Leeqkuna tapukuyanqan

¿Imanirtaq “Jehoväpa nawimpaqqa alläpa valoryoqmi rasumpa kuyaqninkunapa wanïninqa” nin Biblia?

▪ Awmi, Jehoväpaqqa jukllaqllapa o llapampa karpis sirweqninkunapa kawëninqa alläpa valoryoqmi. Tsënö kaptimpis, Salmo 116:15 textochö qellqarëkaqqa manam juk alli nunapa wanïninllapaqtsu parlan.

Wanupakushqakunapaq discursochöqa manam allitsu kanman wanukushqapaq parlarnin tsë textota leiqa, tsë wanukushqa cristiano Jehoväta alli sirwikar wanushqa kaptimpis. ¿Imanir? Porque tsë textoqa manam juk sirweqpa kawëninllapaqtsu parlëkan. Tsëpa rantinqa, llapan sirweqninkuna paqwë ushakäriyänantaqa alläpa jatun desgraciatanö rikarnin, Jehová tsë pasananta mana jaqinampaq kaqtam Salmo qellqaqqa rikätsikïkarqan (rikäri Sal. 72:14 y 116:8).

Awmi, kë textoqa rikätsimantsik llapan sirweqninkunata ushakätsiyänantaqa Jehová mana jaqinampaq kaqtam. Tsëtam rikätsikun kanan witsan imëkakunapa pasanqantsik. Ushakätsimënintsikta tïrayaptin y qatikachämashqa alli tsarakunqantsikqa rikätsikun paqwë mana ushakänapaq Dios tsapëkamanqantsiktam.

Jehoväqa alläpa puëdeqmi, y munanqanqa chipyëmi cumplikanqa. Tsëmi markan paqwë ushakärinantaqa jaqinqatsu. Mana tsënö kaptinqa chikeqninkunachi pëpita más puëdeqnö quedariyanman, y tsëqa manam rasumpatsu. Tsë pasakuptinqa kë Patsa Diosta sirweqkunallawan junta kanampaq Jehová munanqanqa manachi cumplikanmantsu (Isa. 45:18; 55:10, 11). Jehoväpa templompa Patsachö këkaq pationchöqa manachi Diosta adoraq y sirweqqa ni jukllëllapis kanmantsu. Jinamampis, ‘mushog cielu’ gobernanampaq kaq ‘mushog patsa’ o Diosta wiyakoq nunakunaqa, manachi kë Patsachö kayanmannatsu (Apo. 21:1, NTCN). Patsachö alli nunakuna mana kayaptinqa, ¿pikunataraq Waranqa Watapa Cristu gobernanman? (Apo. 20:4, 5). ¡Tsëqa manam imanöpapis pasanqatsu!

Jina Patsapita markanta ushakäratsiyänanta Jehová jaqiptinqa, autoridadyoq kënin y jutinchi mana allichö quedanman. Ciëlochö y Patsachö pëlla mandakoq kënimpis mana kaqchöchi quedarinman. Kikinta y jutinta respetarmi tsë pasanantaqa jaqinqatsu. Këman pensarishun: Dioschöqa “manam ima mana alli rurëkuna kantsu”, tsëmi alli musyantsik llapan markanta ushakätsiyänantaqa mana jaqinampaq kaqta (Deu. 32:4; Gén. 18:25). Tsëqa Biblia nishqannöllam, kënömi nin: “Jutinrëkurmi Jehoväqa markanta jaqirinqatsu” (1 Sam. 12:22). Awmi, “Jehoväqa manam markanta jaqinqatsu, ni herencianta qonqarinqatsu” (Sal. 94:14).

¡Imanö kushikïpaqmi Diospa markanta Patsapita paqwë mana ushakätsiyänampaq kaqta musyëqa! Tsëqa, imëpis Jehoväta sirwikäshun y markäkushun o yärakushun kënö nir awnikunqanman: “Imëka armapis contrëki churakaqqa manam imanäshunkitsu, y juk juiciochö qampa contrëki pipis parlaptinqa, condenarinkim. Tsëmi Jehoväpa sirweqninkunapa herencianqa, y alli rurëninkunaqa noqapitam shamun” (Isa. 54:17).

[22 kaq päginachö ninqan]

Diosqa manam imëpis jaqinqatsu markanta paqwë ushakätsiyänantaqa