1, 2. Mushoq Patsata Diosnintsik änikunqan tiempu manaraq chämuptin, ¿imatataq rurashwan?

 JEHOVÄQA änimarquntsik kanan witsan rikanqantsik imëka mana allikunata ushakäratsir, kë Patsata shumaqta tikratsimunampaqmi. Tsëta änimanqantsikpitaqa alläpam agradecikuntsik (2 Pëd. 3:13). Tsë tiempu imë chämunampaq kaqta mana musyarpis, imëka pasakunqankunata rikarmi cuentata qokuntsik ichikllachöna tsë tiempu chäramunampaq kaqta (Mat. 24:32-34, 36; Hëch. 1:7).

² Atska watapana Jehoväta sirwirpis, Jehovä änikunqankunaman maslla markäkunapaqmi o yärakunapaqmi kallpachakunantsik. ¿Imanirtan tsënö nintsik? Alli markäkuykarpis mana cuidakurqa, illaqpitam markäkuyta dejarishwan. Tsëmi apostol Pabluqa nirqan mana markäkuy-yoq këqa, ‘wankumaqnintsik jutsa’ kanqanta (Heb. 12:1). Tsë mana pasamänapaqqa, Shumaq Patsata Jehovä Dios änimanqantsikkunapita mas seguïdu yachakunantsik (Heb. 11:1).

3. ¿Imatataq këchö yachakushun?

³ ¿Imatan yanapamäshun Shumaq Patsata Jehovä änikunqanta cumplimunampaq kaqman confiakunapaq? Tsëpaqqa yanapamäshun: 1) noqantsikrëkur Jesus wanunqanman pensanqantsik, 2) Jehovä poderösu kanqanman pensanqantsik y 3) Diosnintsikpaq ruranqantsikkunata mana dejanqantsikmi. Tsëkunapitam këchö yachakurishun. Tsënöllam yachakushun, Habacucta Jehovä ninqan imanö yanapamanqantsikta. Peru puntataqa yachakurishun, Shumaq Patsata Jehovä änikunqanman markäkunantsik imanir precisanqantam.

 ¿IMANIRTAN ALLI MARKÄKUNANTSIK O YÄRAKUNANTSIK?

4. ¿Imakunata decidinqantsikchötan alli markäkoq o yärakoq kanqantsik rikakunqa?

⁴ Cada junaqmi decidintsik pikunawan amïgu kanantsikpaq, imakunata rurar kushikunantsikpaq, imata estudianantsikpaq, piwan casakunantsikpaq, wamrakuna imata rurayänampaq y imachö trabajanapaq kaqtapis. Tsëkunata decidinqantsikchömi alli markäkoq kanqantsik rikakunqa. Tsëmi kënö tapukunantsik: “¿Kë decidinqäkunaqa rikätsikunku kë mana alli tiempu ushakärinampaq kaqta y Diosnintsik änikunqan Shumaq Patsa chäramunampaq kaqta? ¿O wakin nunakunanöku kë vïda imëyaqpis kanampaq kaqta pensä?” (Mat. 6:19, 20; Lüc. 12:16-21). Diosnintsik Shumaq Patsata änikunqanman alli markäkurqa, imatapis tsëman pensëkurmi decidishun.

5, 6. ¿Imanirtan mana allikunapa pasarninqa alli markäkunantsik o yärakunantsik? Juk igualatsikuywan willakaramuy.

⁵ Tsënöllam kanan tiempuqa imëka mana allikunapa pasantsik: nunakunam chikir qatikachämantsik, mana kachakaq qeshyawanmi qeshyarishwan o mas mana allikunapam pasarishwan. Capaz qallananllachöqa, alli tsarakushwan. Peru mas tiempu kaptinqa, capazchi aguantëta puëdishuntsu y Jehoväta kushishqa sirwita puëdishunnatsu. Tsëmi alli markäkunantsik o yärakunantsik (Rom. 12:12; 1 Pëd. 1:6, 7).

⁶ Imëka mana allikunapa pasarqa, capaz pensarishwan Shumaq Patsata Diosnintsik änimanqantsikta mana cumplinampaq kaqta. ¿Tsënöqa pensashwan markäkuynintsik o yärakuynintsik pishiptintsuraq? Manam. Këllaman pensarishun: tamya tiempu alläpa alalaptinqa, capazchi pensarishwan usya tiempu manana chämunampaq kaqta. Peru tsënö pensashqapis usya tiempuqa chäramunmi. Tsënöllam mana allikunapa pasarnin llakishqa këkarqa pensarishwan Diosnintsik änikunqan Shumaq Patsa mana chämunampaq kaqta. Peru alli markäkurqa o yärakurqa, musyantsikmi änikunqankunata Jehovä cumplimunampaq kaqta (Sal. 94:3, 14, 15; Heb. 6:17-19). Tsënö confiakunqantsikmi yanapamantsik Jehovä Diosnintsikta sirwirnin sïguinapaq.

7. ¿Imapitataq cuidakunantsik?

⁷ Tsënöllam Diosnintsikpita yachatsikunapaqpis pëman alli markäkunantsik o yärakunantsik. Shumaq Patsata Diosnintsik ruramunampaq kaqpita nunakunata parlapashqaqa, pëkunaqa alläpa shumaq kanqanta nirpis manam creiyantsu (Mat. 24:14; Ezeq. 33:32). Peru pëkunanö mana pensanapaqmi cuidakunantsik. Tsëpaqqa, allim markäkunantsik o yärakunantsik. ¿Imatan yanapamäshun? Kimallata rikärishun.

NOQANTSIKRËKUR JESUS WANUNQANMAN PENSË

8, 9. ¿Imanötan yanapamantsik noqantsikrëkur Jesus wanunqanman pensanqantsik?

⁸ Juknöpaqa, mas markäkunapaq o yärakunapaqqa yanapamäshun noqantsikrëkur Jesus wanunqanman pensanqantsikmi. Vïdanwan Jesus pagakunqanwanmi següru këkantsik änikunqankunata Diosnintsik cumplinampaq kaqta. Tsëmi alläpa alli kanman vïdanwan Jesus pagakunampaq imakunata ruranqanman y Jehovä imanir permitinqanman alli pensanantsik. Tsënöpam imëyaqpis alli kawakunantsikpaq Diosnintsik änimanqantsikkunaman maslla confiakushun. ¿Imanirtan següru këkantsik?

⁹ Këllaman pensarishun: Jehoväqa, noqantsikrëkur wanunampaqmi kuyë Tsurinta mandamurqan, tsëmi pëqa jutsannaq nunanö Patsachö yurirqan. Kë Patsachö këkarnam Jesusqa imëkata sufrirqan y noqantsikrëkur wanurqan. Rikanqantsiknömi, Jehoväqa kuyë Tsurimpa vïdanwan pagakushqa. Juk ishkë  watakunalla kushishqa kawanantsikta munarqa, manachi kuyë Tsurimpa vïdanwan pagakunmantsu karqan (Juan 3:16; 1 Pëd. 1:18, 19). Jehoväqa kuyë Tsurimpa vïdanwan pagakushqa karmi, Shumaq Patsachö imëyaqpis kawakunantsikpaq änimanqantsiktaqa cumplimunqa.

JEHOVÄ PODERÖSU KANQANMAN PENSASHUN

10. Efesius 3:20 ninqannö, ¿imatataq Jehovä rurëta puëdin?

¹⁰ Juknöpaqa, Jehovä Diosnintsik änikunqankunaman mas markäkunapaq o yärakunapaq yanapamäshun, Jehovä Diosnintsik poderösu kanqanman pensanqantsikmi. Pëqa poderösu karmi, ima änikunqantapis cumplita puëdin. Capazchi nunakunaqa mana wanuypa imëyaqpis kawakunapaq Diosnintsik änikunqankunataqa creiyanmantsu. Peru Jehoväqa poderösu karmi, nunakuna rurëta mana puëdiyanqankunata änikun. Pëqa Llapanta Puëdeqmi (Job 42:2; Mar. 10:27). ¿Manaku poderösu këkarqa nunakuna rurëta mana puëdiyanqankunata änikunman? (Leyi Efesius 3:20).

11. Nunakuna rurëta mana puëdiyanqankunata Jehovä änikunqanta jukta willakaramuy (rikäri “ Nunakuna rurëta mana puëdiyanqankunata änikurir Jehovä cumplinqan” neq recuadruta).

¹¹ Nunakuna rurëta mana puëdiyanqankunata unë sirweqninkunata Jehovä äninqanman pensarishun. Abrahantawan Säratam änirqan, edäna këkarpis ollqu wamrayoq kayänampaq (Gen. 17:15-17). Y Abrahantam nirqan, pëpa kastankuna Canaan markakunata chaskiyänampaq kaqta. Peru Abrahanpa kastankunaqa mëtsika watapam Egiptuchö esclävu kayarqan. Capazchi wakinkunaqa pensayarqan Jehovä änikunqan mana cumplinampaq kaqta. Tsënö kaptimpis, Jehovä parlanqanqa cumplikarqanmi. Tsëpita mëtsika wata pasariptinnam chakwanna Elisabet-ta, juk ollqu wamrayoq kanampaq kaqta nirqan. Tsënöllam Marïatapis nirqan ollquwan manaraq kashqa këkarpis, Pëpa kuyë Tsurinta qeshpikunampaq kaqta. Tsë llapantaqa Jehovä rurarqan Eden huertachö änikunqanta cumplirmi (Gen. 3:15).

12. ¿Imapita següru kanapaqtan Josuë 23:14 y Isaïas 55:10 y 11 yanapamantsik?

¹² Llapan änikunqankunata Jehovä imanö cumplishqa kanqanman pensarmi musyantsik Jehoväqa poderösu kanqanta. Tsëta musyarmi Shumaq Patsata änimanqantsikta cumplimunampaq kaqmampis maslla markäkuntsik o yärakuntsik (leyi Josuë 23:14; Isaïas 55:10, 11). Tsënö markäkurmi, wakinkunatapis yanapashun Shumaq Patsata Jehovä änikunqanta cumplimunampaq kaqman confiakuyänampaq. Kikin Jehovämi mushoq ciëlupaq y mushoq Patsapaq parlarnin, kënö nirqan: “Tsë ninqäkunata qellqë, tsëkunaqa confiakuypaqmi y rasumpa kaqllam” (Apoc. 21:1, 5).

DIOSNINTSIKPAQ RURANQANTSIKKUNATA AMA DEJASHUNTSU

13. ¿Imanötan reunionkuna yanapamantsik maslla markäkunapaq o yärakunapaq?

¹³ Juknöpaqa, maslla markäkunapaqqa o yärakunapaqqa yanapamantsik Jehovä Diosnintsikpaq ruranqantsikkunata mana dejanqantsikmi. Pensarishun reunionkunallaman. Llapan tiempunwan imëkachö yanapakushqa Anna jutiyoq panim b kënö nin: “Reunionkunaqa barcuta tsaraq anclanömi mas markäkunäpaq o yärakunäpaq yanapaman. Yachatsikamoq turi, yachatsikamuyta alläpa mana yachaptimpis, nimunqankunataqa alkäbum wiyakü, tsëmi yanapaman Biblia ninqankunata maslla entiendinäpaq y maslla markäkunäpaq o yärakunäpaq”. Maslla markäkunapaqqa, reunionkunachö wawqi panintsikkuna parlakayämunqankunapis yanapamantsikmi (Rom. 1:11, 12; 10:17).

14. ¿Imanötan Diosnintsikpita yachatsikunqantsik maslla markäkunapaq yanapamantsik?

¹⁴ Mas markäkunapaqqa o yärakunapaqqa, Diosnintsikpita yachatsikunqantsikpis yanapamantsikmi (Heb. 10:23). 70 watapana Jehoväta sirweq Barbara jutiyoq panim kënö nin: “Diosnintsikpita yachatsikunqämi yanapaman maslla markäkunäpaq. Jehoväpita y änikunqankunapita mas seguïdu parlarqa, masmi Diosnintsik änikunqankunaman markäkü”.

15. ¿Imanötan Bibliapita alli yachakunqantsik mas markäkunapaq yanapamantsik? (Rikäri dibüjukunata).

¹⁵ Mas markäkunapaqqa o yärakunapaqqa, Bibliapita alli yachakunqantsikpis yanapamäshunmi. Bibliapita yachakunampaq tiempunta alli patsätsishqa Susan jutiyoq panim kënö nin: “Domingukunaqa, qateqnin semänachö Täpakoq revistapita yachakunapaq kaqtam preparakü. Lünis y martisnam, semänachö yachakunapaq kaqta preparakü. Y wakin junaqkunanam juk tëmakunapita yachakü”. Tsënö yachakunampaq tiempunta alli patsätsishqa kaptinmi, Susantaqa mas markäkunampaq o yärakunampaq yanapan. Jehoväpa Testïgunkunapa Principal Oficïnanchö mëtsika watapana yanapakoq Irëni jutiyoq panipis, Biblia willakunqankunata alli yachakunqanmi yanapashqa maslla markäkunampaq. Kikinmi kënö nin: “Jehovä willakunqankunaqa llapampis pë ninqannölla cumplikaqta rikarqa, alläpam kushikü”. c

“RASUMPAM CUMPLIKANQA”

16. ¿Imanirtan musyantsik Habacucta Jehovä parlaparninqa noqantsiktapis parlapëkämanqantsikta? (Hebrëus 10:36, 37).

¹⁶ Jehoväpa wakin sirweqninkunaqa mëtsika watakunapanam ushakë chämunanta shuyarëkäyan. Y wakinkunaqa “tsëqa unënam chämunan karqan” niyanmi. Sirweqninkuna tsënö sientikuyanqantaqa Jehovä entiendinmi. Tsëmi willakoqnin Habacucta kënö nirqan: “Revelacionchö qamta rikätsinqäqa tiempunchömi  cumplikanqa, tsë tiempu chämunampaqqa ichikllanam pishin, y rasumpam cumplikanqa. Demoramoqnö kaptimpis, ¡alkäbulla këkë! Tsëkunaqa rasumpam cumplikanqa. ¡Tiempunchömi cumplikanqa!” (Hab. 2:3). Tsënö ninqanwanqa, ¿Habacucllataku nikarqan, o noqantsiktawanku nikämantsik? Jehovä yanapaptinmi, apostol Pabluqa tsë palabrakunawan cristiänu mayinkunata animarqan Shumaq Patsa imë chämunampaq kaqta alkäbu këkäyänampaq (leyi Hebrëus 10:36, 37). Jehovä änikunqankuna mana chämunqanta pensarqa, noqantsikpis yarpänantsikmi Jehovä änikunqanqa cumplikänampaq kaqta. “Tsëkunaqa rasumpam cumplikanqa. ¡Tiempunchömi cumplikanqa!”.

17. ¿Imanötan Habacucta Jehovä consejanqanta juk pani cäsukushqa?

¹⁷ Alkäbulla këkänapaq Jehovä consejakunqantaqa, Diosnintsikpa mëtsika sirweqninkunam mëtsika watapa cäsukuyashqa. Louise jutiyoq paniman pensarishun. Pëqa 1939 watachömi Jehoväta sirwir qallarqan. Y kënömi nin: “Noqaqa pensarqä secundariäta estudiar manaraq ushaptï, Armagedon chämunampaq kaqtam. Peru manam tsëqa pasakurqantsu. Y kananyaq alli tsarakunäpaqqa yanapamashqa Noëpita, Abrahanpita, Josëpita y Jehoväpa wakin sirweqninkunapita yachakunqämi. Pëkunaqa Jehovä änikunqankuna cumplikaqta rikäyänampaqqa shuyäyänanran karqan. Alkäbulla këkanqämi yanapamashqa y wakinkunatapis yanapashqa Jehovä änikunqan Shumaq Patsa ichikllana chämunampaq kaqman confiakunäpaq”. Mëtsika watakunapa Jehoväta sirwishqa kaqkunapis tsënöchi pensayan.

18. ¿Imanötan Jehovä kamanqankuna yanapamantsik Shumaq Patsa kanampaq kaqman confiakunapaq?

¹⁸ Kanan witsan Shumaq Patsachöna mana këkarpis clärum rikantsik estrëllakunata, plantakunata, animalkunata y nunakunata. ¿Imanirtan tsëkunataqa rikantsik? Diosnintsik Jehovä kamashqa kaptinmi (Gen. 1:1, 26, 27). Tsënöllam Jehovä Diosnintsikqa änimanqantsik Shumaq Patsatapis ruramunqa. Tsë witsanqa, mana wanuypam imëyaqpis kawakushun y mananam qeshyashunnatsu. Tsë witsanqa, kanan witsan rikëkanqantsik cösaskunatanömi Shumaq Patsataqa rikäshun (Is. 65:17; Apoc. 21:3, 4).

19. ¿Imatataq ruranantsik mas markäkunapaq o yärakunapaq?

¹⁹ Shumaq Patsachö kawanantsik tiempu manaraq chämunqanyaqqa, Jehovä Diosnintsik änikunqankunaman maslla markäkunapaq o yärakunapaq kallpachakushun. Noqantsikrëkur Jesus wanunqanman y Jehovä poderösu kanqanman pensashun y Diosnintsikpaq ruranqantsikkunata ama dejashuntsu. Tsëkunata rurarqa, ‘markäkur o yärakur y pacienciakur änikuyta chaskeqkunawan’ juntum këkäshun (Heb. 6:11, 12; Rom. 5:5).