1, 2. ¿Asamblëantsikkuna imanö kanqantataq yachakushun?

ATSKA watakunapanam, jatun kaq asamblëankuna y atska nacionkunapaq asamblëankuna Jehoväpa testïgonkuna unëpita imanö kayanqanta rikätsikushqa. Wakinnintsikqa tsë asambleäkunaman mëtsika kutim atska watakunapa ëwashqantsik.

² Diosnintsikpaq unë markampis tsënö asamblëakunata rurayaqmi, tsëpitaqa atska waranqa watakunanam pasashqa. Kanan witsankuna asamblëantsikkuna imanö kanqanta rikarninmi, musyanki unë witsan asamblëakunata rurayanqanwan imachö igualayanqanta, alläpa allim kanqa tsëkunaman ëwanan imanir precisanqanta alleq yachakunëki (Sal. 44:1; Rom. 15:4).

3. a) ¿Imakunataq pasakurqan Diospa markan qallanan asamblëata rurayanqanchö? b) ¿Imanötaq asamblëaman israelïtakunata qayatsiyaq?

³ Sinaí jirka chakinchö Diospa yachatsikïninta wiyakuyänampaq israelïtakuna juntakäyanqanmi rikätsimantsik tsë junaq asamblëakuna rurakar qallanqanta, tsëmi rasumpa kaq adoracionchö tsë asamblea alläpa precisaqtanö yarpantsik. Tsë mana qonqëpaq asamblëachömi Jehoväqa alläpa poderoso kanqanta rikätsikurqan y Leyninta israelïtakunata qorqan (Éx. 19:2-9, 16-19; lei Éxodo 20:18 * y Deuteronomio 4:9, 10 *). Tsëpita patsëmi alläpa precisaq tikrarirqan israelïtakunawan Diosnintsikpa amigo kënin. Tsëpitanam llapan nunakunata imanö qayatsinampaq, Moisesta Jehová mandarqan  plätapita ishkë trompëtakunata rurayänampaq, y ‘reunionta rurayänan carpa wayipa puntanman’ ‘llapan asamblea’ juntakänampaq tsë trompëtakunata tocarnin qayatsiyänampaq (Núm. 10:1-4). ¡Jehoväta shonqupita patsë adoraqkunaqa imanö kushishqaraq sientekuyaq!

4, 5. ¿Imanirtaq alläpa precisaq karqan llapan israelïtakuna asamblëaman juntakäyänampaq Moises y Josué qayatsiyanqanqa?

⁴ 40 watapa desiertochö kayanqan ushanëkaptinnam, mana qonqëpaq pasakunqan witsanchö, mushoqllaraq Israel nacionta Moises juntarqan. Jehová Awninqan Patsamanmi yëkuyänampaqna këkäyarqan, tsë junaqmi alläpa precisarqan pëkunapaq Jehová tukïta ruranqampita y tukïta ruranampaq kaqkunapita yarpätsinan (Deut. 29:1-15; 30:15-20; 31:30).

⁵ Jina tsë asamblëallachöchi, Diospa yachatsikïninta wiyakuyänampaq, juntakëta mana dejayänampaq Jehová mandakunqanta Moises parlarqan. Sábado watakunachö Ramäda Wayikunapa fiestan celebrayanqanmanqa, Jehová mandakunqan sitiomanmi ollqukuna, warmikuna y Israelchö täraq o tiyaq forastërokuna ëwayänan karqan. ¿Imapaq? Bibliam kënö willakun: “Wiyakuyänampaq y yachakuyänampaq, tsënöpa Jehová Diosnikikunata mantsayänampaq y kë ley ninqannö rurayänampaq” (lei Deuteronomio 31:1, 10-12 *). Israel marka qallanqan witsanqa, alleq cläronam karqan Diospa palabranta y munëninkunata yachakuyänampaq juntakäyänan alläpa precisanqanqa. Jehová Awnikunqan Patsaman yëkurirnam, Jehoväta mana adoraq markakuna këkäyaptinllaraq, Diosta sirwiyänampaq awnikuyanqanta yarpätsinampaq Josué llapan israelïtakunata qayatsirqan. Y pëkunaqa Jehovällata imëpis sirwiyänampaqmi awnikuyarqan (Jos. 23:1, 2; 24:1, 15, 21-24).

6, 7. ¿Imanirtaq kanan witsankuna Jehoväpa testïgonkunapa asamblëankuna alläpa precisaqpaq kayashqa?

⁶ Kanan witsankunapis Jehoväpa testïgonkunapa asamblëankunachöqa kashqam Diospa markan alliyänampaq precisaq cambiokuna y Bibliapa yachatsikïninkunata más entiendeyanqampita willakïkuna (Prov. 4:18). Punta jatun guerra ushariptinmi, Bibliata Estudiaqkunapa más jatun kaq punta asamblëankuna rurakarqan 1919 wata Cedar Point (Ohio, Estados Unidos) nishqan markachö. Tsëmanqa juntakäyarqan 7000 nunakunam o runakunam, y tsëchömi qallakarqan entero Patsachö wayin wayin yachatsikï. 1922 wata, isqun junaqkunapa rurakanqan asamblëachömi, Joseph F. Rutherford tsëchö mäkoqlla wiyëkaqkunata yachatsikur sïguiyänampaq alläpa yanaparqan kënö nir: “Rasumpa y Señorta mana dejaq testïgonkuna kayë. Mana utishpa sïgueyë kallpachakurnin Babilonia chipyëpa ushakanqanyaq. Tsë willakïta karuman y më tsëman chätsiyë. Entero mundom Jehová Dios kanqanta y Jesucristu reykunapa Reynin y señorkunapa Señornin kanqanta musyanan. Kë junaqqa alläpa precisaq junaqmi. ¡Rikäyë, Reyqa mandakëkämunnam! Qamkunam musyatsikoqninkuna kayanki. Tsënö kaptinqa, willakuyë, willakuyë, willakuyë Gobiernompita y Reynimpita”. Tsëchö këkaqkuna y entero mundochö Diospa sirweqninkunam kushishqa tsë invitacionta chaskikuyarqan.

⁷ Bibliata Estudiaqkunaqa 1931 watachömi Columbus (Ohio) markachö kushishqa Jehoväpa testïgonkuna nishpa jutinkuna churakuyarqan. Washington markachömi 1935 watachö, wawqi Rutherford entiendetsikurqan “tronucho tëcaq Diospa y Achcaspa nopancho” “mana yupetapis puedipaq” nunakunapaq Apocalipsis libro parlanqan pikuna kayanqanta (Apoc. 7:9-17). 1942 wata ishkë kaq jatun guerra këkanqan witsanmi, “Yamë kawakï... ¿imëyaqpis kanqatsuraq?” neq tïtuloyoq shumaq discursopita Nathan H. Knorr yachatsikurqan, tsëchömi Apocalipsis  17 kaq capïtulonchö parlanqan ‘mantsanepaq puca achachi’ pï kanqanta rikätsikurqan y guerra pasariptimpis Diospita atska watakunaparaq yachatsikurnin sïguenantsikpaq kaqta nirqan.

8, 9. ¿Imanirtaq wakin asamblëakunaqa alläpa kushikïpaq kayashqa?

⁸ Cleveland (Ohio) markachömi 1946 watachö Asamblea Teocrática “Naciones Alegres” tïtuloyoq asamblea karqan, tsë asamblëachöqa “Los problemas de la reconstrucción y expansión” tïtuloyoq discursota wawqi Knorr ruranqanmi más yarpëpaq karqan. Tsë yachatsikï alläpa shumaq kanqampaq parlarmi juk cristiano kënö nirqan: “Tsë ampiqa o paqasqa, wawqi Knorr discursanqan plataformapa qepanchömi këkarqä, y Diospita yachatsikï mirëkanqanta y Brooklynchö Betel wayita y fabricata más jatunyätsiyänampaq pensëkäyanqanta willakuptinmi tsë asamblëachö mëtsikaq këkaqkuna kushishqa kutin kutin unëpa paqchiyarqan o taqllayarqan, plataformapita cärankuna alleqlla mana rikakuptimpis, chipyëpa kushishqa kayanqanqa clärom rikakurqan”. 1950 wata Nueva York markachö rurakanqan asamblëachönam, tsëchö këkaqkuna llapankuna chaskiyarqan Traducción del Nuevo Mundo de las Escrituras Griegas Cristianas nishqan Bibliata, tsë Bibliaqa qellqashqa karqan nunakuna parlayanqanmannömi y Diospa jutintam qallananchö kanqantanö tsë Bibliaman churayarqan (Jer. 16:21).

⁹ Jina alläpa kushikïpaqmi kayarqan Jehoväpa markan chikishqa këninkunapita pasarirnin juntakäyanqan asamblëakunapis. Këllaman pensarishun, Alemania nacionpita Adolf Hitler nunam Jehoväpa testïgonkunata chipyë ushakätsinampaq churapakarqan. Pero 1955 watachöqa, Testïgokunata ushakätsinampaq parlanqan y tröpankuna juntakäyanqan Núremberg nishqan jatun pampachömi, Jehoväpa testïgonkuna juk asamblëapaq 107.000 juntakäriyarqan. ¡Tsëchö këkaqkunaqa mëtsikaqmi kushikïpita waqayarqan! Polonia nacionchönam 1989 wata, “Devoción Piadosa” tïtuloyoq kima asamblëakuna rurakarqan. Tsëmanqa juntakäyarqan 166.518 nunakunam y mëtsikaqmi ëwayarqan Unión Soviëticapita, Checoslovaquiapita y Europa del Este nacionkunapita. Wakinkunaqa tsëchöran rikäyarqan juk reunionllachö 15 o 20 cristiänokunapitapis más juntakäyanqanta. Kiev (Ucrania) nacionchönam 1993 wata Atska Nacionkunapaq “Enseñanza Divina” tïtuloyoq asamblea rurakarqan. ¿Pensarinkiku 7.402 nunakuna bautizakoqta rikar tsëchö cristiänokuna alläpa kushikoqta? Kanankamayaqqa manam juk asamblëallachö tsëtsikaq Jehoväpa testïgonkuna bautizakuyashqatsu (Is. 60:22; Ageo 2:7).

10. ¿Ima asamblëakunatataq alläpa kushishqa yarparanki, y imanir?

¹⁰ Quizaschi kushishqa yarpanki jatun asamblëakunaman o atska nacionkunapaq asamblëakunaman ëwanqëkita. Awmi, punta ëwanqëki o bautizakunqëki kaq asamblëaqa cristiano kawënikichö shumaq yarpëpaqchi. ¡Ama qonqëtsu tsëkunachö shumaq pasanqëkitaqa! (Sal. 42:4.)

11. ¿Ima fiestakunata rurayänampaqtaq Israel nacionta Jehová mandarqan?

¹¹ Jehovämi israelïtakunata mandarqan llapan watakuna kima kuti Jerusalenchö fiestata celebraq  ëwayänampaq, tsë fiestakunaqa kayarqan: Levadürannaq Tantata Mikuyanqan, Semana jutiyoq kaq (tsëpitaqa Pentecostes nishpam reqiyarqan) y Ramäda Wayikunapa nishqanmi. Leyqa këtam mandakoq: “Watachö kima kutim llapan ollqu kaqkuna rasumpëpa Señor Jehoväpa nöpanman shayämunan” (Éx. 23:14-17). Familianta pushaq ollqukunaqa alleqmi musyayaq tsë fiestakunaman ëwë Dioswan alli kayänampaq alläpa yanapakunqanta, tsëmi llapan familiankunawan ëwayaq (1 Sam. 1:1-7; Luc. 2:41, 42).

12, 13. ¿Wata wata fiestakunaman ëwëqa familiayoq israelïtakunapaq fäciltsuraq karqan?

¹² Israelïta familiapaq tsë fiestakunaman ëwë sasaraq o ajaraq kanqanman pensari. Mariaman y Josëman yarpärishun, pëkunaqa Nazaretpita Jerusalenyaqmi 100 kilömetrostanö viajayänan karqan. Y qamqa, ¿ëka junaqraq pishillaraq wamrëkikunawan tsë karu nänita ëwankiman? Wamrallaraq këkar Jesus familianwan Jerusalenta ëwanqan willakïmi rikätsimantsik familiakunaqa llapankuna juntakëkur viajayanqanta. Atskaq viajë y llapampaq cocinë y mana reqiyanqan markakunachö posäda ashiqa mana qonqëpaqchi karqan. Tsënö kaptimpis, tsë viäjeqa manachi alläpa mantsëpaqtsu karqan, tsëchi 12 watayoq wamrapaqpis alläpa yarpachakuyaqtsu. ¡Tsëkunachö imatapis pasayanqantaqa manachi qonqayaqtsu, masnäqa joven kaqkunachi yarparäyaq! (Luc. 2:44-46.)

¹³ Mëtsikaq israelïtakunam markankunata dejarir juk markakunaman ëwakushqa kayarqan. Tsëmi tsë fiestakunaman más atskaq ëwaqkunaqa kayarqan tukï nacionkunapita. Jesus shamushqanchöna 33 wata Pentecostes fiestamanqa Jerusalenta ëwayashqa kayarqan Diosta kuyaq judío kaqkuna y mana judío kaqkunam, pëkunaqa kayarqan alläpa karu markakunapitam: Italiapita, Libiapita, Crëtapita, Asia Menorpita y Mesopotamiapitam (Hech. 2:5-11; 20:16).

14. ¿Ima yanapakïkunatataq tariyaq israelïtakuna cada wata fiestakunaman ëwarnin?

¹⁴ Diosta kuyaq israelïtakunapaqqa tsë viäjeqa más precisaq karqan Diosta kuyaq wakin nunakunawan juntakëkur Jehoväta adorayanqanmi. ¿Imanöraq sientekuyaq? Këtaqa tantearishun Ramäda Wayikuna fiestata imanö rurayänampaq Jehová mandakunqanchömi, kënömi nirqan: “Tsë fiestëkichöqa kushishqam kanëki y wayikichö këkaq ollqu wamrëki, warmi wamrëki, ollqu y warmi sirwishoqniki, levïta nuna, forastero nuna, teytannaq y mamannaq kaq y viudayashqa kaq. Jehová akranqan sitiochömi qanchis junaq Jehoväpaq fiestan ruranëki, Jehovämi bendecishunki llapan murukïnikichö y ruranqëkichö, y mana yarpachakushpam kushishqa kanëki” (Deut. 16:14, 15; lei Mateo 5:3 *).

15, 16. ¿Imakunatataq rurarqunki asamblëakunachö kanëkirëkur y imanirtaq allipaq karqan?

¹⁵ Diospa markan unë witsan asamblëakunata rurayanqampitaqa kanan witsan cristiänokunapis alläpam yachakuntsik. Awmi, tsë witsankunapita kananqa jukläyanam, pero imapaq kanqanqa tsëllam. Unë witsan tsëman ëwayänanqa sasaran o ajaran karqan y kanampis tsënöllam; pero alläpa yanapakoqmi kayan. Diosta kuyaqkunapaqqa alläpa kushikïpaqmi karqan y kanan witsankunapis tsënöllam. Diosnintsikwan alli kanapaq alläpa necesitanqantsik yachënintsik y tanteakïnintsikmi chaskintsik. Jina yanapamantsikmi yachakunqantsikmannö kawakunapaq, problëmakunaman mana ishkinapaq y llakikurlla kanantsikpa rantin o trukan Diospa kaqta puntaman churanapaq (Sal. 122:1-4).

¹⁶ Asamblëachö këkaqkunapa kushishqa këninmi imëpis masqa rikakun. 1946 watachö asamblea kanqampaq willakuyanqanmi kënö nirqan: “Alläpa kushikïpaqmi karqan atska waranqa cristiänokunata kushishqa tëkäyaqta rikëqa y masqa orquestawan tsëtsikaq nunakuna Jehoväpaq shumaq canticokunata cantëkaqta wiyëmi”. Jina nirqanmi: “Asamblëachö Yanapakïta Munaqkuna nishqanmanmi mëtsikaq  apuntakuyarqan asamblea rurakëchö cristiano mayinkunata kushishqa yanapayänampaq”. ¿Qampis tsënöllaku sientekurqunki jatun kaq asamblëaman o atska nacionkunapaq asamblëakunaman ëwarnin? (Sal. 110:3; Is. 42:10-12.)

17. ¿Unënöllaku kanan witsan asamblëakunaqa?

¹⁷ Kanan witsankuna asamblëakuna rurakänampaqqa wakinqa cambiashqam. Këllaman yarpärishun, Diosta wakin sirweqkunaqa yarpäyan puwaq junaqkunapa kanqantam. Qoyapa o tutapa, tardepa y paqaspam rurakaq. Jina tsë asamblëakunachöqa wayin wayimpis Diospita yachatsikuyaqmi. Wakin discursokunaqa qallaq nueve de la mañänam y casi llapan junaqkunam las nueve de la noche ushaq. Yanapakoqkunaqa alläpam trabajayaq desayünota, almuerzota y cënata asamblëaman ëwaqkunapaq alistarnin. Kanan witsan asamblëakunaqa manam unënönatsu duran y cada ünom mirkapankunata apakuyan, tsënöpam Diospa yachatsikïninta más wiyakuyan.

18, 19. ¿Imataq asamblëakunapita más gustashunki, y imanir?

¹⁸ Unëpita patsëmi asamblëakunaqa alläpa shuyarëpaq kayashqa. Profecïakunapita y Bibliapa yachatsikïninkunapita alleq entiendenapaq höranchö ‘mikïqa’, manam asamblëakunachö discursokunallatsu, sinöqa tsëkunachö mushoq publicacionkuna yarqamunqampis yanapamantsikmi (Mat. 24:45, NM). Tsë yachatsikïkunaqa yanapamantsik nunakunata rasumpa kaqta kuyayänampaq yanapanapaqmi. Jina drämakunaqa jövenkuna y mayorkuna imanö këkäyanqanta rikäyänampaq y kë mundopa makinman mana ishkiyänampaqmi yanapan. Y bautizakoqkunapaq discursonam llapantsikta yanapamantsik imakunata más precisaq churëkanqantsikta rikänapaq y wakinkunapis Jehoväta sirwiyänampaq bautizakoqkunata rikar kushikunapaq.

¹⁹ Asamblëakunaqa unëpita patsëmi Jehoväta adoranqantsikchö alläpa precisan. Sasa o aja tiempokunachö Jehoväta kuyayänampaqmi yanapakun. Jinamampis Diospa kaqchö más sinchi kanapaq, alli amïgokunata tarinapaq y entero Patsachö cristiano mayintsikta kuyanapaqmi yanapamantsik. Tsë asamblëakunawanmi bendecimanqantsikta y kuyamanqantsikta Jehová rikätsimantsik. Llapantsikchi imatapis puntallapitana patsätsishun asamblëachö llapan junaqkuna kanapaq y tsëchö yachatsikïkunata wiyakunapaq (Prov. 10:22).