1. Waranqa Watapa Cristu gobernamunqanchöqa, ¿ima kushikuypaq cösaskunatan pasakunqa?

 WARANQA Watapa Cristu gobernamunqanchö Patsachö kawarimoq nunakunata rikëqa, alläpa kushikuypaqchi kanqa. Kuyashqa kastantsikkunata wanupakushqa kaqkunaqa, tsë junaq chämunantaqa alläpam shuyarëkantsik. Jehoväpis wanushqakuna kawariyämunantaqa alläpam munëkun (Job 14:15). Nunakunaqa entëru Patsachöchi kawarimoq kastankunawan kushishqa tinkuyanqa. Punta kaqchö yachakunqantsiknömi, pikuna kawayänampaq kaqta rikätsikoq libruchö ‘allita ruraq’ nunakunapa jutin qellqarëkaqkunaqa, “kawayänampaqmi kawariyämunqa” (Hëch. 24:15; Juan 5:29). Itsa mas puntataqa, kuyashqa kastantsikkuna kawariyämunqa. b Jina Jehoväpita mana yachakushqa kaqkuna o pëllata sirwiyänampaq mana churapakashqa ‘mana allikunata rurashqa kaqkunaqa, juzgashqa kayänampaqmi kawariyämunqa’.

2, 3. (1) Isaïas 11:9 y 10 ninqannö, ¿imapitataq kawarimoq nunakuna yachakuyanqa, y imanir? (2) ¿Imatataq këchö yachakushun?

² Kawarimoq kaqkunaqa imëkatam yachakuyänan (Is. 26:9; 61:11). Tsëmi mana ni imëpis rurakanqannö nunakunata yachatsinapaq patsätsikanqa (leyi Isaïas 11:9, 10). Mana alli kaqta rurashqa kaqkunam Jesucristupita, Diospa Gobiernumpita, vïdanwan pagakur Jesucristu salvamanqantsikpita y Jehovä kikimpa jutinta y pëlla llapanta gobernaq kanqanta respetatsishqa  kanqampita yachakuyänan. Alli kaqta rurashqa kaqkunapis, sirweqninkunata Jehovä yachatsishqa kanqampitam yachakuyänan. Jehovällata sirweq tsë wakin nunakunaqa, Bibliata qellqar manaraq ushayaptinmi wanukuyarqan. Clärum këkan, mana alli kaqta rurashqa kaqkuna y alli kaqta rurashqa kaqkunaqa, imëkapitam yachakuyänan.

³ Këchöqa, kë tapukuykunapitam yachakushun: tsë witsanqa, ¿imanöraq Diospita yachatsikushun y yachakushun?, Diospita tsë tiempuchö yachakoqkunawanqa, ¿imataq pasanqa? y ¿imatan mana yachakoqkunata pasanqa? Tsëkuna imanö kanampaq kaqtaqa musyëtam procurashwan. Daniel y Apocalipsis librukunachö Diosnintsik willatsikunqanmi, wanushqakuna kawarirayämuptin imakuna pasakunampaq kaqta entiendinapaq yanapamantsik. Puntataqa, Daniel 12:1 y 2 ninqanchö imakuna pasakunampaq kaqpita yachakurishun.

4, 5. ¿Ushanan tiempuchö ima pasakunampaq kaqtataq Daniel 12:1 ninqanchö willakun?

⁴ (Leyi Daniel 12:1, nöta). Ushanan tiempuchö imapis imanö pasakunampaq kaqtam Daniel libruchö willakun. Këllaman pensarishun: Daniel 12:1 ninqanchömi Miguel, juk parlakuychöqa Jesucristu, Diosta sirweqkunata ‘yanapanampaq’ kaqta nin. Tsëta Dios willatsikunqanqa, 1914 watachömi cumplikar qallëkurqan. Tsë watachömi Diospa Gobiernunchö rey kanampaq Jesus churashqa kanqanchö, tsëchö qellqarëkanqan cumplikarqan.

⁵ Jina Danieltaqa, “patsachö nacionkuna kanqampita” ni imëpis mana kanqannö sufrimientu kanqan witsan Jesus sharkunampaq kaqtam tsë angel willarqan. Tsë sufrimientuqa, Mateu 24:21 ninqanchö “alläpa sufrimientum”. Tsë jatun sufrimientu ushëkaptinmi Jesusqa sharkunqa, juk parlakuychöqa, Armagedon guërrachömi Diosta sirweqkunata defendinqa. Apocalipsis libruchöqa, tsë nunakunapaqmi ‘mëtsika nunakuna’ nin y pëkunaqa ‘alläpa sufrimientupitam’ yarqayämun (Apoc. 7:9, 14).

6. Alläpa sufrimientuta mëtsikaq nunakuna kawëkar pasariyaptin, ¿imatan pasakunqa, y imanirtan tsëta nintsik? (Patsachö kawariyämunampaq kaqpaq masllata entiendinëkipaq, “Leyeqkuna tapukuyanqan” neqta kë revistachö leyiri).

⁶ (Leyi Daniel 12:2). Alläpa sufrimientuta mëtsika nunakuna kawëkar pasariyaptinqa, ¿imatan pasakunqa? Bibliachöqa, nunakuna kawariyämunampaq kaqtam willakun. Puntataqa, akrashqa nunakuna ciëluchö kawariyänampaq kaqta o 1918 watachö Diosta sirweqkunata chikeqkuna yachatsikuyänanta michäyaptin cäsi dejariyanqampita, yapë yachatsikur qallëkuyanqampaq Daniel 12:2 parlëkanqantam entiendirqantsik. c Tsëpa rantinqa, Shumaq Patsachö nunakuna kawariyämunampaq kaqta Bibliachö Dios willatsikunqampaqmi parlëkan. ¿Imanirtan tsëta nintsik? Job 17:16 ninqanchöpis ‘allpapaqmi’ parlan, y tsëchöqa ‘Sepultürapaq’ parlarmi tsënö nin. Tsëqa Daniel 12:2 ninqanchöpis, ushanan tiempu ushariptin y Armagedon guërra ushariptin, Patsachö nunakuna kawariyämunampaq kaqpaqmi parlëkan.

7. (1) ¿Imanötan wakinkunaqa “imëyaqpis kawayänampaq” kawariyämunqa? (2) ¿Imanirtan pëkunaqa “mas alli kaq kawarimuyta” lograyan?

⁷ ¿Ima ninantan wakinkunaqa “imëyaqpis kawayänampaq” kawariyämunampaq kaqta Daniel 12:2 ninqanchö qellqarëkanqanqa? Tsëqa, Waranqa Watapa Jesus  gobernamunqanchö kawarimoqkuna Jehoväpita y Jesuspita yachakoq, o pëpita yachakurnin sïgueqkuna, y yachakuyanqanmannö kawaqkuna imëyaqpis kawakuyänampaq kaqtam rikätsikun (Juan 17:3). Pëkunaqa, unë witsanchö kawarimoq nunakunapita ‘mas alli kaq kawarimuytam’ lograyanqa (Heb. 11:35). ¿Imanirtan tsëta nintsik? Unë witsanchö kawarimushqa kaqkuna yapë wanushqa kayaptinmi.

8. ¿Imanirtan wakinkunaqa imëyaqpis kawayänampaq kawariyämunqa, peru wakinkunaqa “imëyaqpis penqapashqa y despreciashqa” kayänampaq?

⁸ Peru manam llapan kawarimoqkunatsu Jehovä yachatsinqanta chaskikuyta munayanqa. Tsëmi Daniel libruchö Dios willatsikunqanchöqa, wakinkunaqa “imëyaqpis penqapashqa y despreciashqa” kawariyämunampaq kaqta nin. Mana wiyakoq kayanqampitam pikuna kawayänampaq kaqta rikätsikoq libruchö jutinkuna qellqaranqatsu y imëyaqpis kawëta puëdiyanqatsu. Imëyaqpis ‘despreciashqam’ kayanqa o juk parlakuychöqa, ushakäyanqam. Tsëmi Bibliachö Daniel 12:2 ninqanqa, kawarirkamur imata rurayanqampita llapan kawarimoqkuna imachö ushayänampaq kaqta rikätsikun d (Apoc. 20:12). Wakinmi imëyaqpis kawakuyanqa, peru wakinqa ushakäyanqam.

9, 10. (1) Daniel 12:3 ninqannö, ¿ima mastan alläpa sufrimientu pasariptin pasakunqa? (2) ¿Pikunatan ‘ciëlunöraq atsikyäyanqa’?

⁹ (Leyi Daniel 12:3). Chëkämoqna “sufrimientu” tiempu pasariptinqa, ¿ima mastan pasakunqa? Manam Daniel 12:2 ninqanllatsu pasakunqa. Kima kaq versïculuchömi, sufrimientu tiempu pasariptin ima pasakunampaq kaqta rikätsikun.

¹⁰ ¿Pikunatan ‘ciëlunöraq atsikyäyanqa’? Mateu 13:43 ninqanchö Jesus parlanqanmi tsëta musyanapaq yanapamantsik. Pëmi kënö nirqan: “Tsë witsanmi allita ruraqkunaqa Teytankunapa Gobiernunchö intinöraq o rupaynöraq chipapäyanqa”. Tsëpaq parlarqa, ‘Gobiernupa tsurinkunapaqmi’ Jesusqa parlëkarqan, pëkunaqa Diospa Gobiernunchö pëwan gobernayänampaq akrashqa wawqinkunam kayan (Mat. 13:38). Tsëmi Daniel 12:3 ninqanqa, ciëluta ëwayänampaq akrashqakunapaq y Waranqa Watapa Jesus gobernamunqanchö imata rurayänampaq kaqpaq parlëkanman.

11, 12. Waranqa Watapa Jesus gobernanqanchöqa, ¿imatataq Patsapita akrashqa 144.000 nunakuna rurayanqa?

¹¹ Patsapita akrashqa kaq nunakunaqa, mëtsikaqtam “allita rurayänampaq” yanapayanqa. Tsëtaqa, Waranqa Watapa Jesucristu gobernanqanchö Patsachö Diospita yachatsikuyanqanta dirigirninmi rurayanqa. Tsë 144.000 nunakunaqa rey karpis, sacerdötim kayanqa (Apoc. 1:6; 5:10; 20:6). Tsëmi manana pantaq kayänampaq nunakunata yanaparnin, ‘nacionkuna jampishqa kayänampaq’ yanapakuyanqa (Apoc. 22:1, 2; Ezeq. 47:12). Ciëluchöna këkaq tsë akrashqa nunakunaqa, ¡tsëta rurarmi alläpa kushikuyanqa!

¹² ¿Pikunatan këkäyanqa “allita rurayänampaq” yanapayanqan kaqkunachöqa? Kawarimoq kaqkuna, Armagedon guërrata kawëkarnin pasaq kaqkuna y Shumaq Patsachö yureq wamrakunam. Waranqa Watapa Jesus gobernar ushariptinqa, llapan nunakunam ni imachöpis manana pantaq kayanqa. Tsëqa, pikuna kawayänampaq kaqta rikätsikoq libruchöqa, ¿imëtan jutinkunaqa imëka tintawannö qellqashqa kanqa?

13, 14. Manana wanurnin kë Patsachö kawakuyänampaqqa, ¿imatataq manana pantaq llapan nunakuna rikätsikuyänan?

¹³ Yarpäshun, juk nuna mana pantaq kanqanqa, manam imëyaqpis kawakunampaq kaqtaqa rikätsikuntsu. Adanwan Ëva rurayanqanllaman pensarishun. Pëkunaqa mana pantaqmi kayarqan. Tsënö karpis, imëyaqpis kawakuyänampaqqa Jehovätam wiyakuyänan karqan. Peru musyanqantsiknöpis, pëkunaqa manam wiyakuyarqantsu (Rom. 5:12).

¹⁴ Yachakunqantsiknöpis, Waranqa Watapa Jesus gobernar ushariptinqa, Patsachö llapan kawaq kaqkunam manana pantaq kayanqa. Peru tsë mana pantaq nunakunaqa, ¿Diospa Gobiernun ninqantatsuraq imëyaqpis wiyakuyanqa? ¿O Adanwan Ëvanötsuraq ni imachöpis mana pantaq këkarnimpis mana wiyakoq tikrakuriyanqa? ¿Imanöraq tsëqa musyakanqa?

15, 16. (1) ¿Imëtan nunakunaqa Jehoväta mana dejëpa sirwiyanqanta rikätsikuyanqa? (2) Tsë pruëba ushariptinqa, ¿imatan wiyakoq kaqkunata y mana wiyakoq kaqkunata pasanqa?

¹⁵ Satanasqa waranqa watapam llawiranqa. Y tsë tiempuchöqa, manam pitapis engañëta puëdinqatsu. Peru Waranqa Wata pasariptinqa, librim yarqaramunqa y ni imachöpis manana pantaq nunakunatam engañëta procuranqa. Tsë tiempuchömi, Diospa jutinta respetayanqanta y Gobiernunchö këta  munayanqanta o mana munayanqanta nunakuna rikätsikuyanqa (Apoc. 20:7-10). Imata rurayanqampitam pikuna kawayänampaq kaqta rikätsikoq libruchö jutinkuna qellqakanqa o manapis.

¹⁶ Mëtsikaqmi Adannö y Ëvanö mana cäsukoq kayanqa y manam Jehoväpa Gobiernunchö këta munayanqatsu. ¿Imatan pëkunawanqa pasanqa? Bibliachömi, Apocalipsis 20:15 kënö nin: “Pikuna kawayänampaq kaqta rikätsikoq libruchö jutinkuna mana kaqkunaqa, nina qochamanmi jitashqa kayarqan”. Tsënömi tsë mana wiyakoq nunakunaqa chipyëpa ushakäyanqa. Peru manana pantaq mëtsikaq nunakunam tsë pruëbata kawëkar pasayanqa. Y manana wanurnin kawakuyänampaqmi, pikuna kawayänampaq kaqta rikätsikoq libruchö jutinkuna qellqakanqa.

17. ¿Kanan tiempuchö imakuna pasakunampaq kaqtataq Danielta juk angel willarqan? (Daniel 12:4, 8-10).

¹⁷ ¡Shamoq tiempuchö imakuna pasakunampaq kaqta musyanqantsikpitam alläpa kushikuntsik! Peru Danieltaqa juk angelmi kanan witsanchö ima pasakunampaq kaqtapis willarqan (leyi Daniel 12:4, 8-10; 2 Tim. 3:1-5). Kënömi willarqan: “Rasumpa kaq yachatsikuytaqa mëtsikaqmi musyayanqa”. Tsënö kaptinmi, Diosta sirweqkunaqa Daniel libruchö qellqarëkaq  Diospa willakuyninkunata mas alli entiendiyänan karqan. Jina ushanan tiempupaqqa, tsë angelqa kënöpis nirqanmi: “Mana alli nunakunaqa mana allikunata rurarmi kakuyanqa y manam entiendiyanqatsu”.

18. ¿Imatan mana alli kaqta ruraq nunakunata ichikllachöna pasanqa?

¹⁸ Kanan witsanqa, mana alli kaqta ruraqkunaqa mas kushishqanömi kawakuyan (Mal. 3:14, 15). Jesusqa ichikllachönam cabranö kaq nunakunata üshanö kaq nunakunapita rakir juzganqa (Mat. 25:31-33). Mana alli kaqta ruraqkunaqa manam alläpa sufrimientu witsanta kawëkar pasayanqatsu ni Shumaq Patsachö kawayänampaq kawariyämunqatsu. Pëkunapa jutinkunaqa, manam Malaquïas 3:16 ninqan ‘libruchö’ Dios ‘yarpänampaq’ qellqaranqatsu.

19. ¿Imatataq kanan witsan ruranantsik, y imanir? (Malaquïas 3:16-18).

¹⁹ Kananmi rikätsikunantsik mana alli kaqta ruraq nunakunanö mana kanqantsikta (leyi Malaquïas 3:16-18). Jehoväqa pëpaq kayänampaq kaqkunatam kanan witsan juntëkan. ¿Manaku tsë grüpu nunakunachö këta munantsik?

20. ¿Ima mastataq Danielta Jehovä änirqan, y imanirtan tsëta äninqan cumplikänanta qampis shuyarëkanki?

²⁰ Rikanqantsiknömi, alläpa kushikuypaq tiempuchömi kawantsik. Peru ichikllachönam mas kushikunapaq kaqkuna pasakunqa. Imëka mana allikuna ushakänampaq tiempuqa chëkämunnam. Tsëkuna pasakuriptinnam, Danielta Jehovä kënö äninqan cumplikaqta rikäshun: “Ushanan tiempuchömi kawarimunki herenciëki chaskinëkipaq” (Dan. 12:13). ¿Daniel y kuyashqa kastëkikuna kawariyämunan junaq chämunantanaku munëkanki? Tsënö kaptinqa, Jehovällata sirwir sïguinëkipaq kallpachakuy y jutikiqa pikuna kawayänampaq kaqta rikätsikoq libruchömi qellqarëkanqa.