1 Corintius 15:8 ninqanchömi, Pablu kënö nirqan: “Ultimutanam manaraq killanchö yurishqatanö noqata yuripumarqan”. Këchöqa, ciëluchö Jesus këkaqta suëñïninchönö rikashqa kanqampaqmi Pabluqa parlëkarqan. Tsëchö ninqantaqa, ciëluchö kawayänampaq nunakuna kawariyämunampaq dispunishqa tiempupaq mëtsika watakunaraq pishikaptin, imëka yurikunampaq o ciëluchö kawanampaq kawaritsimushqa kanampaq permitishqa cuenta kashqa kanqantam, qepa watakunaqa entiendishqa karqantsik. Peru tsë versïculuta maslla estudiarmi, juknöpa entiendinapaq kaqta cuentata qokuntsik.

Awmi, apostol Pabluqa cristiänu këman tikranampaq ima pasakushqa kanqampaqmi parlëkarqan. Peru ¿ima nitataq munëkarqan ‘manaraq killanchö yurishqa’ cuenta kanqampaq parlarqa? Itsapis imapaq parlëkanqampita kimallata rikärishun.

Illaqpitam cristiänu këman chärirqan. Killanchö mana yurikoq wamraqa illaqpitam yuririn. Damascu markachö cristiänukunata chikir sufritsinampaq ëwëkaptin Jesus kawarimushqatana suëñïninchönö rikëtaqa, Sauluqa manam ni ichikllapis pensarqantsu. Tsëpita tiempuwanqa, Saulutaqa Pablu nirnam reqiyarqan. Cristiänu këman chanqampitaqa, manam Pablullatsu espantakurqan, sinöqa chikir sufritsinampaq Damascuchö këkaq cristiänukunapis espantakuyarqanmi. Jina suëñïninchönö Jesusta tsëpin rikanqampitam juk ishkë junaqkunapa imatapis rikëta puëdirqantsu (Hëch. 9:1-9, 17-19).

“Manana tiempunchömi” cristiänu këman charqan. Griëgu idiömachö ‘manaraq killanchö yurishqa’ neq palabrakunataqa, “manana tiempunchö yurishqa” nirpis entiendikanmanmi. Traducción Kadosh Israelita Mesiánica de estudio Bibliachömi, tsë palabrakunata kënö nir tumatsiyashqa: “Manana tiempüchömi yurikurqä”. Cristiänu këman Pablu chanqanchöqa, Jesusqa ciëlutanam kutikushqa karqan. Pabluqa manam qepa kaq versïculukunachö parlanqampaq nunakunanötsu kawarirkamur ciëluta manaraq kutikuptin Jesusta rikashqa karqan (1 Cor. 15:4-8). ‘Manana tiempunchö’ rikaq cuentam, yuripunqanchö Jesusta Pablu rikarqan.

Mana alabakurllam kikimpaq parlëkarqan. Wakin estudiösu nunakunaqa niyan, Pabluqa kë versïculuchöqa kikimpaq imëka despreciakuykaqnö parlëkanqantam. Tsëman pensëkur tsënö qellqashqa kaptinqa, itsa apostol kanampaqnö mana kanqanta nikarqan. Awmi, pëqa kënöpis nirqanmi: “Apostolkunachöqa mana kaqllam kä, y Diospa congregacionninchö kaqkunata imëkata rurar sufritsishqa karmi, apostolnö reqishqa kanäpaqnötsu kä. Peru Teyta Dios noqawan alläpa alli kanqanrëkurmi kanan kanqäqa kä” (1 Cor. 15:9, 10).

Tsëchi itsa Pabluqa, manapis pensashqa këkaptin Jesus yuripunqampaq, illaqpita cristiänu këman chanqampaq o Jesusta suëñïninchönö rikänampaqnö mana kashqa kanqampaq parlëkarqan. Imanö kashqa kaptimpis, suëñïninchönö rikanqantaqa manam ni imëpis qonqarqantsu. Jesus kawarimushqa kanqantaqa segürum këkarqan. Tsëmi Jesus kawarimunqampaq wakinkunata yachatsirqa, tsëpin Jesus yuripunqampaq imëpis parlaq (Hëch. 22:6-11; 26:13-18).