1. ¿Imanötan Pëdru sientikurqan mëtsika pescädukunata tsaririr?

 PËDRUWAN yanaqinkunaqa entëru paqasmi pescäduta tsariyänampaq alli trabajashqa kayarqan, y manam ni jukllëllatapis tsarishqatsu kayarqan. Peru Jesusmi Pëdruta kënö nirqan: “Mas hondu kaqman yëkur pescayänëkipaq mällëkikunata jitayë” (Lüc. 5:4). Mana tsariyänampaq kaqta pensarpis, Pëdruqa Jesus ninqantam cäsukurqan. Mëtsika pescädutam tsariyarqan, hasta mällankunapis rachirmi qallëkurqan. Milagru kanqanta cuentata qokurmi, Pëdruwan yanaqinkunaqa ‘alläpa espantakuyarqan’. Y Pëdrum Jesusta kënö nirqan: “Noqapita witikullë Teytë, noqaqa jutsa ruraqmi kallä” (Lüc. 5:6-9). Capazchi Pëdruqa pensarqan Jesuspa lädunchö këllatapis mana merecinqanta.

2. ¿Imanötan yanapamantsik Pëdru imanö kanqampita yachakunqantsik?

² Pëdruqa rasun kaqtam nikarqan, pëqa ‘jutsa ruraq’ nunam karqan. Bibliam willakun alliraq mana pensarnin imatapis parlanqanta o ruranqanta y tsëpita arrepentikunqanta. ¿Qampis Pëdrunöku sientikunki? ¿Imanö kënikita cambiëta munëkarpis manaku puëdinki o mana alli rurëkunataku dejëta munëkanki? Tsënö karqa, ama qelanäkuritsu. Pëdrupita yachakunqëkim yanapashunki tsë rurëkunata dejanëkipaq. ¿Imanirtan Diosnintsikqa Palabranman qellqatsimurqan Pëdru imanö kanqanta? Ruranqankunapita yachakunantsikta munarmi (2 Tim. 3:16, 17). Pëdruqa noqantsiknö jutsa ruraq y pantaq nunam karqan. Y pëpita yachakurninmi cuentata qokuntsik, Jehoväqa llapantapis  allillata ruranantsikta mana shuyaranqanta. Jehoväqa valoran mana alli munëkunata o rurëkunata dejanantsikpaq kallpachakunqantsiktam.

3. ¿Imanirtan allita ruranapaq kallpachakur sïguinantsik?

³ Allita ruranantsikpaq kallpachakunqantsikqa alläpam yanapamantsik. Këllaman pensarishun: ima rurëtapis kutin kutin rurarqa, mas alli rurëtam yachakuriyan. Müsica tocaq nunallaman pensarishun. Müsicata alli tocanampaqqa atska watakunaran alli yachakunan. Peru tsë yachakunqan tiempuchöqa mëtsika kutim pantan, hasta yachakushqana këkarpis höra höraqa pantanqaran. Peru tsënö ichik pantanqampita müsica toquëta dejarinampa rantinmi, maslla yachakun. Tsënöllam noqantsikwampis pasanman, ima mana alli rurëtapis o munëtapis dejashqana kanqantsikta pensarpis, höra höraqa rurarishunran. Höraqa alliraq mana pensarmi imatapis parlarintsik o rurarintsik, y tsëpitam llakikuntsik. Peru tsëkunata dejanantsikpaq kallpachakushqaqa, Jehovämi yanapamäshun (1 Pëd. 5:10). Pëdru pasanqanta rikärishun. Jutsata rurashqa këkaptimpis, Jesus llakipanqampita yachakunqantsikmi yanapamäshun imachö pantarnimpis Jehovä Diosnintsikta sirwirnin sïguinapaq.

4. ¿Imanö kanqantataq Pëdru nirqan y imanötan Jesus yanaparqan? (Lücas 5:5-10).

⁴ Bibliaqa manam nintsu, Pëdru imanir “jutsa ruraqmi” kä ninqanta o ima jutsata ruranqanman pensëkanqanta (leyi Lücas 5:5-10). Capazchi alläpa jutsakunata rurëkarqan. Peru Jesusqa cuentatam qokurqan, alläpa mantsakoq kanqanta y kikinmampis mana confiakunqanta. Tsëmi kuyëllapa Pëdruta kënö nirqan: “Ama mantsakënatsu”. Tsënö ninqanmi Pëdrutaqa yanaparqan. Y tiempuwanqa, wawqin Andreswanmi negociunkunata dejarir Jesuspa qepanta ëwayarqan. Tsënöpam atska bendicionkunata chaskiyarqan (Mar. 1:16-18).

5. ¿Ima bendiciontataq Pëdru chaskirqan mantsakuykarpis Jesus invitanqanta chaskikunqampita?

⁵ Pëdruqa Jesucristupa qateqnin karmi imëka milagruta rikarqan. Rikarqanmi qeshyaqkunata alliyätsinqanta, demoniukunata qarqunqanta y wanushqakunata kawaritsinqanta (Mat. 8:14-17; Mar. 5:37, 41, 42). b Tsënöllam Jesustapis gobernëkanqantana rikarqan. Tsëta rikanqanmi yanaparqan Jehoväta mana dejëpa sirwinampaq (Mar. 9:1-8; 2 Pëd. 1:16-18). Pëdruqa manachi pensarqantsu tsëkuna rikëtaqa. ¡Pëdruqa alläpachi kushikurqan mantsakuykarpis Jesuspa qateqnin tikranqampita! Qateqnin  mana tikrarqa, manachi tsë bendicionkunata rikanmantsu karqan.

6. ¿Pëdruqa valienti nunaku tikrarqan?

⁶ Tsë milagrukunata rikashqa y wiyashqa këkarpis, Pëdruqa mantsakoqllaran karqan. Këllaman pensarishun: Diospa Palabran ninqannö sufrinampaq y wanunampaq kaqta Jesus parlaptinmi, Pëdruqa Jesusta qayaparqan (Mar. 8:31-33). Y atska kutim Pëdru y wakin qateqninkunapis pï mas alli kanqampaq plëtuyarqan (Mar. 9:33, 34). Y Jesusta wanutsiyänampaq prësuyanqan paqasmi, Pëdruqa cölerar juk nunapa rinrinta wallurapurqan (Juan 18:10). Tsë paqasllam kima kutipa nirqan Jesusta mana reqinqanta (Mar. 14:66-72). Tsëpitam alläpa llakikurnin waqarqan (Mat. 26:75).

7. Kawariramurqa, ¿imata ruranampaqtan Pëdruta Jesus mandarqan?

⁷ Pëdru alläpa qelanashqa këkaptimpis Jesusqa manam dejarqantsu. Kawariramurmi Pëdruta tapurqan kuyanqanta o mana kuyanqanta y Pëdruqa kuyanqantam nirqan. Tsëmi sirweqninkunata llapan shonqunwan cuidanampaq Jesus mandarqan (Juan 21:15-17). Pëdruqa kushishqam rurarqan. Tsëmi Pentecostes fiesta junaq Jerusalenchö këkarqan, y Diospa santu espïrituntam puntata chaskirqan.

8. ¿Imatataq Pëdru rurarqan Antioquïachö këkar?

⁸ Santu espïrituta chaskishqana këkarpis, Pëdruqa mantsakoqllaran karqan. 36 watachömi, Pëdruqa cläru rikarqan mana judïu këkar Corneliu santu espïrituta chaskinqanta. Tsëwanmi cläru musyarqan, “Teyta Diosqa llapan nunatapis igualpa rikanqanta” y juk nacion nunakunapis congregacionchö këta puëdiyanqanta (Hëch. 10:34, 44, 45). Tsëpita witsëpaqa, imëpis mana rurashqa këkarmi Pëdruqa mana judïu nunakunawan juntu juntu mikur karqan (Gäl. 2:12). Peru wakin judïukunaqa, mana judïu kaqkunawan juntu mikuy mana alli kanqantam pensayaq. Tsënö pensaq judïukuna Antioquïaman chäriyaptinmi, Pëdruqa mana judïu kaq nunakunawan juntakarqannatsu. Capazchi tsë judïukunata ofendita munarqantsu. Tsënö portakunqanta rikarmi, apostol Pabluqa llapankuna jananchö Pëdruta qayaparqan (Gäl. 2:13, 14). Tsënö pantashqa këkarpis, Pëdruqa manam qelanäkurirqantsu. Tsëpa rantinqa, Jehovä Diosnintsiktam sirwirnin sïguirqan. Peru ¿imatan yanaparqan?

9. ¿Imanötan musyantsik Juan 6:68 y 69 ninqanwan Pëdruqa Diosnintsikta mana dejanqanta?

⁹ Pëdruqa manam pantarinqankunapita qelanärir Diosnintsikta dejarqantsu. Juk kutim Jesus parlarqan qateqninkuna mana entiendiyanqankunata (leyi Juan 6:68, 69). Wakin nunakunaqa Jesus ninqanta mana entiendir tapukuyänampa o shuyäriyänampa rantinmi, Jesusta dejarir ëwakuyarqan. Peru Pëdruqa manam ëwakurqantsu. Pëqa llapankuna wiyëkäyaptinmi kënö nirqan: “Qamllataq imëyaqpis kawakuypaqqa parlanki”.

10. ¿Imanötan Jesusqa rikätsikurqan Pëdruman confiakunqanta? (Rikäri dibüjuta).

¹⁰ Jesusqa manam Pëdruta dejarqantsu. Pëqa musyarqanmi, wanutsiyänan paqas Pëdrupis y wakin qateqninkunapis dejarir ëwakuyänampaq kaqta. Tsëta musyëkarmi, Jesusqa Pëdruman confiakurqan qelanashqa këkarpis Jehovä Diosnintsikta sirwita mana dejanampaq kaqta (Lüc. 22:31, 32). Jesusqa clärum musyarqan “nuna allita rurëta munaptimpis” höraqa allita ruranampaq kallpan mana kanqanta (Mar. 14:38). Tsëmi reqinqanta Pëdru negariptimpis Jesusqa dejarqantsu. Kawariramurqa Pëdrutam yuripurqan, capazchi japallanta yuripurqan (Mar. 16:7; Lüc. 24:34; 1 Cor. 15:5). Tsëchi apostol Pëdrutaqa yanaparqan Diosnintsikta sirwirnin sïguinampaq.

11. ¿Imanirtan Jesusqa Pëdruta Jehovä cuidanampaq kaqta nirqan?

 ¹¹ Jesusqa Pëdrutam nirqan, Jehovä imëpis pëta cuidanampaq kaqta. Jesusqa kawariramurmi, yapë milagruta rurarqan Pëdru y wakin apostolkuna mëtsika pescäduta tsariyänampaq (Juan 21:4-6). Tsë milagruta rikarchi Pëdruqa cuentata qokurqan llapan wananqankunata Jehovä mana pishitsinampaq kaqta. Y yarparqanchi ‘Diospa Gobiernunta puntaman’ churayaptinqa, Jehovä cuidanampaq kaqta Jesus ninqanta (Mat. 6:33). Tsëta cläru musyarmi Pëdruqa negociunchö trabajanampa rantin Diosnintsikpita yachatsikur qallëkurqan. 33 wata Pentecostes fiesta junaqmi, mana mantsapakuypa yachatsikurqan y mëtsika mil nunakunam Jesuspa qateqnin tikrayarqan (Hëch. 2:14, 37-41). Tsëpita tiempuwannam samaritänukunata y mana judïu nunakunata mëtsikaqta yanaparqan Jesuspa qateqnin tikrayänampaq (Hëch. 8:14-17; 10:44-48). Pëdrutaqa Jehovämi utilizarqan, mëtsikaq nunakunata yanapanampaq, y pëqa kushishqam yanapakurqan.

12. Mana alli rurëkunata dejanapaq kallpachakuykashqaqa, ¿imanötan Pëdru ruranqan yanapamantsik?

¹² Jehoväqa mas kallpachakunapaqmi yanapamantsik. ¿Unëpanaku mana alli rurëkunata rurarquntsik? Tsëqa manachi fäciltsu kanqa tsë rurëkunata dejanantsik. Capaz pensashwan Pëdru pasanqampitapis mas mana allipa pasëkanqantsikta. Tsënö kaptimpis, kallpachakur sïguinapaqmi Jehoväqa yanapamantsik (Sal. 94:17-19). Juk wawqi pasanqanman pensarishun. Pëqa Diosnintsikta manaraq sirwirqa, mëtsika watapam ollqu mayinwan kakurqan. Tsë rurëta dejashqa karpis, höra höraqa ollqu mayinwan këtam munarin. ¿Imatan yanapan kallpachakur sïguinampaq? Kikinmi kënö nin: “Jehovämi yanapamantsik. Santu espïritunwan Jehovä yanapamaptinmi kallpachakur sïguirqö, y kananyaqpis sirwikä”. Tsëpitanam kënö nin: “Jehovämi permitimashqa sirwinäta [...], y mana allikunata rurar pantëkaptïpis kallpachakur sïguinäpaqmi yanapaman”.

13. ¿Imanötan Pëdru ruranqannölla rurashwan? (Hëchus 4:13, 29, 31; rikäri fötukunata).

¹³ Rikärinqantsiknöpis, Pëdruqa nunakunata mantsarmi mana allikunata rurarqan. Peru Jehoväman mañakurmi valienti tikrarqan (leyi Hëchus 4:13, 29, 31). Noqantsikpis nunakunata mantsëkarpis valienti këta puëdintsikmi. Rikärishun Alemania nacionchö Horst jutiyoq Testïgu jövin pasanqanta. Pëqa nunakunata mantsarmi escuëlanchö  atska kuti “¡Heil, Hitler!” nir saludakurqan. Y teytankunaqa cölerakuyänampa rantinmi, pëwan juntu Jehoväman mañakuyarqan. Teytankuna yanapayaptin y Jehovä yanapaptinmi Horstqa nunakunata mantsarqannatsu. Y tiempu pasariptinmi, kënö nirqan: “Jehoväqa manam imëpis dejamarqantsu”. c

14. ¿Imanötan anciänukuna yanapayanman Jehovä sirwita qelanëkaqkunata?

¹⁴ Jehoväwan Jesusqa manam imëpis dejamäshuntsu. Jesusta reqinqanta Pëdru negarirqa, Jesuspa qateqnin këta o dejaritam decidinan karqan. Peru Jesusqa Jehovämanmi rogakushqa karqan Pëdruta yanapëkunampaq. Tsëpitam Pëdruta nirqan Teytanman pëpaq mañakushqa kanqanta y wakin sirweqninkunata yanapanampaq confiakunqanta (Lüc. 22:31, 32). Tsëta willariptinqa, ¡Pëdruqa alläpachi kushikurqan! Noqantsikpis ima jutsatapis rurarirqa, Jehoväpa sirweqnin këta o dejaritam decidinantsik. Tsë hörakunachö yanapamänantsikpaqqa, Jehoväqa anciänukunatam churamushqa, pëkunam alli kaqta decidinantsikpaq yanapamënintsikta puëdiyan (Efes. 4:8, 11). Paul jutiyoq wawqiqa atska watapanam anciänu y mana allikunapa pasëkaq wawqi panikunata yanapanampaqmi kallpachakun. Juk wawqita o juk panita Jehoväta sirwita dejëkaqtanö rikarqa, Jehoväpita imanö yachakunqanta y sirweqnin kanampaq Jehovä imanö chaskishqa kanqantam yarpatsin. Tsënöllam Jehovä kuyanqanta y imëpis mana dejanampaq kaqtam yarpatsin. Kë anciänuqa clärum rikashqa Jehovä yanapaptin Jehovä sirwita mana dejashqa kayanqanta.

15. ¿Imanötan Pëdruta y Horst-ta pasanqanqa rikätsimantsik Mateu 6:33 ninqan imëpis cumplikanqanta?

¹⁵ Rikärinqantsiknömi, Jehoväqa Pëdruta ni wakin apostolkunatapis dejarqantsu, ni manam  llapan wanayanqankunata faltatsirqantsu. Tsënöllam Diospa voluntäninta puntaman churashqaqa, noqantsiktapis yanapamäshun (Mat. 6:33). Ishkë kaq Jatun Guërra witsan pasariptinmi, Horstqa precursor regular këta munarqan. Peru alläpa waktsa karnin wananqankunata mana tarinampaq kaqta pensarmi, precursor këta mana puëdinampaq kaqta pensarqan. Y ¿imatataq decidirqan? Pëqa decidirqan, congregacionkunata watukaq wawqi congregacionninta watukanqan semänachö llapan junaqkuna yachatsikoq yarqunampaqmi. Peru semäna ushariptinmi, congregacionkunata watukaq wawqiqa, Horst-ta juk sobrita entregarqan. Tsë sobrichöqa atska killakuna precursor këta puëdinampaqmi atska qellë kanaq. Tsëta rikëkurqa, Horstqa alläpam espantakurqan, y manam musyarqantsu tsë qellëta pï qarëkanqanta. Tsëta chaskinqanwanmi cuentata qokurqan Jehovä imëpis cuidanampaq kaqta. Tsëpita patsëqa, Diospa voluntänintam imëpis puntata rurarqan (Mal. 3:10).

16. ¿Imanirtan Pëdru pasanqankunapita y qellqanqan ishkan cartakunapita yachakushwan?

¹⁶ “Noqapita witikullë Teytë” nikaptimpis Jesus mana dejanqampitaqa, ¡Pëdruqa alläpachi kushikurqan! Jesusqa Pëdrutam yanaparnin sïguirqan Jehovä Diosta imëpis mana dejanampaq y cristiänu mayinkunata yanapanampaq. Pëdru yachakunqankunaqa noqantsiktapis yanapamäshunmi. Tsë yachakunqankuna y maskunaqa qellqarëkan, punta cristiänukuna kawayanqan tiempuchö congregacionkunaman cartakunqan ishkan cartakunachömi. Qateqnin kaqchömi, tsë cartakunapita wakin wakinta yachakurishun y imanö yanapamänantsikpaq kaqtam rikäshun.