Libre katsikoq Diosta sirwishun

“Tsemi mandacushqancunata cäsucurnenqa, Diosta cuyantsic. Y mandacushqancunaqa manam allapa sasatsu.” (1 JUAN 5:3.)

¿IMA NINKIMANRAQ?

¿Imanötaq Diospa mandakïninkuna alläpa michäkunqanta creitsimënintsikta Satanás procuran?

¿Imanirtaq alläpa precisan amïgontsikkunata alli akranantsik?

¿Imaraq yanapamäshun libre katsikoq Diosta imëpis mana dejanapaq?

1. ¿Imanötaq Jehová libre këninta utilizan, y ima libre këtataq Adantawan Ëvata qorqan?

JEHOVÄLLAM ciëlochöpis y Patsachöpis chipyëpa libreqa. Tsënö karpis, manam imatapis llutaqa rurantsu ni manam llapanchö munëninllata sirweqninkuna rurayänampaqtsu controlan. Tsëpa rantinqa o trukanqa, nunakuna alli pensëkur imatapis kikinkuna akrakuyänanta y alli munëninkunata rurayänantam dejan. Tsënö rurarmi, Adantawan Ëvataqa ‘alli kaqta y mana alli kaqta musyatsikoq plantallapita’ mana mikuyänampaq micharqan (Gén. 2:17). Tsënömi Kamaqninkunapa munëninta rurëta puëdeyarqan y tsëta rurarnin mana imawampis igualaq libre kawakïta puëdeyänan karqan.

2. ¿Imanötaq punta teytantsikkuna Jehová libre këninkuna qonqanta oqrariyarqan?

² ¿Imanirtaq Jehová tsënö libre këta punta teytantsikkunata qorqan? Kikin rikoqta rurashqa karnin y imapis alli y mana alli kanqanta musyayänampaq concienciankuna qoshqa karmi. Pëta kuyëninkuna alli nänipa pushanantam shuyararqan (Gén. 1:27; Rom. 2:15). Pero libre këninkuna Dios qoshqa kanqampita agradecikuyänampa rantinmi, Satanasta wiyëta akrayarqan y mana pëkunapa kaqta  rurarninmi kikinkuna ima alli o mana alli kanqanta akrayänampaq churapakäyarqan. Tsëta rurarnin más libre kayänampaq kaqtam pensayarqan, pero pasëpam pantariyarqan. Jutsapa esclävonmanmi tikrariyarqan y mirëninkunatapis tsëpa makinmanmi churariyarqan (Rom. 5:12).

3, 4. ¿Diospa mandakïninkunapaq ima creitsimënintsiktataq Satanás munan?

³ Jutsannaq ishkë nunakuna y mëtsikaq angelkuna Diospa autoridadnimpa contran churakäyänanta Satanás lograshqa këkarninqa, ¿manatsuraq noqantsiktapis engañaramashwan? Diospa mandakïninkuna chipyëpa michäkunqanta y kushishqa kawakunata mana dejamanqantsiktam  imëpis creitsimënintsikta munan (1 Juan 5:3). Tsëkunaman alläpa yarpachakushqaqa noqantsikpis tsënö kanqantam creir qallëkushwan. Manaraq casado këkar juk ollquwan punukïkushqa 24 watayoq cristiänam kënö nin: “Mana alli amïgökunam tukïman chätsiyämarqan, masqa pëkuna rurayanqannölla ruraptïmi”. ¿Manaku noqantsiktapis mana alli amïgokunaqa tukïta ruratsimënintsikta munayashqa?

⁴ Congregacionchöpis mana alli amïgokuna kanqanqa llakikïpaqmi. Juk joven cristiänom kënö nin: “Wakin amïgökunaqa mana Testigo kaqkunawanmi puriyaq. Tiempowanmi, cuentata qokurirqä pëkunawan más junto junto karnin pëkunanölla tikrëkanqäta. Jehoväpa kaqchömi chipyë débil tikrarirqä: reunionkunaqa mananam kushitsimaqnatsu y hora hörallam Diospita yachatsikoqpis yarqoq kä. Tsë höram cuentata qokurirqä juk amïgokunata ashinäpaq kaqta. Y tsëtam rurarqä”. Awmi, amïgokunaqa alliman o mana allimampis chätsimashwanmi. Unë witsan tsënö pasakunqampaq Biblia willakunqanta rikärishun (Rom. 15:4).

“ISRAEL NUNAKUNAPA SHONQUNTA SUWARMI SÏGUERQAN”

5, 6. a) ¿Imanötaq mëtsikaq israelïtakunata Absalón engañarqan? b) Tsënö ruranqan, ¿alliku yarqapurqan?

⁵ Bibliaqa atskaq mana alli nunakunapa portakïnimpaqmi parlan. Juk kaqqa karqan Absalón jutiyoq rey Davidpa tsurinmi. Biblia ninqannöpis, rikëninchöqa alläpa kuyëllapaq nunam karqan. Pero Satanasnöpis mallaqäkoq këninchömi teytampa rey këninta qochita o qechuyta munarqan. * Israelïtakunapaq alläpa yarpachakoqtukur y pëkunapaq rey imatapis mana rurëkanqanta nirllam rey këman chëta munarqan. Edén huertachö Satanás ruranqanllatam Absalonqa rurëkarqan: kikintam alläpa kuyakoqtanö rikätsikïkarqan y teytampa mandakïnimpaqmi pasëpa mana allita parlëkarqan (2 Sam. 15:1-5).

⁶ Tsënö ruranqan, ¿alliku yarqapurqan? Qallananllachöqa allim yarqapakïkarqan, tsëpaq willakurmi Biblia kënö nin: “Absalonqa Israel nunakunapa shonqunta suwarmi sïguerqan” (2 Sam. 15:6). Tsënö kaptimpis precisaqtukïninqa chipyëpa penqakïmanmi chätsirqan. Kikin y engañanqan atska waranqa nunakunam wanuyarqan (2 Sam. 18:7, 14-17).

7. ¿Imatataq yachatsimantsik Absalonpaq willakï? (Rikäri 14 kaq päginachö këkaq dibüjota.)

⁷ ¿Imanötaq israelïtakunaqa raslla engañariyänanta dejayarqan? Quizaschi Absalón awnikïkanqanta munapäyarqan o capazchi shumaqllan nunata rikarnin creiriyarqan. Imanö kaptimpis, tsë israelïtakunaqa Jehoväta y pë akrashqan reyta mana respetayarqantsu. Kanan witsampis, Satanasqa Absalonnö kaq nunakunatam utilizan Jehoväpa sirweqninkunapa shonqunkunata suwarinampaq. Wakinkunam kënö niyan: “¡Diospa mandakïninkunaqa alläpam michäkun”, o: “Jehoväta mana sirweqkunam sïqa rasumpa kushishqa kayan!”. ¿Allitsuraq tsarakushun noqantsikpis tsënö mana pensanapaq? ¿Rikantsikku yachëllapa engäñokuna kanqanta? ¿Rasumpëpaku creintsik Jehoväpa ‘chipyëpa alli kaq leynin’, o Cristupa leyninlla, rasumpëpa libreta tikratsimänantsikta? (Sant. 1:25, NM.) Tsë leyta alläpa kuyanqantsikta rikätsikushun y ama mana alliqa utilizäshuntsu cristiänonö libre kënintsikta (lei 1 Pedru 2:16).

8. ¿Ima willakïkunataq rikätsikun Jehoväta mana wiyakïqa kushikïta mana apamunqanta?

⁸ Jövenkunatam Satanasqa más rikarëkan. 30 watayoq wawqim kënö willakun: “Joven këman chëkarmi, Jehoväpa mandakïninkuna mana allikunapita cuidamänampa rantin alläpa michämanqanta pensaq kä”. Tsëta pensarmi, manaraq casakurnin juk warmiwan punukïkurqan. Tsënö ruranqampita, ¿más kushishqaku kawarqan? Manam. Kikinmi këta nin: “Mëtsika watapam mana alli sientekurqä y concienciäqa  ruranqätam imëpis yarpëkätsimaq”. Juk paninam joven këman chëkarnin ruranqankunata kënö yarpan: “Manaraq casakurnin piwampis punukïkurqa, pasëpa llakishqa y mana imayoqnömi sientekunki. 19 watana pasarishqa kaptimpis, manam ruranqäkunataqa qonqätsu”. Juk paninam kënö willakun: “Mana alli portakunqä mëtsikaq kuyanqä nunakunata llakitsishqa kanqanta musyarirqa, chipyëpam mana alli sientekurqä. Jehoväpa kuyakïninnaq kawëqa alläpa llakikïpaqmi”. Joven, ama dejëtsu Satanás engañashunëkita: imatapis manaraq rurarnin alleqraq yarpachakï ruranqëkikuna imaman chätsishunëkipaq kaqman.

9. a) ¿Imatataq Jehoväpita y churanqan leyninkunapitawan mandamientokunapita tapukunantsik? b) ¿Imanirtaq alläpa precisan Diosta alli reqinantsik?

⁹ Alläpa llakikïpaqmi tsëraq joven këman chëkaqkuna y jövenna kaqkunapis mana alli munëninkunata mana controlarnin rurayanqampita sufrir-raq yachakuyanqanqa (Gal. 6:7, 8). Llapantsikmi kënö tapukunantsik: “¿Musyëta puëdeko Satanás imanö engañamëta munëkanqanta? ¿Pipitapis Jehoväku más alli kaq amigö y noqaman yarpachakur imëpis rasumpa kaqta nimanqanmanku markäkö o yärakö? ¿Imapis yanapamänampaq y kushitsimänampaq kaqta Jehová imëpis mana michämänampaq kaqmanku chipyëpa markäkö?” (lei  Isaías 48:17, 18). Tsë tapukïkunata shonqupita patsë “awmi” nir contestëta munarqa, alläpam precisan Jehoväta alleq reqinantsik. Chipyëpa reqitam procuranantsik, jina yarpänantsikmi leykunata y mandamientokunataqa kuyamarnintsik churanqanta, y manam libre kënintsikta michäkurtsu (Sal. 25:14).

 MUSYAQ Y WIYAKOQ SHONQUTA JEHOVÄTA MAÑAKUSHUN

10. ¿Imanirtaq joven kanqan witsan rey Salomon kanqannö këta procuranantsik?

¹⁰ Jövenllaraq y alläpa mana yachaq karmi, Jehoväta mañakunqanchö Salomon kënö nirqan: “Noqaqa wamrallaran kä. Manam musyätsu imanö yarqïta y imanö yëkïta”. Tsëpitanam juk musyaq y wiyakoq shonquta mañakurqan (1 Rey. 3:7-9, 12). Shonqupita patsë mañakunqantam Jehová contestarqan. Y tsënöllam noqantsikpaqpis ruramunqa ëka watayoq kashqapis. Awmi, mana creipaqnö yachaq këta o musyaq këtaqa manam qomäshuntsu. Pero Bibliata alli estudiashqa, santo espïritunta mañakushqa y congregacionwan pëpa kaqchö qomanqantsikta alli provechashqaqa musyaqmanmi tikratsimäshun (Sant. 1:5). Yarpäshun, Jehoväqa tsë llapankunatam utilizan, mana wiyakoqkunapita y kë mundochö ‘musyaq tucoqcunapitapis’, markanchö jövenkuna más musyaq kayänampaq (Luc. 10:21; lei Salmo 119:98-100).

11-13. a) ¿Ima alli yachatsikïkunatataq tarintsik Salmo 26:4, Proverbios 13:20 y 1 Corintios 15:33 textokunachö? b) ¿Imanötaq kë consëjokuna ninqanta wiyakushwan?

¹¹ Rikanqantsiknöpis, Jehoväta alli reqinapaqqa, alläpam precisan Bibliapita yachakunantsik y leinqantsikkunaman yarpachakunantsik. Këta maslla entiendirinapaq, amïgokunapaq parlaq versïculokunachö juk ishkë consëjokunata rikärishun. Salmo 26:4 textom kënö nin: “Mana rasumpa kaqta parlaq nunakunawanqa manam takukarqötsu, ni jananllapa allitukoq nunakunawampis”. Proverbios 13:20 textonam kënö nin: “Yachaqkunawan pureqqa yachaqmi tikranqa, pero mana wiyakoqkunawan takukaqqa mana allimanmi ishkinqa”. 1 Corintios 15:33 textopis kënömi nin: “Mana alli amigucunaqa, llutantam yachatsishunqui”.

¹² Kë versïculokunaqa alläpa shumaq yachatsikïtam rikätsimantsik. Puntataqa, mana alli kaqkunaman ishkinata mana munar y pëpa kaqchö alli kanata munarmi Jehoväqa amïgontsikkunata alli akranantsikta munan. Y ishkë kaqchöqa, amïgontsikkunaqa alliman o mana allimampis chätsimanqantsiktam rikätsimantsik. Jina kë consëjokuna shumaq qellqashqa kanqanqa rikätsimantsik Jehová shonquntsikman yëkïta munanqantam. ¿Imanö? Manam “wakta këta ama rurëtsu” nimantsiktsu, sinöqa alli clärom rikätsimantsik tsëkuna imanöpis kanqanta. “Këqa kënömi y kënömi. Y kananqa, ¿imataraq ruranki? ¿Imataq shonqïkichö kan?” nimaqnintsik cuentam.

¹³ Jinamampis, kë versïculokuna yarpänallapaq palabrakunawan qellqashqa karmi, ima tiempokuna kaptin o ima pasakuptimpis yanapamantsik. Maslla entiendirinapaq kënö tapukurishun: “¿Imanötaq cuidaköman ‘jananllapa allitukoq nunakunapa’ amïgon tikrëta? ¿Imakunata rurartaq pëkunawan juntakëman chäman? (Pro. 3:32; 6:12). ¿Pikunataq amïgöpaq Jehová munanqan ‘yachaq’ nunakuna kayan y pikunataq ‘mana wiyakoqkuna’ kayan? (Sal. 111:10; 112:1; Pro. 1:7.) Mana alli amïgokuna ‘llutanta yachatsiyämaptin’, ¿ima allikunataraq oqrarïman? ¿Mana alli amïgokunaqa mundollachöku kan? (2 Ped. 2:1-3.)”. Alläpam precisan tsë tapukïkunapa respuestanman yarpachakunantsik.

14. ¿Imatataq rurashwan Familiachö Diosta Adorana más shumaq kanampaq?

¹⁴ Jina tsënöllam, noqantsikta y familiantsikta yarpakachätsimaqnintsik asuntokunapaq Jehová ima ninqanta musyëta puëdentsik tsëpaq parlaq versïculokunapita alleq yachakushqaqa. * Awmi, teytakunaqa familianchö kaqkunata llapanta yanapayänampaq kaqman yarpëkurmi, Familiachö Diosta Adorana Hora tsë asuntokunapaq parlayänan y entiendetsiyänan Jehoväpa mandakïninkuna y leyninkunaqa alläpa kuyamarnintsik churashqa kanqanta (Sal. 119:72). Tsëta rurayaptinqa familiachö  këkaqkunam jukllëllanö y Jehoväpa más lädonchö këkaqnö sientekuyanqa.

15. ¿Imanötaq musyashwan shonquntsikta musyaq y wiyakoq kanampaq yachëkätsinqantsikta?

¹⁵ ¿Imanötaq musyashwan shonquntsikta musyaq y wiyakoq kanampaq yachëkätsinqantsikta? Juknöpaqa musyashun, unë tiempochö Diosta sirweq nunakunapa pensëninkunatawan pensënintsikta igualatsirninmi. Këllaman yarpärishun, rey Davidmi kënö qellqarqan: “Teyta Diosllä, munanqëkita rurarmi alläpa kushikurqö, y shonqöpa rurinchömi leynikikuna këkan” (Sal. 40:8). Y Salmo 119 textota qellqaqmi këta nirqan: “¡Imanömi leynikita kuyëkö! Paqasta junaqtapis tsëllamanmi yarparëkä” (Sal. 119:97). Tsënö kuyakïqa manam rasllatsu winarin, tsënö kanampaqqa alläpam precisan Bibliata alleq estudianantsik, mañakunantsik y yachakunqantsikkunaman yarpachakunantsik, jina Dios mandakunqankunata wiyakunqantsikpita ima bendicionkunata chaskinqantsiktam yarpänantsik (Sal. 34:8).

CRISTIANO LIBRE KËNINTSIK USHAKÄNANTA DEJASHUNTSU

16. Libre këta munarnin sinchikunqantsikchö, ¿imakunatataq yarpänantsik?

¹⁶ Unëpita patsëmi mëtsikaq nacionkuna libre këta munarnin guërrakunata rurayashqa. Tsënöllam noqantsikpis cristiano libre kënintsik mana ushakänampaqqa masraq sinchikunantsik. Yarpänantsikmi Satanaspa y kë mundopa mana alli espïritumpa contranllawan mana peleëkanqantsikta, sinöqa munënintsikpa y traicionakoq shonquntsikpa contrampis peleëkanqantsiktam (Jer. 17:9; Efe. 2:3). Pero Jehoväpa yanapakïninwanqa tsëkunata vencishunmi. Y imachöpis allita ruranqantsik ichikllanlla kaptin o jatun kaptimpis ishkë cösaskunachömi yanapamäshun. Puntataqa, Jehovätam kushitsishun (Pro. 27:11). Y ishkë kaqchöqa, “libre këman apakoq chipyëpa alli kaq ley” ninqanta wiyakurnin libre sientekurmi, churapakäshun kawëman apakoq llanulla nänipita imëpis mana rakikänapaq. Y tsëpitanam, mana dejashpa sirweqninkunata mana imawampis igualaq libre këta Jehová qonampaq kaqta chaskishun (Sant. 1:25, NM; Mat. 7:13, 14).

17. ¿Imanirtaq imachö pantarishqa karpis chipyëpa llakikurllaqa kakushwantsu, y ima yanapakïtataq Jehová qomantsik?

¹⁷ Awmi, llapantsikmi imë hörapis mana alli kaqtaqa rurarintsik (Ecl. 7:20). Tsëkuna pasakuptinqa ama llakinar imapaqpis mana sirwinqantsikta pensashuntsu. Pantarishqapis, imëka sharkoq cuenta sïguishun tsëpaq anciänokunapa yanapakïninta mañakunantsik kaptimpis. Santiägum nirqan, pëkuna “Dios Yayaman marcäcur mañacuyaptinmi, tse qeshyaq  cachacärenqa. Teyta Jesusmi [“Jehovämi”, NM] cachacätsir sharcaratsenqa; jutsacunata rurashqa captinpis, perdoneconqam” (Sant. 5:15). Ama imëpis qonqashuntsu Jehová alläpa llakipäkoq kanqantaqa, pëmi shonquntsikchö alli cösaskunata rikarnin congregacionninchö kanapaq pushamarqantsik (lei  Salmo 103:8, 9). Awmi, llapan shonquntsikwan pëllata sirwinapaq kallpachakushqaqa, manam imëpis dejamäshuntsu (1 Cró. 28:9).

18. Juan 17:15 textochö Jesus mañakunqannö, ¿imatataq ruranantsik Jehová tsapämänantsikpaq?

¹⁸ Wanutsiyänampaq tsariyanqan paqasmi, Jesus chunka juk qateqninkunapaq Jehoväta kënö mañakurqan: “Mañacoq, [...] llutan rurecunapita wardecunequipaq[mi]” (Juan 17:15). Kanan witsampis, Cristuqa llapan qateqninkunapaqmi tsënölla alläpa yarpachakun. Tsëmi llapantsik markäkuntsik o yärakuntsik Jesus mañakunqanta contestarnin, sasa o aja tiempokunapa pasashqa Dios yanapëkamänapaq kaqta. Bibliam këta awnimantsik: “Pëta mana dejashpa sirweqninkunapaqqa, imëka escudo cuentam, [...] jina pëqa sirweqninkunapa rurëninkunatam täpanqa” (Pro. 2:7, 8). Diosllata sirwiqa sasaraq kanqantam yarpänantsik, pero manam juk näniqa kantsu mana wanushpa kawëman y rasumpëpa libre këman apakoqqa (Rom. 8:21). ¡Ama imapis tsë nänipita rakimänata dejashuntsu!

[Página hawanchö ichisaq letrakuna]

[Yachakunapaq kaqpa tapukïninkuna]

[14 kaq päginachö dibüju]

¿Pikunataq Absalonnö kanan witsankuna kayan, y imatataq rurashwan mana alli munëninkunapita cuidakunapaq?