JEHOVÄMI ‘Alli Yachatsimaqnintsik’ (Is. 30:20). Alläpa kuyakoq karmi ciëlochö y Patsachö sirweqninkunata yachatsin. Këllaman pensarishun, kuyakoq karmi “llapan ruranqanta [Jesusta] ricatsin” (Juan 5:20). Jina kuyakoq karmi pëta respetaqkunata y nuna mayinta yanapaq Testïgonkunata “yachaqkunapa qallunta” qomantsik (Is. 50:4).

Jehová kuyakoq kanqanta qatirninmi Jehoväpa Testïgonkunata Pushaqkunapa Yachakunapaq kaqta Rikaqkuna, chunka escuëlakunata patsätsishqa ëwëta munaqkunapaq y puëdeq kaqkunapaq. ¿Kë escuëlakunawan rikankiku Jehová kuyakoq kanqanta?

Diospa kaqchö kanan witsan kë escuëlakuna imanö rurakanqanta musyarinëkipaq y tsëkunaman ëwashqakuna ima niyanqanta leirinëkipaqmi invitariyaq. Tsëpita kënö tapukï: “¿Imakunatataq tarïman tsë escuëlakunaman ëwarqa?”.

“Cuyamaqnintsic” ‘Teyta Dios’ yachatsimanqantsikqa yanapamantsik alli kawakunapaq, problëmakunata altsanapaq y pëpita yachatsikurnin kushishqa kanapaqmi (2 Cor. 13:11). Punta cristiänokunatanömi noqantsiktapis yanapamantsik, Jesus mandakunqannö wakinkunata ‘yachatsinapaq pecunapis alli cäsucoq cayänanpaq’ (Mat. 28:20).

Tsë llapan escuëlakunaman ëwëta mana puëderpis, capaz jukllëllamampis ëwëta puëdeshwan. Jinamampis yachatsimanqantsikkunatam alli utilizashwan. Y tsë escuëlakunaman ëwashqa Jehoväpa sirweqninkunawan yachatsikoq yarqurqa, pëkunapitam yachakïta puëdentsik más alli yachatsikoq kanapaq.

Tsënö kaptinqa kënö tapukushun: “Tsë escuëlakunachö, ¿mëqanllachöpis këta puëdëko?”.

Jehoväpa sirweqninkunaqa kë escuëlakunaman ëwëta y tsëchö yachakïtaqa alläpam valorantsik. Tsë llapan yachatsiyäshunqëkikuna Diosman más wititsishunëkipaq y pëpa kaqchö rurënikikunata cumplinëkipaq, masqa alli willakïkunapita yachatsikïchö, yanapashunëkitam shuyaräyä.