“¿Pitaraq alläpa mantsäman?”
“¿Pitaraq alläpa mantsäman?”
“Guërrata rurarnin conträ sharkuyaptimpis, noqaqa markäkïkäshaqllam.” (SAL. 27:3.)
KË VERSÏCULOKUNA NINQANNÖ, ¿IMATAQ YANAPAMÄSHUN ALLI TSARAKUNAPAQ?
1. ¿Salmo 27 texto ninqanqa ima tapukïkunapa respuestanta yachakunapaqtaq yanapamäshun?
KË MUNDOCHÖ imëkapis más mana alliman tikrëkaptinqa, ¿imanirtaq Diospita yachatsikunqantsikta más nunakuna chaskikuyan? Qellë tarinan sasa o aja këkaptimpis, ¿imanirtaq tiempontsikta y kallpantsikta kushishqa utilizantsik Diospita yachatsikunapaq? Mëtsika nunakuna shamoq tiempokunata mantsëkäyaptin, ¿imanirtaq noqantsikqa mantsantsiktsu? Santo espíritu yanapaptin rey David Salmo 27 ninqanta qellqanqanmi tsë tapukïkunata contestanqa.
2. ¿Imanötaq alläpa mantsëqa nunakunata tikraratsin, pero imamantaq noqantsikqa markäkuntsik?
2 Kë palabrakunawanmi tsë salmota David qellqar qallëkun: “Jehovämi aktsï y salvacionnï. ¿Pitaraq mantsashaq? Jehovämi kawënïpa tsapaqnin. ¿Pitaraq alläpa mantsäman?” (Sal. 27:1). Imatapis mantsëqa kallpannaqtam tikraratsimashwan, pero tsëpitapis masran imatapis alläpa mantsëqa. Tsënö kaptimpis, Jehoväta sirweq nunaqa manam imatapis chipyëpaqa mantsanmantsu (1 Ped. 3:14). Jehoväpa tsapäkïninta asheqqa “yamëmi kawakunqa, y manam ima desgracia pasanantapis mantsanqatsu” (Pro. 1:33; 3:25). Imanir tsënö kanqanta rikärishun.
“JEHOVÄMI AKTSÏ Y SALVACIONNÏ”
3. ¿Imanötaq Jehoväqa aktsintsik cuenta, pero imatataq ruranantsik?
3 “Jehovämi aktsï” nir igualatsikïqa rikätsimantsik mana musyaq këpita y Jehoväpa kaqchö pantashqa këpita libramanqantsiktam (Sal. 27:1). Musyanqantsiknöpis, nänichö ima peligro kanqanta o ima atajamaqnintsik kanqantapis aktsiqa rikätsimënintsikta puëdenmi. Tsënö kaptimpis, manam tsë cösaskunata ushakäratsintsu, sinöqa rikärir witikunapaqmi yanapamantsik. Tsënöllam kanan witsankuna imanir imapis pasakïkanqanta, kë mundochö ima peligrokuna kanqanta Jehová rikätsimantsik y imëpis yanapakoq Bibliapa consëjonkunatam qomantsik, pero tsëkuna yanapamänapaqqa yachakunqantsikmannömi ruranantsik. Salmo qellqaq ninqannöpis tsëta rurarllam alli musyaq këwan imatapis rurashun, kënömi nirqan: “Mandamientïkikunaqa [...] chikimaqnïkunapitapis más musyaqta[m] tikratsiman. [...] Yachatsimaqnïkunapitapis más tanteaq[mi] tikrarqö” (Sal. 119:98, 99, 130).
4. a) ¿Imanirtaq alläpa markäkurnin “Jehovämi [...] salvacionnï” nirqan David? b) ¿Ima pasakuptintaq Jehoväqa salvamaqnintsik kanqanta rikätsikunqa?
4 Salmo 27:1 texto ima ninqanta leirmi, Davidqa unë witsan Jehová imanö salvanqanman yarpëkarchi qellqarqan nintsik. Juk kutichömi, ‘leonpa shillumpita y ösopa shillumpita’ salvarqan. Jina alläpa jatun Goliat jutiyoq nunata wanutsinampaqmi yanaparqan. Tsëpita ichik tiempollatanam rey Saúl lanzanwan cadalla wanutsita munaptin Jehoväqa tsaparqan (1 Sam. 17:37, 49, 50; 18:11, 12; 19:10). ¡Tsëchi Jehoväman alläpa markäkurnin Davidqa kënö nirqan: “Jehovämi [...] salvacionnï”! Kanan witsankunapis, Davidta tsapanqannöllam alläpa ‘nacaqui’ tiempokuna chämuptin Jehoväqa sirweqninkunata salvarnin tsapanqa (Apo. 7:14; 2 Ped. 2:9).
MARKAMPAQ TUKÏTA RURANQANTA YARPÄSHUN
5, 6. a) ¿Imanötaq yanapamashwan unë tiempokunachö Jehová imanö yanapamanqantsikman yarpë? b) Sirweqninkunata Jehová imanö yanapanqanman yarpë, ¿imanötaq yanapamäshun alli tsarakunapaq?
5 Sinchi kanapaqqa yanapamantsik Salmo 27:2, 3 (lei) texto ninqanmi. Atska kutichö tukï peligrokunapita Jehová libranqantam Davidqa yarparqan (1 Sam. 17:34-37). Tsëkunaman yarpanqanmi yanaparqan tukï sasa kawëkunachöpis alli tsarakunampaq. Y qamqa, ¿yarpankiku unë witsan Jehová imanö yanapashunqëkita? Tsëkunata yarpanqëki, ¿sinchi kanëkipaq yanapashunkiku? Këllaman yarpäri, alläpa sasa o aja problëmata altsanëkipaq Jehoväta mañakuriptiki, ¿rikarqunkiku musyaq këta y kallpata pë qoshunqëkita? ¿O yarpankiku Diosta más sirwinëkipaq imapis tsapäshoqniki ushakärinqanta o juk jatun “puncu quichaq cuenta” Jehoväta más sirwinëkipaq imapis karinqanta? (1 Cor. 16:9.) ¿Imanötaq sientekunki tsëkunaman yarparnin? ¿Manaku unë tiempochö Jehová imanö yanapashunqëkiman yarpë yanapashunki ima kaptimpis alli tsarakunëkipaq? (Rom. 5:3-5.)
6 ¿Y Jehoväpa testïgonkunata juk gobierno llapanta ushakäratsita munaptinqa? Kanan witsankunaqa atskaq nunakunam tsëta rurëta procurayashqa, pero manam ni mëqan puëdeyashqatsu. Unë tiempokunachö Jehová markampaq ruranqankunaman yarpachakushqaqa, shamoq tiempochö ima pasakunampaq kaqtapis mana mantsashpam shuyaräshun (Dan. 3:28).
RASUMPA KAQ ADORACIONTA KUYASHUN
7, 8. a) Salmo 27:4 texto ninqannöpis, ¿imatataq Jehoväta David mañakurqan? b) ¿Imataq ciëlochö këkaq Jehoväpa jatun templon, y imanötaq tsëchö pëta adorantsik?
7 Imapis kaptin alli tsarakunapaqqa alläpam precisan rasumpa adoracionta kuyanantsik (lei Salmo 27:4). David kawanqan witsanqa tabernäculon ‘Jehoväpa wayin’ karqan. Pero tsëpitaqa, tsurin Salomon alläpa shumaq y jatun templota ruranampaqmi kikin David tukïta alistapakurqan. Tsëpita atska pachak watakuna pasarinqanchönam, Jesusqa rikätsikurqan Dios bendecishqan templochöraq Jehoväta adorë manana precisanqanta (Juan 4:21-23). Hebreus libropa 8 kaq capïtulompita 10 kaq capïtulonyaqmi, Jesus shamushqanna 29 wata ciëlochö juk templo yurinqanta Pablu rikätsikurqan, këqa pasakurqan Jesus bautizakuriptin y Jehoväpa munëninta ruranampaq churakäriptinmi (Heb. 10:10). Ciëlochö këkaq kë jatun temploqa Jesus wanunqanman markäkur Diosman witinapaq Jehová patsätsinqanmi. ¿Imanötaq tsë templochö Diosta adorantsik? “Llapan shonquntsicwan, y alli marcäquinintsicwan” pëman mañakur, shamoq tiempochö shuyaranqantsikta mana mantsakushpa willakur y cristiano mayintsikkunata reunionkunachö y Familiachö Diosta Adorana Hörachö kallpata qorninmi (Heb. 10:22-25). Rasumpa kaq adoracionta kuyëqa, kë ushanan mana alli tiempokunachö, alli tsarakunapaqmi yanapamantsik.
8 Entero Patsapam Jehovällata sirweq mëtsika cristiänokuna Diospita más yachatsikurnin kayan. Wakinkunaqa juk idiömakunatam yachakuyan o Diospita yachatsikoqkunata necesitaq markakunamanmi täraq ëwakuyan. Rurëninkunawanmi rikätsikuyan, salmota qellqaqnöpis, Jehoväpa kuyëninchö imëpis kayänampaq y ima kaptimpis pëllata sirwiyänampaq mañakuyanqanta (lei Salmo 27:6).
DIOSPA YANAPAKÏNINMAN MARKÄKUSHUN
9, 10. ¿Imanötaq Salmo 27:10 texto ninqanta entiendentsik?
9 Jehová yanapanampaq kaqman chipyëpa markäkurmi o yärakurmi Davidqa këta qellqan: “Teytä y mamä dejarayämaptimpis, kikin Jehovämi ëllukarkamanqa” (Sal. 27:10). Teytankuna Davidta imëpis mana jaqiyanqantam Punta kaq Samuel libropa 22 kaq capïtulon rikätsikun. Tsënö kaptimpis, Diosta kanan witsan mëtsikaq sirweqkunataqa chipyëpam familiankuna despreciayashqa, tsëpa pasashqa karpis kuyakoq congregacionchömi yanapakïta y tsapäkïta tariyashqa.
10 Wakinkuna chikikäyaptin, Jehová sirweqninkunata yanapanampaq këkaptinqa, ¿manatsuraq ima problema kaptimpis pëqa yanapëkanqalla? Këllaman pensarishun, wayintsikchö kaqkunapaq mikïta apanapaq yarpachakushqaqa, Jehová yanapamänantsikpaq kaqmanmi markäkushwan (Heb. 13:5, 6). Pëqa, sirweqninkuna imapa pasëkäyanqanta y imakunata necesitäyanqantam llapanta musyan.
11. ¿Imanötaq wakin nunakunata yanapanman Jehoväman markäkunqantsik? Juk igualatsikïwan willakaramï.
11 Liberia nacionchö Bibliapita yachakïkaq Victoriapaq parlarishun. Bautizakïta munarnin más yachakïkaptinmi, nunanqa kiman wamrankunatawan dejarïkur ëwakurqan. Trabäjonnaq y wayinnaq këkarpis, manam Bibliapita yachakïtaqa dejarqantsu, tsënöpam bautizakurqan. Tsëpita ichik tiempollatanam 13 watayoq warmi wamran juk billetërata junta qellëyoqta tarikurirqan. Tsë qellëwan quedakïta mana munapayänampaqmi ëka kanqantapis yupayarqantsu, sinöqa rasllam qellëta oqrashqan soldädota ashiyarqan. Patsachö llapan nunakuna Jehoväpa testïgonkunanölla honrado kayaptinqa más kushishqa y yamëchi kawakushwan, nirqanmi tsë soldädoqa. Tsëmi Victoriaqa Jehová mushoq Patsata awnikunqanta Bibliachö rikätsirqan. Honrado kanqampita alläpa kushikurmi, tsë soldädoqa kutitsinqan billetërampita atska qellëta rakirïkur Victoriata qoykurqan. Jehová imëkatapis necesitanqantsikta qomänapaq kaqman llapan shonquntsikwan markäkurmi o yärakurmi, Jehoväpa testïgonkunaqa më tsëchöpis honrado kanqantsikpita reqishqa kantsik.
12. ¿Imatataq rikätsikun imata oqrarpis Jehovällata sirwikanqantsikqa? Willakaramï.
12 Jina Sierra Leona nacionpita Thomas jutiyoq manaraq bautizakushqa publicador imanö sientekunqanman pensarï. Secundariata yachatsikoq profesornömi trabajar qallëkurqan, pero pägontaqa manam chaskita puëderqantsu tukï documentokunataraq presentanan kaptin, tsë llapanqa demoranan karqan juk watapitapis masran. ¿Imatataq ruranan karqan pägonta y debiyanqanta chaskinampaqqa? Escuëlata rikaq sacerdötewanran parlanan karqan. Tsë sacerdöteqa, Jehoväpa testïgonkuna pensayanqan tsë colegiochö yachatsikuyanqanwan mana igualanqantam nirqan, tsëmi trabäjonta o creenciankunata akranampaq nirqan. Thomasqa trabäjonta y casi juk watapa debiyanqan pägonta dejarirmi, radiokunata y telëfonokunata altsapakur trabajar qallëkurqan. Kanan witsan nunakuna kayäpunqankunata oqrëta mantsayaptimpis, Thomas y wakin cristiänokuna pasayanqanqa rikätsikun, llapanta Kamaqman y markanta Tsapaqman, imata oqranantsik kaptimpis, llapan shonquntsikwan markäkunqantsiktam.
13. ¿Imanirtaq waktsa nacionkunachö Diospita yachatsikï más mirëkan?
13 Atska waktsa nacionkunachö qellë tarinan alläpa sasa o aja kaptimpis, Diospita yachatsikoqkunaqa más hörakunam yachatsikur puriyan. ¿Imanir? Juk sucursalpitam kënö qellqayarqan: “Mëtsikaq estudiëta munaq nunakunam trabäjonnaq kayan, tsëmi más tiemponkuna kan Bibliapita yachakuyänampaq. Cristiano mayintsikkunapapis masmi tiemponkuna kan Diospita yachatsikurnin puriyänampaq. Más waktsa kë kanqan lädokunachö täraq nunakunaqa, tukïta rikarmi musyayanna ushanan junaqkunachöna kawëkanqantsikta”. Juk nacionchöqa, cada publicadormi kimaqtanö Bibliapita yachakïta munaqkunata yanapan. 12 watapana juk nacionchö yanapakïkaq misionërom kënö qellqarqan: “Mëtsikaq publicadorkunapa kawënin sencillolla kanqan y tukïpaq yarpachakuyänampaq alläpa mana kaptinmi, más tiemponkuna kayäpun Diospita más yachatsikuyänampaq y Bibliapita yachakïta munaqkunatapis yanapayänampaq”.
14. ¿Imanötaq mana yupëtapis puëdepaq nunakunata Jehová tsapanqa?
14 Jehoväqa, markanta yanapanampaq, tsapänampaq y salvanampaqmi awnikushqa, y noqantsikqa llapan shonquntsikwanmi tsënö ruranampaq kaqman markäkuntsik o yärakuntsik (Sal. 37:28; 91:1-3). “Imeca nacaquicunatapis” kawëkar pasaq nunakunaqa mana yupëtapis puëdepaqmi kayanqa (Apo. 7:9, 14). Tsënöpam musyantsik kë ushanan junaqkunachö tsë nunakuna chipyëpa mana ushakäyänampaq kaqta. Tukï pruëbakunachö alli tsarakuyänampaq y Dioswan amigo këninkuna mana ushakänampaqmi, llapan necesitäyanqankunata chaskiyanqa. Y imëka nakakïkunapa ushanan junaqnam, Jehoväqa markanta tsapanqa.
“NÄNIKICHÖ YACHATSIMË, OH JEHOVÁ”
15, 16. ¿Imanötaq yanapamantsik Jehová yachatsimanqantsiknölla rurëqa? Willakaramï.
15 Sinchi kënintsikta mana oqranapaqqa, Jehoväpa yachatsikïnintam imëpis chaskikänantsik, tsëllatam Davidpis mañakurqan kënö nirnin: “Nänikichö yachatsimë, oh Jehová, chikimaqnïkunarëkur alli kaq nänipa pushamë” (Sal. 27:11). David mañakunqannölla imatapis rurëqa, Jehoväpa markan yachatsimanqantsikkunata wiyakïmi y nimanqantsikta raslla rurëmi. Mëtsikaq cristiänokunam tsë consëjota wiyakurnin necesitäyanqanllawan kawayan, tsënöpam mana precisaq cösaskunawan jaqa këman chäyashqatsu, y këqa yanapan tariyanqanllawan kushishqa kawakuyänampaqmi. Tarita mana puëdeyanqan cösaskuna munëwan nitipakashqa kayänampa rantinmi o trukanmi, Diospita yachatsikuyänampaq más tiemponkuna kayäpun. Tsëmi llapantsik kënö tapukushwan: “¿Bibliachö y llapanchö wiyakoq y yachëwan sirweq jorqamunqan publicacionkunachö leinqäkunata wiyakurku kawënïchö rurëkä, kuyanqä cösaskunata dejanä kaptimpis?” (Mat. 24:45, NM).
16 Alli kaq nänichö Jehová yachatsimänata y pushamänata dejarqa, manam imatapis mantsashuntsu. Estados Unidos nacionchömi, juk precursor regular llapan familian precursor regularnö yanapakur sïguiyänanta munar juk trabäjota mañakurqan, pero universidadchö mana estudiashqa karqa ni imëpis tsë cargochö mana trabajanampaq kaqtam supervisornin nirqan. Tsënö qamta nïkuyäshuptikëqa, ¿precursor kanëkirëkur universidadman mana ëwanqëkitatsuraq llakikunkiman karqan? Tsëpita ishkë semänallatanam tsë supervisorta qarquriyarqan; y juk mandakoqnam tapurirqan tsë precursorta kawëninchö ima rurëta munanqanta. Tsënam pëqa willarqan Jehoväpa testïgon kanqanta y warminwan junto llapan tiemponkunawan Diospita yachatsikoq kayanqanta, y tsënölla imëpis rurëta munayanqanta. Manaraq imatapis más parlaptinmi, tsë mandakoq nunaqa kënö nirqan: “¡Noqaqa musyarqänam jukläya kanqëkita! Teytä manaraq wanurnin cämarëkaptinmi, ishkaq Testïgokuna llapan junaqkuna Bibliata leipuyänampaq shayämoq. Tsëmi shonqüllachö nirqä juk Testïgota imëllapis makïchö yanapanäpaq këkaptinqa, tsëta ruranäpaq kaqta”. Waränimpaqqa unë supervisornin cargota qoyta mana munanqantam qoriyarqan. Rasumpam, Jehoväpa Gobiernonta puntaman churashqaqa, imapis mana faltamänantsikpaq awnimanqantsiktam pëqa cumplin (Mat. 6:33).
MARKÄKÏWAN SHUYAKIQA ALLÄPAM PRECISAN
17. ¿Imataq yanapamäshun shamoq tiempochö imapis pasakunampaq kaqta mana mantsashpa shuyaränapaq?
17 “¡Jehoväpa alli këninta kawëkaq nunakunapa chowpinchö rikänäpaq mana markäkurqa...!” nirmi Davidqa markäkïyoq o yärakuyyoq kë y shuyakïyoq këqa alläpa precisanqanta rikätsikurqan (Sal. 27:13). Këllaman pensari: ¿mëchöraq këkashwan karqan shuyakïnintsik mana qomashqantsik kaptinqa y Salmo 27 texto ninqan Diospa kuyakïninta precisaqpaq mana churashqa karqa? Jehová kallpata imëpis qomänapaq kaqman y Armagedonchö tsapämänapaq kaqman shonqupita patsë markäkur mañakïkäshun (lei Salmo 27:14).
[Yachakunapaq kaqpa tapukïninkuna]
[23 kaq päginachö dibüju]
Unë tiempochö Jehová salvanqanman yarparmi, Davidqa kallpata tarirqan alli tsarakunampaq
[25 kaq päginachö dibüju]
Qellë tarinan sasa o aja këkaptin, ¿churapakantsikku Diospita yachatsikïchö más yanapakunapaq?
