Unë imanö kanqantsik

“Cada junaqmi colportorädota más kuyä”

1886 watachömi Allegheny (Pensilvania, Estados Unidos) markachö këkaq Casa Bíblica nishqampita La Aurora del Milenio librokunata pachakta Chicago (Illinois) markaman apatsiyarqan. Charles Taze Russellqa munarqan tsë librokunata librerïakunachö rantikuyänantam. Librokunata rantikoq jatun tiendam awnikurqan La Aurora del Milenio librota rantikunampaq. Pero ishkë semänallatam tsë apatsiyanqan librokunataqa Casa Bíblica nishqanman kutiratsiyarqan. ¿Imanir?

Bibliapita yachatsikoq juk respetashqa nuna imash qellqanqan librokunawan paqta tsë libro këkaqta rikëkur alläpa piñakunaq. Paqwë ajashqash kënö ninaq: “Librokuna churaränampita mana jorqayaptikiqa, yachatsikoq mayïkunawanmi librökunata juk tiendaman apakuyäshaq”. Negocionkuna alli kananrëkurmi tiendayoqkunaqa mana imanöpis këta puëder Aurora librokunata kutïkatsiyarqan. Y tsë chikikoqkunaqa manam tsëllatatsu rurayarqan, hasta wakin periödicokunachö willakïkuna yarqamunantapis manam jaqiyarqantsu. ¿Imanöraq kë mushoq libro chanman karqan rasumpa kaq yachatsikïta ashikaqkunaman?

Tsënö kanampaqqa colportorkunam alläpa yanapakuyarqan, tsë witsanqa llapan tiemponkunawan Jehoväta sirweq cristiänokunatam tsë jutiwan reqiyaq. * 1881 watachömi Zion’s Watch Tower (La Torre del Vigía de Sión) nishqan revista nirqan, llapan tiemponkunawan Diospita yachatsikuyänampaq y Bibliapita publicacionkunata nunakunaman apayänampaq juk waranqa cristiänokunata wanayanqanta. Kë colportorkuna juk ishkë pachaklla karpis, kë librotaqa më tsëmanmi chätsiyarqan. Awmi, 1897 watapaqqa juk millonpitapis mastanam Aurora nishqan librota nunakunata qoyarqan, y tsëchöqa colportorkunam alläpa yanapakuyarqan. Librota chaskikoqkuna o Zion’s Watch Tower nishqan revistata cada killa chaskiyänampaq apuntakoqkuna qellë qoyanqanwanmi casi llapampis mantenikuyaq.

¿Pikunataq kayaq tsë mana mantsakoq colportorkunaqa? Wakinkunaqa kayaq joven këman chëkaqkunam, y wakinkunanam edäna cristiänokuna. Atskaq soltërokuna y wamrannaq casakushqakunapis kayarqanmi, jina familiëpapis kayarqanmi. Colportor regularkunaqa junaqnimpi o qoyatmi Diospita yachatsikuyaq, y auxiliar kaqkunanam cada junaqchö juk o ishkë hörakuna. Musyanqantsiknöpis, saludninkuna mana yanapaptin o imapis karëkaptinmi llapankunaqa colportor këta puëdeyaqtsu. Tsënö kaptimpis, 1906 wata asamblëachömi llapan cristiänokunata niyarqan colportor kayänampaqqa, “alli estudiashqaraqtsu, alläpa yachaqraqtsu ni angelnö parlaq-raqtsu kayänan precisanqanta”.

 Lluta nunakunallam casi jinantin Patsachö alläpa yanapakuyarqan. Juk wawqim willakurqan qanchis watachö 15 mil librokunata qokunqanta. Tsënö kaptimpis kënömi nirqan: “Manam librokunata rantikunäpaqtsu colportor tikrarqä, sinöqa Jehoväpita y rasumpa yachatsikïninkunapita willakunäpaqmi”. Juk colportor mëpapis ëwanqanchö yachatsikunqanchöqa muru cuenta Diospa yachatsikïninmi nunakunapa shonqunman patsakäreq, tsënöpam Bibliapita yachakoqkunaqa allipa mirayaq.

Pero tukï iglesiachö pushakoqkunaqa mana allitam pëkunapaq parlayaq, y cällekunachö rantikoq lluta nunakuna kayanqantam niyaq. 1892 wata kaq Zion’s Watch Tower nishqan revistam kënö nirqan: “Casi llapampis manam Señorpa jutinchö rasumpa yachatsikoqkunatanötsu rikäyäshunki, ni qollmi shonqïkikunawan y imëkata jaqïkur rurayanqëkita Señornötsu valorayan”. Juk colportöram nirqan ‘mashtashqa rosas jananchönötsu’ kawënin kanqanta. Pëkunaqa puriyänampaq cärrota utilizäyänampa rantinmi biciclëtata y alli zapatota utilizäyaq. Y qellëninkuna pishiptinqa, mikïwanmi librokunata trokayaq. Junaqnimpi o qoyat yachatsikurirmi, carpankunaman o alquilayanqan cuartoman kutiyaq, y utishqa karpis kushishqa punuriyaq. Tsëpitanam “colportorkunapaq carrëta” nishqan yurirqan, tsëqa kikinkuna rurayanqan llantayoq wayikunam kaq, y tiempota y qellëta mana alläpa gastayänampaqmi yanapakoq. *

1893 wata Chicago markachö rurayanqan asamblëachömi, wakin yachatsikïkunaqa colportorkunapaq karqan. Tsë asamblëakunachömi yachatsikur puriyanqanchö imakuna pasakunqanta willakuyaq, jina imanö yachatsikuyänampaq kaqtapis yachatsikuyaqmi y alli consëjokunatam qokuyaq. Juk kutim tsë alli yachatsikoq precursorkunata wawqi Russell consejarqan alli desayunayänampaq, pullan qoya o wäray juk vaso lëcheta upuyänampaq y tsë junaq alläpa achachaptinqa alalaq refrescota upyayänampaq.

Juk colportor yachatsikoq yarqunampaq yanaqita ashirqa asamblëakunachömi qallwash cintanwan pureq. Mushoq kaqkunaqa unëna yachatsikoq kaqkunawanmi yarquyaq, y pëkunapitam yachakuyaq. Y tsëqa allipatsunchi yanapakurqan, juk kutim tsëllaraq yachakïkaq colportora mantsakoq karnin juk warmita kënö ninaq: “Qamqa kë librota manam munankitsu ¿aw?”. Tsënö niptimpis tsë warmiqa munarqanmi, y Jehoväpa sirweqnin këmanmi charqan.

Juk wawqim kënö tapukurqan: “¿Imataq más alli kanman: qellëta tarinäpaq sinchi trabajarnin llapan watakuna mil dölaresta Diospita yachatsikïpaq churanqäku o colportor tikranqäku?”. Tsënam kënö niyarqan: “Señorqa ishkampitapis agradecikunmanmi, pero más bendicionkunataqa tarinki kikikipa tiempïkita sirwinëkipaq utilizarmi”. Mary Hinds jutiyoq panim nirqan colportöra këqa ‘mëtsika nunakunata rasumpa yanapanampaq’ alläpa alli kanqanta. Y Alberta Crosby jutiyoq alläpa mantsapakoqlla paninam kënö nirqan: “Cada junaqmi colportorädota más kuyä”.

Kanan witsanqa tsë colportorkunapa wamrankuna y Diospita yachatsiyanqan cristiänokunam pëkunanölla Diospa kaqchö rurëkäyan. Familiëkichö pipis colportor o precursor mana kayaptinqa, ¿imanirtaq qam precursor kanëkipaq churapakankitsu familiëkikunapis tsënölla qatiyäshunëkipaq? Tsëta rurarqa qampis masmi kuyanki Jehoväta llapan tiempïkiwan sirwita.

[Päginapa ura kuchunchö willakïkuna]

[32 kaq päginachö ninqan]

Colportor kayänampaqqa manam “estudiashqaraqtsu, ni alläpa yachaqraqtsu ni angelnö parlaq-raqtsu” kayänan precisarqan

[31 kaq päginachö fötu]

Ghana nacionpita colportor A. W. Osei, 1930 wata witsankunachö

[32 kaq päginachö fötukuna]

Janachö: Edith Keen y Gertrude Morris, 1918 wata witsan Inglaterra nacionchö colportörakuna; jawachö: librokunata nunakunapa makinchö jaqirir jinëlla cäjakuna lädonchö Stanley Cossaboom y Henry Nonkes Estados Unidos nacionchö