1. ¿Imanirtan kë munduchö nunakuna pimampis confiakuyta mana musyayanqampita espantakuntsiktsu?

 SATANASPA kë mundunchöqa, manam nunakunaqa pimampis confiakuyta musyayantsu. Jatun emprësayoq nunakuna, polïticukuna y religionkunata dirigeq nunakuna mana allikunata ruraqta rikarmi confiakuyantsu. Y tsënö ruraqllatam amïgunkunata, vecïnunkunata y hasta familiankunatapis rikäyan. Y tsëkuna pasakunqampitaqa, manam espantakuntsiktsu. ‘Ushanan tiempuchö’ nunakuna jukkunata dejaq, calumniakoq y traicionakoq kayänampaq kaqtam Bibliachöqa nishqana karqan. Tsë nunakunaqa, kë munduta gobernaq Satanas mana confiakuypaq kanqannöllam kayan (2 Tim. 3:1-4; 2 Cor. 4:4).

2. (1) ¿Pimantan chipyëpa confiakuyta puëdintsik? (2) ¿Ima tapukuymantan itsa pipis pensanman?

² Peru Diosta sirweqkunaqa, Jehoväman chipyëpa confiakuyta puëdinqantsiktam musyantsik (Jer. 17:7, 8). Pë alläpa kuyamanqantsikta y amïgunkunata mana dejarinampaq kaqtam següru këkantsik (Sal. 9:10). Jina noqantsikrëkur wanushqa kaptinmi, Jesucristumampis confiakuyta puëdintsik (1 Pëd. 3:18). Y vïdantsikchö yanapamashqa kaptintsikmi, Bibliachö këkaq consëjukunamampis confiakuyta puëdinqantsikta musyantsik (2 Tim. 3:16, 17). Jehoväman, Jesusman y Bibliachö këkaq consëjukunaman confiakuyta puëdinqantsiktaqa segürum këkantsik. Itsa pipis kënö pensanman: “Peru wawqi panintsikkunamanqa, ¿rasumpaku imëpis confiakuyta puëdishwan?”. Awmi nirqa, imanir confiakuypaq kayanqanta rikärishun.

3. ¿Imatataq Jehovä permitimarquntsik? (Marcus 10:29, 30).

³ Jehoväqa entëru Patsachö pëta sirweqkunawan juk familianölla kanapaqmi permitimarquntsik. Tsërëkurmi, mëtsika bendicionkunata chaskintsik (leyi Marcus 10:29, 30). Entëru Patsachömi, noqantsiknölla Jehoväta kuyaq y mandakunqankunata respetaq wawqi panikunayoq kantsik. Itsa parlanqantsik idiöma, costumbrintsikkuna y imanö vistikunqantsikpis jukläya kanman, peru wawqi panintsikkunataqa reqirirllam kuyar qallëkuntsik. Y tsëpitapis masqa, pëkunawan juntu Teytantsik Jehoväta alabë y adorëmi gustamantsik (Sal. 133:1).

4. ¿Imanirtan wawqi panintsikkunata wanantsik?

⁴ Kananqa imëpitapis masmi, juk familianölla kanantsik. Wawqi panintsikkunaqa, höraqa imëka problëmantsikkunachömi yanapamantsik (Rom. 15:1; Gäl. 6:2). Jina Jehoväta sirwir sïguinapaq y pëpa mas alli amïgun kanapaqmi yanapamantsik (1 Tes. 5:11; Heb. 10:23-25). Satanaspa y mana alli mundumpa contran churakänapaq yanapamaqnintsik wawqi panintsikkuna mana kaptinqa, llakikuypaqchi kanman. Satanas y pëpa makinchö këkaqkunaqa, ichikllachönam Diosta sirweqkunata ushakätsita munayanqa. Tsë witsankunaqa, wawqi panintsikkuna läduntsikchö këkäyanqampitam agradecikushun.

5. ¿Imanirtan wakinkunaqa wawqi panikunaman confiakuyta mantsayan?

⁵ Tsënö kaptimpis, itsa wakinqa wawqi panintsikkunaman confiakuytaqa mantsayan. ¿Imanir-raq mantsayan? Itsa imatapis willayanqanta jukchö parlashqa kayaptin. O itsa änikurir mana cumplishqa kayaptin. O imatapis ninqanwan o ruranqanwan, juk wawqi o pani llakitsishqa kayaptin. Tsëqa, ¿imatan yanapamäshun wawqi panintsikkunaman mas confiakunapaq?

6. ¿Imanötan kuyakoq kanqantsikqa wawqi panintsikkunaman mas confiakunapaq yanapamantsik? (1 Corintius 13:4-8).

⁶ Pitapis kuyarmi, pëmanqa confiakuntsik. 1 Corintius librupa 13 kaq capïtulunchömi, kuyakoq nuna imanö kanqanta rikätsikun. Tsëmi, pimampis mas confiakunapaq o pëman yapë confiakur qallanapaq yanapamäshun (leyi 1 Corintius 13:4-8). Këllaman pensarishun: chusku kaq versïculuchömi, ‘kuyakoqqa pacienciayoq y llakipäkoq’ kanqanta nin. Jutsata rurashqapis, Jehoväqa pacienciawanmi tratamantsik. Tsëmi imatapis niyanqanwan o rurayanqanwan wawqi panintsikkuna cöleratsimashqa o llakitsimashqapis, pacienciawan tratanantsik. Pitsqa kaq versïculuchönam, kuyakoq nunaqa “rastsu o sastsu” cölerakunqanta y ‘mana allita rurayanqanman mana yarparäkunqanta’ nin. Tsëmi wawqi panintsikkuna mana allita ruramanqantsiktaqa yarparäkushwantsu. Eclesiastes 7:9 textuchömi, imapitapis jinan höra mana cölerakunapaq nimantsik. Tsëpa rantinqa, Efesius 4:26 kënö ninqantam wiyakunantsik: “Ama cölerashqallaraq këkäyaptiki inti o rupay jeqarkutsuntsu”.

7. ¿Imanötan Mateu 7:1 a 5 ninqanchö consëjukuna wawqi panintsikkunaman mas confiakunapaq yanapamantsik?

⁷ Jina wawqi panintsikkunata Jehovä rikanqannö rikanqantsikmi, pëkunaman mas confiakunapaq yanapamäshun. Pëqa alläpam pëkunata kuyan y manam jutsata rurayanqanta yarparäkuntsu. Tsënöllam noqantsikpis, ima mana allita ruramanqantsiktapis yarparäkushwantsu (Sal. 130:3). Pantayanqankunallata rikaräkunantsikpa rantinqa, imakunachö alli kayanqanta y alliyarnin imanö kayänampaq kaqmanmi pensashwan (leyi Mateu 7:1-5). Kuyakoqqa ‘llapanta creiptinmi’, imatapis mana alliman yarpëkur mana rurashqa kayanqantaqa pensantsiktsu (1 Cor. 13:7). Tsënö nirpis, Jehoväqa manam pimampis llutalla confiakunapaqtsu nikämantsik, sinöqa confiakuypaq kayanqanta rikätsimashqantsik kaqkunallamanmi. b

8. ¿Imatataq rurankiman wakinkunaman mas confiakunëkipaq?

⁸ Manam pimampis rasllaqa confiakuntsiktsu. ¿Imatataq rurankiman wakinkunaman mas confiakunëkipaq? Alli reqita procurë. Reunionkunachö pëkunawan parlë. Diospita juntu yachatsikuyë. Pacienciawan tratë y confiakuypaqnö kayanqanta rikätsikuyänampaq permiti. Pitapis alliraq mana reqirqa, ama vïdëkipita willëtsu. Peru tsë nunata reqinqëkimannö mas yachanarqa, itsa imanö këkanqëkita willankiman (Lüc. 16:10). Peru ¿imatataq rurankiman confiakunqëki wawqi o pani traicionashuptikiqa? Mana confiakuypaq kanqanta ninëkipa rantinqa, ichik alliyärinanta shuyäri. Y ama wakinkuna rurayanqampitaqa llapankunaman confiakuyta dejëtsu. Tsëpaqqa, Jehoväta sirweq wakin nunakunata traicionayashqa o mana alli tratayashqa kayaptimpis, wakinkunaman confiakur sïguiyanqampita Bibliachö yachakunqëkim yanapashunki.

9. (1) Jehoväpita chaskishqa carguyoq nunakuna jutsata rurëkäyaptimpis, ¿imatataq Äna rurarqan? (2) ¿Imatataq Änapita yachakunki? (Dibüjuta rikäri).

⁹ ¿Carguyoq mëqan wawqipis ruranqanwan llakitsishurqunkiku? Tsënö pasashqa kaptikiqa, Änapita yachakunqëkim yanapashunki. Pë kawanqan witsanqa, Israel nacionchöqa Elïmi sacerdötikunapa mandaqnin karqan. Sacerdöti karpis, wamrankunaqa jukwan jukwanmi kakuyaq. Y tsëkunata rikarpis, Elïqa  manam correginampaq ni imatapis ruraqtsu. Tsënö karpis, Jehoväqa manam Elïta sacerdötikunata mandaq kënimpita rastsu jorqarirqan. ¿Imatataq Äna rurarqan? Sacerdötikunapa mandaqnin karnin Elï sïguiptimpis, manam Jehoväta adoranampaq carpa wayiman ëwëtaqa dejarqantsu. Juk kutichö alläpa yarpachakurnin Jehoväman mañakuykaptinmi, machashqa këkanqanta pensar Elïqa qayapëpa parlaparqan (1 Sam. 1:12-16). Änaqa, ollqu wamrayoq karqa Jehoväta sirwinampaq carpa wayiman apanampaqmi Jehoväta änishqa karqan. Y Elïpa mandädunchö kanampaq kaqta musyarpis, änikunqantaqa cumplirqanmi (1 Sam. 1:11). ¿Elïpa wamrankunaqa corregipaqku këkäyarqan? Awmi, y Jehoväqa tiempunchömi tsëta rurarqan (1 Sam. 4:17). Y tsëyaqqa, Änatam permitirqan ollqu wamrayoq kanampaq y pëpa jutinmi Samuel karqan (1 Sam. 1:17-20).

10. Traicionëkäyaptimpis, ¿imanötan Davidqa wakinkunaman confiakuyta mana dejanqanta rikätsikurqan?

¹⁰ ¿Imëllapis juk amïguyki traicionashurqunkiku? Tsëqa rey David imapa pasanqanman pensari. Rey këninta tsurin Absalon qochita munaptinmi, Davidpa amïgun Ahitofelqa Absalonta yanaparqan. Davidqa alläpachi llakikurqan tsurin y amïgun pëpa contran churakäyaptinqa. Peru tsërëkurqa, pëqa manam wakinkunaman confiakuyta dejarqantsu. Pëqa contranchö churakaqkunata mana yanapaq Husaï amïgunmanmi confiakurnin sïguirqan. Y Husaïqa, Davidta yanapëta munarmi hasta vïdantapis peligruman churarqan (2 Sam. 17:1-16).

11. ¿Imanötan Nabalpa juk sirweqnin wakinkunaman confiakunqanta rikätsikurqan?

¹¹ Jina Israel nacionchö alläpa kapoqyoq Nabal jutiyoq nunapa juk sirweqninman pensari. Nabalpa sirweqninkunatam David y pëpa yanapaqnin nunakuna cuidayarqan. Tsëpita tiempuwanqa, yanapaqnin nunakunapaqmi Davidqa Nabalta mikuyta mañakurqan. Peru mikuyänampaq imanllapis qarëta mana munaptinmi, Davidqa alläpa cölerakurnin Nabalpa wayinchö këkaq llapan ollqukunata wanutsinampaq nirqan. Nabalpa warmin Abigailtam sirweqninkunapita juk nuna, Davidta Nabal imanö tratashqa kanqanta y pë imata ruranampaq churapakashqa kanqanta  willarqan. Wanïta o wañuyta mantsar qeshpir ëwakunampa rantinmi, tsë asuntuta Abigail altsanampaq kaqman confiakurqan. Pëtaqa llapankunam yachaq warmitanö reqiyaq. Y pëman confiakunqanqa, allipaqmi karqan. Abigailqa mana mantsakushpam David kaqman ëwarqan y pitapis mana wanutsinampaqmi änitsirqan (1 Sam. 25:2-35). Y Abigailqa, David alli nuna kanqanmanmi confiakurqan.

12. Pantaq kayaptimpis, ¿imanötan Jesusqa qateqninkunaman confiakunqanta rikätsikurqan?

¹² Pantaq nunakuna kayaptimpis, Jesusqa qateqninkunamanmi confiakurqan (Juan 15:15, 16). Jesus gobernar qallëkamuptin lädunkunachö Santiäguwan Juan täkuyänampaq mañakuyaptinqa, Jehoväta imarëkur sirwiyanqanta o qateqninkuna manana kayänampaq kaqtaqa Jesusqa manam nirqantsu (Mar. 10:35-40). Y prësuyanqan paqasqa, llapan qateqninkunam dejarir ëwakuyarqan (Mat. 26:56). Peru Jesusqa manam pëkunaman confiakuyta dejarqantsu. Y pantaq kayanqanta musyarpis, ‘wanukunqanyaqmi’ kuyarqan (Juan 13:1). Y kawarirkamurqa, mana dejëpa qateq 11 apostolninkunatam Diospita yachatsikur sïguiyänampaq y üsha cuenta qateqninkunata cuidayänampaq nirqan (Mat. 28:19, 20; Juan 21:15-17). Y pëkunaman confiakunqanqa, allipaqmi karqan. Pantaq karpis, kë Patsachö kawayanqanyaqqa, llapankunam Jehoväta sirwir sïguiyarqan. Rikanqantsiknömi Äna, David, Nabalpa juk sirweqnin, Abigail y Jesus, pantaq nunakunaman confiakuyarqan. Tsëmi noqantsikpis pëkunanölla ruranapaq kallpachakunantsik.

13. ¿Imanir-raq wakinkunaman confiakuyqa fäciltsu kanman?

¹³ ¿Pitapis mana willakunampaq ninqantsikta confiakunqantsik pani o wawqi wakinkunata willashqa kanqanta wiyarquntsikku? Pipis traicionamashqaqa, alläpam llakikuntsik. Juk kutim, wakinkunata mana willanampaq kaqta juk pani juk anciänuta willarqan. Waränin junaqnam, tsë anciänupa warmin tsë panita shumaq parlapänampaq qayarqan. Tsëqa rikätsikurqan, qowan willashqa kanqantam. Tsënö pasakunqampitam, tsë paniqa tsë anciänuman confiakurqannatsu. Peru tsë paniqa, juk anciänutam yanapanampaq mañakurqan y pëmi anciänukunaman yapë confiakur qallanampaq yanaparqan.

14. ¿Imatan juk wawqita yanaparqan anciänukunaman yapë confiakur qallanampaq?

¹⁴ Juk wawqim, mana confiakuypaqtanö rikanqan ishkaq anciänukunawan atska tiempupa cölerashqa këkarqan. Peru tsëpitaqa, alläpa respetanqan y kuyanqan wawqi kënö nishqa kanqantam yarpärirqan: “Chikimaqnintsikqa Satanasmi, manam wawqi panintsikkunatsu”. Tsë wawqiqa, tsë palabrakunaman yarpachakurmi Jehoväman mañakurqan. Y tiempuwanmi, tsë ishkan anciänukunawan problëmankunata altsarqan.

15. ¿Imanirtan wawqi panintsikkunamanqa unëtaraq yapë confiakuntsik? Grete pasanqanta willakaramuy.

¹⁵ ¿Imëllapis congregacionchö chaskinqëki carguta dejarqunkiku? Tsënö kashqa kaptinqa, alläpachi llakikurqëki. Gretewan mamänin imapa pasayanqanta rikärishun. Tsë ishkan panikunaqa, Alemania nacionchö näzi gobiernu Diospita yachakunqantsikta y yachatsikunqantsikta michäkunqan witsanmi, Jehoväta mana dejëpa sirwiyarqan. Grete panitaqa Täpakoq revistakunapita copiakunata rurarnin yanapakunampaqmi niyarqan. Peru tsëpitam, wawqi panikunaqa Jehoväta sirweqkunapa contran Gretepa teytan këkanqanta musyariyarqan. Tsëmi Jehoväpa testïgunkuna pikuna kayanqanta Gretepa teytan willakunanta mantsar, Täpakoq revistata manana copianampaq niyarqan. Peru Greteqa maskunaparan pasarqan. Ishkë Kaq Jatun Guërra witsanqa, manam pëta ni mamäninta  revistankuna makyayaqtsu ni cällichö rikarpis saludayaqtsu. Tsëta rurayanqanqa, Greteta alläpam llakitsirqan y wawqi panikunata perdonanampaq y pëkunaman yapë confiakunampaqqa atska tiempuran pasarqan. Mas watakuna pasariptinqa, pëkunata Jehovä perdonashqa kanqantam entiendirqan y pëpis tsënö ruranampaqmi kallpachakurqan. c

16. ¿Imanirtan wakinkunaman confiakunantsikpaq kallpachakushwan?

¹⁶ Qepa kaq pärrafukunachö wawqi panintsikkuna willakuyanqannöpa pasashqa karqa, wawqi panikunaman yapë confiakur sïguinëkipaq kallpachakuy. Itsa unëtaraq yapë confiakunki, peru allipaqmi kanqa. Këllaman pensarishun: ima mikuypis dañëkamashqaqa, yapëpaqqa cuidakuntsikmi, peru manam tsërëkurtsu mikuytaqa dejarintsik. Ama juk wawqi o pani traicionamashqa kaptintsikqa, llapan wawqi panintsikkunaman confiakuyta dejarishuntsu. Yarpäshun, pëkunapis noqantsiknö pantareqmi kayan. Pëkunaman yapë confiakur qallashqaqa, mas kushishqam kawakushun y congregacionchö yamë kawakunapaq imanö yanapakunapaq kaqtam masqa rikäshun.

17. (1) ¿Imanirtan wakinkunaman confiakunapaq kallpachakunantsik? (2) ¿Imatataq qateqnin kaqchö yachakushun?

¹⁷ Satanaspa mundunchö nunakunaqa, manam pimampis confiakuyantsu. Peru Diosta sirweqkunaqa, juk familianölla kuyanakurmi confianakuntsik y kushishqa kawakuntsik. Tsënö kanqantsikmi, shamoq tiempuchö imëka mana allikuna pasakuptin yanapamäshun. Peru ¿imatataq rurashwan pipis traicionamashqa kanqantsikrëkur llakishqa këkarqa? Imatapis Jehovä rikanqannö rikarnin, Bibliachö këkaq consëjukunata wiyakurnin, wawqi panintsikkunata kuyanapaq kallpachakurnin y Bibliachö willakunqan nunakunapita yachakurmi, traicionamaqnintsik wawqi panikunaman yapë confiakunapaq kallpachakunantsik. Tsëta rurashqaqa, ‘wawqintsikpitapis mas kuyakoq’ mëtsikaq amïgukunayoqmi kashun (Prov. 18:24). Peru manam wakinkunallamantsu confiakunantsik, noqantsiktapis confiakuypaqtanö rikämänapaqmi kallpachakunantsik. Qateqnin kaqchömi, noqantsikman wakinkuna confiakuyänampaq imata ruranapaq kaqta yachakushun.