Casado kawënikita salvanëkipaq kallpachaki

“Majayoq caqcunatam mandayaq [...]. Queqa Diospa mandaquininmi y manam noqapatsu.” (1 COR. 7:10.)

¿WILLAKARAMUNKIMANKU?

¿Imanirtaq casakoqkunata Dios juntanqanta nintsik?

¿Imanötaq anciänokuna yanapayan casado kawëninkunachö problëmayoqkunata?

¿Imanötaq rikänantsik casado kawakïta?

1. ¿Imanötaq cristiänokuna rikäyan casakushqa kawakïta, y imanir?

CASAKOQ cristiänoqa Diospa rikëninchömi juk conträtoman yëkun, tsëmi tsë conträtotaqa ichikllapaq churanmantsu (Ecl. 5:4-6). Casakoqkunataqa Jehovämi ‘juntashqa’, y tsëtaqa nintsik pë casado kawakïta patsätsishqa o kamakätsishqa kaptinmi (Mar. 10:9). Nunakunapa o runakunapa leynin casado kawakïpaq ima niptimpis, Diospaqqa tsë contrato rurayanqan precisanmi. Y tsënöllam cristiänokunapis casakurnin contrato rurayanqanta precisaqpaq churayänan, Jehoväta manaraq reqir casakushqa kar o reqiyanqanchöna casakushqa karpis.

2. ¿Ima tapukïkunatataq kë yachatsikïchö rikäshun?

² Casado kawakïqa alläpa kushikïtam apamun. Pero ¿imataraq casädokuna rurayanman imapis rakikätsita munaptinqa? ¿Rakikätsita munaq problëmankunata altsëta puëdeyanmantsuraq? ¿Ima yanapakïkunataq kan rakikëmanna chëkaqkunapaq?

¿KUSHIKÏTATSURAQ O LLAKIKÏTATSURAQ APAMUNQA?

3, 4. ¿Imataq pasan majata ashir llutalla akraqkunata?

³ Casädokuna shumaq kawakurqa alläpa kushishqam kayan, y tsëqa Jehovätam kushitsin y alaban. Pero rakikëman charqa alläpam llakikuyan. Casakïta pensëkaq cristiänokunataqa Diosta wiyakïmi yanapanqa majankunawan alli kawakur qallayänampaq. Pero majankunata llutalla akraqkunaqa llakikïman y waqëmanmi chäyan. Tantearinapaq, wakin jövenkunaqa piwampis novio tikrariyan casado kawakïpaq manaraqpis listo këkarmi. Wakinkunaqa Internetchömi majankuna raslla ashiriyan y tsëpita casakurirqa llakishqa purikäyan. Y wakinkunanam noviollaraq këkar jatun jutsakunaman ishkiyan y tsëpitaran casakuyan, tsënö ruraqkunaqa quizá casado kawakïninkunata shumaq mana respetanakurnin qallayanqa.

 ⁴ “Casacutsun Jesucristuman creyicoq nunallawan” neq mandätota mana wiyakurmi wakinkunaqa juk religionyoqwan casakurir imëka mana allikunapa pasayan (1 Cor. 7:39). Tsënö rurashqa karqa perdonashunëkipaq y yanapashunëkipaq Diosman mañakï. Jutsata rurayanqampita imëkapa pasayanqampita mana librarpis, pëqa jutsankunata jaqireqkunata yanapanmi tsëkunachö tsarakuyänampaq (Sal. 130:1-4). Llapan shonqïkiwan kallpachakï kanan y imëpis pëta wiyakunëkipaq, tsëqa ‘Jehoväpa kushikïnin tsapäshoqniki wayinömi’ kanqa (Neh. 8:10).

CASADO KAWË USHAKAQNÖ KAPTIN

5. Majanwan shumaq mana kawakurpis, ¿imakunatataq casakushqakunaqa pensayanmantsu?

⁵ Majanwan shumaq mana kawakoqkunaqa quizás kënö tapukuyanman: “¿Kallpachakömanraqtsuraq tukï problëmayoq casado kawënï mana ushakänampaq? ¡Ima alliraq këkunman soltero këman kutirir jukwan casakuptïqa!”. Majampita rakikëta munaqkunaqa quizás kënö pensayanman: “¡Tsënöqa yapëchi libre karïman! ¿Imanirtaq juezkunaman ëwëkur rakikäkurïtsu? Biblia mana nikaptimpis, ¿imanirtaq shumaq kawakunäpaq rakikäkurïtsu?”. “Japallällaraq kanqä witsan kënö waknö ruräman karqan” niyänampa rantinqa o trukanqa, Diospa yanapakïnintam cristiänokunaqa ashiyänan y wiyakuyänampaqmi puëdeyanqanmannö kallpachakuyänan.

6. Mateo 19:9 textochö Jesus ima yachatsikïta munanqanta willakaramï.

⁶ Biblia ninqannöpis, juk cristiänoqa manam juezkunaman ëwëkur majampita rakikashqa karllatsu libre quedarin yapë casakunampaq. Jesusmi kënö nirqan: “Pipis warmin juc ollquwan mana yachecaptin jaqirir, juc warmiwan casacorqa jutsamanmi ishquirin. Tsenollam tse qowanpita [runampita] raquicashqa warmiwan casacoq nunapis jutsaman jina ishquirin” (Mateo 19:9). Kë textoqa parlëkan pipis casado këkar jukwan pununakoqpaq y tukï rakchakunata o qanrakunata ruraqkunapaqmi. Tsëmi majan jukwan mana punukushqa këkaptin juezkunaman ëwëkur rakikëta munaqkunaqa, yanapakïta ashir y Diosman mañakurir-raq alli pensayänan.

7. ¿Imatataq nunakuna pensayan cristiano këkar rakikaqkunapaq?

⁷ Rakikaq casädokunaqa Jehoväpa kaqchö mana alli këkäyanqantam rikätsikuyan. Apóstol Pabluqa alli clärom kënö tapukurqan: “Pipis wayincho mana mandaquita yachecar ¿Imanoparaq Diosman creyicoqcunata cuidanman!” (1 Tim. 3:5). Cristiano kayanqanta nikar rakikaqkunapaqqa nunakuna pensayan yachatsikuyanqannö mana rurayanqantam (Rom. 2:21-24).

8. ¿Imachötaq allitsu këkäyan rakikëta munaq cristiänokunaqa?

 ⁸ Biblia mana nikaptimpis rakikëta munaq casado cristiänokunaqa rikätsikuyan Diospa kaqchö imachöpis mana alli këkäyanqantam. Quizaschi juknin o ishkampis Biblia ninqanta wiyakïkäyantsu. Jehoväman rasumpa ‘llapan shonqunkunawan’ markäkur o yärakurqa, puëdeyanmanchi casado kawakïninkunata altsëta (lei Proverbios 3:5, 6).

9. ¿Ima allikunatataq tariyan mana rakikäyänampaq kallpachakoq cristiänokuna?

⁹ Mëtsikaq casädokunam rakikäyanampaqna këkarnin problëmankunata altsayashqa. Majankunapita mana rakikäyänampaq kallpachakoq cristiänokunaqa alli kawakïtam tariyan o taripäkonqa. Jehoväta mana sirweq majayoqkunapis tsëta logrëta puëdeyanmi. Apóstol Pëdrum kënö qellqarqan: “Casadu warmicuna, Diosnintsicpa alli willaquininman qowequicuna [runaykikuna] mana creyiyaptinpis, pecunapa mandaduncho cawacuyë. Tsemi respetosa y alli cawacuyanqequita ricarnin, qowequicunapis Diosnintsicmanna paqwepa creyicuyanqa, Diosnintsicpaq mana parlapëcaptiquipis” (1 Ped. 3:1, 2). Awmi, alli portakoq cristiänoqa majanta yanapëta puëdenqam Diospa sirweqnin këman chänampaq. Casädokuna problëmankunata altsarir alli kawakuyaptinqa, alläpam Dios kushikun y kikinkuna y wamrakunapis alläpam kushikuyanqa.

10, 11. ¿Imakunaraq casado kawakïchö pasëkunman, pero imatataq casädokuna yarpäyänan?

¹⁰ Jehoväta kushitsita munarmi soltero cristiänokunaqa bautizakushqakunata majankunapaq akrayan. Tsënö kaptimpis, illaqpitam problëmakuna yuririnman. Quizás mëqan majatapis alläpa yarpachakï o llakikï qeshya tsarïkunman. O mëqan karpis Diospita yachatsikïta chipyëpa jaqirinman. Tsëmi pasarqan Diosta alli sirweq y wamrayoq Linda jutiyoq cristiänata, * pëqa alläpa llakishqam rikarqan Diosta jaqiriptin congregacionpita nunanta qarquriyanqanta. ¿Imataraq juk cristiano ruranman tsëkuna pasakunqampita rakikäyänan kaptinqa?

¹¹ Quizás qam kënö tapukunkiman: “¿Imëkanöpapis casado kawakïnïta salvanäpaq kallpachakömanku?”. Manam pipis puëdentsu imata ruranëkipaq kaqta nishïnikita. Tsënö kaptimpis, casado kawëninkuna ushakëkaqnöna këkaptimpis, salvayänampaq kallpachakoqkunaqa tukï bendicionkunatam tariyanqa. Jehoväqa alläpam kushikun concienciankunata wiyakurnin casado kawakïninkunachö tukï problëmakuna kaptimpis mana rakikäkuriyaptinqa (lei 1 Pedru 2:19, 20). Casado kawakïninkuna ushakaqnöna kaptin altsayänampaq llapan shonqunkunawan kallpachakoq cristiänokunataqa, Palabran Bibliawan y santo espïritunwanmi Jehová yanapan.

LISTOM KËKÄYAN YANAPAKUYÄNAMPAQ

12. ¿Imataraq anciänokuna noqantsikpaq pensayanqa yanapamänantsikpaq mañakushqaqa?

¹² Casado kawakïnikichö tukï problëmakuna kaptinqa, poqushqa cristiänokuna yanapayäshunëkita ashi. Anciänokunaqa üshata mitseq cuentam cristiänokunata cuidayan y kushishqam yanapariyäshunki Bibliachö këkaq consëjokunawan (Hech. 20:28; Sant. 5:14, 15). Ama  pensëtsu casado kawakïnikichö jatun problema kaptin yanapayäshunëkipaq mañakuptiki manana respetayäshunëkipaq kaqta. Diosta rasumpa kushitsita munanqëkita rikarmi pëkunaqa más kuyayäshunki y yanapayäshunki.

13. ¿Imatataq yachatsimantsik 1 Corintios 7:10-16 texto?

¹³ Diosta mana sirweq majanwan juk cristiano problëmayoq këkar yanapakïta mañakuptinqa, anciänokunaqa apóstol Pablu qellqanqannö consëjokunatam rikätsiyan, pëmi kënö consejakurqan: “Majayoq caqcunatam mandayaq, warmicuna qowancunapita [runankunapita] mana raquicayänanpaq. Queqa Diospa mandaquininmi y manam noqapatsu. Peru sitsun malas raquicacurenqa, mana yapapäcushpa [casakuypa] japallan tärätsun o mana tseqa amishtacuyätsun qowanwan. Tsenolla jina ollqu caqcunapis ama jaqiyätsuntsu warmincunata. [...] Porqui manam musyanquitsu [...] juntu cayanqequirecur, tse majequi salbacunanta” (1 Cor. 7:10-16). ¡Alläpa jatun bendicionmi Diosman mana creeq maja rasumpa kaq religionman yëkuriptinqa!

14, 15. ¿Imakuna pasakuptintaq juk cristiana majampita rakikëta pensanman, pero imanirtaq tsëtaqa Diosman alli mañakïkur-raq decidinman?

¹⁴ Höraqa juk cristiana majampita ‘raquicacurita’ puëdenmanmi. Wakinkunaqa rakikäkuriyan majan alläpa maqaptin, Diospa kaqchö alli këninta ushakätsita munaptin o familianta mantenita mana munaptinmi.

¹⁵ Majampita rakikäkurinampaq o mana rakikäkurinampaqpis kikinmi rikänan. Tsënö kaptimpis, bautizakushqa majaqa imata ruranampaqpis llapan shonqunwanran Diosta mañakunan. Alli tantearinapaq, Diospa kaqchö alli kënin ushakëkanqanqa, ¿Diosman mana creikoq majampa culpanku, o kikinku Bibliapita yachakuntsu, reunionkunaman ni Diospita yachatsikïman ëwannatsu?

16. ¿Imanirtaq rasllaqa majantsikpita divorciakurishwantsu?

¹⁶ Dioswan amigo kënintsikta alläpa kuyar y Diospa qarënin casado kawakïpita alläpa agradecikurmi, majantsikpita divorciakïmanqa raslla pensarishwantsu. Diosta sirweq cristiänokunaqa Jehoväpa jutin respëtowan alabashqa kanantam munantsik. Tsëmi jukwan casakïta munarllaqa ni imëpis majantsikpita rakikashwantsu (Jer. 17:9; Mal. 2:13-16).

17. ¿Ima pasakuptintaq nishwan cristiano kaq maja ‘shumaq pasaquicho cawacunanta’ Dios munanqanta?

¹⁷ Diosman mana creeqwan casakushqa cristiänoqa tukïnöpam kallpachakunan majampita mana rakikäkurinampaq. Pero tukïnöpa kallpachakïkaptimpis Diosman mana creeq majan rakikäkurita munaptinqa, cristiano kaq majaqa manam kikin culpayoq kanqanta pensanmantsu. Pablum kënö qellqarqan: “Diosqa munan mana liryacushpa [pleitor] shumaq pasaquicho cawacunantsictam. Tsemi sitsun qowequi o warmiqui Jesucristuman mana creyicoq car jaqirishunqui, dejarïquï eucunanpaq. Tseno  quiquin eucuptenqa, meqan wauqintsic o panintsicpis librim quedarenqa” (1 Cor. 7:15). *

JEHOVÄMAN MARKÄKÏ

18. Juk cristiano casado kawëninta mana salvëta puëderpis, ¿ima allikunatataq tarinqa mana rakikänampaq kallpachakunqampita?

¹⁸ Casado kawënikichö ima problema kaptimpis altsanëkipaqqa kallpata qoshunëkipaq Jehoväman mañakï y llapan shonqïkiwan markäkï o yärakuy (lei Salmo 27:14). Qallananchö parlanqantsik Linda jutiyoq cristiänapa casado kawakïninqa divorciochömi usharirqan, tsënö mana pasanampaq mëtsika watakunapa kallpachakushqa këkaptimpis. ¿Mana kaqllapaq kallpachakunqantaku pëqa pensan? “Manam” ninmi. Jina këtapis willakunmi: “Tsë pasakunqanta rikaqkunaqa alli rurënïpitam yachakuyarqan. Concienciäqa allim këkan. Y llapampitapis más alliqa kashqa tsë mana alli watakunachö warmi wamrä Jehoväman más markäkunqan, bautizakunqan y Jehoväpa testïgon këman tikranqanmi.”

19. ¿Imatataq tariyashqa casado kawakïninkunata salvayänampaq kallpachakoqkuna?

¹⁹ Marilyn jutiyoq cristiänanam alläpa kushikun Diosman markäkur o yärakur casado kawakïninta salvanampaq kallpachakunqampita. Kënömi nin: “Mana mantenimaptin y Diospa kaqchö alli kënï ushakänanta mantsarmi, majäpita rakikäkurita pensarqä. Pëqa congregacionchö anciänom karqan mana alli negociokunaman manaraq yëkurqa. Tsëpitaqa mananam reunionkunam ëwarqannatsu ni parlapänakuyarqänatsu kayä o parlapäkurqanätsu. Terroristakuna markächö alläpa mana allita rurëkuyaptinmi alläpa mantsakarqä y wakinkunapita chipyëpa rakikäkurirqä. Tsëchömi cuentata qokurirqä casado kawënïchö problema kanampaqqa kikïpis culpayoq kanqäta. Yapëmi parlapänakur, familiachö yachakur y reunionkunaman mana faltëpa ëwar qallëkuyarqä. Anciänokunaqa kuyëpam yanapayämarqan. Tsënöpam casado kawakïnïkunaqa altsakärirqan, y tiempo pasariptinqa majäpis yapëmi congregacionchö anciano këman kutirirqan. Majäpita mana rakikäkurinapaq kallpachakïqa sasaraqmi karqan, pero kananqa alläpa kushishqam kawakuyä”.

20, 21. Casado kawakï qarëman pensar, ¿imatataq imëpis ruranantsik?

²⁰ Majayoq o majannaq karpis, Jehoväman markäkunqantsikta o yärakunqantsikta y alli tsarakoq kanqantsikta rikätsikushun. Casado kawënintsikchö problema kaptinqa rasumpa altsëta tïrashun, y yarpäshun, casädokunaqa mananam “ishcaqnatsu cayan, sinoqa jucllellanam” (Mat. 19:6). Y ama qonqashuntsu, familiachö tukï problëmayoq karpis Jehoväta mana jaqirqa, quizás imëllapis kushishqa rikäshun majantsik Jehoväpa sirweqninman tikranqanta.

²¹ Imëkapa pasarpis alli yachëwan imëkatapis ruranapaq kallpachakushun, tsënöpa mana Testigo kaqkunapis alli portakunqantsikta rikar Diosta alabayänampaq. Y casado kawakïnintsikta ima problëmapis ushakätsita munaptinqa, Jehoväta llapan shonquntsikwan mañakushun, imanöpa tsëman chanqantsikta rikäshun, Biblia ninqankunaman yarpäshun y anciänokunapa yanapakïninta ashishun. Pero llapampitapis masqa Jehoväta imëpis kushitsishun y casado kawë qarënimpita alläpa agradecikushun.

[Päginapa ura kuchunchö willakïkuna]

[Yachakunapaq kaqpa tapukïninkuna]

[10 kaq päginachö ninqan]

Majankunapita mana rakikäyänampaq kallpachakoq cristiänokunaqa alli kawakïtam tariyan o taripäkonqa

[12 kaq päginachö ninqan]

Jehoväman imëpis markäkï o yärakuy, y kallpata qoshunëkipaq mañakï

[9 kaq päginachö dibüju]

Majankunapita mana rakikäyänampaq kallpachakoq cristiänokunataqa Jehová bendecinmi

[11 kaq päginachö dibüju]

Congregacionchöqa shoqashqa këta y Diospa kaqchö yanapakïtam tarintsik