Unë imanö kanqantsik

Peregrïnokuna watukakur puriyanqan

“¡NOQAQA manam wayin wayin yachatsikoq ëwëta puëdëtsu!” Noqantsikwan Bibliapita yachakïkaqkunaqa mëtsikaqmi mana reqiyanqan nunakunata Diospita yachatsikuyänampaq invitashqa tsënö niyashqa. Tsënö kaptimpis, tsënöqa parlarqan atska watapana Bibliapita alli yachatsikoq peregrïnom.

Zion’s Watch Tower (La Torre del Vigía de Sión) nishqan revistata leirir iglesiankunata mëtsikaq dejaqkunam, pëkunanölla Bibliapa rasumpa yachatsikïninta yachakïta munaqkunawan junto këta munayarqan. Tsë revistam nirqan pëkunanölla Diosman markäkoqkunata o yärakoqkunata ashiyänampaq y juntakëkur mana dejëta Bibliapita yachakuyänampaq. 1894 wata witsankunanömi, Sociedad Watch Tower nishqan, watukakoq cristiänokunata mandayaq mañakoq grüpokunaman. Tsë alli yachaq y yanapakoq wawqikunataqa akrayaq humilde kayanqampita, Bibliapita alleq yachayanqampita, mëtsikaq nunakunachö alli parlaq y yachatsikoq kayanqampita y nunakunarëkur Jesus wanunqanman markäkuyanqampitam. Juk o ishkë junaqllam watukakuyaq, tsënö kaptimpis tsë junaqkunaqa mëtsika rurëyoqmi kayaq. Mëtsikaq Bibliata Estudiaqkunam Diospita yachatsikur qallayarqan mëqan peregrïnopis ruranampaq kaq discursoman invitakur. Juk paqas juk escuëlachö discursowan yachatsikurirmi, Hugo Riemer wawqiqa Bibliapita nunakunapa tapukïkunata pullan paqaspitapis masyaq contestar karqan, tsëpita más watakunataqa Jehoväpa Testïgonkunata Pushaqmi tikrarirqan. Utishqa këkarpis tsë reunión “alläpa shumaq” kanqantam kushishqa nirqan.

Bibliapita yachakïkaqkunapa wayinkunachö reunionkunata rurar peregrïnokuna watukakur yanapakuyanqanqa, tsë grüpochö këkaqkunapa markäkïninkuna o yärakuyninkuna miranampaq alläpa yanapakunqantam Zion’s Watch Tower nishqan revista nirqan. Tsë grüpopa amanunchö täraq Bibliata Estudiaqkunam ëwayaq discursokunata wiyayänampaq y tapukïkunata contestayanqan reunionkunaman. Tsëkuna ushariptinnam, llapankuna imallatapis shumaq mikuriyaq. Maude Abbott cristiänam willakun wamra kanqan witsan qoyapa juk discurso wiyaq ëwanqanta y tsë ushariptin llapankuna juk patiochö jatun mesa këkaqman täkuriyanqanta. Kënö nirmi yarpan: “¡Mëtsika tukïläya mikïmi karqan! Karqanmi jamón, ankashqa pollo, tukïläya tantakuna y pastelkuna. Llapäkunam manana munayanqäyaq o munapäkunqäkama mikuyarqä, y 2 de la tarde höranam juntakäriyarqä juk discursota wiyayänäpaq. Pero llapäkunatam punï acusayämaq!” Atska watakunapana peregrïnonö yanapakoq Benjamin Barton wawqim kënö qellqarqan: “Tsë mëtsika mishki mikïkunata mikukurkurqa [...], ¡unënachi peregrïnonö yanapakïta dejarishqa käman karqan!”. Tiempowannam, Brooklynchö këkaq oficïnakunapita cartakunata alläpa kuyakoq panikunaman apatsiyarqan, tsëchömi peregrïnokuna tranquilo punuyänampaq wallkallata y sencillo mikïkunallata qarayänampaq mañayaq.

Tsë peregrïnokunaqa yachatsikïtam alläpa yachëkuyaq, tsëmi dibüjokunata, maquëtakunata y imatapis amänuchö tariyanqantaqa, discursonkuna shumaq kanampaq utilizäyaq. Këllam pensarishun, R. H. Barber wawqiqa, imata karpis rurareqmi discursonkuna imëpis shumaq kanampaq. W. J. Thorn wawqinash alläpa kuyakoq kaq, tsënö kaptinshi wakinkunaqa Diosta unë sirweq awkinkunanö parlanqanta niyaq. Jina Shield Toutjian wawqish Ford modelo A, reqishqa marcayoq cärrowan ëwëkar, illaqpita kënö qaparirqan: “¡Pärë!”. Tsënash cärropita raslla yarpurir wëtata pallarir tsëchö këkaqkunata wëtankuna tsaräratsir Jehová tukïta kamanqampita parlar qallëkunaq.

Peregrïnokuna más edäyoq këman chärirqa, tukïpam pasayaq. Tsënö kaptimpis, más sasa o aja  cambioqa  karqan wayin wayin yachatsikur punta puntachö kayänampaq niyanqanmi. 1924 wata, 15 de marzo killa, La Torre del Vigía nishqan revistam kënö nirqan: “Cristiänokunapa juk precisaq rurëninqa Diospa Gobiernompita yachatsikïmi. Tsëta rurayänampaqmi peregrïnokuna këkäyan”.

Wakin peregrïnokunaqa piñakurmi tsënö watukakur puriyanqanta dejariyarqan y wakinkunanam grüponkuna rurëkur juk religionninkunata yuritsiyarqan. Robie D. Adkins wawqim juk alli yachatsikoq peregrino alläpa llakishqa kanqanta y kënö parlar purinqampita willakun: “¡Plataformallapitam yachatsikïta yachä. Noqaqa manam wayin wayin yachatsikoq ëwëta puëdëtsu!”. Wawqi Adkinsmi këta yarpan: “Tsë peregrïnotaqa yapë rikarqä 1924 watachö Columbus (Ohio) nishqanchö juk asamblea rurakanqanchömi. Tsëchömi juk jatun plantapa wänin o lantuyninchö ganasninnaq y llakishqa japallan shëkarqan. Atska waranqa wawqikunam kushishqa tsëchö këkäyarqan, pero pëqa chipyëpa piñashqam këkarqan. Mananam yapëqa rikarqänatsu, Jehoväpa markantam dejarirqan”. Pero wayin wayin Diospita yachatsikïta munëwanmi “atskaq wawqikuna cärronkunaman kushishqa librokunata aparnin pëpa lädompa pasayaq” (Hech. 20:20, 21).

Wayin wayin imanö yachatsikuyänampaq yachatsiyanqan cristiänokunanölla mantsakurpis, mëtsikaq peregrïnokunam kushishqa yachatsikur puriyaq. Wayin wayin Diospita yachatsikïpaq alemán idiömata parlaq Maxwell G. Friend (Freschel) wawqim këta qellqarqan: “Wayin wayin yachatsikïqa juk bendición masmi noqapa kashqa peregrïnonö watukakur purinqächö”. John A. Bohnet peregrïnonam, cristiänokuna Diospita juknöpana yachatsikuyänampaq kaqta kushishqa chaskikuyanqanta willakurqan. Llapankunanöshi “alläpa munëkuyaq punta puntata ëwëta” wayin wayin Diospa Gobiernompita yachatsikuyänampaq.

Mëtsika watakunapam watukakur pureq cristiänokunaqa alläpa yanapakuyashqa. Yachatsikïta alli yachaq Norman Larson jutiyoq Testïgom kënö nin: “Wamra kanqäpita patsëmi watukakur pureq peregrïnokuna alläpa yanapakuyanqanta entiendirqä [...] Pëkunam yanapayämarqan alli nänipa ëwanäpaq”. Kanan witsampis, shonqupita patsë y tukï munëninkunata dejarïkurmi watukakurnin pureq wawqikuna yanapantsik noqantsikpis, “¡noqaqa wayin wayin yachatsikoq ëwëta puëdëmi!” ninantsikpaq.

[32 kaq päginachö ninqan]

Peregrïnokunapa watukakïninqa kushikïpaqmi kaq

[31 kaq päginachö fötu]

1905 watachöqa 170 sitiokunatam Benjamin Barton watukakoq

[32 kaq päginachö fötu]

Walter J. Thorn peregrïnotaqa alläpa kuyakoq y ankupäkoq kaptinmi, wawqi panikunaqa Papá niyaq

[32 kaq päginachö fötu]

J. A. Browne peregrïnom 1902 watachö Jamaica nacionta ëwarqan 14 ichikllan grüpokunata yanapanampaq

[32 kaq päginachö fötu]

Peregrïnokunaqa cristiano mayinkunapa markäkïninkunata o yärakuyninkunatam sinchiyätsiyaq, jukllëllanö kayänampaq yanapayaq y Jehoväpa markan imanö kanqanta más musyatsiyaq