“JESUSMAN creyicoqcunapa mandacoqnincuna Santiagu, Pedru y Juan” apostolkunam, 49 wata witsankuna Pablutawan Bernabëta niyarqan mana Israel kaqkunata Diospita yachëkätsir, waktsa cristiänokunata mana qonqayänampaq (Gal. 2:9, 10). ¿Imanötaq tsë cargonkunata cumpliyarqan?

Pablupa cartankunam rikätsikun tsëta imanö ruranqanta. Këllaman yarpärishun, Corinto markachö këkaq cristiänokunamanmi kënö nir qellqarqan: “Jerusalen marcacho Teyta Jesucristuman creyicoqcunapaq ofrendata elluyänequipaq caqtaqa ‘Elluyë Galacia probinsiacho quecar wauqintsiccunata’ mandanqänolla. Pecunata mandarmi queno nerqä: ‘Uryapucur ganayanqequimanno cada domingu waquinta raquiyanqui ofrendequicuna’ nir. Qamcunapis tseno rurayanqui noqa chäramuptï listullatana entregayämänequipaq. Tse elluyanqequi ofrendata Jerusalenman apar ewayänanpaq acrayë waquin wauqintsiccunata. Qamcuna caqman chëcamurnam, quiquï juc cartata rurashaq tse cartawan Jerusalencho creyicoqcuna shumaq chasquiyänanpaq” (1 Cor. 16:1-3).

Diosnintsik yanapaptin ishkë kaq cartan qellqanqanchönam yapë willarqan imanir ofrendata qoyänampaq mañëkanqanta, kënömi nirqan: “Cananchi qamcunapa quecayäpushunqui, pecunana pishipëcayan; ware warätinnam pecunapa cayäponqa, qamcunanam pishipëcayanqui. Tsenopam jucnintsic jucnintsic yanapanacur, iwallla bidata pasashun” (2 Cor. 8:12-15).

56 wata romänokunaman Pablu cartakunqan witsanqa, tsë qarëkunata ëlluyanqan o qoriyanqanqa ushakëkarqannam. Pablum nirqan: “Cananqa Jerusalenmanran ewashaq tse marcacho wauqintsiccunata y panintsiccunata yanapanäpaq. Porqui Macedonia y Acaya marcacunacho wauqintsiccunam y panintsiccunam llapan boluntaninwan qelleta elluyashqa Jesucristuman creyicoq Jerusalencho quecaq wactsa wauqicunapaq apatsiyämänanpaq” (Rom. 15:25, 26). Tsëpita ichik tiempollataran ofrendakunata ëllunampaq o qorinampaq churayanqan cargota usharishqa karqan, tsëtaqa nintsik Jerusalenman kutiriptin guardiakuna tsaririyaptin Römachö mandakoq Fëlixta kënö ninqampitam: “Wactsacunapaq qoyämanqan qelleta apamurnin y Diospaq qarenin aparcurnin[mi] [shamurqä]” (Hech. 24:17).

Macedoniachö këkaq cristiänokunapaq parlarmi Pablu këta nirqan: “Tse elluyanqan qelletam allapa rogayämarnï niyämarqon creyicoqcunaman apayänäpaq”. Punta cristiänokunaqa alläpa qarakoqmi kayarqan, tsëmi Corinto markachö këkaq cristiänokunapis tsënölla kayänampaq Pablu kënö nirqan: “Tsemi pipis shonqun sientenqanmanno ofrendecutsun, peru ama malasqa obligayëtsu qonanpaq, porqui Teyta Diosnintsicqa cuyan cushi cushilla ofrendaq nunatam”. ¿Imataq congregacionkunata yanapaq alläpa qarakoq kayänampaq? Munëninkunaqa manam cristiano mayinkunata pishipuyanqankunallachö yanapëtsu karqan, ‘sinoqa tse qareniquicunarecur Teyta Diosnintsicta atscaq nunacuna agradesicuyänanmi’ (2 Cor. 8:4; 9:7, 12). Noqantsikpis wakinkuna alli kayänampaqmi yarpachakushwan, tsëta ruranqantsikpita Jehová bendicimänapaq kaqman markäkurnin. Y Jehoväpa bendicionnimpitaqa, ¿imaraq nunata más rïcoyätsinman? (Prov. 10:22.)

Pablupa tiemponchönöllam, kanan witsampis wakinkunaqa qellëninkunata ‘raquiyan’ Yachatsikuyänan Wayichö “Obra mundial” nishqan cäjaman winayänampaq (1 Cor. 16:2). Congregacionkunaqa llapan killakunam tsëchö juntakanqan qellëta apatsiyan nacionninchö Diospita yachatsikïta rikaq Jehoväpa testïgonkunapa sucursalninman. Jina nacionnikichö Jehoväpa testïgonkuna ima jutipa reqishqa kayanqanmampis imata qoyta munanqëkitapis apatsinkimanmi; ima jutiwan reqishqa kayanqanta alleq musyëta munarqa, nacionnikichö këkaq sucursalman qellqari o qayakuri. Direccionninqa këkan www.pr418.com/contact nishqan päginachömi. Imanö yanapakunëkipaq kaqta këkunapita akrari.

MANA KUTITSIYÄNAMPAQ QOYANQAN

• Tsëkunaqa kayan qellë, aläjakuna o wakin alläpa väleq cösaskunam.

• Tsëkunata apatsirqa, juk cartatam ruranan tsë qonqan qellëta o cösaskunata kutitsiyänampaq kaqta mana shuyaranqanta nir.

KUTITSIYÄNAMPAQ QOYANQAN

• Tsënöqa qoyan necesitanqan hora qellëninta kutitsiyänampaqmi.

• Tsënö qorqa, juk cartatam rurayan tsë qoyanqan qellëta necesitanqan hora kutitsiyänampaq kaqta nir.

IMANÖ QONËKIPAQ KAQ

Qateqninchömi juk listata tarinki entero Patsachö yachatsikïta qellëwan y wakin alläpa väleq cösaskunawan yanapakurnimpis, juknöpapis yanapakunëkipaq. Mëqan ninqannöpis yanapakïta munarqa, nacionnikichö këkaq sucursalta tapukuri akranqëki kaqta imanö ruranëkipaq kaqta maslla musyarinëkipaq. Nacionkuna mañakuyanqan y tribütopaq leyninkuna jukläya kaptinmi, alläpa precisan tsë asuntochö musyaq profesionalkunapa yanapakïninta mañakunëki mëqan kaqtapis akrarinëkipaq.

Segürokuna. Këqa Asociación de los Testigos de Jehová jutiman segurakuyanqan o jubilakuyanqan qellëta pasëkïmi.

Bancochö qellë. Bancochö katsiyanqan qellëta, bancoman qellëta churayanqan documentokunata y jubilakuyanqan qellëtam testamentota rurëkur juk confianza nunapa (albaceapa) makinchö dejayan Asociación de los Testigos de Jehová jutiman pasatsinampaq, o manaqa, kikinkunam tsë conträtota rurayan wanukuptin llapan kapunqan Asociación de los Testigos de Jehová jutiman pasanampaq. Tsëqa bancopa leynin tsë nacionchö ninqannömi kanan.

Juk emprësachö kapamanqantsik. Tsëkunataqa, Asociación de los Testigos de Jehová jutimanmi ni ima condicionta mana churashpa qoykïta puëdiyan o wanuriyanqan hora tsë llapankuna tsë jutiman pasanampaq juk conträtota rurayan.

Chakrakuna o wayi. Puëdiyanmi qoykïta rantikuna kaq cösaskunata Asociación de los Testigos de Jehová jutiman, ima condicionta mana churashpa o kawayanqankamayaq tsëchö tärar tsë llapanta rikänampaq condicionta churarnin.

Testamentokuna y rurashqa acuerdokuna. Juk notariochö testamentota rurëkur o wanuriyaptin qellë o imapis kayäpunqankuna Asociación de los Testigos de Jehová jutiman pasanampaqmi juk contrato rurayan. Tsënö conträtokunata rurëqa yanapakunmanmi impuesto pagakuyanqan hora.

“Imanö qonëkipaq kaq” ninqannöpis, alliran yarpachakunan tsënö yanapakïta munaq nunaqa. Tsënö entero Patsachö yachatsikïta yanapakïta munaqkunapaqmi, Donaciones planificadas para favorecer el servicio del Reino en todo el mundo nishqan follëtota ingleschö y español idiömachö rurayämushqa. Tsë follëtom yanapakun qellëta imanö qonapaq kaqta o kapamanqantsikkunata imanöpis pasëkunapaq kaqta. Quizaspis tsë follëtochö ninqanqa llapantsu qampaqnö kanqa, porque leykunaqa cada nacionchömi jukläya kayan. Tsëmi tsë follëtota leirirqa tsë asuntopaq musyaq profesionalkunapa yanapakïninta mañakunëki. Mëtsikaq tsënö yanapakuyanqanwanmi entero Patsachö Diospa kaqchö y desgraciakuna kaptin rurapakïchö yanapakuyänäpaq yanapayämashqa, jina impuesto asuntokunachöpis masmi yanapakushqa. Nacionnikichö kë folleto kaptinqa, congregacionnikipa secretarionta mañakïta puëdinkim.

Këkunapaq masta musyëta munarqa, Betelman qellqari o qayakuri, këchömi direccionnin këkan.