Teyta Jehoväta reqinqantsikqa yanapamantsikmi

TEYTA DIOSTA manaraq alli reqirqa, manam yamë y kushishqa kawakunkitsu. Mëtsika nunakunam rikäyashqa, Diosnintsikta reqiyanqanqa kawëninkunachö yanapashqa kanqanta. Y tsëqa manam kananllatsu, sinöqa shamoq tiempuchöpis yanapamäshunmi.

Reqinantsikta munarmi, Teytantsik Jehoväqa Palabran Bibliata qellqatsimushqa. Salmus libruta qellqaqmi kënö nirqan: “Llapanpis musyayätsun qam japallëki puëdiq TEYTA DIOS kashqëkita” (Salmus 83:18, Teyta Diospa Willakïnin [TDW]). Teyta Diosqa musyanmi, pëta reqir alli kawakunapaq kaqta. Tsëmi kënö nimantsik: “Noqam alli kaqkunata yachatsikur munashqänö kawayänëkipaq alli nänipa pushayaq” (Isaïas 48:17, TDW). ¿Imakunachötan Teyta Jehoväta reqinqantsikqa yanapamantsik?

Jehovä Diosta reqinqantsikqa imëka mana allikuna kaptin altsanapaq, shamoq tiempuchö alli kawakuyta shuyaränapaq y yamë kawakunapaqmi yanapamantsik. Y Jehoväta reqinqantsikqa, kanan witsan nunakunanö mana alläpa yarpachakunapaqpis yanapamantsikmi. ¿Imamantan nunakunaqa mas yarpachakuyan? Yachakurishun.

¿Imapaqraq Dios kamamashqantsik?

Kanan witsanqa, nunakuna imëkatam rurayämun. Tsënö kaptimpis, manam nunakunaqa allilla musyayantsu imapaq kawayanqanta. Tsëmi kënö tapukuyan: ¿Imarëkurtan kawëkantsik? Tsëpitaqa, ¿mëtaraq ëwashun? ¿Imapaqraq Teyta Dios kamamashqantsik? Tsëkunata mana musyaq kaqkunaqa manam kushishqatsu kawayan. Y nunakunaqa, ¿mäkuyanku tsënö yarpëyoq kayanqanta? Awmi. Alemaniachö nunakunata tapuyanqanchömi, pullan kaqqa niyarqan imapaq kawayanqanta mana musyayanqanta. Marka mayikikunaqa, ¿tsënöku niyan?

Imapaq kawayanqanta mana musyaq nunakunaqa, manam kushishqatsu kayan, pëkunaqa imëpis llakishqallam kakuyan. Estudiuchö y qellëyoq këchömi wakinqa kushishqa kawakuyta ashiyan. Peru qellëyoq kar y estudiashqa karpis, manam kushishqatsu kayan, y wakinqa wanukuytam munayan. Juk reqishqa periödicum nirqan, juk shumaq shipash “mëtsika qellëyoq y imëka jananchö winashqa kanqanta”. Peru mëtsika qellëyoq këkarpis llakishqallam kakoq, tsëmi wanuyta munar mëtsika pastïllata upurir wanurqan. Tsënöllam mëtsikaq nunakunapis llakishqalla kakuyan, y wakinqa tsënö llakishqa karmi mana allichö ushayashqa.

Estudiashqa nunakunaqa, manam musyatsimënintsikta puëdiyantsu imakunata rurar alli kawakunapaq kaqta. Alemaniachö juk periödicum nin: “Estudiashqa nunakuna llapan rurayanqan alli kaptimpis, manam alli kawakunapaqqa yanapamënintsikta puëdiyantsu. Y imëkata rurayashqa kayaptimpis, alli y kushishqa kawakunapaqqa manam yanapamantsiktsu”. Estudiashqa nunakunaqa musyatsimarquntsikmi animalkunapa, plantakunapa y noqantsikpa kawënintsik imanö kanqanta. Tsënö kaptimpis, kawënintsik mëpita shamunqanta y imapaq kawanqantsiktaqa manam musyatsimënintsikta puëdiyashqatsu. Tsëmi juk reqishqa periödicu nin: “Alli kawakunapaqqa, pillapis willapäramänantsiktam wanantsik o necesitantsik”.

Teyta Diosmi kamamashqantsik, tsëmi pëqa alli kawakunapaq yanapamënintsikta puëdin. ¿Imanötan tsëta musyantsik? Bibliachömi nimantsik, Jehovä Dios nunakunata kë Patsaman churanqanta, y wamrankuna kar Patsata juntayänampaq. Y Teyta Diosqa pë rikoqta ruramashqantsik kaptinmi allikunata rurantsik, imëkatapis rurëta yachantsik y kuyakoq kantsik. Tsëkunata musyarqa, imapaq kawanqantsikta allim musyashun (Genesis 1:26-28).

¿Imatatan rurankiman?

Itsa kananyaq imapaq kawanqantsikta, shamoq tiempuchö imanö kawanapaq kaqta y imarëkur Teyta Dios ruramanqantsikta musyankiraqtsu. Tsëqa, ¿imaraq yanapashunki? Teytantsik Jehoväta alli reqinqëkim. Señornintsik Jesusmi kënö nirqan: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki, y qam kachamunqëki Jesucristuta reqikäyanqan” (Juan 17:3). Yachakunqantsiknö kawakunapaqmi kallpachakunantsik. Bibliachöqa kuyakoq kanapaqmi nimantsik, y Diospa Gobiernun shamuptin alli kawakunapaq kaqmanmi yarparänantsik. Tsëkunata ruranqantsikqa alli y kushishqa kawakunapaqmi yanapamäshun, y manam “¿imapaqtan kawä?” nir këkäshuntsu (Eclesiastes 12:13).

Teyta Diosta reqinqantsikqa, ¿rasumpaku yanapakun? Hans jutiyoq nunapaq parlarishun. * Pëqa wiyashqam karqan Diospita, peru manam kawëninchö cuentaman churarqantsu. Drögakunatam shoqoq, warmikunawanmi lluta purikoq y mana allikunatam ruraq. Hansmi nin: “Manam imapaq kawanqätapis musyaqtsu kä, y manam kushishqatsu karqä”. Tsënö këkaptinmi, 25 watayoqnö këkar Teyta Jehovä reqinampaq Bibliapita alli yachakur qallëkurqan. Tsëpitanam, mana alli rurëninkunata dejarqan y Jehoväpa testïgun kanampaqmi bautizakurqan. Kananqa, chunka watapanam Teyta Diosta llapan tiempunwan sirwikan. Imanö këkanqantam kënö nin: “Teyta Jehovä sirwinöqa manam imapis kantsu. Mas alli y kushishqam kananqa kawakü”.

Peru nunakunataqa, manam imapaq kawayanqanta mana musyayanqanllatsu yarpakachätsin. Kanan witsanqa imëka mana allikunam më tsëchö pasakun, y tsëkunaqa alläpam llakitsimantsik. Tsëpita ichik yachakurishun.

¿Imanirtan mana allikuna pasamantsik?

Mana allikunapa pasar y llakikurqa, “¿imanirtan noqata tsë pasamashqa?” nirmi nunakuna tapukuyan. ¿Imatan yanapanman mana alläpa llakikuyänampaq? Imanir tsëkuna pasakunqanta alli musyayanqanmi. Peru tsëkuna imanir pasakunqanta mana musyarqa, llakishqallam kakuyanqa, y höraqa hasta piñashqam. Bruni jutiyoq warmita ima pasanqanta yachakurishun.

Brunim willakun: “Tsëllaran juk ishkë watakuna pasarishqa, llullu wamrä Susäna wanukunqampita. Noqaqa Teyta Diosman creiqmi kä, tsëmi wamrä imanir wanushqa kanqanta musyëta munar juk cürata tapurqä. Pëqa wamräta Dios ciëluta apakushqa kanqanta y juk angelman tikratsishqa kanqantam nimarqan. Tsënö nimanqampitam, Teyta Dioswan piñakurkurqä”. Bruniqa atska watapam llakishqalla kakurqan. Tsëpita ima pasanqantam kënö willakun: “Jehoväpa testïgun juk warmim, Teyta Dioswan piñashqa mana kanapaq Bibliawan yachatsimarqan. Wamrä Susänaqa ciëluta mana ëwakushqa kanqanta y juk angelman mana tikrashqa kanqantam yachatsimarqan. Y yachatsimarqanmi, wanushqakunaqa punuykäyanqanta y shamoq tiempuchö Jehovä Dios kawaritsimunampaq kaqta. Teyta Jehovä imanö kanqanta alli reqirirqa, masmi kuyarqä y manam alläpa llakikurqänatsu” (Salmus 37:29; Hëchus 24:15; Romänus 5:12).

Mëtsikaq nunakunam alläpa llakikuyan mana allikunata, guërrakunata, mallaqëta y desgraciakunata rikar. Tsënö llakishqam Bruni warmipis karqan. ¿Imatan yanaparqan? Mana allikunapita Teyta Jehovä culpayoq mana kanqanta y ichikllachöna tsëkuna ushakänampaq kaqta Bibliachö yachakunqanmi. Kë mana allikuna pasanqanqa, ‘ushanan junaqkunachöna’ kawëkanqantsikta y ichikllachö alli kawakunapaq kaqtam rikätsimantsik (2 Timoteu 3:1-5; Mateu 24:7, 8).

¿Imataraq rurashwan Teyta Diosta reqinapaq?

Hans y Bruniqa Teyta Diospita wiyashqa kar y pëman creirpis, manam allillaqa reqiyarqantsu. Peru Jehovä Diosta alli reqiyanqanqa, kushishqa kayänampaqmi yanaparqan. Kananqa manam alläpa yarpachakuyannatsu y shamoq tiempu mas alli kawakuytam shuyarëkäyan. Pëkunanöllam, mëtsikaq Diospa sirweqninkunawampis pasashqa.

Teyta Jehoväta reqinapaq y pë munanqannö kawanapaqqa, Palabran Bibliapitam alli yachakunantsik y yachakunqantsikmanmi yarpachakunantsik. Tsënöllam unë witsan Diospa sirweqninkunapis rurayarqan. “Pëkunaqa Tesalönica nunakunapitapis mas alli shonqum kayarqan, porqui alläpa kushishqam Diospa Palabranta chaskikuyarqan, y llapan junaqkunam Diospa Palabranta alleq estudiayaq tsënö kanqanta o mana tsënö kanqanta rikäyänampaq” (Hëchus 17:10, 11).

Unë witsan Diospa sirweqninkunaqa yachakuyänampaqmi juntakäyaq (Hëchus 2:41, 42, 46; 1 Corintius 1:1, 2; Gälatas 1:1, 2; 2 Tesalonicensis 1:1). Kanan witsan Jehoväpa testïgunkunapis tsënöllam reunionkunata rurayan. Tsë reunionkunaqa, Teyta Jehoväta kushishqa sirwiyänampaqmi yanapakun. Peru reunionkunaqa manam tsëllachötsu yanapakun. Teyta Dios kikin rikoqta kamamashqantsik kaptinmi, nunakunaqa allikunata rurantsik. Peru Jehoväpa testïgunkunawan juntakurqa mas kuyakoq, llakipäkoq y allikunata rurëtam yachakunki. Awmi, tsë reunionkunaman ëwarqa masmi Jehoväta reqinki (Hebrëus 10:24, 25).

Këkunata rurar Teyta Diosta reqiqa manam fäciltsu. Pëta reqinapaqqa alliran kallpachakunantsik. Teyta Jehovä imanö kanqanta musyanapaqqa, juk reqishqa pukllaq alistakunqanman yarpärishun. Jean-Claude Killyqa juk reqishqa pukllaqmi, pëmi kënö willakun: “Ima pukllanqantsikchöpis juk premiuta ganëta munarqa, chunka watapam yachakur qallanantsik y tsëllamanmi cada junaq yarparänantsik. [...] Watachö 365 junaqkunam pukllëta yachakunantsik y tsëllamanmi yarparänantsik”. Tsëläya kallpachakuyanqanqa, chunka minütus pukllariyanqanllachömi höraqa usharin. Peru Jehovä Diosta reqinqantsikqa imëyaqpis alli kawakunapaqmi yanapamäshun, y tsëkunaqa mana ushakaqmi kayan.

Jehovä Diosta alli reqirqa masmi kuyashun

Llapantsikmi munantsik alli y kushishqa kawakuytaqa, ¿imatan yanapamäshun? Teyta Jehoväta alli reqinapaq kallpachakunqantsikmi. Bibliata leyir alli reqishqaqa, musyashunmi imapaq kawëkanqantsikta y imanir më tsëchö mana allikuna pasanqantapis. Jehoväta alli reqirqa kanan y imëyaqpis kushishqam kawakushun.

Jehovä Diosnintsikpitaqa imëpis yachakuykäshunllam. Tsëtam niyan, mëtsika watapana Teyta Diospita yachakoqkuna. Cada junaq mas reqinqantsikmannömi mas kushishqa kashun y Jehoväta mas kuyashun. Tsëta rurashqaqa, apostol Pablunömi noqantsikpis nishun: “¡Imanö jatunmi Diospa bendicionninkuna, yachënin y musyëninqa! ¡Imanö mana käyipaqmi juiciunkuna y reqita mana puëdipaqmi näninkuna! Porqui ‘¿pitaq Jehoväpa pensëninkunata musyëta puëdin, o pitaq consejaqnin këman tikrashqa?’” (Romänus 11:33, 34).

[Willakuy]

[Willakuy]

Nunakunaqa kananyaqmi kënö tapukuyan: ¿Imarëkurtan kawëkantsik? Tsëpitaqa, ¿mëtaraq ëwashun? ¿Imapaqraq Teyta Dios kamamashqantsik?

[Willakuy]

“Teyta Jehovä imanö kanqanta alli reqirirqa, masmi kuyarqä y manam alläpa llakikurqänatsu”

[Willakuy]

“Teyta Jehovä sirwinöqa manam imapis kantsu. Mas alli y kushishqam kananqa kawakü”