Diospa Gobiernonchö täraq alli nunakunanö portakushun

“Täraq alli nunakunanö portakuyë.” (FILI. 1:27, nota, NM.)

¿IMA NINKIMANRAQ?

¿Pikunataq Diospa Gobiernonchö tärëta puëdeyan?

¿Imatataq ruranantsik Diospa Gobiernompa idiömanwan, unëpita imanö kanqanwan y leyninkunawan?

Diospa Gobiernonchö täraqkuna, ¿imanötaq rikätsikuyan Diospa leyninkunata wiyakuyanqanta?

1, 2. ¿Imanirtaq Filipos congregacionchö cristiänokuna Pablu consejakunqanta alleq entiendiyarqan?

FILIPOS congregacionchö këkaq cristiänokunamanmi apóstol Pablu këta qellqarqan: “Cristupa alli willakïnin ninqanmannölla respëtowan portakuyë” (lei Filipenses 1:27 *). Griego idiömapita “portakuyë” nishpa traducikashqa palabrataqa, “täraq alli nunakunanö portakuyë” nishpapis traducikanmanmi. Kë palabrakuna ima ninan kanqantaqa, Filipos congregacionchö cristiänokunaqa alleqmi entiendiyaq, wakin akrashqa markakunachö täraqkunatanömi kë markachö täraqkunataqa Römapa leynin ninqanmannö kawayaptin más precisaqtanö rikäyaq. Filipos markachö romanokunanö täraq nunakunaqa kushishqam kayaq Römapa leynin ninqannö kawar y tsënö reqishqa kayanqanrëkur pëkunalla más precisaq yanapakïkunata chaskir.

² Pero Filipos congregacionchö cristiänokunaqa tsënö reqishqa kayanqampitapis más kushishqaran kayarqan, ¿imanir? Pablu yarpätsinqannöpis ciëlopaq akrashqa kar, täräyänampaq kaq marka ‘sieluchö’ kaptinmi (Fili. 3:20). Awmi, Diospa Gobiernonchö täraqkunam kayarqan y manam nunakunapa gobiernönchötsu. Tsënö karmi tsapäkïta y imawampis mana igualaq yanapakïkunata chaskiyaq (Efe. 2:19-22).

3. a) ¿Pikunataq Diospa Gobiernonchö täräyan? b) ¿Imatataq yachakushun kë yachatsikïchö?

³ Respëtowan portakuyë nir Pablu consejakunqanqa karqan ciëlochö Cristuwan Gobernaqkunapaqmi (Fili. 3:20). Jina kë consëjoqa yanapanmi Diospa Gobiernon mandakuptin kë Patsachö täraqpaq kaqkunatapis. ¿Imanir?  Porque llapan cristiänokunam, ciëlopaq kar o Patsapaq karpis, juk Reyllata o Jehovällata sirwiyan, tsëmi tsë leykunallata cäsokuyänan (Efe. 4:4-6). Kanan witsanqa, kapoqyoq nacionkunachö tärëta munarmi atskaq nunakuna tukïkunata rurayan. Pero tsëpitapis más allim Diospa Gobiernonchö tärëqa, ¿manatsuraq tsëchö täranqantsikta alläpa valorashwan? Diospa Gobiernonchö täranqantsikta más valoryoqta rikänapaqqa, igualaratsishun juk nacionchö täräyänampaq tukïkunata rurayanqantawan, Diospa Gobiernonchö täränapaq imakunata ruranantsikpaq kaqta. Tsëpitanam, Diospa Gobiernonchö tärëkanqantsikta mana oqranapaq kima o kimsa yanapakïkunata rikärishun.

JUK NACIONCHÖ TÄRÄNAPAQ IMAKUNATA MAÑAKUYANQAN

4. ¿Imataq ‘alli kaq idioma’, y imanötaq tsëta parlantsik?

⁴ Parlayanqan idiömata yachakuyänan. Nacionninchö tärëta munaqkunatam, wakin gobiernokunaqa tsë nacionchö más parlayanqan idiömata yachakuyänanta mañayan. Tsë nacionchö täräyänampaq permisota chaskirirpis, wakinkunaqa atska watakunaparan nakayan tsë idiömata alleq parlayänampaq. Quizaschi raslla yachakuriyan tsë idiömachö palabrakunata imanö patsätsita, pero parlarnin shumaq pashtakätsitaqa manam alleqllaqa puëdeyantsu. Tsënöllam Diospa Gobiernompis tsëchö täraqkunata mañan, Biblia ninqannöpis, “juk alli kaq idiömallata parlayänampaq” (lei Sofonías 3:9 *). ¿Ima idiömataq tsëqa? Bibliachö qellqarëkaq Diospita y munënimpita rasumpa kaq yachatsikïmi. Diospa leynin y consëjonkuna ninqanmannö portakïnintsik kaptinmi, tsë “alli kaq idiömallata” parlëkantsik. Diospa Gobiernonchö täraq nunakunaqa capazchi raslla yachakuriyanman Bibliapa más reqishqa kaq yachatsikïninkunata. Pero bautizakurirpis, sinchikur sïguinantsikmi tsë “alli kaq idiömallata” más alli parlanapaq. ¿Imanö? Llapantsikmi Bibliapa consëjonkuna ninqanmannö kawëkanqantsikta musyëta procuranantsik.

5. ¿Imanirtaq Jehoväpa markan imanö kanqanta alleq yachakushwan?

⁵ Unëpita imanö kanqanta yachakuyänan. Juk nacionchö tärëta munaqkunaqa capazchi ichikllatapis yachakuyanman tsë nación unëpita imanö kanqanta. Tsënöllam Diospa Gobiernonchö tärëta munaqkunapis, tsë Gobierno imanö kanqanta alleq yachakuyanman. Unë Israel nacionta yarpärishun. Corëpa kastankunaqa alläpam kuyayaq Jerusalenta y Diosta adorayänan templota, y tsë marka unëpita imanö kanqanta willakïtam alläpa gustayaq. Manam rumikunawan rurashqa kanqampitatsu masqa parlayaq, sinöqa, Jerusalen y templon “jatun Reypa” o Jehoväpa markan kanqampita, y tsë sitiochö rasumpa kaq adoración miranqampitam. Y tsëchömi  Diospa Leyninta yachatsikuyaq, jina Jerusalenpitam Jehoväqa Reynö markanta kuyanqanta rikätsikurnin gobernaq (lei Salmo 48:1, 2 *; 48:9, 12, 13). ¿Qampis pëkunanöku Jehoväpa markan Patsachö imanö kanqampita yachakïta y willakïta munanki? Markampita y tsëta Jehová imanö yanapëkanqanta más yachakurqa, Gobiernon rasumpa kanqanmanmi más markäkunki o yärakunki, y tsë Gobiernopita alli willakïkunatam más yachatsikïta munanki (Jer. 9:24; Luc. 4:43).

6. ¿Imanirtaq Jehoväqa shuyaran Gobiernompa leyninkunata y consëjonkunata yachakunantsikta?

⁶ Leyninkunata reqiyänan. Nunakunapa gobiernonqa, nacionninkunachö täraq nunakuna leyninkunata yachakuyänanta y wiyakuyänantam munayan. Tsënöllam Jehoväpis, Gobiernonchö täraq nunakuna leyninkunata y consëjonkunata yachakuyänanta y wiyakuyänanta shuyaran (Isa. 2:3; Juan 15:10; 1 Juan 5:3). Nunakunapa leyninkunaqa mana yanapakoq y mana allim imëpis kayan. Pero “Jehoväpa leyninqa chipyëpa allim” (Sal. 19:7). Y qamqa, ¿leyninchö kushikïta tarinkiku y llapan junaqkunaku Bibliata leinki? (Sal. 1:1, 2.) Diospa Leynintaqa reqishun kikintsikraq yachakurmi. Manam juktsu noqantsikpaq tsëta ruranqa.

DIOSPA GOBIERNONCHÖ TÄRAQKUNAQA LEYNINKUNATAM KUYAYAN

7. ¿Ima leytataq Diospa Gobiernonchö täraqkunaqa chaskintsik?

⁷ Diospa Gobiernonchö imëyaqpis kawanapaqqa, manam leyninkunata musyanantsikllatsu precisan, sinöqa kuyanantsikmi. Kanan witsanqa, mëtsikaq nunakunam täräyanqan nacionpa leyninkuna wiyakuyanqanta niyan. Tsënö kaptimpis, munëninkunapaqnö mana kaptinqa, y pipis mana rikëkaptinqa manam cäsokuyantsu. ‘Ricarëcayaptinllam’ imatapis ruraqtukuyan (Col. 3:22). Pero Diospa Gobiernonchö täraqkunaqa más alli kaq leykunatam chaskintsik. Nunakuna mana rikëkämashqapis Diospa leyninkunataqa kushishqam wiyakuntsik. ¿Imanir? Qellqatsimoqninta kuyarninmi (Isa. 33:22; lei Lucas 10:27).

8, 9. ¿Imanötaq musyankiman Diospa leyninkunata kuyanqëkita?

⁸ ¿Imanötaq musyankiman Diospa leyninkunata rasumpa kuyanqëkita? Tsëpaqqa, imanöpis vestikunqëkipaq y altsapäkunqëkipaq consejayäshuptiki imanöpis chaskikunqëkiman pensarï. Diospa Gobiernonchö manaraq tärarqa, capazchi lluta o qarëki rikakïkaq o qarëkiman laqarëkaq röpakunawan vestikoq kanki. Pero Diosta masna kuyarqa, pëpa jutin alabashqa kananta munarchi shumaqna vestikur qallarqëki (1 Tim. 2:9, 10; 1 Ped. 3:3, 4). Kananqa capazchi alli juiciowanna vestikunqëkita pensanki. Pero, “congregacionchö atskaq publicadorkunatam vestikïniki mana allikunata pensëkätsin” nir juk anciano nishuptikiqa, ¿imataraq rurankiman? ¿Tukïnöpatsuraq tsapäkunkiman? ¿Piñakunkimantsuraq o mana wiyakushpatsuraq tsënölla vestikur siguinkiman? Diospa Gobiernonchö precisaq leyqa mandakun, tsëchö täraqkuna Cristu ruranqankunata qatiyänampaqmi (1 Ped. 2:21). Tsëpaq parlarmi apóstol Pablu kënö qellqarqan: “Imecatapis alli caqta rurashun nuna mayintsicwan cushishqa cawacunantsicpaq, y mas marcäcoq ticranantsicpaq. Porqui Jesucristupis manam quiquin cushicunanpaqtsu imatapis rurarqan” (Rom. 15:2, 3). Congregacionchö yamë kawakï kananta munarmi, juk poqu cristiänoqa, kikimpa munëninta dejarir jukpa conciencianta kushishqa respetan (Rom. 14:19-21).

⁹ Kananqa, alläpa precisaqta ishkë masta rikärishun: Pununakïpaq imatapis pensanqantsikta, y casado kawëta imanö rikanqantsikta. Diospa Gobiernonchö mana täraqkunaqa, ollqupura o warmipura pununakoqkunata, röpannaq warmipis ollqupis rakcha rurëkaqkunata rikarë allilla kanqantam pensayan, jina majayoq këkar jukwan punukï y divorciakïpis cada nuna  akrakunampaq libre kanqantam niyan. Pero Diospa Gobiernonchö täraqkunaqa, tsënö mana alli pensëkunatam dejayashqana. Mëtsikaq nunakuna manaraq cristiano karnin mana allikunata rurar kawashqa karpis, kananqa alleqmi musyayan majanwan punukï y casado kawëqa Jehoväpa qarënin kanqanta. Diospa leyninkunatam alläpa respetayan y alleq clärom musyayan jukwan jukwan pununakoqkunaqa Diospa Gobiernonchö mana täräyänampaq kaqta (1 Cor. 6:9-11). Jinamampis musyayanmi shonqu traicionakoq kanqanta (Jer. 17:9). Tsëmi, allikunata rurarnin tsarakuyänampaq claro consëjokunata chaskiyanqampita alläpa agradecikuyan.

DIOSPA GOBIERNONCHÖ TÄRAQKUNAQA CONSEJAYANQANTA WIYAKUYANMI

10, 11. ¿Ima willakïkunatataq Diospa Gobiernon necesitanqantsik hora qomantsik, y imatataq qam tsëkunapaq pensanki?

¹⁰ Gobiernokunaqa, mikïkuna y ima jampikuna mana alli kanqanta musyarirqa, rasllam llapan nunakunata willariyan. Rasumpa kaqchöqa, mikïkuna y jampikunaqa manam llapantsu mana alli kayan. Tsënö kaptimpis, wakinkuna mana alli kanqanta musyarirqa, capazchi gobiernoqa tsë nacionchö täraqkunata willatsinman cuidakuyänampaq. Pero mana willatsikunqampita imapis pasakuptinqa, gobiernochi culpayoq kanman. Tsënöllam Diospa Gobiernompis, nunankunapa portakïninkuna y Diospa kaqchö rurëninkuna alli kananta munar, necesitanqantsik hora ima peligropitapis claro willamantsik. Këllaman pensarishun, llapanchö wiyakoq y yachëwan sirweqqa, atska watapanam claro willakëkämun Internetchö rakcha rurëkaqkunata rikëqa, Diospa Gobiernonchö täraq nunapaq alläpa mana alli kanqanta. ¡Alläpam kushikuntsik tsë willakïkunapita!

¹¹ Tsëllaraqmi, Internetpa parlayanqan progrämakuna más reqishqa këman tikrarishqa, alli juiciowan utilizashqaqa allichi kanman; manaqa, mana alli amïgokunawan juntakätsimarnintsikmi mana allikunaman chätsimashwan (1 Cor. 15:33). Jehoväpa markanqa tsë progrämakunapaq parlarmi, alli juiciowan utilizänampaq alli consëjokunata qomarquntsik. ¿Llapanchö wiyakoq tsëkunapaq parlaq publicacionkunata tsëllaraq jorqamunqankunata llapantaku leirqunki? Tsë publicacionkunata manaraq leir tsë progrämakunaman yëkïqa, imëka imanö utilizänapaq kaqta manaraq musyar alli fuerte jampita upurinöchi kanman. *

12. ¿Imanirtaq pasëpa upa rurë kanman consejamanqantsikkunata mana wiyakïqa?

¹² Llapanchö wiyakoq consejakunqanta mana wiyakoqkunaqa pasëpa mana allichömi ushayan y kuyashqa familiantapis pasëpam llakitsiyan. Wakinkunaqa Jehová rikëkanqanta mana creirmi rakchakunata o qanrakunata rurëkaqkunata rikaräkïta mäñashqa kayan y tukï mana allikunata rurayan. ¡Jehová llapanta rikarëkämunqanman mana creiqa upa këmi! (Pro. 15:3; lei Hebreus 4:13.) Imanömi juk gobiernopis mana alli ruraq nunakunata markampita qarqurita puëden, tsënöllam Jehoväpis gobiernonchö tärëkar leyninkunata mana wiyakoqkunata y mana arrepentikoqkunata markampita qarqurinqa (1 Cor. 5:11-13). * Pero Jehoväqa alläpa kuyakoq karmi, Patsachö cargoyoq sirweqninkunawan tsënö jutsa ruraq nunakunata yanapëta munan (Gal. 6:1). Y mana alli rurëninkunata dejarir arrepentikoqkunaqa Dioswan alli këtam yapë tariyan y Gobiernonchömi tärarnin sïguiyan. (2 Cor. 2:5-8) ¡Alläpa kushikïpaqmi tsënö kuyakoq Reyta sirwiqa!

 DIOSPA GOBIERNONCHÖ TÄRAQKUNAQA YACHAKÏTAM PRECISAQPAQ CHURAYAN

13. Diospa Gobiernonchö täraqkuna, ¿imanötaq rikätsikuyan yachatsiyanqankunata valorayanqanta?

¹³ Atskaq gobiernokunam nacionninchö täraqkunata yachatsita procurayan. Këllaman pensarishun, escuelakunatam rurayan, tsëchö leita y qellqëta yachatsiyan, tsënöpa imallachöpis trabajarnin mantenikuyänampaq. Cristiänokunaqa tsë estudiokunata kushishqam chaskikuyan, tsëmi qellqëta y leita alleq yachakïta procurayan; pero tsëkunapitapis masqa, Diospita yachatsikïta chaskiyanqantam más precisaqpaq churayan. Jehoväqa congregacionkunawanmi alli leita yachakuyänampaq yanapakun. Tsëmi, teytakuna pishi wamrankunata leipäyänan. Llapanchö wiyakoqqa, llapan killakunam Bibliapita yachatsikunata Täpakoq revistachö atska päginakunata jorqamun. Cada junaq juk o ishkë päginakunata leirqa manam qepapankitsu Diospita yachakïchö.

14. a) ¿Ima yachatsikïkunatataq chaskintsik? b) Familiachö Diosta Adorana Hörata ruranëkipaq, ¿mëqan consëjokunatataq utilicëkanki?

¹⁴ Llapan semänakunam reunionkunachö Diospa Gobiernonchö täraqkunata congregacionchö yachatsiyan. Këllaman yarpärishun, Yachatsikunapaq Diospa Escuëlanqa 60 watakunapitapis masnam tsëman matriculäkushqakunata Diospita alleq yachatsikoqkuna kayänampaq mëtsikaqta yanapëkan. Qamqa, ¿matriculäkurqunkinaku tsë escuëlaman? Kë pasaq watakunachöqa, llapanchö wiyakoq y yachëwan sirweqqa allipam yarpätsikushqa cada semana Familiachö Diosta Adorana Hörata runapaq. Kë reunionqa familiachö juknölla kayänampaqmi yanapakun. ¿Kë reunionta imanö ruranapaq publicacionnintsikkunachö yurimoq consëjokuna ninqannöku rurëkanki? *

15. ¿Imataq imapitapis más kushikïpaq rurënintsik?

¹⁵ Nunakunapa gobiernonchö kaqkunaqa llapankunam rikätsikuyan juk candidätoman qaqäyanqanta, höraqa punkun punkunmi tsë candidätopaq votayänampaq parlapaq ëwayan. Pero tsëkunapitapis masmi Diospa Gobiernonchö täraqkunaqa cällekunachö y punkun punkumpis nunakunata kushishqa parlapäyan pëkunapis Pëpa mandädonchö kayänampaq. Punta yachatsikïchö rikanqantsiknöpis, Täpakoq revistam ima revistapitapis entero Patsaman chan, tsëtaqa jorqayämun Jehová Diospa Gobiernompita willakunampaqmi. Imapitapis más kushikïpaq rurëqa, Diospa Gobiernompita nuna mayintsikta yachatsikïmi. ¿Qamqa llapan puëdenqëkimannöku Diospita yachatsikunki? (Mat. 28:19, 20.)

16. ¿Imanötaq rikätsikushwan Diospa Gobiernonchö täraq alli nunakuna kanqantsikta?

¹⁶ Ichikllachönam Patsachöqa Diospa Gobiernonllana mandakunqa. Llapan kawënintsikchömi pushamäshun. Tsë witsanqa, ¿Diospa Gobiernonchö täraq alli nunakunatsuraq kashun? Kanan witsankunam tsënö kanqanta rikätsikunantsik. Imatapis cada ruranapaq churapakanqantsikchöqa Diospaqnö rurëkäshun, y rikätsikushun Diospa Gobiernonchö täraq alli nunakuna kanqantsikta (1 Cor. 10:31).

[Päginapa ura kuchunchö willakïkuna]

[Yachakunapaq kaqpa tapukïninkuna]

[14 kaq päginachö ninqan]

¿Internetta imanö utilizänapaq Bibliapita jorqushqa consëjokunata wiyakïkankiku?

[12 kaq päginachö dibüju]

Corëpa kastankuna rurayanqannöku, ¿rasumpa adoracionta y unëpita imanö kanqanta kuyanki?

[15 kaq päginachö dibüju]

Familiachö Diosta Adorana Höram qamta y familiëkita yanapayäshunki Diospa Gobiernonchö tärarnin alli nunanö portakuyänëkipaq