1. ¿Imanötan confiakuypaq nunaqa?

 CONFIAKUYPAQ nunaqa änikunqanta cumplinampaq y rasumpa kaqllata parlanampaqmi kallpachakun (Sal. 15:4). Reqeqninkunaqa pë yanapanampaq kaqtam següru këkäyan. Wawqi panintsikkuna confiakuypaqtanö rikämänatam munantsik. ¿Imatan yanapamäshun noqantsikman confiakuyänampaq?

2. ¿Imanötan confiakuypaq kanqantsikta rikätsikuntsik?

² Noqantsikman confiakuyänampaqqa, manam pitapis obliguëta puëdintsiktsu. Tsëpa rantinqa, confiakuypaq kanqantsikta rikätsikunapaqmi kallpachakunantsik. Pimampis confiakunqantsikqa, qellë cuentam: manam fäciltsu tarinan y raslla ushakäreqmi. Confiakuypaq kanqanta rikätsikushqa kaptinmi, Jehovämanqa confiakuntsik. ‘Llapan ruranqampis confiakuypaq’ kaptinmi, Pëmanqa imëpis confiakuyta puëdintsik (Sal. 33:4). Y Pëqa pënö kanantsiktam shuyaran (Efes. 5:1). Këchömi, Jehoväpa wakin sirweqninkuna Teytan Jehovänölla kayanqampita y confiakuypaq kayanqanta rikätsikuyanqampita yachakushun. Jina confiakuypaq kanapaq yanapamaqnintsik pitsqa consëjukunatam rikäshun.

3, 4. (1) ¿Imanötan Diospa willakoqnin Daniel confiakuypaq nuna kanqanta rikätsikurqan? (2) ¿Ima tapukuykunamantan pensashwan?

³ Diospa willakoqnin Danielqa, confiakuypaq nunam karqan. Babiloniachö prësunö kawanampaqmi apayarqan y wallka tiempullachömi confiakuypaq nuna kanqanta rikätsikurqan.  Y rey Nabucodonosor suëñukunqanta entienditsikunampaq Jehovä yanapaptinmi, confiakuypaq nuna kanqanta masraq pï më musyariyarqan. Juk kutichöqa, Diosta rurëkanqan mana gustanqanta ninampaqmi Jehovä mandarqan. Rey Nabucodonosor alläpa feyu geniuyoq këkaptimpis, Jehovä ninqanta willanampaqmi Danielqa ëwarqan (Dan. 2:12; 4:20-22, 25). Tsëpita mëtsika watakuna pasanqanchönam, reypa wayimpa perqanchö juk maki qellqanqan ima ninan kanqanta entienditsikunqanchö confiakuypaq kanqanta rikätsikurqan (Dan. 5:5, 25-29). Tsëpita tiempuwanqa, Media nacionpita rey Darïu y pëwan mandakoq nunakunam imëkatapis Daniel ‘mas yachanqanta’ cuentata qokuyarqan. ‘Churayanqan trabäjuchö llapantapis allita ruraptin y cumpliptinmi’, ‘imapitapis acusëta puëdiyaqtsu’ (Dan. 6:3, 4). Jehoväta mana adoraq gobernaqkunapis confiakuypaq nuna kanqantam rikäyarqan.

⁴ Daniel confiakuypaq nuna kanqanta cuentaman churëkur, kë tapukuykunaman pensashun: “Mana Testïgu kaq nunakunaqa, ‘¿imatataq noqapaq niyan?’ ¿Confiakuypaq y cumplïdu nunatanöku rikäyäman?”. Confiakuypaq kashqa Jehoväta alabayaptinmi, tsë tapukuykunaman pensanantsikqa alläpa alli.

5. ¿Imanirtan Hananïastaqa confiakuypaq nunatanö reqiyaq?

⁵ Jesus manaraq shamuptin 455 watam, Jerusalen markapa jiruroq perqankunata sharkatsirnin, confiakuypaq nunakunata tsë markachö mandakuyänampaq gobernador Nehemïas churarqan. Tsë markata cuidaqkunapitaqa, jukqa Hananïasmi karqan.  Bibliachömi pëpaq kënö nin: “Confiakuypaqmi karqan, y wakimpitapis masmi Dios Yayata respetaq” (Neh. 7:2). Hananïasqa Jehoväta kuyar y llakitsita mantsarmi, ima carguman churayanqantapis alli cumpleq. Diosta sirweqkunataqa Hananïasnö kanqantsikmi, confiakuypaq nuna kanapaq yanapamäshun.

6. ¿Imanötan Tïquicuqa apostol Pablupa confiakuypaq amïgun kanqanta rikätsikurqan?

⁶ Viäjinkunachö apostol Pabluta yanaqaq Tïquicu jutiyoq nunapaq parlarishun. Wayinchö prësuränampaq autoridäkuna mandakuyaptinmi, Tïquicuqa Pabluta yanaparqan. Tsëmi Pabluqa, “Señorpa confiakuypaq sirweqnin” kanqanta Tïquicupaq nirqan (Efes. 6:21, 22). Manam Ëfesuchö y Colösas markachö wawqi panikunapaq qellqanqan cartakunata apananllapaqtsu Pabluqa confiakurqan, sinöqa pëkunata shumaq parlapänampaq y shoqanampaqwanmi. Tïquicu imanö kanqanqa, Diosta mas alli sirwinapaq yanapamaqnintsik y confiakuypaq wawqikunamanmi yarpäratsimantsik (Col. 4:7-9).

7. ¿Imatataq congregacionnintsikchö këkaq anciänukunapita y siervu ministerialkunapita yachakuntsik?

⁷ Kanan witsanqa, confiakuypaq anciänukuna y siervu ministerialkuna rurayanqantam alläpa valorantsik. Danielnö, Hananïasnö y Tïquicunömi chaskiyanqan carguta alli cumpliyan. Këkunallaman pensarishun: semänachö kaq reunionman ëwarqa, yachakunapaq kaqkunata pikuna yachatsikayämunampaq kaqta churashqa kayanqantam següru këkantsik. Y yachatsikuyänampaq kaqta alli preparakuyanqampitam anciänukunaqa wawqi panikunata alläpa agradecikuyan. Jina Bibliata estudiëkätsinqantsikkunata semäna ushë reunionman invitarqa, manam “¿llapan nunakunapaq yachatsikayämunampaq pillatapis invitayashqatsuraq?” nirtsu pensantsik. Y Diospita yachatsikunapaq publicacionkuna kanampaq kaqmampis confiakuntsikmi. Awmi, tsë confiakuypaq wawqintsikkunaqa shumaqmi cuidamantsik, y tsërëkurmi Jehoväta agradecikuntsik. Peru noqantsikqa, ¿imanötan confiakuypaq nunakuna kanqantsikta rikätsikushwan?

8. Wawqi panintsikkunapaq yarpachakurpis, ¿imapitataq cuidakushwan? (Proverbius 11:13).

⁸ Alläpam wawqi panintsikkunata kuyantsik y pëkunapaq yarpachakuntsik. Tsënö karpis, vïdankunaman mana mëtikunapaqmi cuidakunantsik. Punta cristiänukuna witsan congregacionkunachöqa, wakinkunaqa chismösum kayaq, jukpa asuntunkunamanmi mëtikuyaq y mana parlayänampaq kaqkunapitam parlayaq (1 Tim. 5:13). Manachi noqantsikqa pëkunanö këta munantsiktsu. Këllaman pensarishun: itsa imapa pasëkanqanta mana willakunapaq kaqman confiakurnin, pillapis willaramashwan. Itsa qeshyëkanqanta o juk problëmakunapa pasëkanqanta willaramashwan y pitapis mana willanapaq niramashwan. Tsënö nimashqaqa, manam pitapis willakushwantsu (leyi Proverbius 11:13). b Jina, ¿ima asuntukunapitataq pitapis willakushwantsu?

9. ¿Imanötan familiachö kaqkunaqa confiakuypaq kayanqanta rikätsikuyanman?

⁹ Familiëkichö confiakuypaq kanqëkita rikätsikuy. Familiachö kaqkunaqa, manam familiampita pitapis penqakatsinampaq kaqkunataqa willakunmantsu. Këllaman pensarishun: itsa casädu nunaqa warmin imatapis  asikuypaqtanö ruranqanman yarpärinman. Manachi tsëtaqa wakin nunakuna jananchö parlanmantsu, ¿aw? Warminta kuyarmi, imatapis penqakatsinampaq kaqta o llakitsinampaq kaqtaqa ruranqatsu (Efes. 5:33). Teytakunaqa, jövinyëkaq wamrankuna respëtuwan tratayänanta gustayanqantam yarpäyänan. Tsëmi, imakunachö pantayanqampita wakinkunata willakurnin penqakatsiyanmantsu (Col. 3:21). Y pishi wamrakunaqa, familiampita pitapis penqakatseq kaqkunata mana willakuyänampaqmi yachakuyänan (Deut. 5:16). Familianchö pasakunqankunata mana willakuyänampaq cuidakuyaptinqa, mas kuyanakurninmi kushishqa kawakuyanqa.

10. ¿Imanötan rasumpa amïgukunaqa kayan? (Proverbius 17:17).

¹⁰ Amïguykikunata confiakuypaq kanqëkita rikätsi. Llapantsikmi juk alli amïguntsikwan parlakuritaqa imëllapis wanantsik. Imanö këkanqantsikta pitapis seguïdu mana willashqam, tsë asuntupaq parlakuyqa fäciltsu kanman. Y imanö këkanqantsikta juk amïguntsikta willashqa y tsëpita willanqantsikta wakinkunata cuentakushqa kanqanta musyarirqa, alläpam llakikuntsik. Peru willanqantsikta mana cuentakuptinqa, alläpam agradecikuntsik. Tsënö kaqkunaqa, ¡’rasumpa amïgukunam’ kayan! (Leyi Proverbius 17:17).

11. (1) ¿Imanötan anciänukunawan warminkuna confiakuypaq kayanqanta rikätsikuyan? (2) Congregacionchö juk asuntuta rikärir y tsëpita familianwan imanö kanqampitaqa, ¿imatataq juk anciänupita yachakuntsik? (Fötuta rikäri).

¹¹ Wawqi panintsikkunata confiakuypaq kanqantsikta rikätsishun. Willayanqanta wakinkunata mana cuentakoq anciänukunataqa, “fuerti vientupita” tsapaqninkunatanömi wawqi panikunaqa rikäyan (Is. 32:2). Pitapis mana willayänampaq kaqta següru karmi, pëkunataqa imallatapis willarita puëdintsik. Manam mana willakuyänampaq kaqkunata willamänapaqqa tapupashwantsu. Willayanqankunata mana tapupäyaptinmi, anciänukunapa warminkunatapis alläpa  valorantsik. Wawqi panikuna willayanqankunata warminkunata anciänukuna mana cuentayanqanqa, juk bendicionmi. Juk anciänupa warminmi kënö willakun: “Watukanqan turi nanakunapita o Diosta mas alli sirwiyänampaq imachö yanapayänanta wanayanqanta mana willamanqampitam qowäta agradecikü. Pëqa manam jutinkunallatapis willamantsu. Imanöpis yanapakuyta mana puëdinäpaq kaq problëmakunata mana willamanqampitam qowäta agradecikü. Tsëmi nana turikunata juknöpa mana rikänäpaq yanapaman. Jina musyämi imanö sientikunqäta o ima problëmapa pasëkanqäta willaptï, ni pitapis mana cuentanampaq kaqta”. Awmi, llapantsikmi confiakuypaq nunatanö reqimänataqa munantsik. Tsënö reqimänapaq imanö kanqantsik yanapamänapaq kaqpita, pitsqallapita yachakurishun.

12. Kuyakoq nuna imanir confiakuypaq kanqanta willakaramuy.

¹² Kuyakoq kaqqa, confiakuypaq nunam. Jesusqa, Jehoväta y nuna mayintsikta kuyanapaq mas precisaq mandamientukuna kanqantam nirqan (Mat. 22:37-39). Jehoväqa, pita reqinqantsikpitapis mas confiakuypaqmi, y pëta kuyarmi pënö këta munantsik. Këllaman pensarishun: wawqi panintsikkunata kuyarmi, willamanqantsikkunataqa cuentakuntsiktsu. Ama llakitsinampaq kaqta o penqakatsinampaq kaqkunataqa, ni imatapis willakushuntsu (Juan 15:12).

13. ¿Imanötan humildi kanqantsik confiakuypaq kanapaq yanapamantsik?

¹³ Humildi kanqantsikqa confiakuypaq kanapaqmi yanapamäshun. Humildi wawqi o paniqa manam ima noticiatapis punta puntata willakuyta procurantsu (Filip. 2:3). Jina manam willakuyta mana puëdinqanta musyanqanta nirtsu parlar purin. Y humildi karqa, Bibliachö ni publicacionnintsikkunachö mana entienditsikunqankunapaq imata pensanqantsikta parlartsu manam purintsik.

14. ¿Imanötan tantiyaq kanqantsikqa confiakuypaq kanapaq yanapamantsik?

¹⁴ Tantiyakoq kanqanmi juk wawqita o panitaqa, imë ‘upällalla kakunampaq’ y imë ‘parlakunampaq’ yanapanqa (Ecl. 3:7). Wakin markakunachöqa, kënömi niyan: “Palabrakunaqa pläta metal cuentam y upälla kakuyqa öru metal cuentam”. Tsëqa, juk kutikunachö upällalla kakuy mas alli kanqan ninanmi. Tsëchi Bibliachöqa, Proverbius 11:12 kënö nin: “Alli pensëta yachaq nunaqa upällam kakun”. Problëmakuna kaptin juk congregacionkunachöpis yanapakunampaq mañayanqan alli yachaq anciänupita parlarishun. Juk anciänum pëpaq kënö nin: “Pëqa manam juk congregacionkunachö rikanqan problëmakunapita parlantsu”. Tsë anciänu tsënö alli tantiyaq kanqampitam, congregacionninchö wakin anciänukunaqa respetayan. Pëkunaqa, mana willakunampaq kaq asuntukunapita mana cuentakunampaq kaqta segürum këkäyan.

15. Wakinkuna noqantsikman confiakuyänampaq honrädu kanqantsik imanö yanapamanqantsikpita willakaramuy.

¹⁵ Honrädu kanqantsikpis confiakuypaq kanapaqmi yanapamantsik. Honrädu kaqkuna rasumpa kaqllata parlakuyaptinmi, pëkunaman confiakuyqa fäcil-lla (Efes. 4:25; Heb. 13:18). Këllaman pensarishun: reunionkunachö juk wawqi mas alli yachatsikuyta munanman. Y tsërëkur, yachatsikunqanta wiyanampaq y imachö pishipanqanta ninampaq juk amïgunta mañakuyta munanman. ¿Pitataq yanapanampaq mañakunqa? ¿Allilla yachatsikunqanta neq kaqtaku o shumaqllapa imachö pishipanqanta ninampaq kaqtaku? Yanapanampaq pita mañakunampaq kaqqa clärum  këkan. Bibliachömi kënö nin: “Pitapis kuyarnin upälla kakunqëkipitaqa, correginqëkim mas alliqa. Rasumpa alli amïguqa mana gustashuptikipis corregishunkim” (Prov. 27:5, 6). Amïguntsik corregimanqantsikta chaskikuyqa, qallananllachöqa manam fäciltsu kanman, peru tsëkunata wiyakunqantsikqa, tiempuwanqa kikintsikpa biennintsikpaqmi kanqa.

16. Proverbius 10:19 ninqannö, ¿imanirtan controlakuyta yachanapaq kallpachakushwan?

¹⁶ Wakinkuna noqantsikman confiakuyänampaqqa, controlakuytam yachanantsik. Tsëqa, mana willakunapaq kaqta mana cuentakunapaqmi yanapamäshun (leyi Proverbius 10:19). Parlanapaq Internet-ta utilizanqantsik höram, controlakuyta o mana controlakuyta yachanqantsikta rikätsikunqa. Alliraq pensëkur imatapis mana qellqarqa, mana willakunantsikpaq kaqtam mëtsikaqta musyaratsishwan. Manam qellqanqantsikta wakinkuna imanö utilizäyänampaq kaqta ni pitapis mana allichö quedatsinampaq kaqta controlëta puëdishuntsu. Y controlakuyta yachanqantsikqa, chikimaqnintsikkuna imatapis tapupämashqa wawqi panintsikkunata peligruman mana churanapaqmi yanapamäshun. Y itsa tsëqa pasakunman Diospita libri yachatsikunantsikta o michämanqantsik nacionchö wawqi panintsikkunapaq policïakuna tapupämashqam. Tsëkuna pasakuptinqa, kë consëjuta wiyakunqantsikmi yanapamäshun: “Llutankunata mana parlanäpaqmi shimïman bozalta churaq cuenta upälla kakushaq” (Sal. 39:1). Familiantsikpaq, amïguntsikkunapaq, wawqi panintsikkunapaq y llapan nunakunapaqmi confiakuypaq nunakuna kanantsik. Y tsëpaqqa, controlakuytam yachanantsik.

17. ¿Imatataq llapantsikpis rurashwan wawqi panintsikkunawan confianakunapaq?

¹⁷ Kuyanakoq y confianakoq wawqi panintsikkunawan juk familianölla kanapaq Jehovä akramanqantsikpitam alläpa agradecikuntsik. Wawqi panintsikkuna confiakamarnintsik sïguiyänampaqqa, kallpachakurninmi sïguinantsik. Llapantsikpis kuyakoq, humildi, tantiyaq, honrädu kashqa y controlakunapaq kallpachakurqa, wawqi panintsikkunawan confianakunapaqmi yanapakuykantsik. Jehovä Diosnintsiknö këta procurashun y confiakuypaq kanqantsikta rikätsikurnin sïguishun.