Kushishqam awnikuyarqan yanapakuyänampaq Ecuadorchö

ITALIA nacionpita Bruno jutiyoq Testigo jövenmi imata ruranampaq kaqkunata musyarqantsu. Tsëllaran secundarianta alli nötakunawan usharishqa karqan, y profesorninkuna y familiankunam universidadchö estudiananta pasëpa munayarqan. Pero Jehovällata sirwinampaq bautizakunqan watam churapakarqan Diospa kaqta kawëninchö puntaman churanampaq. ¿Pero imatataq rurarqan? Kikinmi kënö willakun: “Jehovätam mañakïnïchö nirqa, awnikunqänö, pëllapaqna kawanäpaq y pëta puntaman churanäpaq. Jinamampis clärom nirqä juk rurëllachö imëpis këta mana munanqäta, sinöqa pëpa kaqchö tukï rurëkunachö yanapakïta munanqäta”.

 Ichik tiempo pasariptinnam, Sudamëricachö këkaq Ecuador nacionman Brünoqa ëwakurqan. ¿Y alliku karqan? Pëmi nin: “Mañakunqäpitapis mastam Jehoväqa qomashqa”. Y kushikïnimpaqqa, Ecuadorman chärirqa reqirirqan Jehoväpita más yanapakïta munar ëwashqa atskaq poqushqa jövenkunatam.

JEHOVÄPA INVITACIONNINTA CHASKIKOQ JÖVENKUNA

Entero Patsapita atska waranqa jövenkunanöpis, Brünoqa chaskikurqan Jehová kënö nir invitakunqantam: “Probaralläyämë, mä manakush ciëlopa punkunkunata kichar mana imapis pishipuyäshunqëkiyaq qamkunaman bendicionta ramamushaq” (Mal. 3:10). Tsë llapan jövenkunataqa Diosta kuyayanqanmi yanapashqa, Jehoväta pruëbaman churaq cuenta tiemponkunata, kallpankunata y imëkankunata qornin, Diospita yachatsikoqkunata necesitäyanqan markakunaman yanapakoq ëwayänampaq.

Yanapakuyänampaq kaq markaman chärirqa, kë yachatsikoqkunaqa cuentata qokuriyan ‘cosecha poqicaqno nunacuna ellipaq’ o juntëpaq alläpa atska kayanqanta y ‘wallcalla elloqcuna’ o juntaqkuna kayanqantam (Mat. 9:37). Tsënö kanqantam musyarirqan Alemania nacionpita Jaqueline jutiyoq shipash, pëmi Ecuador sucursalman alläpa kushishqa kënö qellqarqan: “Ishkë watapitapis masnam këchö yanapakïkä, y chunka kima nunakunatam Bibliapita yachëkätsï, pëkunapitaqa chuskoqmi reunionkunaman mana dejëta ëwayan. ¡Alläpa kushishqam këkä!”. Canadá nacionpita Chantal jutiyoq shipashnam kënö nin: “2008 watachömi Ecuadorpa costa kaq lädon markaman yanapakoq ëwarqä, y tsëchöqa juk congregacionllam karqan. Kananqa kima congregacionkunanam  kan y chunka kimapitapis masmi precursorkuna kayan. ¡Manam imapis igualantsu mëtsika nunakuna Diosta sirwiyänampaq churakaqta rikënöqa! Tsëllaraqmi yapë yanapakoq ëwakurqö Ecuadorpa cordillera de los Andes nishqanchö këkaq markaman, tsëqa këkan lamarpita 2.743 metros janachömi. Tsëchö 75.000 nunakunapitapis más kawayaptimpis juk congregacionllam kan. Diospita willakïtaqa shumaqmi nunakuna chaskikuyan y noqaqa kushishqam këkä yachatsikurnin”.

TUKÏPA PASËKARPIS TSARAKUYAN

Clärom këkan, juk nacionkunachö Diospita yachatsikïqa sasam o ajam. Y wakin jövenkunaqa, nacionninkunapita manaraq yarqurpis, tukï pruëbakunapam pasayashqa. Estados Unidos nacionpita Kayla jutiyoq shipashmi këta yarpan: “Wakin cristiänokuna alli këninkunachö más yanapakïpaq mana allita parlayanqanqa chipyëpam qelanätsikoq. Manam entiendeyaqtsu juk nacionchö llapan tiempöwan Diospita yachatsikunäpaq imanir ëwakïta munanqäta. Tsënö parlayanqanmi hörachöqa yarpachakatsimaq rurëta munëkanqä alli o mana alli kanqantapis”. Tsënö nikäyaptimpis Kaylaqa ëwakurqanmi. Ima yanapanqanta willakurmi këta nin: “Alläpam Diosta mañakurqä y poqushqa nanakunawan y turikunawanmi parlarqä, tsë llapanmi rikätsimarqan más yanapakuyänampaq churapakaqkunataqa Jehová bendicenqanta”.

Wakinkunapaqnam juk idiömata alli parlë sasa kashqa. Irlanda nacionpita Siobhan jutiyoq Jehoväpa testïgon shipashmi këta nin: “Chipyëpam llakikoq kä juk idiömachö parlëta mana puëder. Pacienciakoq këta, tsë mushoq idiömata alli yachakïta y parlarnin pantanqäkunapita asikïtam yachakurqä”. Estonia nacionpita Anna jutiyoq shipashmi këta nin: “Alläpa achachëchö kawë, mëtsika polvopa puri y alalaq yakuwan bañakïqa manam sasatsu o ajatsu karqan español idiömata yachakïnöqa. Atska kutim yachakïkanqäta dejarïta munarqä. Yachakïkanqäkunaman yarpänäpaqmi sinchikurqä y manam pantanqäkunamanqa”.

Pero manam tsëllatsu, familiata y amïgokunata yarpëpis llakikïpaqmi. Estados Unidos nacionpita Jonathan jutiyoq jövenmi kënö nin: “Diospita yachatsikunäpaq mandayämanqan markaman ichik tiempo chärinqällachömi, familiäpaq y amïgökunapaq chipyëpa llakikurqä. Pero Diospita yachatsikïchö mëtsika rurëyoq kanqä y japallä Bibliapita yachakunqämi alläpa mana llakikunäpaq yanapamarqan. Diospita yachatsikïchö tukï shumaqkunata pasanqä y congregacionchö amïgokunata tarinqämi yapë kushishqa kanäpaq yanapamarqan”.

Jina juk pruëbaqa juk markachö sasa o aja kawë kanqanmi. Canadá markapita Beau cristiänom këta  nin: “Pipis nacionninchö këkarqa, manam alläpa yarpachakuntsu electricidadpaq ni upunan yakupaq. Pero këchöqa, mana pensanqëki höram luz jeqarin o yakupis tsakiramun”. Tsëraq alliyëkaq nacionkunachöqa, waktsa kë kanqan, mëta viajanapaqpis imapis allillaqa mana kanqan y leita ni qellqëta mana yachayanqanqa më tsëchömi rikakan. Austria nacionpita Ines jutiyoq shipash, tsëkunaman alläpa mana yarpachakunampaqqa, tsëchö nunakunapa alli këninkunata rikanqanmi yanapashqa. Pëmi kënö nin: “Tsëchö nunakunaqa alläpa alli, kuyakoq, imachöpis yanapakoq y humildem kayan. Y más kushikïpaqqa Diospita yachakïta munayanqanmi”.

‘MANA IMAPIS PISHINQANYAQ’ BENDICIONKUNA

Rikanqantsiknöpis, tsë jövenkunaqa tukï munëninkunatam dejayashqa Ecuador nacionchö yanapakuyänampaq. Tsënö kaptimpis, “mañacushqantsicpitapis y pensashqantsicpitapis mas atscata” Jehová qomanqantsiktam rikäyashqa (Efe. 3:20). Awmi, ‘imapis mana pishipuyanqanyaq’ Jehová qonampaq kaqta awnikunqanta cumplishqa kanqantam niyan (Mal. 3:10). Diospita yachatsikurnin kayanqampita ima niyanqanta rikärishun.

Bruno: “Ecuadorman chärirllaqa selvachömi Diospita yachatsikur karqä. Tsëpitanam sucursal wayita más jatunyätsichö yanapakurqä, y kananqa tsëchömi trabajä. Italiachö këkarmi Jehoväpa kaqta puntaman churanäpaq awnikurqä, y pëqa kushishqa kawanäpaq y pëpa kaqchö tukï rurëyoq kanäpaq mañakunqätam qomashqa”.

Beau: “Ecuador nacionchö Jehoväpita yachatsikïchö mëtsika rurëyoq kanqämi, Jehoväwan amigo kënïta más sinchiyätsishqa. Jinamampis, imëpis reqita munanqä shumaq sitiokunamanmi charqö, tsë llapanqa Jehoväpa bendicionninmi”.

Anna: “Manam ichikllapis pensarirqätsu majannaq këkar misionëranö yanapakïta puëdenäpaq kaqta. Pero kananmi sïqa musyä puëdena kanqanta. Jehoväqa atska bendicionkunatam qomashqa y alläpam kushikö pëta reqiyänampaq nunakunata yachatsirnin, Yachatsikuyänan Wayikunata rurëchö yanapakurnin y mushoq amïgokunata tarirnin”.

Elke: “Yurikunqä Austria nacionchö këkarmi, juk estudio biblicota tarinäpaq Jehoväta yanapamänampaq mañakurqä. ¡Manam ichikllapis pensarirqätsu kë nacionchö chunka pitsqa nunakunata Bibliapita yachatsinäpaq kaqtaqa! Bibliapita yachakurnin nunakuna kawëninta altsar kushishqa kayanqanta rikëqa alläpam kushitsiman”.

Joel: “Alläpa kushikïpaqmi mana reqinqëki nacionchö Jehoväta sirwiqa. Pëman más markäkïta o yärakuytam yachakunki, y alläpam kushikunki kallpachakunqëkita Jehová bendecimunqanta rikar. Estados Unïdospita chanqä witsanqa, yanapakïkanqä grüpochöqa joqtaqllam publicadorkuna kayarqan, pero watallatam 21 tikrariyarqä y Jesus Wanunqanta Yarpëchöqa 110 juntakäyarqä”.

Y QAMQA, ¿IMATARAQ RURANKI?

Testigo karqa y Diospita yachatsikoqkunata necesitäyanqan markakunachö yanapakïta puëderqa, ¿chaskikunkitsuraq tsë invitacionta? Rasun kaqllam manaraq tsë markakunata ëwarnin alleq yarpachakunantsikqa. Pero tsëpitapis masqa precisan Jehoväta y nuna mayintsikta shonqupita patsë kuyanqantsikmi. Tsënö jatun kuyakïniki kaptinqa y juk lädokunachö yanapakïta puëderqa, mañakïnikikunachö tsë rurëta munanqëkita Jehoväta willë. Jinamampis, allichi kanman teytëkikunata y congregacionchö anciänokunata willarinqëkiqa. Tsëta rurarqa, qampis musyarinkimanmi juk markakunachö Diosta kushishqa sirwinëkipaq kaqta puëdenqëkita.

[3 kaq päginachö ninqan]

“Alläpam Diosta mañakurqä y poqushqa nanakunawan y turikunawanmi parlarqä, tsë llapanmi rikätsimarqan más yanapakuyänampaq churapakaqkunataqa Jehová bendicenqanta.” (Estados Unidospita Kayla)

[6 kaq päginachö dibüju y recuadru]

¿Imanöraq alistakunkiman juk nacionkunachö yanapakunëkipaq?

• Mana dejëta Biblia estudiëta yachakë

• Rikäri 2011 watachö agosto killapaq Diospita Yachatsikunapaq 4-6 päginankunachö ninqanta

• Juk nacionkunachö yanapakushqa kaqkunawan parlë

• Tsë nación imanö kanqanta y ima costumbreyoq kayanqanta musyapakï

• Tsë nacionchö parlayanqan idiömata ichikllatapis yachakïta procurë

[6 kaq päginachö dibüju y recuadru]

Gastonkunapaq qellëta wakinkuna imanö tariyanqan

• Watachö juk ishkë killakunam kikinkunapa nacionninkunachö trabajayan

• Wayinkunatam, cuartonkunatam o negocionkunatam arrendakuyan

• Internetpam trabäjokunata rurayan

[4 y 5 kaq päginachö fötukuna]

1 Jaqueline (Alemania)

2 Bruno (Italia)

3 Joel (Estados Unidos)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)