1. ¿Imanötan familiankuna kayan juk nunata congregacionpita qarquriyaptin?

CONGREGACIONPITA juk nunata qarquriyaptinqa, familiankunam alläpa llakikuyan. Hilda * jutiyoq panim kënö nin: “41 watapa casädu këkäyaptï nunä wanukuptinqa, tsëläya imapis mana llakitsimänampaq kaqtam pensarqä. Peru wamräta congregacionpita qarquriyaptin familianta dejarïkur ëwakuptinqa, nunä wanukunqampitapis masmi llakikurqä”.

2, 3. Salmus 78:40 y 41 ninqannö, ¿imatan shonqunchö Jehovä sientin sirweqninkuna dejariyaptin?

² Jehoväqa alläpachi llakikurqan, familiampita mëtsikaq angelkuna pëpa contran churakäriyaptin (Jüd. 6). ¿Y kuyanqan Israel nacion pëpa contran kutin kutin churakäyaptin alläpa llakikunqanta pensarintsikku? (Leyi Salmus 78:40, 41). Familiëkipita o kuyashqa amïguykikunapita pillapis Jehoväta sirwita dejariptin llakikurqa, yarpë, Jehoväpis alläpam llakikun. Pëqa musyanmi imanö këkanqëkita y llakipäshurnikim tsarakur sïguinëkipaq yanapashunki.

³ Këchöqa, tsënö pasamashqa Jehovä yanapamänapaq imata ruranapaq kaqtam yachakushun. Jina tsënö pasëkaq wawqi panikunata imanö yanapanapaq kaqtam rikäshun. Peru puntataqa, imanö mana pensanapaq kaqpita yachakurishun.

4. Wamrankuna Jehoväta sirwita dejariyaptin, ¿imatataq wakin teytakuna pensayan?

⁴ Juk wamran Jehoväta sirwita dejariptinqa, imata mana  rurashqa kayanqantam teytakunaqa tapukuyan. Wamranta congregacionpita qarquriyaptin, Luke jutiyoq wawqi kënö yarpachakushqa kanqantam willakun: “Noqa culpayoq kanqätam pensarqä. Mana allikunatam suëñukoq kä. Höraqa shonqümi nanaq y waqaqmi kä”. Congregacionpita wamranta qarquriyaptinmi, Elizabeth panipis kënö pensëta dejëta puëdeqtsu: “¿Mamanö imata ruranätaq pishishqa? Llapan puëdinqämannö wamräta Diospita mana yachatsishqa kanqätam pensaq kä”.

5. Pipis Jehoväta sirwita dejariptinqa, ¿pitan culpayoq?

⁵ Yarpäshun, Jehoväqa imatapis kikintsik akrakunapaqmi kamamarquntsik. Y cada ünum Pëta sirwinapaq o mana sirwinapaqpis akrashun. Wakin jövinkunaqa, shumaq wätashqa mana karnimpis, Jehoväta sirwiyänampaqmi churapakäyashqa y kananyaqmi tsëta rurëkäyan. Wakinnam, Jehoväpita teytankuna yachëkätsiyaptimpis, winarkurqa Jehoväta sirwita dejariyashqa. Rikanqantsiknömi, cada ünum akranantsik Jehoväta sirwinapaq o manapis (Jos. 24:15). Tsëqa teytakuna y mamakuna, wamrëkikuna Jehoväta sirwita dejariyaptinqa, ama culpayoq kayanqëkita pensayëtsu.

6. ¿Imanötan wamrakuna kayan mëqan teytampis Diosta sirwita dejariptinqa?

⁶ Höraqa, teyta kaq o mama kaqmi Jehoväta sirwita o hasta familiantapis dejarin (Sal. 27:10). Alli kaqta ruraqtanö teytankunata rikaq wamrakunapaqqa llakikuypaqmi kanman. Teytanta congregacionpita qarquriyaptin llakikunqampaq parlarmi, Esther kënö willakun: “Ichikllapa ichikllapa Jehoväta sirwita mana dejanqanta, sinöqa musyëkarnin manana sirwinampaq kaqta decidinqanta musyarmi seguïdu waqaq kä. Teytäta alläpa kuyarmi, congregacionpita qarquriyaptinqa, imanö këkanqampaq alläpa yarpachakoq kä. Höraqa, mana imarëkurmi alläpa mantsakaq kä”.

7. ¿Congregacionpita qarqushqa teytakunayoq jövinkuna imanö këkäyanqantataq Jehovä musyan?

⁷ Jövinkuna, mëqan teytëkikunapis congregacionpita qarqushqa kashqa kaptinqa, noqakunapis llakikuyämi. Jehoväpis, imanö këkäyanqëkita musyanmi. Pëqa kuyayäshunkim y mana dejëpa sirwir sïguiyanqëkipitam kushikun. Y Jehoväpa llapan Testïgunkunam, qamkunapita alläpa kushikuyä. Jina yarpäyë, teytëkikuna imatapis decidiyanqampitaqa manam qamkunatsu culpayoq kayanki. Yachakunqantsiknöpis, Jehoväqa pëta sirwinapaq kikintsik akranatam dejamantsik. Y Diosta sirwinampaq churapakashqa y bautizakushqa nunaqa, “cada ünum ruranampaq kaqta ruranan” (Gäl. 6:5).

8. ¿Imatataq Diosta sirwikaqkuna rurayanman qarqushqa familian kutiyanqanyaq? (Rikäri “ Kutikamunëkitam Jehoväqa munan” neqta).

⁸ Pipis kuyanqantsik Jehoväta sirwita dejariptinqa, imë karpis kutimunampaq kaqmanmi yarpantsik. ¿Tsëyaqqa imatataq rurashwan? Jehoväta sirwir sïguinëkipaq kallpachakuy. Tsëta ruranqëkipitam familiëki yachakunqa y itsa congregacionpita qarqushqa kaqpis. Y tsëta ruranqëkim alläpa mana llakikunëkipaq yanapashunki. Diosta sirwinqëkichö tsarakurnin sïguinëkipaq, imakuna yanapashunëkipaq kaqta rikärishun.

9. ¿Imatan yanapashunki Diosman mas markäkur sïguinëkipaq? (Rikäri “ Pipis kuyanqëki kaq Jehovä sirwita dejariptin yanapashunëkipaq kaq textukuna” neqta).

⁹ Qam y familiëki, Jehoväman mas markäkuyänëkipaq o yärakuyänëkipaq kallpachakurnin sïgui. Tsëpaqqa, Bibliata seguïdu leyinqëki, leyinqëkiman yarpachakunqëki y reunionkunaman ëwanqëkim yanapashunki. Joanna pasanqanman pensarishun. Teytan y nananmi Jehoväta sirwita dejariyarqan. Pëmi kënö willakun: “Bibliachö Abigailpaq, Esterpaq, Jobpaq, Josëpaq y Jesuspaq leyinqämi, shonqüta yamëyäratsin. Pëkunapita yachakunqämi, alläpa mana llakikunäpaq y alli kaqman pensanäpaq yanapaman. Jina JW Broadcasting progrämachö yarqamoq cancionkunapis alläpam yanapaman”.

10. Salmus 32:6 a 8 ninqannö, ¿imatataq rurashwan alläpa llakikurninqa?

¹⁰ Jehoväman mañakur imanö këkanqëkita willë. Pë rikanqannö tsë asuntuta rikänëkipaq, yachaqta tikratsishunëkipaq y imata ruranëkipaq rikätsishunëkipaq kuyakoq Diosnintsikta mañakuy (leyi Salmus 32:6-8). Imanö këkanqëkita willëqa itsa llakitsishunkiman. Peru Jehoväqa musyanmi imanö këkanqëkita. Pëqa alläpam kuyashunki y imanö këkanqëkita willanëkitam munan (Ex. 34:6; Sal. 62:7, 8).

11. Hebrëus 12:11 ninqannö, ¿imanirtaq pitapis kuyar Jehovä corriginqanman confiakunantsik? (Rikäri, “ Congregacionpita jutsallakoqta qarquyanqanqa Jehovä kuyakoq kanqantam rikätsikun” neqta).

¹¹ Creikoqkunata rikaqkuna decidiyanqanta respetë. Jutsallakoqkunata congregacionpita qarquyänampaq Jehovä patsätsinqanqa, llapantsiktam yanapamantsik, hasta jutsallakushqa nunatapis (leyi Hebrëus 12:11). Itsa wakinkunaqa, pitapis congregacionpita qarqurnin creikoqkunata rikaqkuna pantashqa  kayanqanta niyanman. Peru itsapis qarqushqa nuna imanö kanqanta llapantaqa willakuyantsu. Yarpäshun, pasakunqampitaqa manam llapanta musyantsiktsu. Tsëmi creikoqkunata rikaqkuna Biblia ninqannö, y Jehovä munanqannö tsë nunata juzgashqa kayanqanman confiakunantsik (2 Crön. 19:6).

12. Congregacionpita qarqushqakunata imanö rikänapaq Jehovä mandamanqantsikta wiyakuyqa, ¿imanötan wakinkunata yanapashqa?

¹² Familiëkipita jutsallakushqa kaq congregacionpita qarqushqa kanampaq creikoqkunata rikaqkuna decidiyanqanta respetarninqa, itsa tsë familiëkita kutinampaq yanapëkankiman. Chusku kaq pärrafuchö Elizabethpaq parlanqantsikmi kënö nin: “Mayorna wamräkunata parlapëta dejëqa manam fäciltsu karqan. Peru Testïgu këman yapë kutiriptinqa, congregacionpita qarquyanqan allipaq kanqantam nirqan. Y mas tiempu pasariptinqa, imëka allikunata yachakushqa kanqantam nirqan. Tsëkunam rikätsimarqan, Jehovä corrigimanqantsikqa imëpis alli kanqanta”. Mark jutiyoq nunampis kënömi nin: “Tsëpita atska watakunatam, Jehovä mandakunqanta rurayanqä Testïgu këman kutinampaq yanapashqa kanqanta wamrä nimarqan. Cäsukoq kayänäpaq yanapayämanqampitam Jehoväta alläpa agradecikü”.

13. ¿Imatan yanapashunki llakishqalla mana kanëkipaq?

¹³ Entiendiyäshunqëki amïgukunawan parlë. Allita pensanëkipaq yanapayäshoqniki wawqi panikunawan juntu kë (Prov. 12:25; 17:17). Nuëvi kaq pärrafuchö parlanqantsik Joanna jutiyoq panim kënö nin: “Rasumpa kaqchöqa, pïninnaq kanqätam pensaq kä. Peru confiakunqä amïgükunawan parlanqämi yanapamarqan”. Tsënö kaptimpis, juk wawqi o pani nishunqëkiwan mas llakitsishuptikiqa, ¿imataraq rurankiman?

14. ¿Imanirtan aguantanakurnin y perdonanakurnin sïguinantsik?

¹⁴ Ama wawqi panikunawan rasllaqa piñakuytsu. Manam llapantsu wanëkanqantsikmannö parlapämäshun (Sant. 3:2). Llapantsikmi imallachöpis pantarintsik, tsëmi wakinkunaqa imanö parlapämënintsikta musyayantsu o imatapis nïramantsik. Apostol Pablu kënö consejakunqanta yarpë: “Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë” (Col. 3:13). Juk familianta congregacionpita qarquyanqan panim kënö willakun: “Jehoväqa, yanapamëta munayanqanchö llakitsimaq nana turikunata perdonanäpaqmi yanapamashqa”. Kananqa, qarqushqa nunapa Diosta sirwikaq familianta, congregacionchö wawqi panikuna imanö yanapayänampaq kaqta yachakurishun.

15. ¿Imanötan yanapashwan congregacionpita tsëllaraq qarquyanqan nunapa familianta?

¹⁵ Congregacionpita qarqushqa nunapa Diosta sirwir sïguikaq familianta kuyëpa tratashun.  Turinta qarquriyaptinmi, reunionkunaman ëwëta pani Miriam mantsaq. Kënömi willakun: “Imatapis niyämänampaq kaqtam mantsaq kä. Peru turïpaq mana allita mana parlaq y llakishqa këkaq amïgükunapis karqanmi. Pëkunam yanapayämarqan”. Juk paninam kënö nin: “Wamräta qarquriyaptinmi, kuyayämaq nana turikuna shoqayämaq shayämurqan. Wakinkunaqa imatapis niyämëta mana puëdiyanqantam niyämarqan. Noqawanmi waqayarqan o yanapamänampaq palabrakunatam qellqapäyämarqan. Tsëta rurayanqanqa alläpam yanapamarqan”.

16. ¿Imanötan qarqushqakunapa Diosta sirwikaq familianta congregacionchö wawqi panikuna yanapayanman?

¹⁶ Congregacionpita qarqushqakunapa Diosta sirwir sïguikaq familiankunata yanapashun. Pëkunaqa, kanan witsanran mas kuyanata y yanapanata wanayan (Heb. 10:24, 25). Qarqushqakunapa wakin familiankunaqa, pëkunatapis qarqushqatanö rikarmi wakin wawqi panikuna mana parlapäyanqanta cuentata qokuyashqa. Tsëtaqa, ¡ama imëpis rurashuntsu! Congregacionpita qarqushqa teytakunayoq jövinkunaqa, masran yanapanata y rurayanqampita felicitänata wanayan. Congregacionpita qarquriyaptin, familianta dejarir nunan ëwakunqampita imapa pasanqantam pani Marïa kënö willakun: “Wakin yanasäkunam wayïman shayämurqan, cocinakayämurqan y wamräkunawan Bibliata estudianäpaqmi yanapayämarqan. Alläpa llakikoqta rikämarnïmi, noqawan waqayarqan. Y noqapaq wakinkuna mana rasumpa kaqta parlayaptimpis, defendiyämarqanmi. Alläpam yanapayämarqan” (Rom. 12:13, 15).

17. ¿Imatataq creikoqkunata rikaqkuna rurayanman sufrikaqkunata yanapayänampaq?

¹⁷ Creikoqkunata rikaqkuna, congregacionpita qarqushqakunapa familianta puëdiyanqëkimannö yanapayë. Tsënöpa pasëkaq wawqi panikunata yanapayänëkipaqmi Jehoväqa churayäshurqunki (1 Tes. 5:14). Reunionkuna manaraq qallaptin y ushariptin pëkunawan parlayë. Watukayë y pëkunapaq mañakuyë. Jina pëkunawan Diospita yachatsikuyë o familiëkikunawan Diosta adorayänëki höraman juk kutikunachö invitayë. Creikoqkunata rikaqkunaqa,  Jehoväpa sirweqninkunatam llakipäyänan, kuyayänan y wanayanqankunachö yanapayänan (1 Tes. 2:7, 8).

18. 2 Pëdru 3:9 ninqannö, ¿qarqushqa kaqkuna imata rurayänantataq Jehovä munan?

¹⁸ Jehoväqa, “manam munantsu pipis ushakänanta; tsëpa rantinqa, llapankuna arrepentikuyänantam munan” (leyi 2 Pëdru 3:9). Juk nuna jutsallakushqa kaptimpis, kawëninqa Diospaq alläpam välin. Yarpë, Jehoväqa kuyë Tsurimpa kawëninwanmi rantimarqantsik. Qarqushqa kaqkunata kuyarmi, kutiyänampaq Diosqa yanapëta procuran. Y wayimpita ëwakushqa wamrapaq Jesus yachatsikunqannö pëkuna kutiyänantam shuyarëkan (Lüc. 15:11-32). Mëtsikaqmi arrepentikurnin Jehoväta yapë sirwir qallayashqa y congregacionchö kaqkunaqa kushishqam chaskiyashqa. Parlanqantsik pani Elizabethqa, Testïgu këman wamran kutiptin alläpam kushikurqan. Pëmi kënö nin: “Wamrä kutimunampaq kaqta niyämar llapan yanapamaqnïkunatam alläpa agradecikü”.

19. ¿Imanirtan Jehoväman confiakurnin sïguishwan?

¹⁹ Jehoväman imëpis confiakushun. Pëqa, manam llakitsimaqnintsikkunata ruranapaq nimäshuntsu. Alläpa alli y llakipäkoq Teyta karmi, kuyaqninkunata y adoraqninkunata alläpa kuyan. Yarpäshun, Jehoväqa manam imëpis dejamäshuntsu (Heb. 13:5, 6). Döci kaq pärrafuchö parlanqantsik Mark jutiyoq wawqim kënö nin: “Jehoväqa manam imëpis dejayämarqantsu. Pëqa alläpa llakikuyanqä hörakunam yanapayämashqa”. Diosqa, ‘nunakunapa kallpampita mas puëdeq kallpayoq’ kanapaqmi yanapamäshun (2 Cor. 4:7). Awmi, kuyashqa familiantsik Jehoväta sirwita dejariptimpis, Diosman markäkïta o yärakuyta y shamoq tiempuchö imëkapis altsakänampaq kaqta shuyëtaqa, puëdikäshunllam.