Kawënin

Edäyashqakunaqa imëpis yanapayämashqam

Elva Gjerde willakunqan

Qanchis chunka watanönam pasarishqa juk nuna teytäta ninqanwan kawënï alläpa cambianqampita. Tsë junaqpita patsëmi mëtsikaq nunakuna kawënïchö yanapayämashqa. Jina tsëpita patsëmi pipitapis más precisaqwan amigo kanäpaq kallpachakurqö, y tsëtaqa alläpam kuyëkö. Willarishqëki imapaq parlëkanqäta.

SYDNEY (Australia) markachömi 1932 wata yurikurqä. Teytäkunaqa Diosman creiyaqmi, pero iglesiamanqa manam ëwayaqtsu. Noqaqa alläpam Diosta mantsaq kä, mamänï kënö nimaptin: “Pëqa imëpis rikarëkäshunkim, y mana allikunata ruraptikiqa castigashunkim”. Tsënö kaptimpis, Bibliapa yachatsikïnintaqa alläpam kuyaq kä. Semana ushëkunam tiä watukayämaq y Bibliapita shumaq willakïkunata yachatsiyämaq. ¡Kushishqam imëpis shuyaraq kä!

Joven këman chanqä witsanmi, juk chakwanna Jehoväpa testïgon mamänïta qaranqan tukï librokunata teytä leirqan. Leinqan alläpa gustëkuptinmi Jehoväpa testïgonkunawan Bibliapita yachakur qallëkurqan. Juk paqasmi, juk Testïgowan wayïkunachö estudiëkar teytä mäkurirqan pakëllapa wiyëkanqäta. Punukoq kutikunäpaq nimänanna këkaptinmi, yachëkätseq Testigo kënö nirqan: “¿Imanirtaq munankitsu Elva noqantsikwan täkamunanta?”. Tsëpita patsëmi kawënïqa cambiarirqan, y rasumpa kaq Dios Jehoväwan amigo këtam qallëkurqä.

Tsëpita ichikllatanam, teytäwan noqaqa reunionkunaman ëwar qallëkuyarqä, y pëqa jukläya nunanam tikrarirqan y ras piñakoq kënintapis jaqirirqanmi. Bibliapa yachatsikïninkuna alläpa yanapakunqanta rikarmi, mamänïwan Frank jutiyoq mayor kaq turïpis reunionkunaman ëwar qallëkayämurqan. * Chuskökunam Jehoväpa kaqpita más yachakur y pëta más kuyar bautizakuriyarqä. Tsëpita patsëmi edäna cristiano turïkunawan y nanäkunawan más amigo këman charqä, y pëkunam yanapayämarqan winanqämannö tukïpa pasanqäkunachö.

KAWËNÏCHÖ IMATA RURANÄPAQ KAQTA AKRÄ

Congregacionchö edäna turikunawan y nanakunawan tiempota pasëmi alläpa gustamaq. Tsëmi teytäta puntata yachatseq Alice Place nanaqa awilä cuenta karqan. Pëmi yanapamarqan Diospita yachatsikunäpaq y bautizakunärëkur kallpachakunäpaq, tsëmi 15 watayoq këkar bautizakurqä.

Jinamampis, Percy Dunham y warmin Madge (Margaret) edäna cristiänokunawanmi alläpa amigo tikrarqä, y pëkunam yanapayämarqan kawënïchö imata akranäpaq kaqta. Matemäticata estudiëmi alläpa gustamaq y tsëmi profesora këta munarqä. Pero pëkunata rikarmi juknöpana pensarqä. Percywan Madgeqa 1930 witsanmi Letonia nacionchö  misionero kayarqan. Y Euröpachö Ishkë kaq Jatun Guerra qallëkuptinmi, Australia nacionchö këkaq Sydney markapa amänun Betelman invitariyarqan. Misionero karnin Diospita yachatsikur alläpa shumaq pasayanqampitam imëpis willayämaq. Tsënöpam cuentata qokurirqä Bibliapita yachatsikïqa matemática yachatsikïpita más alli kanampaq kaqta. Tsëmi misionera kanäpaq churapakarqä.

Misionera kanäpaqqa precursora kë yanapamänampaq kaqtam Percywan Madgeqa niyämarqan. Tsëmi 1948 watachö 16 watayoq këkar Hurstville (Sydney) marka congregacionchö chunka joven mayïkunawan precursöranö kushishqa yanapakur qallarqä.

Nueva Gales del Sur y Queensland nishqan estädokunachömi, chusku markakunachö chusku watapa Diospita yachatsikur karqä. Bibliapita yachatsinäpaq puntata awnimaqqa karqan Betty Lawmi (casakuriptinqa Remnantmi apellïdon karqan). Ishkë watapam mayornï karqan y alläpa kuyakoqmi kaq. Tiempo pasariptinqa ishkämi precursöranö yanapakuyarqä Cowra nishqan markachö, tsëqa këkan Sydneypita Inti o Rupay jeqanan lädopam 230 kilömetroschö. Wallka tiempolla Diospita yachatsikur purishqa karpis, kanankamam alli yanasa kayä.

Tsëpitaqa precursora especial kanäpaqmi niyämarqan, y Cowra markapa suroeste kaq lädonmampa 220 kilömetroschö këkaq Narrandera nishqan markamanmi mandayämarqan. Y mushoq yanaqïqa karqan yachatsikïta gustaq Joy Lennox (casakuriptinqa Huntermi apellïdon karqan) jutiyoq nanam, pëpis ishkë watapam mayornï karqan. Tsëchöqa ishkäkunallam Testigo kayarqä. Alläpa kuyakoq Ray y Esther Ironspa wayinchömi punuyaq kayä, pëkunaqa wamrankunawanmi Bibliapita yachakur qallayarqan. Tsë markapita karuchö këkaq granjachömi Raywan tsurinqa üshata mitsir y trïgota mururnin semänachö trabajayaq. Y Estherwan warmi wamrankunanam pensionta qokur trabajayaq. Joywan noqaqa domingokunapam familiapaq y ferrocarrilchö trabajaq nunakunapaq asädota rurayaq kayä. Tsëta rurarmi wakin qellëwanqa alquilerta pagakuyaq kayä. Tsëpitaqa, mësata limpiarirmi Irons familiawan imëka mishki mikïtanö Täpakoq revistapita tsëchö yachakuyaq kayä. Joqtanmi Bibliapita yachakuyarqan y Narrandera markachö punta Testïgokuna këman chäyarqan.

1951 watachömi, Sydney markachö Jehoväpa testïgonkuna rurayanqan asamblëaman ëwarqä. Misionero këta munaq precursorkunapaqmi juk reunionta jatun carpa rurinchö rurayarqan, y tsëmanmi kima pachakpita más ëllukäyarqä. Brooklyn Betelpita Nathan Knorrmi, jinantin Patsapa Diospita yachatsikï imanir alläpa precisanqanta rikätsiyämarqan. Llapäkunam juk kutillapis mana qemtsirishpa wiyakuyarqä. Tiempowanqa Pacífico sur nishqanman y más markakunamanmi tsë precursorkunaqa Diospita yachatsikïta puntata chätsiyarqan. Y 1952 watachö rurakaq Galaad Escuëlapa 19 kaq cläsenmanmi noqatawan chunka joqta Australiapita precursorkunata invitayämarqan. ¡Imanömi kushikïkurqä 20 watayoqllaraq këkar misionera këman chärir!

WAKINKUNACHÖQA CAMBIANÄRAN KARQAN

Galaad Escuëlaqa manam Bibliapita más yachakunällapaqtsu ni Diosman más markäkunäpaq o yärakunällapaqtsu yanapamashqa, jina más alli cristiana tikranäpaqwanmi. Jövenllaraq karmi imapis allilla yarqapamänanta y wakinkunapis tsënölla kayänanta munaq kä. Jinamampis, wakin rurëkuna allilla këkaptimpis noqaqa mana allitanömi rikaq kä. Tsëmi juk kuti joven betelïtakunawan turi Knorr beisbolta pukllëkaqta rikëkur mantsakashqa quedarirqä.

Galaad Escuëlachö yachatsikoq alli yachaq turikunaqa cuentata qokuriyarqanmi imanö sientekunqäta, tsëmi noqapaq yarpararnin yanapayämarqan mana allitukunäpaq. Ichikllapa ichikllapam yachakurirqä Jehová alläpa kuyakoq Dios y agradecikoq  kanqanta, y llapantapis allillata y ras ruranäta mana shuyaranqanta. Jina estudiaq mayïkunapis alläpam yanapayämarqan, juk kaqmi kënö nimarqan: “Elva, Jehoväqa manam chicotenwantsu purikan. ¡Llapampis paqwë allilla yarqushunëkitaqa ama shuyarëtsu!”. Tsënö claro parlapëkamanqanqa shonqöyaqmi chäramurqan.

Cläsekuna ushariptinmi, Namibia (África) nacionman pitsqaqta kachayämarqan. Ichik tiempollachömi, llapäkuna yuparirqa puwaq chunka nunakunata Bibliapita yachëkätsiyarqä. Misionera kë y tsë nacionchö yanapakïqa alläpam gustamaq, pero Galaad Escuëlachö juk estudiaq mayïtam alläpa kuyakurkurqä, y pëtaqa Suiza nacionmanmi kachayarqan yanapakunampaq. Tsëmi juk wata pasariptin tsë nacionta ëwakurqä y tsëchömi casakuyarqä. Y nïkurmi congregacionkunata watukar tsëchö yanapakuyarqä.

JUK DESGRACIAM PASËKAMARQAN

Pitsqa watapam congregacionkunata kushishqa watukayarqä, y tsëpitam Suïzachö Betelman invitayämarqan. Edäyashqana y Jehoväpa kaqchö poqu cristiänokunawan juk familianö betelchö junto kawakïqa alläpa shumaqmi karqan.

Tsëpita ichik tiempollatam juk desgracia pasëkamarqan, Jehovätawan noqata nunä traicionäyämanqantam musyarirqä. Y nïkurmi jaqiramarqan. Tsëta rurëkamanqanqa imanömi nanëkamarqan. Imanöraq käman karqan Betelchö edäna turïkuna y nanäkuna kuyayämar mana yanapayämaptinqa. Pillawampis parlëta munanqä höram pëkunaqa wiyayämarqan, jina japallälla këta munanqätapis respetayarqanmi. Shoqëpa shumaq parlapäyämanqan y noqapaq tukïta rurayämunqanmi alläpa yanapamarqan tsëläya llakikïnïchö Jehoväman más witinäpaq.

Tukï pruëbakunata pasar alli tsarakushqa edäna cristiänokuna niyämanqantam yarpärirqä. Madge Dunham kënö nimarqan: “Elva, Jehoväta sirwinqëkichöqa tukï pruëbakunam kanqa, pero más sasa o ajaqa kanqa kuyanqëkikunapita shamoq kaqmi. Tsënö pasashuptikiqa, masmi Jehoväpita tsaripakunëki. Ama imëpis qonqankitsu pëta sirwikanqëkita, y manam jutsasapa nunakunatatsu”. Tsë consejamanqanqa alläpam yanapamarqan sasa o aja pruëbakunapa pasanqächö. Manam jaqirqätsu nunäpa mana alli rurëninkuna Jehoväpita rakiramänanta.

Tsëpitaqa Australia naciontam kutikurqä precursöranö familiäpa amänunllachö sirwinäpaq. Kutinqä barcochöqa alläpa shumaqmi Bibliapita parlakuyarqä atskaq pasajërokunawan. Y tsëchömi Arne Gjerde jutiyoq Noruega nacionpita nunata alläpa gustëkurqan yachatsikunqäta wiyë. Tsëpita juk tiempotam Sydney markaman watukayämaq shamurqan. Y ichik tiempollachömi, Bibliapita más yachakur bautizakurirqan. 1963 watachömi pëwan casakurqä, y ishkë wata pasariptinnam, Gary jutiyoq wamräkuna yuririrqan.

YAPË JUK JATUN DESGRACIA

Arne, Gary y noqaqa alläpa kushishqam kawakuyarqä. Tsëpita ichik tiempo pasariptinmi Arneqa wayïkunata más jatunyätsimurqan tsëchö edäyashqa teytäkunawan paqta yachayänäpaq. Casakuyanqäpita joqta wata pasariptinnam, alläpa llakikïpaq noticiata chaskiriyarqä: Arnepa peqanchö cancer kanqantam willarayämarqan. Radioterapia nishqan tratamientotam atska tiempopa hospitalchö chaskirqan, tsëmi cada junaq cuidaqnin ëwaq kä. Qallananchöqa alliyëkarqannam, pero tsëpitaqa antsakurkurqanmi y ataque cerebral nishqanmi  tsarïkurqan. Juk ishkë semänakunallana kawanampaq kaqtam niyämarqan. Pero Arneqa jukläyärirqanmi y wayïkunatam kutikuyarqä, tsëchömi más alliyänampaq ichikllapa ichikllapa yanaparqä. Tiempowanqa yapëmi purir qallëkurqan y congregacionchöpis yapëmi anciänonö yanapakurqan. Kushi kushilla y asitsikoq kanqanmi saludninchö alläpa yanaparqan, jina noqatapis yanapamarqanmi shumaq cuidanäpaq.

Juk ishkë watakuna pasariptinmi, 1986 watachö yapë qeshyakurkurqan. Tsë witsampaqqa teytäkuna wanukushqanam kayarqan, tsëmi Sydneypita ëwakuyarqä montes Azules nishqanman, tsëchöqa amïgökunapita más amänunchömi kayarqä. Tiempo pasariptinmi Garyqa casakurqan Diosta alli sirweq y alläpa yachanëpaq Karin jutiyoq cristiänawan. Juk ishkë killakunatanam, pëkuna niyämaptin chuskökuna ëwakuyarqä Arnewan noqa unë yachayanqäpita juk ishkë cuadrachö këkaq wayiman.

Kuyashqa nunalläqa o runalläqa chunka isqun killakunapam cämallachöna karqan, y imëpis cuidayänanta wanaptinmi noqaqa wayichö más tiempo quedakoq kä. Llapan junaqkuna Bibliapita y publicacionkunapita ishkë höranö yachakurmi pasëkanqächö tsarakunäpaq alli yanapakïkunata tarirqä. Congregacionpita edäna cristiano mayïkuna y noqanö pasashqakuna shumaq visitamarmi kallpata qoyämarqan. Arneqa abril de 2003 watachömi wanukïkurqan, y pëqa llapan shonqunwanmi markäkurqan o yärakurqan kawarimunampaq kaqman.

LLAPAMPITA MÁS YANAPAMAQNÏ

Joven karqa llapampis allilla yarqapamänantam munaq kä, pero kë kawëchöqa kikintsik pensanqantsiknöqa höralla imapis yarqunqantam yachakurqä. Imëka kushikïkunapam pasarqö, pero alläpa llakikïpaq desgraciakunapapis pasarqömi: jukqa karqan punta kaq majä traicionamanqanmi, y juknin kaqnam, cancerwan juk kaq nunä wanukïkunqan. Tsë llapan tiempochömi mëtsikaq cristiänokuna yanapayämarqan y kallpata qoyämarqan. Tsënö kaptimpis, llapampita más yanapamaqqa Jehovämi kashqa, “mana yupëpaq kawaq Awkin” (Dan. 7:9). Palabran Bibliawanmi yanapamarqan alli cristiana tikranäpaq, y misionera kanäpaq cargo qomanqanwanmi tukï allikunapa pasarqä. Problëmakunapa pasaptïmi alläpa kuyakoq këninwan shoqamarqan y almäta shullpaparqan (Sal. 94:18, 19). Jinamampis, familiäpa y cristiano mayikunapa kuyakïninta y yanapakïnintam imëpis chaskirqö, y masqa edäyashqa kaqkunapita. Pëkunaqa llapampis “llakikï tiempochö yanapa[yämänam]paq yurishqam” kayashqa (Pro. 17:17).

Diosta sirweq Jobmi kënö tapukurqan: “¿Manaku edäyashqakunaqa más yachaq kayan, y mëtsika junaqkuna kawashqakunaqa imëkatapis más käyiyan [tanteayan]?” (Job 12:12). Tsënö kanqantam claro rikä: edäyashqa nunakunaqa consëjonkunawanmi imëpis yanapayämashqa, shoqakïninkunawanmi kallpata qoyämashqa y amistäninkunawanmi alläpa kushitsiyämashqa. Alläpam kushikö mëtsika edäyashqa amïgokunayoq kanqäpita.

80 watatanam usharirqö, tsëmi kananqa noqana edäyashqa cristiana kä. Imëkakunapa pasashqa karmi edäyashqakunata alläpa llakipä, tsëmi alläpa gustaman pëkunata watukë y yanapë. Jina joven kaqkunawan tiempota pasëpis alläpam gustaman. Pëkunawan takuraptïqa kallpäkunapis yuririnmi y más kushishqam sientekö. Yanapanäpaq o consejanäpaq ashiyämaptinqa listom këkä.

[Päginapa ura kuchunchö willakï]

[14 kaq päginachö fötu]

Joy Lennoxwan noqa, Narrandera markachö precursora kayanqä witsan

[15 kaq päginachö fötu]

Suiza Betelchö cristiano mayinkunawan Elva 1960 watachö këkanqan

[16 kaq päginachö fötu]

Arneta cuidëkar