1, 2. ¿Imanirtan Sansonpa vïdampita yachakushwan?

 SANSONPAQ parlaqta wiyarqa, ¿imanö kanqantataq yarpärinki? Alläpa kallpayoq kanqantachi. Peru Sansonqa alläpa kallpayoq karpis mana allitam decidirqan, y tsëpitam sufrirqan. Tsënö këkaptimpis, Jehoväqa alläpam valorarqan pëman confiakunqampita. Tsëmi Sansonpita yachakunantsikpaq Palabranman qellqatsirqan.

² Jehoväqa Sansonta utilizarqan sirweqnin israelïtakunata salvanampaqmi. Y Sanson wanunqampita mëtsika watakuna pasariptinmi, apostol Pabluta yanaparqan markäkoq o yärakoq nunakunapaq qellqaptin Sansonpa jutintapis churanampaq (Heb. 11:32-34). Sansonqa imëka mana allikunapa pasëkarpis, Jehovämanmi confiakurqan. Këchömi yachakushun imakunata ruranqanta, tsëmi yanapamäshun noqantsikpis Jehoväman confiakunapaq.

3. ¿Imata ruranampaqtan Jehoväqa Sansonta akrarqan?

³ Sanson yurinqan witsampaqqa, filisteukunapa poderninchömi israelïtakuna këkäyarqan y filisteukunaqa alläpam sufritsiyarqan (Juëc. 13:1). Tsëmi Jehoväqa ‘filisteu nunakunapita israelïtakunata’ salvanampaq Sansonta akrarqan (Juëc. 13:5). ¡Tsëta rurananqa manachi Sansonpaqqa fäciltsu kanan karqan! Tsëmi Jehoväman confiakunan karqan.

4. ¿Imanötan Sansonta Jehovä yanaparqan? (Juëces 15:14-16).

 ⁴ Juk kutichö, Jehoväman Sanson confiakunqanta rikärishun. Filisteu soldädukunam Judächö këkaq Lehï sitiuta ëwayarqan Sansonta prësuyänampaq. Tsëmi Judä nunakunaqa mantsakarnin Sansonta ishkë mushoq waskakunawan alli watarkur chikeqnin filisteu soldädukunaman apayarqan (Juëc. 15:9-13). Peru poderninwan Jehovä yanapariptinmi, watayanqan waskakunaqa ushakärirqan. Tsëpitanam Sansonqa, “wanushqa ashnupa frescullaraq chakallwanta” tsarirkur filisteu soldädukunata milta wanutsirqan (Leyi Juëces 15:14-16).

5. ¿Imatataq Sanson rurarqan Jehoväman confiakurnin?

⁵ ¿Imanirtan Sansonqa ashnupa chakallwanta pelyarnin utilizarqan? Jehoväman confiakurmi y manam armamantsu. Kë nunaqa makinchö kanqantam utilizarqan Jehoväpa voluntäninta ruranampaq. Tsëmi Jehoväman confiakunqampita filisteukunata vencirqan.

6. ¿Imatataq Sanson ruranqampita yachakuntsik?

⁶ Noqantsiktapis Jehovämi yanapamäshun ruranapaq nimanqantsikkunata alli cumplinapaq. Capaz ruranantsikpaq kaqta sasatanö o ajatanö rikashwan o rurëta yachashwantsu. Peru Jehoväman confiakushqaqa, pëmi mana pensanqantsiknö Sansontanöpis yanapamäshun y kallpayoqta tikratsimäshun (Prov. 16:3).

7. Imata decidirpis, ¿imanirtan Jehovä yanapamänapaq mañakunantsik? Willakaramuy.

⁷ Diospita Yachatsikunantsik Wayikunata y juk wayikunata rurëchö yanapakoq mëtsikaq wawqi panikunam Jehoväman confiakuyan. Unëqa Jehoväpa sirweqninkunam tsë wayikunataqa dibujayaq y rurayaq. Peru Jehoväpa sirweqninkuna mas atskaq tikrayaptinmi, tsë rurëta dejarir juknöpana rurayänan karqan. Tsë obrakunachö yanapakoq wawqikunaqa Jehovämanmi mañakuyarqan juknöpana rurayänampaq. Puntatanö kikinkuna dibujar rurayänampa rantinmi, wayikunata listullatana rantiyaq y altsayaq. Robert  jutiyoq wawqiqa, mëtsë nacionkunachömi atska watakunapa mëtsika obrakunachö yanapakushqa. Pëmi kënö nin: “Juknöpana rurayänäqa manam fäciltsu karqan. Atska watapana puntata rurayanqäpitaqa jukläyam karqan. Peru wawqi panikunaqa listum këkäyarqan juknöpana rurayänampaq, y clärum rikäyarqä juknöpana rurayanqäta Jehovä imanö yanapëkäyämanqanta”. Këwanmi musyantsik Jehoväqa sirweqninkunata pë munanqanta rurayänampaq imëpis yanapëkanqanta. Tsëmi höra höra kënö tapukunantsik: “¿Imata decidirpis Jehovämanraqku puntata mañakü imanö ruranäpaqpis y listuku këkä juknöpana ruranäpaq?”.

8. ¿Imatataq Sanson rurarqan alläpa yakunarnin?

⁸ Sansonqa maskunatam rurarqan. Këllaman pensarishun: juk leontam wanutsirqan, y tsëpitanam Asquelon markaman ëwar treinta filisteukunata wanutsirqan (Juëc. 14:5, 6, 19). Sansonqa musyarqanmi Jehovä yanapaptinlla tsëkunata rurëta puëdinqanta. Jehoväman confiakunqanqa mas cläru musyakärirqan, mil filisteukunata wanuratsir yakunanqanchömi. Yakunarnin yakuta kikin ashinampa rantinmi, Jehoväta mañakurqan (Juëc. 15:18).

9. ¿Imanötan Jehovä contestarqan Sanson mañakunqanta? (Juëces 15:19).

⁹ Jehoväqa milagruta rurarmi yakuta yuritsirqan. “Tsë yakuta upuriptinmi Sansonpaqa kallpan yapë yurirqan” (leyi Juëces 15:19). Tsë pukyuqa Juëces libruta Samuel qellqanqan witsanyaqpis këkarqanllachi. Tsë pukyuta rikarchi israelïtakunaqa yarpäyaq, mana allikunapa pasayanqan höra Jehoväman confiakuyaptinqa pëkunatapis yanapanampaq kaqta.

10. ¿Imatataq ruranantsik Jehovä yanapamänapaq? (Rikäri dibüjutawan fötukunata).

¹⁰ Sansonnömi Jehoväman mañakunantsik. Imata rurëta yacharpis o atska watapana Jehoväta sirwirpis, llapantsikmi Jehovä yanapamänataqa wanantsik. Humildim kanantsik y Jehoväman confiakushqalla ima ruranqantsikpis alli yarqunqantam yarpänantsik. Sansonpaqa kallpan yurirqan Jehovä yuritsinqan yakuta upurkuptinmi. Tsënöllam noqantsikpis, Jehovä yanapamanqantsikta chaskikur y yachatsimanqantsikta cäsukurqa alli firmi kashun (Mat. 11:28).

11. ¿Imanötan Jehovä yanapamanqantsikta provechashwan? Juk wawqiwan warmin rurayanqanta willakaramuy.

¹¹ Rikärishun Rusia nacionpita Alexei jutiyoq wawqi ruranqanta, pëtaqa autoridäkunam sufrikätsiyan. ¿Imatan yanapashqa alli tsarakunampaq? Pëpis y warmimpis manam Jehoväpita yachakuyta dejayashqatsu. Alexeimi kënö nin: “Jehoväpita yachakuytaqa manam dejarqötsu, y Bibliatapis estudiämi y cada junaqmi leyï. Cada qoyam o wärëmi warmïwan cada junaqpaq textuta yachakuyä y Jehoväman mañakuyä”. ¿Imatataq pëkuna rurayanqampita yachakuntsik? Kikintsikman confiakunantsikpa rantinmi, Jehoväman confiakunantsik. Peru tsëpaqqa Jehoväman mas markäkunapaq o yärakunapaqmi Bibliata estudianantsik, Diosnintsikman mañakunantsik, reunionkunaman ëwanantsik y yachatsikoq yarqunantsik. Tsë llapanta rurashqaqa, Jehoväqa bendicimäshunmi y sirwirnin sïguinapaqmi yanapamäshun. Imanömi Sansonta yanaparqan mas kallpayoq kanampaq, tsënömi noqantsiktapis yanapamäshun.

12. ¿Imachötan Sanson pantarqan, y imanirtan tsë ruranqanqa puntata ruranqankunapita jukläya karqan?

¹² Sansonqa noqantsiknö jutsa ruraq nunam karqan, tsëmi höraqa mana allikunata decideq. Juk kutim juezna këkarnin, Jehovä mandanqanta cuentachö mana katsir, “Sorec mayu kuchunchö täkoq Dalïla jutiyoq warmita kuyakurkurqan”, tsëta decidinqampitam sufrirqan (Juëc. 16:4). Peru Dalïlata manaraq reqirqa, Sansonqa casakuyta munarqan juk filistëa warmiwanmi. Y Bibliaqa tsëpaq willakun, ‘Teyta Dios israelïtakunata salvanampaq filisteukunata achäkita ashipëkanqantam’. Y tsëpitanam, Sansonqa filisteukunapa Gäza markankunata ëwar jukwan jukwan kakoq warmipa wayinchö quedakurqan. Y Jehovämi poderninwan Sansonta yanaparqan, filisteukunapa alli següru markankunapa jatun punkunta sutarinampaq (Juëc. 14:1-4; 16:1-3). Peru Dalïlata Sanson kuyakurkuptinqa, manam Jehovä yanaparqantsu. Dalïlaqa capazchi israelïta karqan, y tsëqa manachi yanapakunmantsu karqan filisteukunawan Sanson pelyanampaq.

13. ¿Imanötan Dalïlaqa Sansonta traicionarqan?

¹³ Filisteukunaqa munayarqan Sansonta Dalïla traicionanantam. Tsëmi Dalïlata mëtsika qellëta äniyarqan, y pëqa acuerdum karqan. Peru ¿imanirtan Sansonqa Dalïla traicionëkanqanta cuentata qokurqantsu? ¿Alläpatsuraq kuyakurkurqan? Imanö kaptimpis, Dalïlaqa kutin kutinmi Sansonta tapuparqan alläpa kallpayoq imanir kanqanta, y Sansonqa willarirqanmi. Tsënö willanqampitam Sansonqa juk tiempupa kallpannaq tikrarirqan y Jehoväpis manam yanaparqannatsu (Juëc. 16:16-20).

14. ¿Imachötan Sanson usharqan Dalïlaman confiakunqampita?

 ¹⁴ Jehoväman confiakunampa rantinmi, Sansonqa Dalïlaman confiakurqan y mana allichömi usharqan. Filisteukunam prësurir ishkan nawinkunata oqtirapuyarqan. Tsëpitanam, jatun punkuta sutanqan Gäza markachö carcelarätsiyarqan, y rumi mulinuta tumatsinampaqmi churayarqan. Tsëpitanam filisteukunaqa Dagon diosninkuna Sansonta entregashqa kanqanta pensarnin Dagon santupaq fiestata rurayarqan. Tsëpitanam asikuyänampaq o burlakuyänampaq “Sansonta carcelpita apayarqan” (Juëc. 16:21-25).

15. ¿Imanötan musyantsik Jehoväman Sanson yapë confiakunqanta? (Juëces 16:28-30; rikäri jana qaranchö dibüjuta).

¹⁵ Sansonqa mana allita rurashqa karpis, manam qelanäkurirqantsu. Jehovä mandanqanta cumplita munarmi filisteukunawan pelyëta munarqan (leyi Juëces 16:28-30). Tsëmi Jehoväman kënö nir mañakurqan: “Filisteukunapita vengakunäta permitikamë”. Y Jehoväqa mañakunqanta wiyarmi yapë kallpayoqta tikratsirqan. Tsëmi tsë kutichöqa puntata wanutsinqampitapis masta, filisteukunata Sanson wanutsirqan.

16. ¿Imatataq Sansonpita yachakuntsik?

¹⁶ Sansonqa pantashqa karnimpis, Jehoväpa voluntäninta ruranampaqmi kallpachakurqan. Noqantsikpis capazchi Sansonnö imachöpis pantarishun, y pantanqantsikpita corregimäshun o ima carguchöpis yanapakuyta puëdishunnatsu. Tsënö kaptinqa yarpänantsikmi Jehoväqa yanapamänantsikpaq kaqta (Sal. 103:8-10). Pantashqantsik kaptimpis, Sansontanömi Jehoväqa imëpis valoramäshun y yanapakunatam permitimäshun.

17, 18. ¿Imanötan Michael pasanqan yanapashunki? (Rikäri fötukunata).

¹⁷ Michael jutiyoq jövinta pasanqanta rikärishun. Pëqa siervu ministerial y precursor regularmi karqan, y yanapakurmi alläpa ocupädu këkarqan. Tsënö këkarmi mana allita rurarirqan, y mananam congregacionchö yanapakuyta puëdirqannatsu. Kikinmi kënö nin: “Tsë junaqyaqqa Jehoväta sirwirmi alläpa ocupädu këkarqä. Peru mana allitam rurarirqä y perqachö takakur ishkireq cuentam sientikurqä. Musyarqämi mana allita rurashqa këkaptïpis Jehovä mana dejamänampaq kaqta, peru kënömi yarpachakoq kä: ‘¿Kananqa Jehoväwan yapë amïgu  këta puëdishaqtsuraq y congregacionchöpis yapë yanapakuyta puëdishaqtsuraq?’”.

¹⁸ ¡Michael ruranqanqa allim karqan y manam qelanäkurirqantsu! Kikinmi kënö nin: “Jehoväwan yapë amïgu kanäpaqmi kallpachakurqä. Y tsëpaqqa yanapamarqan llapan shonqüwan seguïdu mañakunqä, Palabranta estudianqä y yachakunqäkunaman pensanqämi”. Tiempuwanqa yapëmi Michaelqa congregacionchö yanapakur qallëkurqan, y kananqa anciänu y precursor regularmi. Kënömi nin: “Wawqi panikuna, y masqa anciänukuna yanapayämanqanwanmi cuentata qokurqä Jehovä kuyëkämanqanllata. Yapëmi limpiu concienciawanna sirwir qallëkurqä. Këta pasanqäwanmi cläru musyä llapan shonqunkunawan arrepentikuyaptinqa, pitapis Jehovä perdonanqanta”. Noqantsikpis Michaelnömi següru kanantsik llapan shonquntsikwan arrepentikushqa, mana allikunata manana rurashqa y pëman confiakushqaqa yanapakunantsikta permitimänapaq y bendicimänapaq kaqta (Sal. 86:5; Prov. 28:13).

19. ¿Imanötan Sanson ruranqampita yachakunqantsik yanapashurqunki?

¹⁹ Këchöqa Sanson ruranqankunapita wakinllatam yachakurquntsik. Pëqa jutsa ruraq nunam karqan y Dalïlata kuyakurkunqampita mana allichö ushashqa karpis, Jehovä sirwitaqa manam dejarqantsu. Y Jehoväpis manam Sansonta dejarqantsu, voluntäninta ruranampaqmi yapë yanaparqan. Jehoväqa Sansonta rikarqan alläpa markäkoq o yärakoq nunatanömi, tsëmi Hebrëus librupa 11 kaq capïtulunman jutinta churayänanta permitirqan. Jehovä yanapamënintsikta munanqanta y yanapamanqantsikta musyarqa alläpam kushikuntsik, y masqa kushikuntsik mana allikunapa pasanqantsik hörakuna yanapamashqam. Tsëmi Sansonnöpis Jehoväman kënö mañakunantsik: “Llapanta Gobernaq Teyta Jehovä, kë kutilla yarpëkallämë kallpä yapë yurinampaq” (Juëc. 16:28).