampitam, tsë desgracia pasakunqampita manaraq watatsaptin, 750 wayikunata altsayarqan o yapë rurayarqan. Y COVID-19 muyakoq o shukukoq qeshya kanqan witsampis, Jehoväpa testïgunkunaqa wawqi paninkunatam imëkanöpa yanapayarqan. Familiantsik cuenta wawqi panintsikkunata yanapanapaq listu këkarqa, pëkunata kuyanqantsiktam rikätsikuntsik.

15, 16. Lücas 6:36 ninqannö, ¿imatataq rurashwan kuyakoq Teytantsik Jehovänö këta munarqa?

¹⁵ Jehoväqa llakipäkoq y perdonakoqmi (leyi Lücas 6:36). Pëqa cada junaqmi llakipämanqantsikta rikätsimantsik (Sal. 103:10-14). Tsënöllam, Jesuspis imachöpis pantareq qateqninkunata llakiparqan y perdonarqan. Jutsantsikpita perdonashqa kanapaqmi, pëqa  hasta wanurqampis (1 Juan 2:1, 2). ¿Manaku Jehoväwan Jesus llakipäkoq y perdonakoq kayanqampita masraq kuyantsik?

¹⁶ Perdonakoq karqa, familiantsik cuenta wawqi panintsikkunatam mas kuyantsik (Efes. 4:32). Awmi, höraqa perdonakoq këqa manam fäciltsu. Tsënö kaptimpis, tsëta ruranapaqmi kallpachakunantsik. Juk panim willakun, Täpakoq revistachö, “Ima ninacushqa carpis, perdonanacuyë” neq alläpa yanapanqanta. * Pëmi kënö nin: “Tsëta estudianqämi yanapamashqa, imachöpis llakitsiyämaptin imatapis juknöpa mana rikänäpaq. Tsëchömi nirqan, ‘pitapis perdonëqa manam mana alli rurëninkunata o llakitsikunqanta mana kaqpaq churë ninantsu. Sinöqa, mana allita ruramanqantsikpita piñakïnintsikta shonquntsikpita chipyëpa jorqë ninanmi, tsënöpam yamë kënintsikqa ushakanqatsu’”. Wawqi panintsikkunata shonqupita patsë perdonarqa, pëkunata Jehovänö kuyanqantsiktam rikätsikuntsik.

17. Mateu 5:16 ninqannö, ¿imatataq rurashwan Teytantsik Jehoväta nunakuna alabayänampaq?

¹⁷ Entëru Patsapita juk familianölla kuyanakoq wawqi panintsikkunawan juntu këqa, alläpa kushikuypaqmi. Y mas nunakuna Jehoväta adorayänantam munantsik. Tsëmi imatapis ruranqantsikpita, Teytantsik Jehoväpaq o sirweqninkunapaq mana allita parlayänantaqa munantsiktsu. Jina Diospita nunakuna yachakuyta munayänampaqmi, alli portakunapaq kallpachakunantsik (leyi Mateu 5:16).

18. ¿Imatan yanapamäshun Diospita mana mantsakushpa yachatsikunapaq?

¹⁸ Höraqa Teytantsik Jehoväta wiyakunqantsikpitam, wakinkunaqa allqutsamäshun o chikir sufritsimäshun. ¿Imatataq rurashwan Diospita parlakuyta mantsarqa? Jehoväwan Jesus yanapamänantsikpaq kaqtam yarpänantsik. Jesusqa imata niyänampaq o imanö parlayänampaq mana yarpachakur kayänampaqmi, qateqninkunata nirqan. Kënö nirmi entienditsirqan: “Tsë höram musyariyanki imata parlayänëkipaq  kaqta; porqui manam qamkunallatsu parlayanki, sinöqa Teytëkikunapa santu espïritunmi parlayänëkipaq yanapayäshunki” (Mat. 10:19, 20).

19. ¿Imanötan Bibliapita tsëllaraq yachakuykaq juk nuna alli tsarakurqan?

¹⁹ Wawqintsik Robert-ta ima pasanqanta rikärishun. Bibliapita tsëllaraq yachakuykarmi, Sudafrica nacionchö militarkunata juzgayänan cortiman apayarqan. Wawqi paninkunata kuyarninmi, ejercituman mana ëwanampaq kaqta mana mantsakushpa nirqan. Tsënömi rikätsikurqan, Jehoväpa familian këta mana kaqpaq mana churanqanta. Tsënam juknin kaq juezqa, “¿pitaq wawqi panikikunaqa kayan?” nirqan. Robertqa manam tsëta tapuyänanta shuyararqantsu. Peru tsë höram, tsë junaqpaq textuta yarpärirqan. Mateu 12:50 textum karqan, tsëchömi kënö nin: “Pipis ciëluchö këkaq Teytäpa munëninta ruraq kaqmi, wawqï, panï y mamänï”. Bibliapita Robert tsëllaraq yachakuykaptimpis, cortichö tapupäyanqanta alli contestanampaqmi poderninwan Jehovä yanaparqan. ¡Alli tsarakunqampitaqa Jehoväqa alläpachi kushikurqan! Mana allikunapa pasëkarpis Diospita mana mantsakushpa yachatsikushqaqa, Jehoväqa noqantsikpitapis kushikunqam.

20. ¿Imata rurartan sïguinantsik? (Juan 17:11, 15).

²⁰ Jehoväpa kuyakoq familianchö kanqantsikpita imëpis agradecikushun. Pï teytawampis mana igualaq, y kuyakoq wawqi panikunayoqmi kantsik. Ama tsëta mana kaqpaq churarishuntsu. Satanaswan mana alli nunakunaqa, Teytantsik Jehovä mana kuyamanqantsikta creinata y juk familianölla kënintsikta ushakätsitam munayan. Peru Jesusqa noqantsikpaq, y juk familianölla kënintsik mana ushakänampaqmi Jehoväta mañakurqan (leyi Juan 17:11, 15). Y Jehoväqa, Jesus mañakunqannöllam cuidëkämantsik. Jesus ruranqannölla rurashun, y ama imëpis qonqashuntsu, Jehovä alläpa kuyamanqantsikta y yanapamanqantsikta. Familia cuenta wawqi panintsikkunata mas kuyanapaq kallpachakushun.