¿Jehoväpa alli këninta rikätsikïkankiku?
¿Jehoväpa alli këninta rikätsikïkankiku?
“Teytapa alli queninta[m] juc espeju cuenta nunacunata ricatsintsic.” (2 COR. 3:18.)
¿IMA NINKIMANRAQ?
¿Imanirtaq jutsasapa karnimpis Jehoväta alabëta puëdentsik?
¿Imanötaq yanapamantsik mañakïnintsik y reunionkunaman ëwanqantsik Diospa alli këninta rikätsikunapaq?
¿Imataq yanapamäshun Jehoväta imëpis alabëta mana jaqinapaq?
1, 2. ¿Imanirtaq Jehoväpa alli këninta rikätsikïta puëdentsik?
ATSKAPA kar o ichikllapa karpis llapantsikmi teytantsik niraqlla kantsik. Imëpis wiyantsikmi ollqu wamrata kënö niyaqta: “¡Paqwë teytëki niraqllam kanki!”. O warmi wamratana kënö niyaqta: “Qamqa mamëkitam yarpätsimanki”. Jinamampis, wamrakunaqa teytankuna rurayanqantam rurëta tïrayan. Y noqantsikqa, ¿ciëlochö këkaq Teytantsik Jehovänö këta puëdentsikku? Kikinta rikëta mana puëdernimpis, imanö Dios kanqanta rikëtaqa puëdentsikmi, kamanqankunata rikar, Bibliata estudiar, leinqantsikkunaman yarpachakur, y Tsurin Jesucristu yachatsikunqankunapita y rurëninkunapita yachakur (Juan 1:18; Rom. 1:20). Tsëmi Jehová imanö kanqanta rikätsikïta puëdentsik.
2 Adanwan Ëvata manaraq kamarmi Diosqa musyarqanna nunakuna Pëpa munëninta rurëta, imanö kanqanta rikätsikïta y alabëta puëdeyänampaq kaqta (lei Génesis 1:26, 27). Diosnintsik imanö kanqanta rikätsikurqa, alläpa alli kënintam rikätsikïkantsik, y tsëqa alläpa kushikïpaqmi. Y ima kasta kar, më marka kar o estudiashqa o mana estudiashqa karpis, llapantsikmi tsëtaqa logrëta puëdentsik. ¿Imanir? Porque ‘llapan nunatapis Diosqa iwalllatam ricamantsic. Jinantin marcacho pipis allicunata rurar y Diosta respetar cacuyaptenqa, pëqa chasquinmi’ (Hech. 10:34, 35).
3. ¿Imanötaq sientekuntsik Jehoväta sirwirnin?
3 Ciëlopaq akrashqa cristiänokunaqa Jehoväpa alli kënintam rikätsikuyan. Tsëmi apóstol Pablupis ciëlopaq akrashqa kar, kënö qellqarqan: “Noqantsicpis qaqllantsic tsapacashqa cuenta mana captin[mi], Teytapa alli queninta juc espeju cuenta nunacunata ricatsintsic. Y quiquin Teytantsicmi Santu Espiritunwan yanapamashqa ichicllapa ichicllapa quiquin espantepaq Teytano juclaya alli nuna ticraquicantsic” (2 Cor. 3:18). Sinaí jirkapita Chunka Mandamientokunawan Moises uräramuptinmi, qaqllanqa paqwë chipapëkarqan Jehoväwan parlashqa kaptin (Éxo. 34:29, 30). Awmi, cristiänokunaqa manam tsënöpa pasarquntsiktsu ni qaqllantsikpis Moisespanö chipapantsu. Tsënö kaptimpis, Jehoväpita, imanö kanqampita y imata ruranampaq kaqpita nuna mayintsikta kushishqa yachatsirqa, imëka qaqllantsikpis chipapaq cuentam kantsik. Unë witsankuna metalta luchoqyätsir rurayanqan espëjonömi ciëlopaq kaq o Patsapaq kaq cristiänokunaqa kawënintsikwan y alli willakïta musyatsikunqantsikwan Diospa alli këninta rikätsikuntsik (2 Cor. 4:1). Tsëmi alläpa alli kanman kënö tapukunantsik: “¿Jehoväpa alli këninta rikätsikïkäku alli portakur y imëpis Diospa Gobiernompita yachatsikoq yarqurnin?”.
JEHOVÄPA ALLI KËNINTAM RIKÄTSIKÏTA MUNANTSIK
4, 5. a) ¿Imawantaq Pablunöpis llapantsik tsaränakuntsik? b) ¿Imamantaq jutsasapa kanqantsik chätsimantsik?
4 Jehoväta sirweqkunaqa munënintsikchö y rurënintsikchömi pëta respetanqantsikta y alabanqantsikta rikätsikïta munantsik. Pero tsëta tïrarpis höraqa manam lograntsiktsu. Kikin apóstol Pablupis tsë problëmapaqa pasarqanmi (lei Romanos 7:21-25). Pëqa kënö nirmi rikätsikurqan nunakuna mana alli munëninkunawan imanir tsaränakuyanqanta: “Porqui llapantsicmi jutsayoqqa quecantsic. Tsenopam Diospa shumaq queninpita melanepaq caquicantsic” (Rom. 3:23). Awmi, nunakunaqa imëka mana allikunaman chätsikoq Adan muyamanqantsik jutsapa makinchömi këkantsik (Rom. 5:12; 6:12).
5 Pero ¿imataq jutsaqa? Tsëqa Jehoväpa alli kënimpa, munënimpa y Leyninkunapa contran ruranqantsikkunam. Jutsaqa Dioswan amigo kënintsiktam ushakätsin. Diospa shumaq këninta rikätsikunata michämashqam tsëta lograntsiktsu, imëka juk nuna animalta shawëta tïrëkar mana lograqnö. Höraqa musyëkar o mana musyëkarmi jutsamanqa ishkintsik (Núm. 15:27-31). Ëtsapa mana alli munëninkunaqa kikintsikchömi këkan y Diosnintsikpitam rakimantsik (Sal. 51:5; Isa. 59:2; Col. 1:21). Casi llapan nunakunam Jehovätaqa reqiyanpistsu, tsëmi alli këninta rikatsikïta puëdeyantsu. Clärom këkan, manam ni imapis jutsapita masqa nunakunata jipatsintsu o ñakatsintsu.
6. ¿Imanirtaq jutsasapa këkarpis Diosta alabëta puëdentsik?
6 Jutsasapa kashqapis Jehoväqa ‘marcäquita qomaqnintsic Diosmi’ (Rom. 15:13). Juk alläpa precisaqtam patsätsimushqa jutsapita libramänapaq: salvamänantsikrëkur Tsurin Jesucristu wanunanta jaqir. Jesus wanunqanman markäkurqa “jutsa[pa] esclabun” këtam jaqirintsik y Jehoväpa alli kënintam rikätsikïta puëdentsik (Rom. 5:19; 6:6; Juan 3:16). Pëwan amigo kënintsikta mana oqrarqa, nawimpaq allim kanan witsan kashun y shamoq tiempochönam, jutsannaq këta y mana wanïpa kawakïta tarishun. Shumaq pensarishun: jutsasapa këkashqapis Diosqa munanmi alli këninta rikätsikunata. ¿Manaku tsëqa alläpa kushikïpaq?
¿IMANÖTAQ DIOSPA ALLI KËNINTA RIKÄTSIKUNTSIK?
7. ¿Imatataq musyanantsik Diospa alli këninta rikatsikïta munarqa?
7 Diospa alli këninta rikätsikunapaqqa jutsaman raslla ishkeq kanqantsiktam yarpänantsik (2 Cró. 6:36). Y tsëta musyarirqa paqwëmi kallpachakunantsik tsë mana alli munënintsikta tsaränapaq. Tsëta rurarllam Diostaqa rasumpa alabëta puëdeshun. Këman pensarishun, warmipis ollqupis qalapächu mana alli rurëkaqta rikaräkïman ishkishqa kashwan. Tsëqa, ¿imataraq rurashwan? Diospa kaqchö yanapashqa këta wananqantsiktam cuentata qokunantsik, y nïkurnam yanapakïta ashinantsik (Sant. 5:14, 15). Tsëtam puntataqa ruranantsik kawënintsikchö Diosta rasumpa respetanqantsikta rikätsikunapaqqa. Tsëmi Jehoväta sirweqkunaqa imëpis musyanantsik Jehová ninqannö kawëkanqantsikta o mana kawëkanqantsiktapis (Pro. 28:18; 1 Cor. 10:12). Diospa alli këninta rikätsikïta munarqa ima kaptimpis mana alli munënintsiktam tsaränantsik.
8. Jutsasapa karpis, ¿imatataq ruranantsik?
8 Diosta kushitseq y alli këninta paqwë rikätsikoqqa Jesusllam kashqa. Awmi, noqantsikqa jutsasapam kantsik, pero llapan puëdenqantsiktam ruranantsik pëta qatinapaq (1 Ped. 2:21). Jehoväqa rikëkämantsikmi y bendecimantsikmi pëta alabanarëkur kallpachakushqa y tukïta rurashqaqa.
9. ¿Imanötaq Bibliata rikäyan Diosta kushitsita munaq cristiänokunaqa?
9 Bibliaqa nänintsiktam aktsimun y más alli cristiano kanapaqmi yanapamantsik. Tsëmi alläpa precisan leinantsik, leinqantsikman yarpachakunantsik y alli yachakunantsik (Sal. 1:1-3). Llapan junaqkuna leirqa tukïchömi más alli cristiano tikrashun (lei Santiago 1:22-25). Diospa Palabranta más reqirqa masmi pëman markäkushun, y listom këkäshun jutsakunapita witikunapaq y Jehoväta kushitsinapaq (Sal. 119:11, 47, 48).
10. ¿Imanötaq mañakunqantsik yanapamantsik Jehoväta llapan shonquntsikwan sirwinapaq?
10 Diospa alli këninta rikätsikunapaqqa, “imepis mañaquicayë Diosman” nir Biblia consejamanqantsikta wiyakunantsikpis alläpam precisan (Rom. 12:12). Jehovätaqa mañakunantsikmi pë munanqannö adoranarëkur yanapamänapaq. Awmi, más markäkunapaq o yärakunapaq, tentacionkunachö tsarakunapaq y ‘Diospa Palabranpita shumag yachatsicunapag’ santo espïritunta mañakurqa allitam rurantsik (2 Tim. 2:15, NTCN; Mat. 6:13; Luc. 11:13; 17:5). Imëka juk wamra teytanman markäkoqnömi noqantsikpis ciëlochö këkaq Teytantsikman markäkunantsik. Llapan shonquntsikwan sirwinapaq mañakurqa, markäkunantsikmi contestamänapaq kaqman. Y manam pensanantsiktsu mañakïnintsikkuna piñatsinampaq kaqtaqa. ¡Tsëtaqa ardëmi pensashwan! Alabanapaq, agradecikunapaq y tukï problëmakunachö yanapamänapaqqa mana ni ichikllapis mantsakurmi pëman mañakïta puëdentsik. Jinamampis, pëpa kaqchö rurënintsikwan limpio jutinta alabanarëkur yanapamänapaqpis mañakïta puëdentsikmi (Sal. 86:12; Sant. 1:5-7).
11. ¿Imanötaq reunionnintsikkuna yanapamantsik Diospa alli këninta rikätsikunapaq?
11 Diosqa “mäcoq, mäcoq, cumplidu sirweqnin[tam]” cargota qoshqa üshankunata cuidanampaq (Mat. 24:45-47; Sal. 100:3). Tsë “cumplidu sirweq[qa]” Jehoväpa alli këninta rikätsikunatam munan. Imanömi juk jiraq nuna röpantsikta altsaramïta puëden, tsënöllam reunionnintsikkunapis alli cristiano kanapaq “altsamënintsikta” puëden (Heb. 10:24, 25). Tsëmi alläpa precisan temprano chänantsik. Imëpis tarderaq charqa, más alli cristiano kanapaq Jehoväpa wakin yanapakïninkunatam perdishun.
DIOSNÖ KËTA TÏRASHUN
12. ¿Imakunachötaq Diosnö këta tïranantsik?
12 Diospa alli këninta rikätsikunapaqqa pënö këtam tïranantsik (Efe. 5:1). Juknöpaqa tsëta rurantsik pënö pensëta tïrarmi. Imëkapaqpis imata pensanqanta mana cuentapaq churarlla kawakurqa jutintam rakchatäshun o iskatäshun, y kikintsikmi mana alliman chäshun. Kanan witsan mana alli nunakuna y rurëninkunaqa Diablupa makinchömi këkäyan, tsëmi Jehová chikinqantaqa paqwë chikita yachakunantsik, y kuyanqan kaqtaqa alläpa kuyanantsik (Sal. 97:10; 1 Juan 5:19). Paqwëmi markäkunantsik Diosta alli sirwinapaqqa pëta kushitsinqan kaqkunallata ruranantsik alläpa precisanqanman (lei 1 Corintios 10:31).
13. ¿Imanirtaq jutsata alläpa chikishwan, y imatataq ruranantsik?
13 Jehoväqa alläpam chikin jutsa rurëta, y tsënöllam noqantsikpis chikinantsik. Tsëmi jutsaman witipänantsikpa rantinqa paqwë witikunantsik. Këman yarpärishun, juk jatun jutsaqa Diospa contran churakashqakunaman witipëmi kanman, y tsëqa paqwëmi rakchatäramashwan y mananam limpioqa Diosnintsikta alabëta puëdeshwannatsu (Deu. 13:6-9). Tsëmi Diospa contran tikrashqakunapita, y cristiano kayanqanta nikar Diosta mana respetaqkunapitaqa paqwë rakikäkurinantsik, mëläya familiantsik kayaptimpis (1 Cor. 5:11). Diospa markampaq niyanqankuna mana rasun kanqanta rikätsikïta tïrarqa manam imata jorqantsiktsu. Awmi, manam ichikllapis imanir tsënö parlayanqanta musyëta tïrashwantsu, qellqayanqankunata leirnin, ni Internetman churayanqankunata leirnin o maskunata rurayanqankunata wiyarnin o rikarnimpis, porque tsëqa Dioswan alli amigo kanqantsiktam ushakäratsinman (lei Isaías 5:20 y Mateo 7:6).
14. ¿Jehová imanö kanqantataq más rikätsikunantsik y imanir?
14 Ciëlochö Teytantsik imanö kanqantaqa rikätsikuntsik kuyakoq karmi (1 Juan 4:16-19). Juknintsik juknintsik kuyanakunqantsikqa rikätsikun Jesuspa qateqnin kanqantsikta y Jehoväta sirwinqantsiktam (Juan 13:34, 35). Jutsasapa kënintsik mana alliman ishkitsimënintsikta munaptimpis, allim tsarakunantsik y kuyakïnintsik más miranampaqmi más sinchikunantsik. Kuyanakïta y cristiano mayintsikwan alli kawakïta imëpis tïrarqa, manam ni imëpis nuna mayintsikta llakitsinqan kaqkunata rurashuntsu, ni jatun jutsakunaman ishkishuntsu (2 Ped. 1:5-7).
15. ¿Imanötaq kuyakoq kanqantsikta rikätsikushun?
15 Kuyakoq kanqantsikqa yanapamantsik llapankunapaq alli kaqta ruranapaqmi (Rom. 13:8-10). Majantsikta kuyarninqa manam imëpis traicionashuntsu. Anciänokunata kuyarnin y rurayanqankunata respetarninqa, wiyakoq y mandädonchömi kashun. Jövenkuna teytankunata kuyarninqa, respetayanqam y niyanqankunatam wiyakuyanqa, y manam pëkunapaq mana allita parlayanqatsu. Nuna mayintsikta kuyarninqa imëpis respëtowanmi tratashun, y manam pëkunapita más precisaqtukushuntsu ni yachaqtukushuntsu (Sant. 3:9).Y anciänokuna Diospa üshankunata kuyarninqa llapantapis kuyëpam tratayanqa (Hech. 20:28, 29).
16. ¿Imanirtaq precisan Diospa Gobiernompita yachakunqantsikchö kuyakoq kanantsik?
16 Diospa Gobiernompita yachatsikunqantsikchöpis alläpam precisan kuyakoq kanantsikqa. Nunakuna wiyakïta mana munayaptin o mana allipa tratamashqapis, Jehová Diosta alläpa kuyarninmi alli willakïnintaqa imëpis purikätsishun. Jinamampis, Diospa Gobiernompita alli yachatsikunapaqmi kallpachakunantsik y puntallapitanam alli preparakunantsik. Diosta y nuna mayintsikta rasumpa kuyarninqa, manam tsë rurënintsikta sasatanötsu o ajatanötsu rikäshun, ni ruranantsik kaptinllatsu rurashun, sinöqa alläpa precisaq y kushikïpaq rurëtanömi rikäshun (Mat. 10:7).
AMA IMËPIS JAQISHUNTSU JEHOVÄTA ALABËTA
17. ¿Imanötaq yanapamantsik Diospa alli këninta rikätsikunantsikta jutsasapa kënintsik michämanqantsikta musyanqantsik?
17 Wakin nunakunapitaqa noqantsikqa musyantsikmi jutsa alläpa mana alli kanqanta. Tsëmi cuentata qokuntsik Diospa alli këninta rikätsikunapaqqa, mana alli munënintsikta tsaränantsik alläpa precisanqanta. Ima mana alli munënintsik kanqanta musyanqantsikqa yanapamantsik concienciantsikta yachatsinapaqmi, y concienciantsiknam, mana alli munëkuna shonquntsikchö winëta tïraptin vencinapaq yanapamäshun (Rom. 7:22, 23). Jutsasapa kashqapis, Diosqa kallpata qomäshunmi imëkachöpis alli tsarakunapaq (2 Cor. 12:10).
18, 19. a) ¿Imatataq ruranantsik mana alli espïritukunapa contran churakänapaq? b) ¿Imata ruranapaqtaq alli churapakänantsik?
18 Jina Diosta alabanapaqqa mana alli espïritukunapa contranmi churakänantsik, tsëpaqqa yanapamäshun “Dios qomashqantsic llapan armacunawan prebinicur listu queca[nqantsikmi]” (Efe. 6:11-13). Satanasqa imëpis munëkanllam nunakuna Diosta alabayänampa rantin pëta alabayänanta. Jina tukï toqllakunatam utilizan Jehoväwan amigo kënintsikta ushakäratsinampaq. Tsëmi juk ollqu, warmi o wamra jutsasapa këkarpis Diosta imëpis mana jaqishpa alabaptinqa, Diablu pasëpa penqakïchö quedan. ¡Y tsëtaqa mëtsika millón cristiänokunam rurëkantsik! Tsënö këkaptinqa, Jehoväta imëpis alabëkäshun ciëlochö këkaqkunanö, pëkunaqa kënömi niyan: “Dios, qamllam puedeq canqui. Llapan imecatapis qammi camashqanqui. Cawenincuna qoshqa captiquim, llapanpis cawecayan. Tsemi qamtaqa llapanpis respetayäshurniqui, alabayäshunqui” (Apo. 4:11).
19 Imëka pasaptimpis, Jehoväta imëpis alabëkänapaq churapakäshun. Awmi, Diosnintsikqa alläpam kushikun mëtsikaq nunakuna pënö këta tïrar imanö këninta rikätsikuyänampaq kallpachakuyaptin (Pro. 27:11). Davidnömi noqantsikpis kënö nintsik: “Jehová Diosllä, llapan shonqöwanmi qamta alabaq, y jutikitaqa imëyaqpis alabashaqmi” (Sal. 86:12). Ichikllachönam Diosta sirweq cristiänokunaqa Jehoväpa imanö këninta paqwë rikätsikuyanqa, y mana imëpis ushaq kawëpam alabayanqa. ¡Imanö kushikïpaqraq tsëqa kanqa! ¿Munankimantsuraq llapan tiempopa Jehoväpa alli këninta rikatsikïta? Tsënö karqa, ¿rikätsikïkankinaku Diospa alli këninta llapan kawënikichö?
[Yachakunapaq kaqpa tapukïninkuna]
[27 kaq päginachö dibüjukuna]
¿Diospa alli këninta rikätsikïkankiku këkunata rurar?
