‘Fariseucunapa lebadurancunapita cuidacuyë’

Jesusmi kënö nirqan: “Alli tucoq fariseucunaqa imeca lebaduranomi cayan. Tsemi pecunapita cuidacuyë” (Luc. 12:1). Këta ninqanwanqa, ¿ima mana alli kanqantataq nikarqan? Mateo librom yachatsikun farisëokunapa “mana alli yachatsiquinincuna[paq]” parlëkanqanta (Mat. 16:12).

Bibliachöqa, höraqa mana alli rurëkuna imëka llevadüranö kanqantam nin. Awmi, farisëokunapa portakïninkuna y yachatsikïninkunaqa mana alli rurëkunamanmi nunakunata chätseq. Pero ¿imanirtaq yachatsikïninkunaqa alläpa peligroso karqan?

1 Alläpa allitukurmi wakin nunakunataqa despreciayaq.

Juk igualatsikïwanmi Jesus rikätsikurqan pëkuna alläpa allitukoq kayanqanta, kënömi nirqan: “Tse fariseu caqmi shëcar, shonquncho queno mañacorqan: ‘Dioslla, grasiastam qoq noqa mana waquin nunacunano canqäta. Waquincunaqa suwam, jutsasapam, jucwan jucwan yachacoqmi cayan. Ni manam taqe impuestu cobraqnotsu cä. Noqaqa cada semanam ishque cuti ayunar micütsu; y llapan gananqätam chuncaman raquirir, juc caqta qoycoq’ nir. Peru impuestu cobraq caqnam carullacho shacur, peqantapis sieluman mana pallarerqantsu. Sinoqa allapa llaquicushpam pechuntapis cutar, nerqan: ‘Diosllä, ancupëcallämë. Noqalläqa allapa jutsasapa nunam callä’ nishpa” (Luc. 18:11-13).

Jesusqa impuesto cobraqta qollmi shonqu kanqampitam alabarqan. Kënömi nirqan: “Contribusion cobraq nunam wayinman cuticorqan jutsanpita perdonashqana; peru fariseoqa, manam. Porqui pipis alli tucoq caqqa, penqacushqan canqa; y qollmi shonqu caqqa, alli presisaqmi canqa” (Luc. 18:14). Impuesto cobrakoqkunata farisëokuna wakinkunapita más jutsasapatanö rikäyaptimpis, Jesusqa yanaparqanmi wiyakoq kaqkunataqa. Awmi, tsënöpam Mateo y Zaquëopis impuesto cobrakoqpita qateqnin këman tikrayarqan.

Imachöpis yachaq kanqantsik, congregacionchö cargoyoq kanqantsik, wakinkuna imallachöpis pantayanqanta rikanqantsik y imëka maskunapis itsa pensatsimashwan wakinkunapita más alli kanqantsikta. Tsënö pasamashqaqa pensënintsiktam raslla altsanantsik, porque Bibliaqa kënömi nimantsik: “Nuna mayinta cuyaqqa imata rurayaptinpis, awantanqam, ancupanqam, manam chiquenqatsu, ni nicachaq usharishqa purenqatsu, ni nuna tucoq canqatsu. Nuna mayinta cuyaqqa manam lluta shiminpaqa qayapanqatsu, ni imatapis manam quiquinllapaqqa ashenqatsu, ni piñashqa purenqatsu, ni ofendenqantapis yarparanqatsu. Nuna mayinta cuyaqqa manam lluta rurecunapita cushenqatsu, antis alli rurecunapitam cushiconqa” (1 Cor. 13:4-6).

Apóstol Pablupanömi pensanantsik, pëqa “Jesucristum que patsaman shamorqan jutsasapacunata salbananpaq” nirirmi, kikimpaq kënö nirqan: “Tse jutsasapacunapitapis mas peormi carqä” (1 Tim. 1:15).

Yarpachakunapaq:

¿Yarpäku jutsasapa kanqäta y Jehoväpa kuyakïnimpitaraq salvakunäpaq kaqta? ¿O mëtsika watakunana Diosta sirwinqä, congregacionchö cargoyoq kanqä o yachaq kanqäku wakinkunapita más alli kanqäta pensatsiman?

  2 Wakinkuna alagayänampaqmi religiosotukuyaq. Imëkachöpis alläpa precisaq këtam ashiyaq y alläpa respëtowan qayayänantam munayaq.

Jesusqa kënömi nirqan: “Imecatapis ruraq tucuyan nunacuna alabayänanllapaqmi. Diospa palabrantanäqa urcuncunachopis y ricrancunachopis anchu sintacho escribïcur puricatsiyan. Y ‘Allapa relijiosum’ nir, nunacuna alabayänanpaqmi, tunicatanäqa shumaq flecuyoq jirecushqatam chaqui puntanyaq yacacushqa puricayan. Micupäquiman qayatsiyaptinpis, punta puntaman taquitam gustayan. Ellucayänan wayichopis mas presisaqcuna täcuyänanmanmi täquita munayan. Callicunachonäqa allapa respetuwan ‘Mayestru’ nir, saludayänantam munayan” (Mat. 23:5-7). ¡Imanö jukläyam Jesusqa karqan! Diospa jutsannaq Tsurin këkarnimpis, qollmi shonqum karqan. Juk joven “Alli mayestru” niptinmi kënö nirqan: “¿Imanirtaq ‘Alli’ nimanqui? Jucllellam alleqa, y tseqa Diosllam” (Mar. 10:18). Y juk kutinäqa qollmi shonqu kayänampaq yachatsirmi qateqninkunapa chakinkunata paqapurqan o awipurqan (Juan 13:1-15).

Rasumpa kaq cristiänoqa, cristiano mayinkunatam kushishqa sirwin (Gal. 5:13). Y tsënö kayänanqa masmi precisan congregacionta rikar yanapakïta munaqkunapaqnäqa. “Pipis inglisiacho mandacoq [“anciano”, NM] queta munarqa, allitam yarpecushqa”, pero tsëtaqa munanan cristiano mayinkunata rasumpa yanapëta munarmi. “Anciano” këqa manam autoridadyoq këman ni precisaq këmantsu pitapis chätsin. Anciänokunaqa Jesusnömi “qollmi shonqu” kayänan (1 Tim. 3:1, 6; Mat. 11:29).

Yarpachakunapaq:

¿Allitanö rikäyämänanrëkur o ima cargotapis chaskinärëkurllaku congregacionta rikaqkunata wakimpita más alli tratä? ¿Alabayämänampaq o reqishqa kanärëkurllaku ima cargoyoq këtapis ashï? ¿Wakinkunapitapis más precisaq këtaku munä?

  3 Leykunata y costumbrekunata munayanqanmannö patsätsirmi, Diospa Leyninkunata nunakunapaq alläpa sasatanö o ajatanö tikratsiyarqan.

Moises qellqanqan Leyqa Jehoväta imanö adoranapaq kaqtam rikätsikoq, pero manam llapanchö imanö rurayänampaq kaqtatsu neq. Këman yarpärishun, säbadopa trabajayänantaqa micharqanmi, pero manam nirqantsu ima rurëkuna trabajo kanqanta o mana kanqantapis (Éxo. 20:10). Tsënö mana niptinmi farisëokunaqa patsätsiyarqan tukïläya leykunata y costumbrekunata. Pero Jesusqa Diospa Leyninkunata cumplirpis, farisëokuna munayanqanmannö patsätsiyanqan leykunataqa manam cumplirqantsu (Mat. 5:17, 18; 23:23). Jesusqa tsë Ley ima ninan kanqantam rikaq, imanöpa Dios patsätsinqanta, y musyarqanmi llakipäkoq kë alläpa precisanqanta. Tsënö llakipäkoq kanqantaqa manam jaqirqantsu mandanqanta qateqninkuna mana wiyakuyaptimpis. Tantearinapaq, tsariyänan paqasqa kiman apostolninkunatam nirqan mäkoqlla y riyaqlla o rikchalla këkäyänampaq, pero pëkunaqa atska kutim punukäriyarqan. Tsënö kaptimpis, ankuparnin o llakiparninmi kënö nirqan: “Boluntaniquicuna alli captinpis, sasam rurarcuyänequipaq” (Mar. 14:34-42).

Yarpachakunapaq:

¿Aja o sasa ruranan kaqkunataku imëpis patsätsï? ¿Imëkapis noqa pensanqänö rurakänantaku ashï? ¿Imatapis mana pantëpa rurayänantaku imëpis munä?

Llapantsikpaqpis precisanmi Jesuspa yachatsikïninkunawan farisëokunapa yachatsikïninkuna imachö jukläya kanqanta pensarir, imachö alliyänantsik pishinqanta rikänantsikqa. Awmi, tsëkunachö alliyänapaq kallpachakunqantsikqa allipaqmi kanqa.

[28 kaq päginachö dibüju]

Farisëokunaqa ichik cajïtakunachömi Bibliapa wakin textonkunata qellqëkur puritsiyaq (Mat. 23:2, 5)

[29 kaq päginachö dibüjukuna]

Allitukoq farisëokunapitaqa, qollmi shonqu karmi anciänokunaqa cristiano mayinkunata yanapayan

[30 kaq päginachö dibüju]

¿Jesus pensanqannöku pensëta tïrantsik?