1. ¿Mëchötan Jesusqa punta kaq milagruta rurarqan?

 YARPÄRISHUN Diosnintsikpita Jesus yachatsikur qallanqan 29 wataman. Casakoqkuna invitayaptinmi, Jesusqa mamänin Marïawan y wakin qateqninkunawan Canä markata ëwayarqan. Canä markaqa këkan Jesus winanqan Nazaret markapa norti kaq lädunchömi. Marïaqa casakoqkunapa familiankunawanmi amïga karqan y imëkachö yanapakurchi këkarqan. Tsënö këkaptinmi vïnu ushakärirqan. b Capazchi nunakunaqa invitayanqampitapis mas ëwayarqan, y vïnu mana kaptinqa casakoqkunapaq y familiankunapaqpis penqakuypaqchi kanman karqan. Tsëmi Marïaqa wamran kaqta ëwar kënö nirqan: “Manam vïnunkuna kannatsu” (Juan 2:1-3). ¿Imatataq Jesus rurarqan? Milagruta rurarmi yakuta mas alli kaq vïnuman tikraratsirqan (Juan 2:9, 10).

2, 3. (1) ¿Imapaqtan Jesusqa poderninta utilizarqan? (2) ¿Imanötan milagrukunata Jesus ruranqampita yachakunqantsik yanapamäshun?

² Jesusqa mëtsika nunakunata yanapanampaqmi poderninta utilizarqan. c Juk kuti yachatsikunqanchömi, milagruta rurarnin cincu mil nunakunata mikuynin qararqan y juk kutichönam cuatru mil nunakunata. Tsë ishkan kuti milagruta ruranqanchöqa warmikunata y wamrakunata yupashqaqa,  veintisiëti milpitapis mastam nunakunata mikuynin qararqan (Mat. 14:15-21; 15:32-38). Tsë ishkan kutichöqa, qeshyëkaqkunatapis alliyätsirqanmi (Mat. 14:14; 15:30, 31). Nunakunaqa mëraq espantakuyarqan milagruta rurar nunakunata mikuynin qaraptin y qeshyëkaqkunata alliyätsiptin.

³ Milagrukunata Jesus ruranqampitaqa, mëtsikatam yachakuyta puëdintsik. Këchömi maslla markäkunapaq o yärakunapaq tsë milagrukunapita imata yachakunqantsikta pitsqata yachakushun. Tsënöllam yachakushun, Jesusqa humildi kar y llakipäkoq kar milagrukunata ruranqanta, y pënölla humildi y llakipäkoq këtapis yachakushunmi.

4. ¿Imatataq yachakuntsik Jesus ruranqan milagrukunapita?

⁴ Jesus milagrukunata ruranqankunapitaqa, manam Jesus imanö kanqanllatatsu yachakuntsik, sinöqa Teytan imanö kanqantapis yachakuntsikmi. Pëmi Jesustaqa poderninwan yanaparqan milagrukunata ruranampaq. Hëchus 10:38 textum willakun, “santu espïrituwan y poderwan [Jesusta] Teyta Dios imanö akranqampaq y pëwan kaptin allikunata rurar y Diablu sufritsinqan nunakunata alliyätsir wakpa këpa” ëwanqanta. Jehovä imanö sientikunqanta y imanö pensanqantaqa musyantsik, Jesus ruranqankunachö, parlanqankunachö y milagrukunata ruranqankunachömi (Juan 14:9). ¿Imatataq yachakuntsik Jesus ruranqan milagrukunapita? Kimallata rikärishun, tsëmi maslla markäkunapaq o yärakunapaq yanapamäshun.

5. ¿Imanirtan Jesusqa milagrukunata rurarqan? (Mateu 20:30-34).

⁵ Juk: Jesuswan Teytanqa alläpam kuyamantsik. Jesusqa kë Patsachö këkarmi, nunakunata kuyar milagruta rurarnin yanaparqan. Juk kutim yanapëkuyänampaq ishkaq nunakuna alläpa rogayarqan (leyi Mateu 20:30-34). Y Bibliam willakun, “alläpa llakiparnin” tsë nunakunapa nawinkunata alliyäratsinqanta. Tsënö llakipäkoq karmi, Jesusqa mallaqëkaq nunakunatapis mikuynin qararqan y lepra qeshyayoq nunatapis alliyäratsirqan (Mat. 15:32; Mar. 1:41). Tsëwanmi musyantsik “llakipäkoq” Teyta Jehoväwan Tsurin Jesusqa, alläpa kuyamanqantsikta y sufrinqantsikta rikämarnintsik llakikuyanqanta (Lüc. 1:78; 1 Pëd. 5:7). Pëkunaqa llapan nunakunapa sufrimientunkunatam ushakätsita munayan.

6. ¿Imata ruranampaqtan Jesusqa Teytampita poderta chaskishqa?

⁶ Ishkë: Jesusqa Teytan Jehoväpitam poderta chaskishqa imëka problëmakunata ushakätsinampaq. Wakin problëmakunataqa manam altsëta puëdintsiktsu. Peru Jesusqa milagrukunata ruranqanwanmi rikätsikurqan tsë llapanta altsëta puëdinqanta. Këllaman pensarishun: nunakunaqa jutsasapa karmi alläpa sufrintsik. Peru Jesusqa jutsasapa kënintsiktam ushakäratsinqa, tsëqa mananam qeshyashunnatsu ni wanushunnatsu (Mat. 9:1-6; Rom. 5:12, 18, 19). Milagrukunata Jesus ruranqanwanmi musyantsik, tukuyläya qeshyata ushakätsinampaq kaqta y wanushqakunatapis kawaritsimunampaq kaqta (Mat. 4:23; Juan 11:43, 44). Jesusqa Teytampita poderta chaskishqa hasta desgraciakunatapis ushakätsinampaq y Satanastawan demoniunkunatapis vencinampaqmi (Mar. 4:37-39; Lüc. 8:2). ¿Manaku tsë llapanta ruranampaq Teytan Jehoväpita poderta Jesus chaskinqanta musyarqa alläpa kushikuntsik?

7, 8. (1) Milagrukunata Jesus ruranqanqa, ¿imapita següru kanapaqtan yanapamantsik? (2) ¿Ima milagrutataq masqa rikëta munanki?

⁷ Kima: Diosnintsikpa Gobiernun gobernamuptinqa llapan änikunqankunam cumplikanqa. Kë Patsachö këkar milagrukunata Jesus ruranqanqa rikätsikurqan, Diosnintsikpa Gobiernun gobernamur ruramunampaq kaqkunatam. Jesus kë Patsata gobernamuptin imanö kawakunapaq kaqman pensari. Manam ni ima qeshyawampis qeshyashunnatsu, llapantsikpis sänullanam kashun (Is. 33:24; 35:5, 6; Apoc. 21:3, 4). Mëtsika mikuy kaptinmi, mallaqäshunnatsu ni desgraciakunapapis mananam pasashunnatsu (Is. 25:6; Mar. 4:41). Y wanushqa familiantsikkuna kawariyämuptinmi, kushishqa chaskishun (Juan 5:28, 29). Shumaq Patsachöna kawarqa, ¿ima milagrutataq masqa rikëta munanki?

⁸ Jesusqa humildi kar y llakipäkoq karmi, tsë milagrukunata rurarqan. Y noqantsikpis pënöllam humildi y llakipäkoq këta munantsik. Tsëpaq ishkëllata rikärishun. Puntata yachakurishun, Canächö casakuyaptin imata ruranqanta.

9. ¿Imanirtan Jesusqa casakuy fiestachö milagruta rurarqan? (Juan 2:6-10).

⁹ (Leyi Juan 2:6-10). Canächö casakuyanqan fiestachö vïnu ushakäriptin, ¿imallatapis Jesus rurananku karqan? Manam. Manam yakuta vïnuman tikratsinampaq kaqtaqa  Diospa willakoqninkuna willakuyashqatsu kayarqan. Peru këllaman pensari: ¿imanöraq sientikunkiman karqan casakunqëki junaq vïnu ushakäriptin? Jesusqa casakoqkuna y familiankunapis vïnu ushakäriptin penqakuyänampaq kaqtachi pensarqan, tsëchi llakiparnin yanapëta munarqan. Tsëmi 390 litrus yakuta alli kaq vïnuman tikratsirqan. ¿Imanirtan tsëtsika vïnuta rurarqan? Capazchi juk kutikunachöpis utilizäyänampaq kaqman pensarqan o capazchi tsëraq casakushqakuna tsëta rantikurirnin kawayänampaq kaqman pensarqan. Jesus tsëta ruranqampitaqa, ¡casakushqakunaqa alläpachi agradecikuyarqan!

10. Jesus milagruta ruranqampaq Juan librupa 2 kaq capïtulunchö, ¿imakunatataq willakun? (Rikäri dibüjuta).

¹⁰ Jesus milagruta ruranqampaq Juan librupa 2 kaq capïtulun willakunqanta maslla rikärishun. ¿Pitan cantarukunaman yakuta winarqan? Manam Jesustsu. Jesusqa rurëkanqanta rikäyänanta mana munarmi, tsëchö yanapakoq nunakunata mandarqan (6 y 7 kaq versïculukuna). Y milagruta rurarirqa, ¿kikinku casakuy fiesta mikuyta rikaq nunaman vïnuta aparqan? Manam. Tsëchö yanapakoqkunatam mandarqan ichikllata apayänampaq (8 kaq versïculu). Jesusqa manam milagruta ruranqampita gälakurqantsu ni manam, “kë mishkeq vïnutam ruraramurqö, mä llamirkuyë o yawarkuyë” nirqantsu.

11. Jesus milagruta ruranqampitaqa, ¿imatataq yachakuntsik?

¹¹ ¿Imatataq yachakuntsik Jesus milagruta ruranqampita? Humildi këtam. Jesusqa manam yakuta vïnuman tikratsinqampita gälakurqantsu. Pëqa manam imata rurarpis gälakoqtsu. Tsëpa rantinqa, humildi karmi Teytanllata alabaq y alabayänanta munaq (Juan 5:19, 30; 8:28). Noqantsikpis Jesusnö këta munarqa, humildim kanantsik y manam imata rurarpis gälakunantsiktsu. Tsëpa rantinqa, Jehoväta sirwinqantsikpitaqa pëllatam alabanantsik (Jer. 9:23, 24). Pensari, ¿manaku Jehovä yanapamashqalla imëkatapis rurëta puëdintsik? Tsëmi Jehovä Diosllata alabanantsik (1 Cor. 1:26-31).

12. ¿Imachö mastan Jesusnö humildi kashwan? Willakaramuy.

¹² ¿Imachö mastan Jesusnö humildi kashwan? Këllaman pensarishun: juk siervu ministerial discursun preparakuptin, juk anciänu yanapanman. Tsëna kë jövinqa shumaq yachatsikurinman y llapan wiyaqkunata gustarinman. Y anciänuta kënö niyanman: “Taqë jövinqa alläpa shumaqmi yachatsikämushqa”. Y anciänuna kënö ninman: “Awmi, noqa yanapashqa kaptïmi shumaq yachatsikämushqa”. ¿Tsënö ninqan allitsuraq kanman? Manam. Humildi karqa kënömi ninman: “Awmi, shumaqmi yachatsikämushqa”. Humildi nunaqa manam ruranqankunapita ni wakinkunata yanapanqampita alabayänanta munantsu. Ruranqankunata Jehovä rikëkanqanta y valoranqantam masqa cuentachö katsin (Mateu 6:2-4 ninqanwan igualaratsi; Heb. 13:16). Jehoväqa alläpam kushikun Jesusnö humildi kanantsikpaq kallpachakushqa (1 Pëd. 5:6).

13. Nain markaman chärirqa, ¿pikunawantan Jesus tinkurin y imatataq ruran? (Lücas 7:11-15).

¹³ (Leyi Lücas 7:11-15). Juk kutim Jesusqa Nain markata ëwarqan. Tsë markaqa karqan Galilëachömi y Sunem markapa amänunchömi. Tsëchömi juk warmipa wamranta Eliseu kawaritsishqa karqan (2 Rëy. 4:32-37). Nain markaman Jesus chärirqa, ayata pampaq apëkaq nunakunawanmi tinkurqan. ¿Pitan wanukushqa karqan? Juk viudapa japallan ollqu wamranmi. Warmiqa alläpa llakishqa y  waqarmi mëtsikaq nunakunawan ëwëkarqan. Tsënam Jesusqa ayata apëkaq nunakunata päraratsirqan y alläpa llakishqa këkaq warmipa wamrantam kawarkatsirqan. Wanushqakunata kawaritsinqampita kë kutipaqmi Bibliaqa puntata willakun.

14. Lücas librupa 7 kaq capïtulunqa, ¿imakunatataq willakun? (Rikäri dibüjuta).

¹⁴ Lücas librupa 7 kaq capïtulun willakunqanta maslla rikärishun. Jesusqa puntatam warmita rikärirqan y tsëpitanam alläpa llakiparqan (13 kaq versïculu). Capazchi warmita rikärirqan ayapa puntanta waqarnin ëwëkaqta. Tsëta rikëkurqa alläpachi llakikurqan. Y Jesusqa manam llakiparqanllatsu. Capazchi kuyëllapa kënö nirqan: “Ama waqënatsu”. Peru manam parlaparqanllatsu, tsëpa rantinqa, wamrantam kawarkatsirqan y kawëkaqtam “entreguëkurqan” (14 y 15 kaq versïculukuna).

15. Jesus milagruta ruranqampitaqa, ¿imatataq yachakuntsik?

¹⁵ Milagruta Jesus ruranqampitaqa, ¿imatataq yachakuntsik? Wanupakushqakunata llakipëtam. Awmi, manam Jesusnöqa wanushqakunata kawaritsita puëdintsiktsu. Peru wanupakushqakunata llakipëtaqa puëdintsikmi. Tsëpaqqa, wanupakushqakuna imata necesitëkäyanqantam alkäbu kanantsik, tsëpitanam imallawampis yanaparishwan o parlapärishwan (Prov. 17:17; 2 Cor. 1:3, 4; 1 Pëd. 3:8). d Imallawampis yanaparinqantsik o shumaq parlapärinqantsikqa alläpam yanaparinqa.

16. Reunionchö juk pani ruranqampita, ¿imatataq yachakuntsik? (Rikäri fötuta).

¹⁶ Këllaman pensarishun: wanushqakuna kawariyämunampaq kaqta juk reunionchö cantëkarmi, juk pani rikärirqan mas wak lädunchö juk pani waqëkaqta. Warmi wamran tsëllaraq wanukushqa kaptinmi waqëkänaq. Imapa pasëkanqanta musyarmi, tsë paniqa ëwarnin waqurkurqan o makallarkurqan y tsëpitam ishkankuna cantayarqan. Wamranta wanupakushqa paniqa, tsë höra alläpa llakishqa  këkanqantam willakun y reunionman ëwanqampitaqa alläpam kushikun. Kënömi nin: “Reunionta ëwaptïqa, yanapayämänampaq kaqtam musyarqä”. Wanupakushqakunata y ‘alläpa llakishqa këkaqkunata’ yanapanantsikpaq imallatapis ruranqantsiktaqa, Jehoväqa rikëkämunmi y alläpam valoran (Sal. 34:18).

17. ¿Imatataq yachakuntsik Jesus ruranqan milagrukunapita?

¹⁷ Jesus ruranqan milagrukunapita yachakunqantsikqa, maslla markäkoq o yärakoq kanapaqmi yanapamantsik. Mateu, Marcus, Lücas y Juan librukunata yachakurqa cuentata qokuntsik Jehoväwan Jesus alläpa kuyamanqantsikta, imëka problëmakunata ushakätsinampaq Jesuspa podernin kanqanta y Diosnintsikpa Gobiernun gobernamuptin imëka bendicionkunata chaskinapaq kaqtam. Tsënöllam yachakuntsik Jesusnö humildi y llakipäkoq kanantsikpaq. ¿Imanirtan Jesus ruranqan milagrukunapita japallëkipis o familiëkikunawampis maslla yachakuriyankitsu? Tsëkunapita yachakurqa, imata yachakunqëkiman pensë y yachakunqëkita wakinkunatapis willë. Tsënöpam maslla parlakuriyanki (Rom. 1:11, 12).

18. ¿Imapitataq qateqninchö yachakushun?

¹⁸ Jesusqa wanutsiyänampaq ichik tiempu pishikaptinmi, kima kaq y ultimu kaq milagruta rurarqan. Peru ultimu kaq milagruta ruranqanqa, manam wakinkunawan igualtsu karqan. Tsë kutichöqa, chusku junaqpana pamparëkaq amïgun Läzarutam kawaritsimurqan. ¿Imatataq yachakuntsik tsë milagrupita? ¿Imatataq rurashwan wanushqakuna kawariyämunampaq kaqman maslla markäkunapaq o yärakunapaq? Tsëtam qateqninchö yachakurishun.