Kananqa kushishqanam kawakü

Diospa Gobiernumpita yachatsikoqkuna willakuyanqan

JESUSQA üshankunata reqinqantam nin (Juan 10:14). Juk nuna alli shonquyoq kar, yamë këta asheq kar y allikunata ruraq karqa, Jesuspa qateqnin këtam munanqa. Y alli kawakuytapis tarinqam. Tsëmi pasarqan Belgica nacionpita juk warmiwan. Pëmi kënö willakun:

“Alläpa llakinashqa y wanuytapis munëkaptïmi, Jehoväpa testïgunkunaqa wayïpa punkunta takakarayämurqan. Kë munduchö imëka mana allikuna alliyänampaq kaqta musyëqa gustamarqanmi, peru Dioslla tsë cambiukunata rurëta puëdinqanqa manam ichikllapis gustamarqantsu. Ëwanqa Iglesiächö ishkë cära kayaptinmi llapan rurayanqankunata chikirqä, tsëmi puwaq watapana ëwashqatsu karqan. Peru musyarqämi, Jehoväpa testïgunkuna willayämanqanqa rasumpa kanqanta y Diosnintsik mana yanapamashqaqa imatapis mana rurëta puëdinqantsikta.

”Juk o ishkë kuti visitayämanqampitaqa, mananam yapëqa Jehoväpa testïgunkunawan tinkuyarqänatsu. Tsëmi alläpa llakikurqä. Tsëpitanam cigärruta shoqur qallëkurqä, y juk junaqllachömi ishkë cajetïllata ushaq kä y drogakurpis qallëkurqämi. Tsëpitanam brüjukunapa yanapakuyninta ashirqä wanukushqa awilüwan parlëta munar. ¡Tsë ruranqäqa manam allitsu karqan! Japallä kanqä höram o paqaspam demoniukunaqa alläpa mantsakätsiyämaq. Tsënöqa pasamarqan atska killakunapam. Y patsa tardiyaptinqa japallä quedakuyta alläpam mantsaq kä.

”Juk junaq pasiaq ëwanqächömi mana imëpis ëwanqäpa tumarqä, y tsëchömi rikarqä juk jatun edificiu rurëkäyaqta. Y tsëchö mëtsika nunakuna juntu trabajëkäyanqanta rikanqäqa mana creipaqnömi karqan. Y mas lädunkunaman witirnam, cuenta qokurqa Jehoväpa testïgunkuna kayanqanta. Pëkunaqa Jehoväta adorayänan wayitam rurëkäyarqan. Tsë höram yarpärirqä, unë wayïman watukaq shayämunqanta y shonqüllachömi kënö pensarirqä: ‘Alläpa shumaqchi kanman entëru patsachö llapankuna pëkunanö kawakuyaptinqa’.

”Alläpam munarqä wayïman yapë watukayämaq shayämunanta, tsëmi Jehoväta adorayänan wayichö wakin trabajëkaqkunawan parlarqä. Tsëpitanam Teyta Diosman mañakurqä y chunka junaqkunallatam tsë puntata watukamaq turi yapë wayïman takakaramurqan. Y yapë Bibliapita yachakuyänäpaq nimaptinmi noqaqa alläpa kushishqa änirqä. Tsëpitanam reunionkunaman ëwanäpaq invitamarqan y ëwarqämi. Unëpitanam kushishqa, yamë y kuyanakur kawakoq nunakunata ashirqä y tsëtam këchöqa tarirqä. ¡Tsëchö rikanqäqa mana creipaqnömi karqan!

”Tsëpitaqa llapan reunionkunamanmi mana faltëta ëwarqä. Y kima semäna pasariptinmi cigärru shoquytapis dejarirqä. Tsënöllam brüjukuna utilizäyanqan librukunata y demoniukunapa müsicankunatapis jitarirqä, y tsëpita patsëmi demoniukunaqa dejayämarqan y mananam mantsatsiyämarqannatsu. Y Jehovä munanqannö kawakuyta munarmi, llapan imëka mana alli ruranqäkunata dejarirqä y kima killa pasariptinnam Diospita yachatsikur qallëkurqä. Tsëpita joqta killallatam bautizakurirqä y ishkë junaq pasariptinllam precursöra auxiliar kanäpaq änikurirqä.

”Jehovätam alläpa agradecikü llapanchö yanapamanqampita. Kananqa kushishqanam kawakü. Teyta Jehoväpa jutinqa imëka alli rurashqa törrinömi, y tsëchömi tarirqä manana mantsakushpa y següru kawakuyta (Proverbius 18:10). Tsëmi kë salmista ninqannö sientikü: ‘Waranqa (1,000) junaq juk läduchö täränäpa rantinqa mas allim kanman juk junaqllapis wayikichö kaptï. Jutsasapakunapa wayinchö täränäpa rantinqa mas allim kanman wayiki punkullachöpis täkuptï’”.

Kë alli shonquyoq warmiqa kushishqa kawakuytam tarirqan. Tsënöllam llapan alli shonquyoq nunakunapis Jehoväta ashirqa kushishqa kawakuyta tariyanqa.